Luqa 20

1Ašăl iyyăn, isaɣra Ɣisa dăɣ-ehăn n-ămudd wa măqqărăn, ixaṭṭăb i-ăddinăt isălan n-Ălĕnžil a-s t-dd-osăn kăl-tikutawen d-ălɣulam n-Ăṭṭăwrăt d-inušămăn n-Iṣrayil, 2ĕnnăn-as: "Lăɣăt-anăɣ, mi kay-ikfăn turhajăt n-amišĕl n-tikunen-ti-dăɣ, meɣ daɣ mi kăy-ikfăn tărna-ta-dăɣ s-tăjjăd a-wa tăjjăd?" 3Inn'-asăn: "Ad-hawăn-ăjăɣ năkk-dăɣ asĕstan iyyăn, ămăra, lăɣătăt-ahi: 4Mi dd-ăšmašălăn Exya wa n-Enĕsselmăɣ i-ad-isĕlmăɣ ăddinăt dăɣ-aman? Ak Măssinăɣ a t-dd-ăšmašălăn meɣ dăgg-adĕm ɣas?" 5Ănmăkkăsăn s-takše, ad-jannen: "Afăl has-nĕnna: 'Măssinăɣ a t-dd-ăšmašălăn', ad-hanăɣ-ănn: 'Adiš, mafăl wăr tomenăm s-a-wa hawăn-inna.' 6Afăl has-nĕnna dăgg-adĕm ɣas a t-dd-ăšmašălnen, ad-hanăɣ-tăkf tamĕtte iket-net sămmăjori n-tihun ed tĕkkas iket-net ăššăk a-s Exya ănnăbi n-Măssinăɣ a ămoos." 7Ǝqqălăn-dd, ĕnnăn-as wăr ĕssenăn ere t-dd-ăšmašălăn. 8Inn'-asăn Ɣisa: "Adiš năkk-dăɣ, wăr hawăn-e-ăllăɣeɣ ere wa hi-ikfăn tărna ta s-tăjjăɣ a-wa tăjjăɣ." 9Issăɣlăy-tăn-dd Ɣisa ḍarăt-a-wen tangalt dăɣ-hasăn-innă: "Kăla ăddomăt ăhalĕs iyyăn ašĕkrĕš n-lăɣnăb, ifăr-t i-inĕsduma iyyăḍ tĕzzar, ikk' ăkall iyyăn dăɣ-hin-ăhoja. 10Tăwwăḍ-dd tăqqăn n-amili n-ašĕkrĕš ɣas, ăšmašăl-dd săr-săn ănaxdim i-ad-has-dd-awĕy ɣur-săn folăt-net dăɣ-a-wa dd-orăw ašĕkrĕš. Osă-dd inĕsduma wi fărnen ašĕkrĕš, ĕḍnăyăn-t tiwit tĕzzar, ĕssĕglăn-t korăyrăy. 11Olăs-dd săr-săn ašĕmmišĕl n-ănaxdim iyyăn daɣ, jăn dăɣ-s ĕnta-dăɣ tiwit, ăsmăḍrăyăn-t, ĕssĕglăn-t korăyrăy. 12Ăšmašăl-dd săr-săn daɣ wa s-kăraḍ, ĕnta, ăsbayăsăn-t tĕzzar, ĕntăjăn-t-in korăyrăy. 13Innă măssi-s n-ašĕkrĕš ḍarăt-a-wen: 'Ǝndek ăddăbara ămăra? Wăr hin-ăqqima ɣas ar ad-săr-săn šĕmmišĕlăɣ rure-ɣ wa ĕkneɣ tărha, ĕnta ya, ănihăjja s-ad-t-sĕmɣărăn.' 14Ǝnhăyăn inaxdimăn rure-s n-măssi-s n-ašĕkrĕš imal-dd ɣas, ănmănnăn jer-iman-năsăn: 'Ǝnhĕywăt-ak, amăkkasu-net, nărmĕset-t, năjet iman-net, dihen ad-tumas tăkasit ti-nănăɣ'. 15Ărmăsăn-t, ĕzjărăn dăr-s ašĕkrĕš, ănɣăn-t kĕrĕf." Inn'-asăn Ɣisa: "Ma tordam, wi-dăɣ inaxdimăn, ma hasăn-mad-ăj măssi-s n-ašĕkrĕš? 