Luqa 15

1Tisĕn-dd inarmasăn n-tiwse d-erk ăddinăt ăjjootnen Ɣisa i-ad-has-ĕslĕn. 2Ǝnhăyăn kăl-faris d-ălɣulam n-Ăṭṭăwrăt a-wen ɣas, ad-simtĕktikăn, jannen: "Ak, tĕjrahăm-in anɣim d-tihra ta ităjj d-erk ăddinăt?" 3Issăɣlăy-tăn-dd Ɣisa tangalt dăɣ-hasăn-inna: 4"Ǝndek dăɣ-wăn wa s-afăl ila temeḍe n-tehăle har dăɣ-snăt tăssujjăl tiyyăt, wădden ad-ăyy ti n-tĕẓẓayăt timĕrwen d-tĕẓẓayăt ĕfradnăt, iglĕw, isĕssĕjjĕl ta dăɣ-s ăba har tăt-dd-ijrĕw? 5Afăl tăt-dd-ijrăw, ad-tăt-isĕwăr iẓerhan-net ikna tedăwit, 6afăl hin-iwwăḍ ihănan, ad-dd-iɣăr imidiwăn-net d-ănhărajăn-net, ănn'-asăn: 'Ǝyyăwăt, ăhrăt dăr-i tedăwit, tehăle-nin ta tăssujjălăt, ĕjrăwăɣ-tăt-dd.' 7S-ĕmmĕk-wen-dăɣ daɣ a făl, ăssiilmădăɣ-kăwăn a-s, ad-tajăr tedăwit ta madăt-tăj dăɣ-išĕnnawăn dăɣ-tĕssĕba n-iyyăn anăsbăkkaḍ ătubăn, uhĕn i-tĕẓẓayăt timĕrwen n-ăwadĕm d-tĕẓẓa ɣur-ija a-s, wăr-ămɣatărăn s-tătubt. 8Wădden daɣ afăl la tamăḍt măraw ărriyalăn n-aẓrĕf hundăɣ har dăɣ-săn ăb' iyyăn, ad-sărmĕs tefătelt, ad-tišriwit ăkall n-ehăn, tiskĕnsĕkit-t hundăɣ har dd-tĕjrĕw ărriyal-net wa ăba? 9Afăl t-dd tĕjrăw, ad-dd-sĕdĕw timidiwen-net d-tănhărajen-net, tănn'-asnăt: 'Ahărmăt dăr-i tedăwit, ed ărriyal-in wa ăba, ĕjrăwăɣ-t-dd.' 10A-wen-dăɣ a făl hawăn-ălleɣeɣ a-s, tămoos tătubt n-anăsbăkkaḍ iyyăn ĕssĕbab n-tedăwit măqqoorăt i-ănjălosăn n-Măssinăɣ." 11Inn'-asăn Ɣisa daɣ: "Kăla t-illa ăhalĕs ilan ĕssin aratăn. 12Ašăl iyyăn, osă-dd wa ĕnḍărrăn ti-s, inn'-as: 'Abba, akf'-ahi ejădăr-in dăɣ-tăkasit.' Ăẓun ti-săn a-wa ila jere-săn. 13Hărăt n-išilan ḍarăt-a-wen, ăttužžăr-in wa ĕnḍărrăn ejădăr-net, irmăs aẓrĕf-net, ikk' ăkall iyyăn ujĕjăn, ăllil iẓĕjraẓ n-iman-net, ad-ibaxxăs a-wa ila. 14Ălwăqq wa d-ikkĕykăy a-wa iṭṭăf, oḍă-dd laẓ făll-ăkall wa iha iket-net, toɣăy-as tămăɣatert. 15Igla, ixdăm ɣur-iyyăn dăɣ-kăl-ăkall, ăssok'-e ăgg-ăkall išĕkraš-net i-ad-dăɣ-săn iḍĕn ĕlxĕnžărăn. 