Luqa 18

1Ij'-asăn Ɣisa daɣ tangalt tiyyăt dăɣ-irha ad-tăn-isĕlmĕd a-s lan s-ad-tĕddalăn Măssinăɣ hărkuk, wăr dăɣ-s tĕkkĕsăn ăṭṭăma. 2Inn'-asăn: "Kăla t-illa aɣrĕm ih' ălqa/l/li wărăn ăksuḍ Măssinăɣ, wăr-issĕfrăr daɣ dăgg-adĕm. 3Tĕll'-e daɣ dihen tănuḍăft t-dd-tiisĕt hak ašăl, tĕjann'-as: 'Ǝkkĕs-ahi tekăriḍt dăɣ-ăwadĕm wa hi-ohăɣăn.' 4Ăhojă ălqa/l/li wăr tăt-in-ijreh, har šik, innă dăɣ-iman-net ašăl iyyăn: 'Kud-dăɣ wăr-ăksuḍăɣ Măssinăɣ, wăr-ĕssĕfrărăɣ dăgg-adĕm, 5ad-ĕkkĕsăɣ tekăriḍt i-tamăḍt-i-dăɣ hi-tăsɣăfăt i-ad-hi-tăkf ălɣafyăt.' " 6Inn'-asăn Ălɣalim Ɣisa: "Săjdăt ɣas i-a-wa-dăɣ inna ălqa/l/li-wa-dăɣ n-enăllăbăs. 7Ɣas tordam a-s Măssinăɣ wăr-e-ikkĕs tekăriḍt i-wi ăsnăfrăn săr-s dd-hallănen ehăḍ d-ašăl? Tordam a-s ad-hin-ăhaj fălla-săn? 8Ăbo! Ălleɣeɣ-awăn a-s, ad-hasăn-ikkĕs tekăriḍt šik măšan, tordam făw s-ašăl wa dd-mad-iqqĕl Ăgg-ăgg-adĕm, ad-dd-agĕẓ immun făll-ărori n-ăkall?" 9Issăɣlăy Ɣisa ḍarăt-a-wen tangalt ăddinăt wi ordănen iman-năsăn iqqud, a-s ija a-wen, ĕlkăhăn imidiwăn-năsăn, inn'-asăn: 10"Kăla ĕkkăn ĕssin meddĕn ehăn n-ămudd wa măqqărăn i-ad-umadăn, ăɣbĕdăn Măssinăɣ. Iyyăn u-faris, wa iyyăḍăn ănarmas n-tiwse. 11Osăn-in ɣas, ibdăd wa n-u-faris, ad-itumad, ijanna dăɣ-iman-net: 'Ăjoḍăyăɣ-ak Măssinăɣ făl-a-s, wăr-olehăɣ d-ăddinăt-wi iyyăḍnen n-imăkrăḍăn d-imĕzzĕna, wăr-olehăɣ daɣ d-u-tiwse-wa-dăɣ, 12tuẓamăɣ ĕssin išilan dăɣ-ĕssĕboɣ, takkăsăɣ tămukăst n-a-wa jarrăwăɣ iket-net.' 13A-s ităjj a-wen u-tiwse ĕnta, ibdad dihen, tĕgdal-as tăkrakiḍt wăla ad-iḍkĕl asăwaḍ-net, ăsninăn iman-net, ijanna ĕnta: 'Ya Măssinăɣ! Sĕsmĕḍ făll-i, ĕkrĕšăɣet data-k idĕm năkk-i n-anăsbăkkaḍ.' " 14Inn'-asăn Ɣisa: "Ălleɣeɣ-awăn a-s u-tiwse-wa-dăɣ, a-s iqqăl ehăn-net, ijraw idĕm wăr-ijrew u-faris dat-Măssinăɣ. Ere iḍkălăn iman-net, ad-irĕs, ere daɣ wa ăsrăsăn iman-net, ad-t-iḍkĕl Măssinăɣ." 15Ămmewăyăn-dd ḍarăt-a-wen imărkăsăn s-Ɣisa i-ad-dăɣ-săn ăj ălbăraka, măšan, ĕnhăyăn inĕṭṭulab-net a-wen ɣas, ăklăwlăwăn făll-imărawăn-năsăn. 16Iɣr'-en-dd Ɣisa s-iman-net, inn'-asăn: "Ăyyăt aratăn ad-hi-dd-ĕkkĕn, wăr tăn-in-tăwweɣăm făll-i făl-a-s Tĕmmĕnĕya n-Măssinăɣ, ăddinăt-wi dăr-săn ănifăqqănen a-s tăt-ihakk. 17Ăsidătteɣ-awăn a-s ere wărăn iqbel Tĕmmĕnĕya n-Măssinăɣ s-ĕmmĕk wa s-tăt-mad-iqbĕl ara, wăr tăt-mad-ijjĕš." 18Osă-dd ălfăqqi iyyăn n-kăl-Ălyăhud Ɣisa, inn'-as: "Ălɣalim wa olăɣăn, ma s-leɣ s-ad-t-ăjăɣ i-ad-ĕkkusăɣ tămudre ta tăɣlălăt?" 19Inn'-as Ɣisa: "Mafăl hi-ɣarrăd s-isĕm: Wa olăɣăn? Wăr t-illa ere olaɣăn săl Măssinăɣ. 