Luqa 19

1Ijjăš Ɣisa aɣrĕm wa n-Žărriko, ăllil-t. 2A ĕnḍărrăn ăhalĕs n-amărrĕzăɣ n-ămănokal n-inarmasăn n-tiwse s-isĕm-net Zakĕyyu da-dăɣ, 3itattăr ĕmmĕk s-inhăy Ɣisa afăl okăy măšan, tĕnjăr-as-t tamĕtte ed, i jĕzzĕlăn. 4Ošăl, ăzzar i-tamĕtte, iwwăn ahĕšk s-isĕm-net sikamur i-ad-isĕnnĕflĕy dăɣ-Ɣisa, afăl ikka dawa-s. 5Iwwăḍ-dd Ɣisa dihen ɣas, iḍkăl asăwaḍ-net, inn'-as: "Zakĕyyu! Zubbĕt-dd šik, ašăl-i, ămijareɣ-ak." 6Ăzzubbăt-dd Zakĕyyu šik, ăsmăjarăt Ɣisa dăɣ-tedăwit. 7Ǝnhăyăn ăddinăt a-wen ɣas, ad-simtĕktikăn, jannen: "A-wa, ăbă-has ere ɣur-ăzzubbăt ar anăsbăkkaḍ-wa-dăɣ." 8Ibdăd Zakĕyyu dat-Ălɣalim Ɣisa, inn'-as: "Ălɣalim, hakkăɣ tilăqqiwen tăẓune n-ehăre-nin, kunta daɣ ill'-e ere s-kăla dăɣ-s ohăɣăɣ ehăre-net, siɣulăɣ-as-t ija ĕkkoẓ inĕḍfusăn." 9Innă Ɣisa ălwăqq-wen-dăɣ dăɣ-isălan n-Zakĕyyu: "Ašăl-i-dăɣ, ehăn-wa-dăɣ, ijjăš-t-dd ĕlɣĕllas, ed ăhalĕs-i-dăɣ, ĕnta-dăɣ ahăya n-ănnăbi Ibrahim a ămoos 10făl-a-s, Ăgg-ăgg-adĕm, osă-dd, immaɣ i-ăddinăt-wi ăssujjălnen i-ad-tăn-iɣlĕs." 11Ǝnhăyăn ăddinăt Ɣisa d-inĕṭṭulab-net han attayăn n-Yărussălam ɣas, ăɣelăn ălwăqq wa d-fălla-săn dd-mad-tĕzzubbĕt Tĕmmĕnĕya n-Măssinăɣ, iwwăḍ-dd. Tĕssĕba n-a-wen-dăɣ a făl issăɣlăy Ɣisa tangalt-ta-dăɣ i-wi has-ăsijădnen, 12inn'-asăn: "Kăla ikk' ăhalĕs n-ăgg-ehăn ăkall ujĕjăn i-ad-dăɣ-s dd-ijrĕw tĕmmĕnukĕla, iqqĕl-dd. 13Ăssawăḍ tekle ɣas, iɣră-dd măraw dăɣ-inaxdimăn-net, hak iyyăn dăɣ-săn, ikf'-e ablăɣ n-orăɣ tĕzzar, inn'-asăn: 'Ăxdĕmăt s-orăɣ-i-dăɣ iket-di dd-taqqălăɣ.' 14Măšan, făl mikḍaw-i-dăɣ dăr-s ĕjăn kăl-ăkall-net, oyyăn-t har iglă tĕzzar, ĕssĕlkămăn-as ălžămaɣăt ăšimašălăn s-ămănokal wa măqqărăn ikka i-ad-has-ĕnnĕn: 'Ăhalĕs-di, wăr nărha ad-fălla-năɣ imnukĕl.' 15Hakd a-wen-dăɣ, ijrăw-dd tĕmmĕnukĕla, iqqăl-dd ăkall-net; osă-dd ɣas, iɣră-dd inaxdimăn-net winnin ikfa orăɣ i-ad-ilmĕd a-wa ărbăxăn dăɣ-mamăla-năsăn. 