16Ǝḍmanăɣ-awăn a-s ămăra, ad-tăn-dd-ass ĕnta iman-net, ilhĕs-tăn iket-dăɣ-năsăn, alĕs tefert n-ašĕkrĕš-net i-iyyăḍ." Ǝslăn, ăddinăt i-a-wen ɣas, ĕnnăn: "Assĕkăḍ ăkall!" 17Issăɣlăy-tăn-dd akăyad-net, inn'-asăn: "Adiš mafăl ătiwănna dăɣ-ĕlkĕttab n-Măssinăɣ a-s: 'Tăhunt ta hin-jărăn ălbănnatăn s-ĕnnăn wăr tĕnfa hărăt, ĕnta a-s a-s tĕšrăy tanfust, tămoos tăhunt ta n-aɣmăr tufăt, hakkăt ăṣṣahăt ehăn; 18tăhunt-ta-hi, ere fălla-s oḍăn, ad-ărrăẓrăẓ; ere făll-toḍa daɣ, ad-ilkĕẓ.' " 19Inn'-asăn Ɣisa a-wen ɣas, ĕttărăn ălɣulam n-Ăṭṭăwrăt d-imănokalăn n-kăl-tikutawen ĕmmĕk s-t-ăstărmăsăn ălwăqq-wen-dăɣ ed, ĕssanăn a-s ĕntăneḍ-en-dăɣ, a ăssiiɣlăy tangalt-ta-dăɣ măšan, wăr jen a-wen ed, ăksuḍăn tamĕtte. 20Jăn-as ḍarăt-a-wen ĕnniyăt dăɣ-ijĕj, ăšmašălăn-dd săr-s inaramăn janen iman-năsăn ălmăt ăddinăt oɣadnen i-ad-t-sĕwwĕnnĕn a-wărăn itĕtwĕnn, ĕjĕn-t dăɣ-ifassăn n-gĕfăr d-ĕlxĕkum-net. 21Osăn-t-dd, ĕnnăn-as: "Ălɣalim, nĕssan a-s a-wa jănned d-a-wa săɣred iket-net, oɣad; wăr tăẓmăẓlăyăd ăddinăt ed tabarăt ta n-Măssinăɣ ɣas a saɣred. 22Ămăra, năssistăn-kăy: ak iwar-anăɣ ad-nĕẓĕl tiwse i-Qăyṣăr wa n-ămănokal măqqărăn meɣ?" 23Ilmăd Ɣisa ɣur-iman-net amsud wa t-illăn ḍarăt asĕstan wa has-jăn, inn'-asăn 24"Săkĕnăt-ahi-dd ărriyal, tăllăɣem-ahi ere wa ilăn ăṭṭăṣwer d-isĕm wa t-iwărăn?" Ǝnnăn-as: "I n-ămănokal Qăyṣăr." 25Inn'-asăn: "Adiš, suɣĕlăt i-Qăyṣăr a-wa fălla-wăn ila, tĕkfĕm daɣ Măssinăɣ a-wa fălla-wăn ila." 26Indăr-asăn făw a t-sĕwwĕnnĕn erk măjrăd dat-tamĕtte, ĕqqălăn-dd ɣas tof'-en tăkunt n-ălwižab wa hasăn-ija, ăssosămăn. 27Os'-e-hi-dd ḍarăt-a-wen hărăt dăɣ-kăl-taggayt ta n-kăl-sadus-i jănnănen a-s wăr tĕlkem tanăkra jer-inĕmmuttan, afăl ăba ăwadĕm, ĕmdăn isălan-net. 28Ǝssĕstănăn-t, ĕnnăn-as: "Ălɣalim, inn'-anăɣ ănnăbi Mosa: 'Afăl ădobăn ăhalĕs, ăba-t wăr oher ara d-hănne-s, idubĕnet-tăt ă/n/na-s i-ad-ikrĕš ĕzzurĕyăt i-ă/n/na-s wa ăba i-ad-wăr hin-itilĕm isĕm n-wa ăba făll-ărori n-ăkall.' 