Luqa 2

1Ăzzăman wa d-ăsiṭăbăl Qăyṣăr Ojărtăn e d t-illăm ămănokal, omăr s-ad-tiḍan tamĕtte făll-ărori n-ăkall. 2Tăḍint-ten-dăɣ tăzzarăt, tĕja dăɣ-ăzzăman wa d-ămoos Kirĕnyus gĕfăr n-teje ta n-Surya. 3Dăɣ-tĕssĕba n-a-wen-dăɣ inn' ămănokal wa măqqărăn, a făl hak ăwadĕm, iqqăl taɣrĕmt-ta dăɣ-iwa i-ad-iḍan. 4Ifăl-dd Yusĕf taɣrĕmt ta n-Năṣirăt hăt teje ta n-Galila, ikkă taɣrĕmt n-amɣar-net Dawĕd ta s-itawănna Bătlehăm hăt teje ta n-Ălyăhudĕyăt, ed ahăya n-Dawĕd a ămoos, 5i-ad-iḍan ĕnta d-Măryăma ta n-tămutărt-net-i s-a-s ităjj a-wen-dăɣ, la ĕnniyăt. 6Han taɣrĕmt-ten-dăɣ, a-s dd-tosa tăqqăn ta dăɣ-jarrăw Măryăma eɣăf-net. 7Tĕjrăw eɣăf-net, tĕkrăš teɣăfădde-net, tĕttăl-t dăɣ-ikăršăyăn, tĕssĕns'-e dăɣ-efăyd făl-a-s, ehăn wa n-imăjarăn, ăbas t-iha edăgg. 8Ăkall-en, han-t imăḍanăn ăssinbărnen irĕzzejăn-năsăn dăɣ-isalwan illa-hin i-aɣrĕm sihen. 9A ĕnḍărrăn, ibdăd-dd ănjălos n-Măssinăɣ data-săn, ăsmălăwlăw-dd ălxurmăt n-Emăli edăgg wa hăn, ĕknăn-dăɣ tarĕmmeɣt 10măšan, inn'-asăn ănjălos: "Wăr tărmeɣăm, ĕnhĕywăt, ăwwayăɣ-awăn isălan n-ălxer maden-umas ĕssĕbab n-tedăwit i-tamĕtte iket-dăɣ-net. 11Ašăl-i, iw'-awăn Ămaɣlas dăɣ-taɣrĕmt ta n-ămănokal Dawĕd, ĕnta a-s Ălmasex n-Emăli. 12Ǝnta da a-wa s-t-mad-tĕzzĕyăm: ad-tĕnhĕyăm ara s-iket iwa, ittal dăɣ-ikăršăyăn, insa dăɣ-efăyd." 13Diha-dăɣ d-issĕmdă ănjălos tĕnna n-a-wen-dăɣ, ad-dd-ăddew abrĕk n-ănjălosăn timĕlnen Măssinăɣ, jannen: 14"Tĕmmal i-Măssinăɣ dăɣ-išĕnnawăn, ălxer ija făll-ărori n-ăkall i-ăddinăt-wi făll-tĕnsa tărha-net." 15Ǝqqălăn ănjălosăn išĕnnawăn ɣas, ănmănnăn imăḍanăn: "Adiš, năkket Bătlehăm i-ad-nĕnhĕy a-wa ijăn d-a-wa hanăɣ-issĕlmăd Emăli." 16Ăšwănken ălwăqq-wen-dăɣ, ogăẓăn-in dihen Măryăma d-Yusĕf d-ara wa s-iket iwa, insa dăɣ-efăyd. 17Ǝnhăyăn-t imăḍanăn ɣas, ăssoɣălăn i-ăddinăt a-wa hasăn-ătwănnăn făll-ara wa ĕnḍărrăn. 18Ăkunăn ăddinăt iket-năsăn wi ĕslănen i-a-wa ĕnnăn imăḍanăn 19măšan, Măryăma-i n-ma-s n-alyaḍ, tĕṭṭăf isălan-win-dăɣ iket-năsăn dăɣ-iman-net, simĕktĕw-tăn dăɣ-ulh-net i-ad-tĕlmĕd ălmăɣna-năsăn. 20Ǝqqălăn imăḍanăn ḍarăt-a-wen, ad-samɣarăn Măssinăɣ, tiimĕlĕn-t făl tĕssĕba n-a-wa ĕslăn d-a-wa ĕnhăyăn s-ĕmmĕk-wa-dăɣ s-hasăn-ătwănna. 