Luqa 21

1Iḍkăl Ɣisa ḍarăt-a-wen asăwaḍ-net, inhăy kăl-ehăre tajjăn aẓrĕf wa tĕkkatăn dăɣ-ĕssĕndoqq wa n-tikutawen ihăn ehăn n-ămudd wa măqqărăn, 2inhăy daɣ tănuḍăft tiyyăt lăqqĕwăt har dd-tosa, tăstărăkkăt dăɣ-ĕssĕndoqq sănatăt tămmaten ĕbḍanen. 3Inhăy Ɣisa a-wen ɣas, inna: "Tidĕt-dăɣ a-s tănuḍăft-ta-dăɣ n-talăqqe, tojăr ăddinăt iket-năsăn ihuk, 4făl-a-s iket-năsăn, a-wa s-ăssakăyăn s-wăr-ămɣatărăn a ĕkfăn, a-s ija a-wen ĕnta, dăɣ-ĕllăqqu-net, a-wa tĕṭṭăf i-tămudre-net iket-net, a tĕkfa." 5Islă Ɣisa ḍarăt-a-wen i-ăddinăt iyyăḍ dăɣ-tamĕtte, tiimĕlĕn tihusay-ti ija ehăn n-ămudd wa măqqărăn, tiimĕlĕn daɣ a-wa t-ihăn d-tihun ti s-idăy d-a-wa s-idlăj măšan, inn'-asăn: 6"A-wa-dăɣ hannăyăm ăhusken, ĕlkamăn išilan dăɣ-wăr mad-dd-tăqqayĕm tăhunt tiyyăt ɣas warăt tamidit-net, ad-ăttăɣtăɣ iket-dăɣ-net." 7Ǝssĕstănăn-t, ĕnnăn-as: "Ălɣalim, ĕmme d-mad-ăj a-wen? Ǝkkĕs-anăɣ dăɣ-taɣdărt n-išmal wi-s-e-nĕlmĕd a-s sămdo, osă-dd." 8Inn'-asăn Ɣisa: "He kăwăneḍ, wăr kăwăn-išăšket ăwadĕm ed, ad-dd-asĕn ăddinăt ăjjootnen s-isĕm-in, ănn hak iyyăn dăɣ-săn: 'Năkk a-s Ălmasex!' meɣ ănn: 'Tăqqăn, tăwwăḍ!' wăr tošelăm ḍara-săn. 9Afăl tĕslăm i-isălan n-imjărăn d-tanăkra n-timĕttawen, wăr-ităggădet ĕnniyăt-năwăn; a-wen a ilan s-ad-ăj tĕzzar išrĕy-t-dd sămdo n-hărăt iket-net." 10Inn'-asăn daɣ ḍarăt-a-wen: "Ad-tĕknĕs tawset tamidit-net, iknĕs ĕddĕwĕl amidi-net, 11ad-iškĕḍkĕḍ ăkall dăɣ-idăggan ăjjootnen, ăj laẓ d-turhĕnnawen ăjjootnen, ĕzjărăn-dd hărătăn d-ijităn ăssuksăḍnen išĕnnawăn 12măšan, dat-ad-ăj a-wen-dăɣ, ad-tăttărmăsăm, tĕtwăɣĕzzĕbem, tăttălwăyăm s-ăššăreɣa dăɣ-ihănan n-ăddin wi n-kăl-Ălyăhud, tĕjjĕšăm tikărmuten, sĕrrĕwrĕwăn-awăn ăddinăt s-imănokalăn d-gĕfărăn dăɣ-tĕssĕba n-isĕm-in wa kăwăn-iwarăn, 13ad-hawăn-umas a-wen ĕssĕbab făl tămoosăm tijuhawen-in. 14Wăr tăšăwwašnet ulhawăn-năwăn dăɣ-isălan n-a-wa mad-tĕnnĕm 15făl-a-s, ad-kăwăn-ăkfăɣ ăllifaẓ d-sărho dăɣ-măjrăd s-wăr t-illa ašănjo-năwăn ăddoben tebădde data-wăn, wăla asĕbbĕggu-năwăn. 16Ad-kăwăn-sĕttărmĕsăn imărawăn-năwăn, d-ayĕtma-wăn, d-išăqqaɣăn-năwăn, d-imidiwăn-năwăn, sĕssănɣĕn kĕrĕf iyyăḍ dăɣ-wăn, 17ad-dăr-wăn akĕḍăn ăddinăt iket-năsăn dăɣ-tĕssĕba n-isĕm-in wa kăwăn-iwarăn 18măšan, wăr hin-e-iba wăla emẓăd n-eɣăf-năwăn iyyăn ɣas. 19Ere wa ăkoyădăn dăɣ-alkum-hahi dăɣ-immun-net har ašăl wa d-imda a-wen-dăɣ iket-net, ad-iɣlĕs." 