Luqa 16

1Innă Ɣisa daɣ i-inĕṭṭulab-net: "Kăla t-illa ăhalĕs n-amărrĕzăɣ dd-osăn ăddinăt, ĕjăn dăɣ-s isălan n-ĕmmĕk wa s-ibaxxăs ănaẓraf-net ehăre-net. 2Issăɣr'-e-hi-dd, inn'-as: 'Kăyy, ma ămoos a-wa sallăɣ fălla-k? Siḍĕn-ahi ehăre-nin ed, ăbas ărheɣ ĕššăɣĕl-năk.' 3Innă ănaẓraf ălwăqq-wen-dăɣ dăɣ-iman-net: 'Ǝndek a-wa mad-ăjăɣ afăl hi-ikkăs măssi-ɣ dăɣ-ălxidmăt? Ajăyak n-išĕkraš, wăr t-ăddobeɣ, tamădilt daɣ tăsikărakăḍ-ahi. 4Ǝssanăɣ a-wa he-ăjăɣ s-kud-dăɣ ikkăs-ahi măssi-ɣ dăɣ-ĕššăɣĕl, ad-hi-simĕjurun ăddinăt dăɣ-ihănan-năsăn'. 5Issăɣră-dd ăddinăt wi irwăs măssi-s iket-năsăn, innă i-wa ăzzarăn: 'Kăyy, maniket kăy-irwăs măssi-ɣ?' 6Inn'-as: 'Temeḍe n-bărgo n-ĕzzăyt'. Inn'-as ănaẓraf: 'Tăkarḍe-năk da ta n-ămarwas, ɣayĕm, ĕktĕb šik fălla-s, sĕmmosăt timĕrwen n-bărgo.' 7Innă i-wa iyyăḍăn: 'Kăyy-i-š, ma kăy-irwas măssi-ɣ?' Inn'-as: 'Temeḍe n-šaku n-ălkăma.' Ikf'-e-hi-dd ĕnta-dăɣ ălkaḍ-net wa n-ămarwas d-aɣănib, inn'-as: 'Ǝktĕb: ĕttamăt timĕrwen n-šaku.' 8Islă măssi-s n-ehăre i-amsud n-ănaẓraf-net ɣas ad-t-itimĕl." Inna Ɣisa daɣ: "Ădduuttăt a-s inĕẓẓulam n-ăzzăman-i-dăɣ, ojărăn imakṣaḍăn n-Măssinăɣ amsud." 9Olăs daɣ, inn'-asăn: "Ăjăt imidiwăn s-ehăre wa xăramăn n-wălăt-ăddunya-ta-dăɣ n-ămăra, dihen, afăl fălla-wăn tăt-ăba, ad-tĕjrĕwăm irošan n-a-wen dăɣ-tămudre ta tăɣlălăt. 10Wa iɣdălăn dăɣ-a-wa wărăn făror, ad-iɣdĕl daɣ dăɣ-a-wa ăjjen, wa wărăn iɣdel dăɣ-a-wa wărăn făror, wăr mad-iɣdĕl daɣ dăɣ-a-wa ăjjen. 11Afăl wăr tăɣdelăm dăɣ-ărrĕzăɣ wa xăramăn n-ăzzăman-wa-dăɣ wărăn infa hărăt, mi kăwăn-madăn-isăɣlĕf ărrĕzăɣ wa n-tidĕt ihăn ăddunya ta tĕlkămăt. 12Afăl wăr tăɣdelăm dăɣ-ehăre n-ăddinăt wa kăwăn-ĕssăɣlăfăn, mi kăwăn-madăn-isăɣlĕf wa mad-tĕkrĕšăm dăɣ-ăddunya-ta dd-malăt. 13Wăr t-illa ănaxdim ăddooben ad-ixdam i-ĕssin imălan; iyyăt-i-dăɣ, ad-akĕḍ d-iyyăn, ărh wa iyyăḍăn, meɣ daɣ, ikf'-iman-net i-iyyăn, iksĕn wa iyyăḍăn. Wăr-ăddobăt ăwadĕm ad-ixdam i-Măssinăɣ, ošal daɣ ḍarăt terše n-aẓrĕf." 14Ija Ɣisa măjrăd-wen-dăɣ ɣas, jăn-t kăl-faris tekăškăšt ed, ĕntăneḍ ĕknan tărha n-aẓrĕf. 15Inn'-asăn Ɣisa: "Kăwăneḍ, jam iman-năwăn ăddinăt oɣadnen dat-dăgg-adĕm, măšan, Măssinăɣ issan a-wa ihăn ulhawăn-năwăn făl-a-s, a-wa ăsihăsken dăgg-adĕm, tajlĕlheyt ɣur-Măssinăɣ. 