21Ikrăš ara ĕttam išilan ɣas, ămelăy, jăn-as isĕm Ɣisa, isĕm wa s-hasăn-innă ănjălos ad-has-t-ĕjĕn hărwa wăr-iwa. 22Dăɣ-isălan n-a-wa tĕnna Ăṭṭăwrăt ta n-Mosa, ăddew Yusĕf d-Măryăma s-ehăn n-ămudd wa măqqărăn ihăn Yărussălam i-ad-šĕšdĕjăn iman-năsăn, ăwwăyăn daɣ ara i-ad-t-săɣlĕfăn tărna n-Emăli 23făl-a-s, iktab dăɣ-alămăr n-Emăli a-s: "Alyaḍ n-eyy wa n-teɣăfădde, umaset emĕššeddĕj n-Măssinăɣ." 24Dăɣ-isălan n-ašĕšdaj n-iman-năsăn, lan s-ad-ĕjĕn takute n-sănatăt tidăberen dăɣ-ti n-ăroj meɣ daɣ sănatăt măllolnen dăɣ-ti n-aɣrĕm ed, a-wen-dăɣ a iktabăn dăɣ-alămăr n-Emăli. 25A ĕnḍărrăn ăhalĕs iyyăn da-dăɣ izzaɣăn Yărussălam s-isĕm-net Šămɣun. A ija a-wa-dăɣ, ijar ăṭṭăma n-ĕlɣĕllas wa s-inna Măssinăɣ i-Iṣrayil, ăssinsa daɣ Măssinăɣ Unfas Šăddijăn fălla-s. 26Ăru d-has-dd-ănfalăl Măssinăɣ dăɣ-tăharjit, ijjăš-as ărkăwăl s-tărna n-Unfas Šăddijăn n-a-s wăr mad-ămmăt wăr-inhey Ălmasex n-Emăli. 27Ašăl-en-dăɣ, imhăl-t-dd Unfas Šăddijăn s-ehăn n-ămudd wa măqqărăn i-ad-imzĕyyĕt d-imărawăn n-Ɣisa ălwăqq wa d-tajjăn a-wa fălla-săn irha ălɣadăt dăɣ-isălan wi n-ihuk-net i-Măssinăɣ. 28Irmăs-t-dd Šămɣun dăɣ-ifassăn-năsăn, ad-itimĕl Măssinăɣ, ijanna: 29"Emăli! Ămăra, ărmĕs unfas dăɣ-akli-năk i-ad-igĕl dăɣ-ălxer ed, a-wa s-has-tĕnned, ijă. 30Ăjjunfănăt tiṭṭawen-in dăɣ-ĕlɣĕllas-năk 31wa dd-tăsmăjned i-ăddunya iket-dăɣ-net. 32Ǝlɣĕllas wa s-ĕnta a-s ănnur i-inĕẓẓulam i-ad-hasăn-dd-tĕnfilĕlĕd, ămoos ălxurmăt-năk i-kăl-Iṣrayil-i n-tamĕtte-năk." 33Iqqăl-dd ti-s d-ma-s ɣas tof'-en tăkunt n-a-wa itawănnen făll-alyaḍ-i-dăɣ. 34Ittăr Šămɣun ḍarăt-a-wen a dăɣ-săn ijăn ălbăraka tĕzzar, innă i-Măryăma-i n-ma-s: "Alyaḍ-i, ĕnhĕy, ăsnăfrăn-t Măssinăɣ i-ad-umas tebădde d-ejăḍăl i-kăl-Iṣrayil, umas daɣ ĕssĕbab n-tamɣĕnnant i-ăddinăt ăjjootnen. 35Dăɣ-tĕssĕba-net, ad-dd-iffukkăr a-wa ihăn ulhawăn n-ăddinăt ăjjootnen. Kămm daɣ, ad-ham-umas ĕssĕbab n-uɣšad n-iman olăhăn d-tidij n-tăkoba." 