20Wădden tĕssanăd alămărăn-net: 'Wăr jed ĕzzĕna, wăr jed iman, wăr tokerăd, wăr tăjjĕyhăd s-bahu, sĕmɣăr ti-k d-ma-k.' " 21Inn'-as ălfăqqi: "Ăɣdalăɣ i-a-wen-dăɣ iket-net hărwa ămoosăɣ ara." 22Isla Ɣisa i-măjrăd wa ija ɣas, inn'-as: "Hărăt iyyăn a hak-in-ăba: tužžăr-in a-wa led iket-net, tuẓanăd-t i-tilăqqiwen i-ad-tĕjrĕwăd ărrĕzăɣ dăɣ-ălžănnăt, dihen, ĕqqĕl-dd, ĕlkĕm-ahi." 23Isl' ălfăqqi i-a-wen ɣas, ĕnxăsăn iman-net ed ila ehăre n-tikunen. 24Inhăy-t Ɣisa ănxasăn iman-net ɣas, innă: "Unhh! Aẓwi ija i-ere irzaɣăn ujĕš n-Tĕmmĕnĕya n-Măssinăɣ! 25Ojăr tărăɣse ta ija i-amnĕs ujĕš s-tiṭṭ n-ănaẓmay uhĕn i-ere irzaɣăn ujĕš n-Tĕmmĕnĕya n-Măssinăɣ." 26Ǝnnăn-as ăddinăt-wi has-ăsijădnen a-s inna a-wen-dăɣ: "Adiš mi madăn-iɣlĕs." 27Inn'-asăn: "A-wa wăr-ăsmăkkănăn dăgg-adĕm, ăddoobăt-t Măssinăɣ." 28Iggăd-dd Bĕṭrus, inn'-as: "Năkkăneḍ-i-š oyyănen ihănan-nănăɣ nĕlkăm-ak, ĕndek isălan-nănăɣ, ma s-ilkam ad-t-nĕjrĕw?" 29Inn'-asăn Ɣisa: "Ăsidătteɣ-awăn a-s wăr t-illa dăɣ-wăn-i madăn-ăyy ehăn-net meɣ hănne-s meɣ ayĕtma-s meɣ imărawăn-net meɣ mĕddana-s dăɣ-tĕssĕba n-Tĕmmĕnĕya n-Măssinăɣ 30s-wădden, ad-ijrĕw a ănnuḍfăsăn făll-a-wen dăɣ-ăddunya-ta-dăɣ, ijrĕw daɣ tămudre ta tăɣlălăt dăɣ-ăddunya ta dd-malăt." 31Ikkăs-dd Ɣisa ḍarăt-a-wen inĕṭṭulab-net wi n-măraw d-ĕssin s-takše, inn'-asăn: "Ǝnhĕywăt, năkkăneḍ-da hi-ĕkkănen Yărussălam i-ad-itbĕt a-wa ĕktăbăn ănnăbităn dăɣ-isălan n-Ăgg-ăgg-adĕm 32făl-a-s, ad-t-ĕjĕn ayĕtma-s dăɣ-ifassăn n-inĕẓẓulam, ĕjĕn-t tekăškăšt, sĕmmăḍrĕyăn-t, sutĕfĕn fălla-s, 33ĕjĕn dăɣ-s tiwit, ĕjĕn iman-net măšan, ašăl wa s-kăraḍ ḍarăt tamăttant-net, ad-dd-inkăr jer-inĕmmuttan." 34Ij'-asăn Ɣisa măjrăd-wen-dăɣ măšan, wăr t-illa a dăɣ-s ĕjrahăn ed, ăttunkăl-asăn ălmăɣna-net, wăr-ĕjrehăn a-wa dăɣ-hasăn-ăssewăl. 35Ălwăqq wa d-hin-ohăẓăn taɣrĕmt ta n-Žărriko, ĕkkăn-dd edes i-emĕdderɣĕl ăqqiimăn dăɣ-asălim n-zăbo, itattăr takute dăɣ-ăddinăt. 36Islă i-tăkat ta ja tamĕtte ɣas, issĕstăn d-a-wa ijăn. 37Ǝnnăn-as ăddinăt: "Ɣisa wa n-Năṣirăt a okayăn." 38Ăsɣărăt, innă: "Ya Ɣisa wa n-Ăgg-Dawĕd, aḍĕn-ahi tăhanint!" 39Ăɣtălăn-t ăddinăt-wi ăzzarnen i-tamĕtte i-ad-hin-isusĕm măšan, ăsɣărăt s-afălla: "Ya Ăgg Dawĕd, aḍĕn-ahi tăhanint!" 40Ibdăd Ɣisa, omăr s-ad-săr-s dd-ăttălwăy. Os'-e-hi-dd emĕdderɣĕl ɣas, issĕstăn-t, inn'-as: 41"Ma s-tărhed ad-hak-t-ăjăɣ?" Inn'-as emĕdderɣĕl: "Ălɣalim, alĕsăɣet ahănay." 42Inn'-as Ɣisa: "Ǝnhĕy! Iɣlăs-kăy immun-năk." 43Inhăy ălwaqq-wen-dăɣ, ilkăm i-Ɣisa, ad-itiimĕl Măssinăɣ, tiimĕl daɣ tamĕtte ta tĕnhăyăt a-wa ijăn Măssinăɣ făl tihusay n-ijităn-net.

will be added

X\