16Os'-e-hi-dd wa ăzzarăn, inn'-as: 'Măssi-ɣ, ablăɣ-năk, ărbăxăɣ fălla-s măraw iyyăḍ.' 17Inn'-as măssi-s: 'Ehoyd! Ănaxdim ifranăn ha taflĕst a tămoosăd; šămad h'-iik taflĕst dăɣ-a-wărăn ijĕt, ad-kăy-sĕmmĕnukĕlăɣ făll-măraw iɣărman n-ăkall-in.' 18Osă-dd wa s-ĕssin ḍarăt-a-wen, innă: 'Măssi-ɣ, ablăɣ-năk, ărbăxăɣ fălla-s sĕmmos iyyăḍ.' 19Innă daɣ i-wa: 'Kăyy, ad-tĕmnukĕlăd făll-sĕmmos iɣărman n-ăkall-in.' 20Osă-dd iyyăn daɣ, inn'-as: 'Măssi-ɣ, ablăɣ-năk, ĕnta da; a tĕgled-dăɣ, ĕkmasăɣ-t, itwar, 21jeɣ-ak tuksĕḍa-i-dăɣ măqqărăt ed ĕssanăɣ a-s emăṣṣehi a tămoosăd, sikusăd-dd a wăr tĕssĕtwărăd, tilĕyĕd-dd ašĕkrĕš wăr tăddomed.' 22Inn'-as măssi-s: 'Kăyy wa-hi, erk ănaxdim a tămoosăd! A-wa-dăɣ dd-izjărăn emm-năk a-s kăy-e-sĕḍlĕmăɣ; a-s tĕssanăd a-s năkk emăṣṣehi a ămoosăɣ dd-isikusăn a wăr ĕssĕtwărăɣ, tilĕyăɣ-dd ašĕkrĕš wăr-ăddomeɣ, 23mafăl wăr jed aẓrĕf-in dăɣ-bănk, dihen a-s t-dd-mad-ăqqĕlăɣ, ăttillăɣăɣ hărăt fălla-s.' 24Innă ămănokal ḍarăt-a-wen i-ăddinăt-wi t-ĕllănen dihen: 'Ahăɣăt dăɣ-s ablăɣ wa iṭṭăf, tĕkfĕm-t i-wa n-măraw.' 25Ǝnnăn-as ăddinăt: 'Ǝnta-š wădden ila măraw?' " 26Inn'-asăn Ɣisa: "Ălleɣeɣ-awăn a-s ăwadĕm wa ilăn hărăt, ad-has-iwwaḍ măšan, wa wărăn ila hărăt, ad-dăɣ-s ămahăɣ wăla a-wa iṭṭăf. 27'Ḍarăt-a-wen, išĕnja-nin winnin wăren irha ad-fălla-săn ĕmnukĕlăɣ, ĕlwĕyăt-ahi-tăn-dd, tăɣrĕsăm-asăn dat-i.' " 28Innă Ɣisa a-wen ɣas, ăzzar-i-inĕṭṭulab-net s-Yărussălam. 29Ohăẓ-in tidbi ti n-Bătfaži d-Bitanya, edes i-taḍaɣt ta tăsijătăt ihĕškan wi n-ĕzzăytun; dihen-dăɣ ad-ăšmašăl ĕssin dăɣ-inĕṭṭulab-net, 30inn'-asăn: "Ăkkăt tadăbayt ta-n data-wăn, afăl tăt-tĕjjăšăm, ad-tĕjrĕwăm ăẓa ojayăn s-kăla wăr t-iney ăwadĕm; arăt-t-dd, tĕlwĕyăm-t-dd. 31Ere kăwăn-issĕstănăn d-a-wa făl t-tirĕm, ănnăt-as: 'Ila dăɣ-s ălɣalim ĕššăɣĕl.' " 32Ǝglăn inĕṭṭulab-wi ăšmašăl, ogăẓăn-in hărătăn s-ĕmmĕk-wa-dăɣ s-hasăn-tăn-innă; 33tiirĕn ăẓa a-s tăn-ăɣtălăn mĕssaw-s d-a-wa făl t-tirĕn. 