36Ăzzăman-en, tĕll'-ee tănnăbit tĕknat tušăre la tawset ta n-dăgg-Ašir s-isĕm-net Hănnătu wălăt Fanwăl. Dăɣ-tĕmmăḍrit-net, kăla tăt-iḍăs adubĕn dăɣ-tĕja ĕssa iwĕtyan, 37ăb' ăhalĕs-net ɣas, tăqqiimă-dd, wăr toles adubĕn, la ămăra-dăɣ a iwwăḍăn ĕttamăt timĕrwen n-awătay d-ĕkkoẓ. A ija a-wen-dăɣ, kăla wăr fel ehăn n-ămudd wa măqqărăn, ehăḍ d-ašăl ɣabbăd Măssinăɣ, tăxdam-as, tuẓam. 38Ăssaɣăt-wen-dăɣ ad-dd-tosa ĕnta-dăɣ, ad-tiimĕl Măssinăɣ, tajj isălan n-Ɣisa i-ăddinăt iket-năsăn wi jărnen ăṭṭăma n-ad-dd-izĕzzubbĕt Măssinăɣ tădarfit-net făll-Yărussălam. 39Ǝssĕmdăn imărawăn n-Ɣisa a-wa fălla-săn ifrăḍ alămăr n-Emăli ɣas, ĕqqălăn taɣrĕmt-năsăn Năṣirăt, dăɣ-teje ta n-Galila. 40Idaggăl Ɣisa, itiṣuhut, itĕggar-t sărho dăɣ-isălan n-a-wa irha Măssinăɣ făll-ăgg-adĕm, ikna daɣ fălla-s Măssinăɣ asĕns n-ănnuɣmăt-net. 41Hak awătay, ĕkkan imărawăn n-Ɣisa Yărussălam i-ămudd wa n-Faṣka. 42Ikrăš Ɣisa măraw iwĕtyan d-ĕssin ɣas, ăddewăn dăr-s ed, a-wen-dăɣ, a innă ălɣadăt n-ămudd. 43Ăssakăyăn ămudd dihen ɣas, ĕqqălăn ihănan-năsăn măšan, ăqqiima-hin Ɣisa ḍara-săn dăɣ-Yărussălam. Wăr t-oḍenăn hundăɣ har hin-ĕjrăhăn a-s wăr dăr-săn ăddew. 44Ǝjăn ašăl imdan n-asikĕl ija ɣur-săn a-s ăddew d-imĕssukal-wi iyyăḍnen dăr-săn ohărnen tabarăt, ĕjrăhăn-in a-s wăr dăr-săn ăddew ɣas, ĕqqălăn dăɣ-adăriš-năsăn, ad-has-tammăɣăn ɣur-išăqqaɣăn-năsăn d-imuzăyăn-năsăn 45măšan, ăba-hasăn-t hundăɣ har hin-ĕwwăḍăn Yărussălam. 46Šămad okayăn kăraḍ išilan ad-t-ĕjrăwăn ăniɣăyma dăɣ-ehăn n-ămudd wa măqqărăn d-ălɣulam n-Ăṭṭăwrăt, ăsijăd-asăn tafăssarăn ĕlkĕttabăn n-Măssinăɣ, isastan-tăn. 47Ăkunăn ăddinăt iket-dăɣ-năsăn wi sallănen i-a-wa ijănna dăɣ-tayĕtte-net d-ălwižabăn-net. 48Ălwăqq wa d-t-ĕnhăyăn imărawăn-net dihen, ăqqănăn iɣăfawăn-năsăn, tĕnn'-as ma-s: "Alyaḍ-in, ma ămoos a-wa hanăɣ-jed? A ija a-wa-dăɣ, nĕtammăɣ-ak năkk d-abba-năk ed năɣel asujjĕl a jed." 49Inn'-asăn: "Mafăl hi-tammăɣăm, ajăn wăr tĕssenăm a-s leɣ s-ad-hi-ĕšlĕwăn ĕššăɣĕlăn n-Abba-nin dăɣ-ehăn-net?" 50Wăr t-illa a ĕjrahăn dăɣ-a-wa hasăn-innă. 51Ăddew dăr-săn ḍarăt-a-wen s-Năṣirăt, ăqqim isajăd i-a-wa has-jannen. Tĕṭṭaf anna-net hărătăn-winnin-dăɣ, wăr tăn-iha-i hin-tatăwa. 52Idaggăl Ɣisa dăɣ-eɣăs-net, itisărhut, ijraẓ i-Măssinăɣ hakd dăgg-adĕm.

will be added

X\