29Ămăra, ĕkkĕs-anăɣ dăɣ-tăqqăn n-eɣăf: Kăla t-ĕllăn ĕssa ă/n/natăn, ădobăn dăɣ-săn wa n-amăqqar măšan, ăba-t wăr-ikreš ara, 30išrăy-t wa s-ĕssin s-adubĕn n-hănne-s, 31ilkăm-as daɣ wa s-kăraḍ măšan, wăr tăn-iha i dăr-s oharăn ara; ădobănăn-tăt ĕssa-essăn, ăba-tăn daɣ iket-năsăn, wăr t-illa i dăr-s oharăn ara. 32Ăba daɣ ḍara-săn tamăḍt. 33Năssiistăn-kăy: ašăl wa n-tanăkra jer-inĕmmuttan, ĕndek dăɣ-săn wa s-e-tumas hănne-s ed, ĕnhayăn-tăt adubĕn ĕssa-essăn?" 34Inn'-asăn Ɣisa: "Dăɣ-ăddunya-ta-dăɣ, tidubunăn meddĕn, tidubunnăt tiḍeḍen 35măšan, ăddinăt wi ikfa Măssinăɣ turhajăt n-ad-dd-ĕnkărăn jer-inĕmmuttan i-ad-ĕjjĕšăn ălžănnăt, jer-wi n-meddĕn wăla tiḍeḍen, ad-ăbas ămiɣatărăn s-adubĕn, 36ed ăbas dăɣ-săn tĕlkam tamăttant, ad-alăhăn d-ănjălosăn, umasăn aratăn n-Măssinăɣ ed, ĕnkărăn-dd jer-inĕmmuttan. 37Dăɣ-a-wa dd-iqqălăn isălan n-tanăkra jer-inĕmmuttan, issĕtbăt-tăn ănnăbi Mosa ed, ašăl wa t-iɣră Emăli dăɣ-tabsăɣt ta tăhjăljălăt wăr răqq, iɣr'-e Mosa s-isĕm: Măssinăɣ n-Ibrahim d-Isxaqq d-Yaqub. 38A-wen, ălmăɣna-net a-s, ăddinăt-win-dăɣ, han ălžănnăt, tiimĕlĕn Măssinăɣ; ĕnnăr wăr ĕdderăn wăr tĕjjĕn a-wen. Măssinăɣ, wădden inĕmmuttan a-s ămoos Măssinăɣ, ămoos-t i-wi ĕddărnen ed data-s, ĕddarăn iket-dăɣ-năsăn." 39Immĕjrăd hărăt dăɣ-ălɣulam n-Ăṭṭăwrăt ḍarăt-a-wen i-Ɣisa, ĕnnăn-as: "Ălɣalim, edăwănne-năk, ikna." 40Ăbas t-illa ḍarăt-a-wen ere ihălăn asĕstan-net. 41Issĕstăn-tăn Ɣisa ḍarăt-a-wen, inn'-asăn: "Ma isawănnen ăddinăt a-s Ălmasex, rure-s n-Dawĕd? 42Ajăn wădden Dawĕd iman-net inna fălla-s dăɣ-ĕlkĕttab wa n-Ăẓẓăbur: 'Inna Emăli i-Emăli-nin, ɣayĕm daw-aɣil-in, 43hundăɣ hăr ăjăɣ išĕnja-năk daw-iḍarăn-năk.' 44Ɣas kunta Dawĕd iman-net iɣarr Ălmasex s-isĕm 'Emăli', ĕndek ĕmmĕk wa s-ăddobăt ad-umas rure-s?" 45Innă Ɣisa ḍarăt-a-wen i-inĕṭṭulab-net dat-tamĕtte ta has-tăsijădăt: 46"Agĕẓăt iman-năwăn dăɣ-ălɣulam n-Ăṭṭăwrăt, ijraẓ-asăn ad-tikĕlĕn timukal dăɣ-isĕlsa ăhobătnen, ijraẓ-asăn ad-hasăn-tajjăn ăddinăt isofan dăɣ-tišarriten, ărhan tisăqqima ti ănnuflăynen dăɣ-ihănan n-ăddin wi n-kăl-Ălyăhud d-atwĕsĕmɣar dăɣ-imjora, 47saknen a-s hărkuk tumadăn, a-s ija a-wen, tihăɣăn a-wa ihăn ifassăn n-tinuḍăfen, ilkam dăɣ-săn ăššăreɣa sĕmmăn."

will be added

X\