16Ij'-as laẓ asĕmmănĕnnăḍ wa-dăɣ făl dd-iqqăl isadărhan tetăte n-išĕkša-wi-dăɣ tattăn ĕlxĕnžărăn măšan, wăr t-ikfa măssi-săn turhajăt n-a-wen. 17Ǝqqălăn-t-dd iman-net ašăl iyyăn, ăznăzjamăt, innă: 'Năkk-i-dăɣ, ma hi-ijăn dăɣ a-wa? Ajăn wădden a-wa ila abba-nin dăɣ-inaxdimăn ijarrăw a ikša har t-isĕssikĕy, uhĕn-dăɣ năkk, năkk-da-dăɣ, isimnĕnniḍ-ahi laẓ; 18ăddăbara, ad-ĕnkărăɣ, ăqqĕlăɣ abba-nin, ănnăɣ-as: Abba, ănmăšrăyăɣ i-Măssinăɣ, ăbodărăɣ-kăy, 19ăbas ăniihăjjăɣ d-ad-itwĕnn rure-k a ămoosăɣ, ăj'-ahi iyyăn dăɣ-inaxdimăn-năk.' 20Ibdăd, iqqăl ăkall wa iha ti-s. Ikkă-dd ehăn dăɣ-ijĕj a-s t-ojja ti-s, tănɣ'-e tăhanint-net, ošăl săr-s, or'-as ifassăn-net, oḍă dăɣ-săn, ad-t-itisĕs dăɣ-ijĕrjar-net, itimĕllut-as. 21Innă alyaḍ ălwăqq-wen i-ti-s: 'Abba, ănmăšrăyăɣ i-Măssinăɣ, ăbodărăɣ-kăy, ăbas ăniihăjjăɣ d-ad-itwĕnn năkk rure-k.' 22Iɣră-dd ti-s inaxdimăn-net, inn'-asăn: 'Ašĕlăt tărmaḍ, awĕyăt-dd anăkăbba wa ufăn, tĕjĕm-as-t, ăjăt taḍhot dăɣ-assĕkăḍ-net, tĕkfĕm-t tifădelen ăynaynen, 23ărmĕsăt-dd ašjăr wa ojărăn tadhont, tăɣrĕsăm-as, ăjet amăjaru d-ăzzăho 24făl-a-s rure-ɣ wa s-kăla ămmut iddăr-dd, kăla ăssujjăl măšan, ittĕjrăw-dd.' Ǝssĕntăn eqqas d-tiɣlĕla ălwăqq-wen-dăɣ. 25A-s ităjj a-wen, rure-s wa n-teɣăfădde ih' išĕkraš. Ikka-dd dihen a-s isla i-tandiwen d-tihărdănen d-isuhaɣ ĕkkan išĕnnawăn, 26iɣră-dd iyyăn dăɣ-inaxdimăn, issĕstăn-t d-a-wa ijăn, 27inn'-as ănaxdim: 'Ă/n/na-k, ad-dd-iqqălăn, inɣ'-as ti-k ašjăr wa iddăren ed, iqqăl-t-dd rure-s, iddar-iɣlas.' 28Ojăl, unjăy s-ad-dd-ijjĕš ehăn. Ikk'-e-hi-dd ti-s, ad-t-isalɣad. 29Inna i-ti-s: 'Wădden năkk, a ilan iwĕtyan ĕšɣalăɣ-ăk, wăr kăla ănmăšrăyăɣ i-a hi-tĕnned măšan, wăr kăla hi-tĕkfed wăla dăɣ-eɣăyd s-ĕkleɣ năkk d-imidiwăn-in 30măšan, iqqăl-dd rure-k wa hin-ibxăsăn aẓrĕf-năk dăɣ-tălkăxbaten ɣas, tăɣrăsăd-as i-ašjăr-wa iddăren.' 31Inn'-as ti-s: 'Alyaḍ-in, kăyy, wăr kăla hi-fălăd, a-wa ĕleɣ iket-net i-năk 32măšan ašăl-i, ăniihăjja s-ad-năj amăjaru d-ăzzăho, făl-a-s ă/n/na-k wa s-kăla ămmut, iddăr-dd, kăla ăssujjăl măšan, ittĕjrăw-dd.' "

will be added

X\