Luqa 17

1Innă Ɣisa ḍarăt-a-wen i-inĕṭṭulab-net: "Tanmĕšrayt, ad-tajj ɣas, măšan, imĕskay kăl-ĕssĕbab-net. 2Wa has-issĕbăbăn, iššăm-as-in, ad-tĕtwăqqĕn tăhunt ta s-itĕẓẓad ălkăma dăɣ-err-net, itwĕjăr-in dăɣ-ejărew wa sĕmmăn, uhĕn ad-umas ĕssĕbab n-tanmĕšrayt i-iyyăn dăɣ-inĕṭṭulab-in. 3Ăjăt ĕnniyăt i-iman-năwăn: afăl kăy-iḍlăm ă/n/na-k, ăɣtĕl-t, kunta ămmujrăẓ, ănš'-as. 4Afăl hak-ija ĕssa uḍlemăn dăɣ-ašăl, ij'-ak-dd ĕssa uɣlawăn dăɣ-dăɣ-k itattăr tenăšše, ănš'-as." 5Ǝnnăn inĕmmušal i-Ɣisa: "Ălɣalim, siwĕḍ immun-nănăɣ." 6Inn'-asăn Ălɣalim Ɣisa: "Afăl lam immun ogdăhăn d-temătăwt ta tojărăt tĕmmĕtkit dăɣ-idommăn, ad-tudabem ad-tĕnnĕm i-ahĕkš-wa-dăɣ: 'Ǝlbĕy-dd iman-năk, săɣtĕd-tăn dăɣ-ejănš', ad-ăj a-wa has-tĕnnăm. 7Ǝndek dăɣ-wăn wa s-afăl t-dd-odwa akli-net wa ăssixdăm dăɣ-ašĕkrĕš-net, meɣ wa ăsḍăn arĕzzej-net, ad-has-ănn: 'Ǝyyăw mănsăw', 8wădden a has-mad-ănn: 'Să/n/n'-ahi-dd a ĕkšeɣ, tĕjĕd isĕlsa-năk wi n-ălxidmăt, tĕkfĕd-ahi amĕnsi har ăkšăɣ, ăswăɣ tĕzzar, tĕkšĕd, tĕswĕd kăyy.' 9Tordam a-s ăhalĕs-en-dăɣ, ill'-e a mad-umay i-akli-en-dăɣ, ijăn a-wa t-iwarăn? 10Kăwăneḍ-dăɣ, e-d jăm a-wa s-hawăn-ătwănnă, ănnăt: 'Năkkăneḍ, jer-t-nĕlla wăla wăr t-nĕlla, eklan ɣas a nămoos, wăr nĕja ɣas ar a-wa hanăɣ-iwarăn.' " 11Ălwăqq wa d-ikka Ɣisa Yărussălam, ăllil zăbo wa ikkăn jer-teje ta n-Sămari d-ta n-Galila. 12Ijjăš-dd tadăbayt tiyyăt ɣas, ĕlkăḍăn-as-dd măraw meddĕn ijraw jĕri, ĕbdădăn-as dihen, 13ĕḍkălăn imăslan-năsăn, ĕnnăn-as: "Ălɣalim Ɣisa! Aḍĕn-anăɣ tăhanint." 14Inhăy-tăn, inn'-asăn: "Ăglăt, săknăt iman-năwăn i-kăl-tikutawen." Ǝglan hărwa a-s ĕzzăyăn iket-năsăn, šăddijăn. 15Inhăy iyyăn dăɣ-săn a-s izzăy ɣas, iqqăl dăɣ-adăriš-net, iḍkăl emăsli-net, ad-itiimĕl Măssinăɣ. 16Osă-dd, irkăɣ dat-Ɣisa, ad-has-itumay, ăhalĕs-en, i n-teje ta n-Sămari. 17Innă Ɣisa: "Ajăn wădden măraw meddĕn a ĕzzăynen, ma jăn tĕẓẓa wi iyyăḍnen? 