16Ăzzăman wa n-alămăr wa n-Mosa d-ĕlkĕttabăn wi n-ănnăbităn, ibdăd ɣur-ănnăbi Exya wa Enĕsselmăɣ, a ija a-wen-dăɣ, titwĕjjin isălan n-Ălĕnžil wa n-Tĕmmĕnĕya n-Măssinăɣ, tattărăn ăddinăt ujĕš-net s-ăṣṣahăt-năsăn. 17Ojăr tărăɣse ija ad-iba išĕnnawăn d-ăkall uhĕn, ad-iba wăla-dăɣ tătbăqqet tiyyăt ɣas dăɣ-alămăr n-Măssinăɣ. 18Ere hin-ăzmăzzăyăn hănne-s, olăs adubĕn n-iyyăt, ilmĕdet a-s izna, ere daɣ wa ădobănăn tamăḍt dd-tămmizzăyăt, ilmĕdet a-s izna ĕnta-dăɣ." 19Inn'-asăn daɣ: "Kăla t-illa ăhalĕs n-amărrĕzăɣ s-hak ašăl ăsisahăɣ ašăl dăɣ-isĕlsa wi ăsmăɣmăɣnen, lănen ălqim, izha, ănnuflăy, ăyyiwăn. 20A-s ităjj a-wen-dăɣ, ins' ăhalĕs n-talăqqe s-isĕm-net Lazar dat-emm n-ehăn-net, ĕlsanăt tikussawen dăɣ-iffay arĕssuḍ elăm-net. 21A-wa has-ija ĕllăqqu, isadărhan ad-ăkš a-wa dd-ititrĕkkin dăɣ-imĕnsiwăn wi itătt amărrĕzăɣ măšan, wăr t-ijărrĕw; ăddeew-as a-wen d-afḍărfăḍăr wa jănăt tikussawen făll-taɣĕssa-net hundăɣ har dd-ĕqqălăn iyyăḍan tallăɣăn-tănăt. 22Har ašăl wa d-tămmut talăqqe, ăwwăyăn-tăt ănjălosăn s-Ibrahim dăɣ-ălžănnăt, ămmut amărrĕzăɣ ĕnta-dăɣ, iẓka. 23Iha tisĕnsa ti n-žohănnăma-en-dăɣ ihannăy aɣăna a-s iḍkăl asăwaḍ-net, ojj' Ibrahim ill'-e Lazar edes-has. 24Ad-iɣar Ibrahim, ijann'-as: 'Y' Abba Ibrahim, aḍĕn-ahi tăhanint, šĕmmišĕl-dd săr-i Lazar i-ad-isĕlmăɣ emm n-assĕkăḍ-net dăɣ-aman, isĕsmăḍ ilĕs-in făl-a-s, ăsrăkăttăt-ahi efew wa heɣ.' 25Inn'-as Ibrahim: 'Alyaḍ-in, ĕktĕw-dd a-s kăyy, tărzăɣăd hullan dăɣ-tămudre-năk, a-s ija a-wen, Lazar, wăr-inhey a săl aɣăna, ămăra, ĕnta a ăssismăḍăn, ănnuflăy, a-s ija a-wen kăyy, tiknĕnnĕwid; 26ḍarăt-a-wen daɣ, ill'-e eɣăy wărăn ila ider jere-năɣ dăr-wăn, wăr-ăddoben wi n-ɣur-năɣ, ad-kăwăn-in-ĕkkĕn, wăr-ăddoben daɣ wi n-ɣur-wăn, ad-hanăɣ-dd-ĕkkĕn kud-tărham-dăɣ.' 27Inn' ăhalĕs ămăra: 'Adiš abba, dalăɣ-kăy d-ad-šĕmmišĕlăd Lazar s-ehăn n-abba-nin 28făl-a-s, leɣ sĕmmos ă/n/natăn i-ad-tăn-isĕmmĕtăr, udaɣ ad-dd-ĕjjĕšăn edăgg-wa-dăɣ n-tissust.' 29Inn'-as Ibrahim: 'Wădden lan Mosa d-ănnăbităn-wi iyyăḍnen, sĕjĕdnet-asăn.' 30Inna i-Ibrahim: 'Ăbo! Abba Ibrahim, afăl tăn-dd-iqqăl ere dd-inkarăn jer-inĕmmuttan, immĕjrăd-asăn, ad-utabăn.' 31Inn'-as Ibrahim: 'Afăl wăr-ăsjădăn i-ănnăbi Mosa d-ănnăbităn wi iyyăḍnen, wăr mad-utabăn kud-hasăn-ija ăwadĕm dd-inkarăn jer-inĕmmuttan isălan-dăɣ.' "

will be added

X\