34Ǝnnăn-asăn inĕṭṭulab wi n-ĕssin: "Ălɣalim a dăɣ-s ilan ĕššăɣĕl." 35Ǝlwăyăn-dd aẓa i-Ɣisa, ĕstăjăn-as inkubba-năsăn, ăsnăyăn-as-t ɣas, 36ad-fattăɣăn ăddinăt isĕlsa-năsăn făll-zăbo wa mad-ilal iket-net. 37Issĕntă-dd Ɣisa atrur n-taḍaɣt ta n-ĕzzăytun ɣas, tĕddĕwăt tamĕtte ta n-inĕṭṭulab-net iket-net, siiɣlĕlit, tiimĕl Măssinăɣ s-afălla dăɣ-tĕssĕba n-ijităn wi ăssuksăḍnen tĕnhăy. 38Tiimĕl Măssinăɣ, janna: "Ozana! Ija Măssinăɣ ălbăraka dăɣ-ămănokal wa dd-osăn dăɣ-isĕm n-Emăli, ălxer ija, imăl-t ălxurmăt dăɣ-išĕnnawăn iket-năsăn." 39Ǝggădăn-dd kăl-faris hanen tamĕtte, ĕnnăn i-Ɣisa: "Ălɣalim, sĕssusĕm inĕṭṭulab-năk." 40Inn'-asăn Ɣisa: "Ălleɣeɣ-awăn a-s afăl ăssosămăn, ad-săqqărĕtnăt tihun." 41Ohăẓ-in Ɣisa Yărussălam, inhăy-tăt ɣas, ad-ihall fălla-s, 42ijanna: "Yărussălam! Ǝnnăr tăddobed ad-tĕlmĕdăd ašăl-i-dăɣ, ĕmmĕk wa s-tăddobed ad-tĕjrĕwăd ălɣafyăt n-iman-năm măšan, ăttunkăl-am a-wen, wăr t-hĕnnĕynăt tiṭṭawen-năm. 43Ădduuttăt a-s, ĕlkamăn dăɣ-m išilan sămuumnen dăɣ-mad-kăm-ăɣlĕyɣĕlĕyăn išĕnja-năm, ăẓbĕbăn-kăm s-išrutăn iket-dăɣ-năsăn, 44ăttăɣtăɣăn-kăm, kămm d-aratăn-năm, wăr mad-dăɣ-m-dd-ĕyyĕn wăla ablăɣ iwarăn amidi-net făl-a-s, tunjăyăd s-ašăl wa săr-m dd-ăšbašăjăɣ." 45Ijjăš Ɣisa ḍarăt-a-wen ehăn n-ămudd wa măqqărăn, ad-dăɣ-s isattăɣ ăttužžar, 46ijann'-asăn: "Ajăn wădden iktab a-s inna Măssinăɣ: 'Ehăn-in, ad-umas ehăn n-tittar', măšan, kăwăneḍ jăm-t tajnut n-imăkrăḍăn." 47Isaɣra ḍarăt a-wen-dăɣ hak ašăl dăɣ-ehăn n-ămudd wa măqqărăn. Ǝnkărăn-dd imănokalăn n-kăl-tikutawen d-ălɣulam n-Ăṭṭăwrăt d-imizărăn n-kăl-Ălyăhud, ad-tattărăn ĕmmĕk s-jăn iman-net 48măšan, ăbă-hasăn tamĕntelt făl jăn a-wen ed, tăsijăd-as tamĕtte iket-net, ijraẓ-as daɣ a-wa ijănna.

will be added

X\