18Ɣas wăr tăn-dd-izjer făw ere dd-iqqalăn i-ad-amĕl Măssinăɣ ar amăjar-wa-dăɣ?" 19Innă Ɣisa i-ăhalĕs ḍarăt-a-wen: "Ǝbdĕd, ĕglĕw, iɣlăs-kăy immun-năk." 20Ǝssĕstănăn kăl-faris Ɣisa, ĕnnăn-as: "Ǝmme dd-mad-tĕzzubbĕt Tĕmmĕnĕya n-Măssinăɣ?" Inn'-asăn: "Tĕmmĕnĕya n-Măssinăɣ, wăr mad-dd-tăj ass ilan mănhoy, 21wăr mad-itwĕnn: 'Ǝnta da', wăla: 'Ǝnta den', făl-a-s ădduuttăt a-s, Tĕmmĕnĕya n-Măssinăɣ, tĕll'-e jere-wăn." 22Innă i-inĕṭṭulab-net ḍarăt-a-wen: "Ǝlkamăn išilan dăɣ-mad-sĕddărhĕnăm ahănay n-Ăgg-ăgg-adĕm kud-dăɣ i-ašăl iyyăn ɣas, măšan, wăr t-mad-tĕnhĕyăm. 23Afăl hawăn-ătwănna: 'Ǝnta den', meɣ: 'Ǝnta da', wăr tĕglem, wăr tĕlkemăm i-a-wen 24făl-a-s, Ăgg-ăgg-adĕm, ass-net, ad-alăh d-essam-i s-e-d issăm dăɣ-ašrut iyyăn n-išĕnnawăn, ad-isĕmmĕlĕwlĕw ašrut wa iyyăḍăn. 25Măšan, wăr mad-ăj a-wen ar s-ad-inhĕy tersĕmmawen, tĕkkuddĕl-t ĕzzurĕyăt-ta-dăɣ tĕzzar, 26făl-a-s, a-wa ijăn dăɣ-išilan wi n-ănnăbi Nox, a madăn-ăj daɣ dăɣ-išilan-wi dd-mad-iqqĕl Ăgg-ăgg-adĕm. 27Ăzzăman wa n-ănnăbi Nox, tayăwanăn ăddinăt, sassăn, tidubunăn, sidubunăn har ašăl wa d-ijjăš Nox turăft n-aman ta măqqărăt s-has-innă Măssinăɣ a tăt-ikĕn, oḍăn-dd fălla-săn aman wi n-ḍuf, ĕlhăsăn-tăn iket-dăɣ-năsăn. 28Šund a-wen-dăɣ daɣ a ijăn dăɣ-išilan wi n-Lut, tattăn ăddinăt, sassăn, žanšen, satajăn, tidumun, tĕddayăn ihănan 29har ašăl wa d-izjăr Lut aɣrĕm wa n-Sodoma, iffăy-dd fălla-săn Măssinăɣ ajĕnna n-efew d-ĕlkăbrit, ilhăs-tăn iket-dăɣ-năsăn. 30Šund a-wen-dăɣ a madăn-ăj ašăl wa dd-mad-iqqĕl Ăgg-ăgg-adĕm. 31Ašăl-en, wa iwarăn afălla n-ehăn, wăr dd-itĕzĕbbutet i-ad-iḍkĕl ilalăn has-hanen ider n-ehăn; wa ihan ašĕkrĕš-net daɣ, wăr-ităqqălet ehăn, 32wăr hin-tĕttĕwăm a-wa ijrăwăn hănne-s n-Lut. 33Ere wa wărăn idgeẓ ar dăɣ-ajăraw n-iman-net dăɣ-ăddunya-ta-dăɣ, ad-ifut dăɣ-ălžănnăt, măšan, ăwadĕm wa irḍăn ăfota dăɣ-iman-net, dăɣ-ăddunya-ta-dăɣ, dăɣ-ăddimmăt-in, ad-iɣlĕs. 34Ăssiilmădăɣ-kăwăn s-ehăḍ-wen-dăɣ, ad-ĕnsan ĕssin meddĕn făll-asĕftăɣ iyyăn, ămmăḍkăl iyyăn, itwĕyy-dd wa iyyăḍăn, 35ad-tĕẓẓadnăt sănatăt tiḍeḍen ĕttăɣam dăɣ-edăgg iyyăn, tămmăḍkăl tiyyăt, tĕtwĕyy-dd ta iyyăḍăt; (( 36ad-ĕhan ĕssin meddĕn ašĕkrĕš iyyăn, ămmăḍkăl iyyăn, itwĕyy-dd iyyăn.))" 37Ǝssĕstănăn inĕṭṭulab Ɣisa, ĕnnăn-as: "Ălɣalim, ĕndek dihad-e-ăj a-wen?" Inn'-asăn: "Dihad t-tĕlla tamăɣsoyt, ad-itajj ellay."

will be added

X\