20"Afăl tĕnhăyăm Yărussălam a-s tăt-dd-ăɣlăyɣălăyăn ĕlɣĕskărăn, ĕlmĕdăt a-s ĕlhĕllak-net, ohăẓ-dd. 21Dihen, wi ĕzzăɣnen teje ta n-Ălyăhudĕyăt, jawăḍnet dăɣ-azzal s-ašrut wa n-iḍaɣăn; wi ĕzzăɣnen aɣrĕm wa n-Yărussălam, ĕzjărnet-t; wi ĕzzăɣnen ăroj-net, wăr dd-tăjjăšnet aɣrĕm 22făl-a-s, išilan-en, išilan n-ukĕs n-eɣa dăɣ-mad-ăj a-wa ĕnnăn ĕlkĕttabăn n-Măssinăɣ iket-net. 23Timĕskay tiḍeḍen-ti irmăs a-wen-dăɣ lanăt ĕnniyăt meɣ siḍuḍnăt, făl-a-s, ad-tăj tiẓẓurt măqqoorăt făll-ăkall, iḍĕw aḍkăr n-Măssinăɣ făll-tamĕtte-ta-dăɣ. 24Aɣil-net iyyăn, ad-t-tăkš tăkoba, aɣil wa iyyăḍăn, ad-ăkkălăt dăɣ-ikallăn wi iyyăḍnen, ad-ĕddĕšnăt tiwsaten wăren ămoos ti n-Ălyăhud, Yărussălam hundăɣ har akĕy ăzzăman-năsnăt." 25"Ad-ăj hărăt dăɣ-tăfukt d-ewăr d-etran, ĕjĕnăt tirĕmmaɣ dăɣ-tiwsaten ti wărnen ărori n-ăkall dăɣ-tĕssĕba n-emăsli-i-dăɣ ăssuksăḍăn he-ikkĕs ejărew wa sĕmmăn d-tinăzzămăren-net. 26Ăddinăt iyyăḍ, ad-tăn-tănɣ tarĕmmeɣt n-a-wa hannăyăn itajj făll-ăkall ed, wăla imĕṣṣuha wi hănen išĕnnawăn, ad-ĕnhĕynĕhĕyăn. 27Ălwăqq-wen-dăɣ, ad-e-ĕnhĕyăn ăddinăt Ăgg-ăgg-adĕm imal-dd, inay tijărăken, tĕlkam-as tărna-net d-ălxurmăt-net. 28Afăl ĕssĕntăn hărătăn-win-dăɣ iji, ĕbdĕdăt, tĕḍkĕlăm iɣăfawăn-năwăn făl-a-s, ĕlɣĕllas-năwăn, ohăẓ-dd." 29Issăɣlăy-tăn Ɣisa ḍarăt-a-wen tangalt tiyyăt, inn'-asăn: "Sĕjrăhăt dăɣ-ašar d-ihĕškan wi iyyăḍnen; 30wădden e-d, tăn-tĕnhăyăm a-s dd-ĕnšărăn, ad-tĕlmĕdăm d-iman-năwăn a-s os'-iwăn akăsa. 31Ǝmmĕk-wen-dăɣ daɣ a-s afăl tĕnhăyăm hărătăn-win-dăɣ s-hawăn-ĕnneɣ har ĕqqălăn iji, adiš ĕlmĕdăt a-s Tĕmmĕnĕya n-Măssinăɣ, tohăẓ-dd. 32Ăsidătteɣ-awăn a-s wăr-e takĕy ĕzzurĕyăt-ta-dăɣ wăr jen hărătăn-win-dăɣ s-hawăn-ĕnneɣ iket-dăɣ-năsăn. 33Ojăr tărăɣse ija ad-ib'-išĕnnawăn d-ăkall uhĕn ad-iba tĕnna-nin. 34Ăjăt ĕnniyăt i-iman-năwăn, wăr ẓăẓayet tesăse n-asmĕd d-ĕlxĕmăr d-inĕzjam n-ăddunya ulhawăn-năwăn, wăr toyyem ašăl-en-dăɣ oḍa-dd fălla-wăn 35šund tătart făl-a-s ašăl-en, ad-dd-iḍĕw făll-ăddinăt wi wărnen ărori n-ăkall iket-dăɣ-năsăn. 36Ɣas, ɣaymăt jam ĕnniyăt, tăɣbadăm Măssinăɣ s-ălwăqq iket-net i-ad-tăɣlĕsăm dăɣ-a-wa dd-imalăn, tudabem daɣ tebădde dat-Ăgg-ăgg-adĕm." 37Itajj Ɣisa ašăl iket-net isaɣra dăɣ-ehăn n-ămudd wa măqqărăn măšan, e-d t-ija ehăḍ, ad-adĕw taḍaɣt ta n-ĕzzăytun; 38e-d ăffăw, ad-dd-tĕnšĕy tamĕtte iket-net ehăn n-ămudd wa măqqărăn i-ad-has-sĕjĕd.

will be added

X\