Luqa 14

1Ašăl iyyăn daɣ n-ĕssĕbĕt-i n-tăsonfat, ikla Ɣisa ɣur-iyyăn dăɣ-imănokalăn n-kăl-faris, jan-as dihen ăddinăt iket-năsăn ĕnniyăt. 2A ĕnḍărrăn ăhalĕs iyyăn da-dăɣ s-ăsilăfafăɣnăt tikussawen taɣĕssa-net iket-net, 3issĕstăn Ɣisa kăl-faris d-ălɣulam-wi t-ĕllănen dihen: "Ak xălal meɣ xăram, ad-izuzĕy ăwadĕm ămarhin dăɣ-ašăl n-ĕssĕbĕt-i n-tăsonfat?" 4Wăr t-illa a has-ĕnnan ɣas, iḍăs ămarhin, ăzozăy-t, issĕgl'-e. 5Inn'-asăn ḍarăt-a-wen: "Ǝndek dăɣ-wăn wa s-afăl oḍa rure-s meɣ awdes-net dăɣ-anu ašăl wa n-ĕssĕbĕt-i n-tăsonfat ad-t-ăyy dăɣ-s har akĕy ašăl-en tĕzzar?" 6Ăbă-hasăn-dd a has-ĕnnăn. 7Ijrăh-in Ɣisa asĕnnĕfrĕn wa tăjjăn imăjarăn i-idăggan wi ănnuflăynen dăɣ-ehăn ɣas, issăɣlăy ăddinăt-wi dd-ĕklănen dihen tangalt, inn'-asăn: 8"E-d kăwăn-ăsmăjarăt ăwadĕm s-edăgg n-aẓli, wăr tăsnăfrănăm idăggan-wi t-ĕllănen s-data ed, ăddobăt ad-dd-ass ăwadĕm kăwăn-ojărăn atwĕsĕmɣăr, 9ănn'-awăn măssi-s n-ehăn, ad-tĕnkărăm, tĕkfĕm-t edăgg. Ad-hawăn-umas a-wen tăkrakiḍt ed, ad-kăwăn-tĕhhuššĕl tebădde dat-ăddinăt iket-năsăn, tăqqĕlăm ḍara-săn. 10Ufa a-s kăwăn-dd-ăsmăjarăt ăwadĕm, ad-tĕkkĕm ḍarăt ăddinăt iket-năsăn, tăqqaymĕm, dihen, afăl dd-ijjăš măssi-s n-ehăn, inhăy dihad tăqqimăm, ad-kăwăn-dd-iɣăr, ănn'-awăn: 'Ǝyyăwăt, ɣaymăt s-data.' Ad-hawăn-umas a-wen semɣar măqqoorăn dat-ăddinăt wi dăr-tăniɣăymăm. 11Ere iḍkălăn iman-net ad-irĕs, ere ăsrăsăn iman-net, ad-itwĕsĕmɣăr." 12Innă Ɣisa ḍarăt-a-wen i-u-faris wa t-dd-ăsmăjaren: "E-d dd-simjurud ăddinăt s-ehăn-năk, s-ašăl wăla s-ehăḍ, wăr dd-tăsmăjared imidiwăn-năk d-ayĕtma-k d-išăqqaɣăn-năk d-ănhărajăn-năk wi lănen hărăt făl-a-s, ĕntăneḍ, ăddooben ad-hak-dd-suɣĕlĕn azăbăna, 13ănn-ak, e-d, tărhed asĕmmĕjĕru n-ăddinăt, ăɣăr-dd tilăqqiwen d-imăsjătăɣăn d-inĕbdan d-imĕddorɣal. 14Tĕnḍĕḍ-ak ed, ĕntăneḍ wăr-ăddoben ad hak-ĕẓĕlĕn ălxer wa hasăn-jed, Măssinăɣ a ɣur-hak-t-ĕllan imraš n-a-wa jed ašăl wa n-tebădde." 15Isl' iyyăn dăɣ-imăjarăn i-a-wa inna Ɣisa ɣas, inn'-as: "Tĕnḍĕḍ i-ere wa madăn-ăkš dăɣ-imjora-wi madăn-ăj dăɣ-Tĕmmĕnĕya n-Măssinăɣ." 16Inn'-as Ɣisa: "Kăla t-illa ăhalĕs ijăn amăjaru-i-dăɣ măqqărăn, ăsmăjarăt-dd săr-s ăddinăt ăjjootnen. 17Ămmujnen imĕnsiwăn ɣas, ăšmašăl ănaxdim-net s-ăddinăt wi dd-iɣra i-ad-hasăn-ănn: 'Hărătăn ămmujnen, tăwwăɣăm-anăɣ' 18măšan, ăssălăhăn-as isoran iket-dăɣ-năsăn. Inn'-as wa ăzzarăn: 'Iket ĕžžĕnšăɣ ašĕkrĕš, ărheɣ ad-t-asăɣ, ĕnhĕyăɣ-t tĕzzar, ănš'-ahi-dd.' 19Inna wa iyyăḍăn: 'Iket ĕžžĕnšaɣ măraw iwdesăn-wi s-mad-ăxdĕmăɣ išĕkraš-in, ărheɣ ad-tăn-arĕmăɣ tĕzzar, ănš'-ahi-dd.' 20Inn'-as wa s-kăraḍ: 'Iket dd-ĕẓẓĕẓlăyăɣ, wăr-ăddobeɣ ad-hin-asăɣ.' 21Iqqăl-dd akli, ij' isălan i-măssi-s ɣas, ijjăš-t ălhăm făll-ăddinăt-win-dăɣ; innă i-ănaxdim-net ămăra: 'Ašĕl šik, ilal tišarriten, tĕlwĕyăd-dd tilăqqiwen d-inaɣyabăn d-imĕddorɣal d-imăsjătăɣăn.' 22Igl' ănaxdim, iqqăl-dd, inna i-măssi-s: 'Măssi-ɣ, a-wa tĕnned ija măšan, ehăn, ih' e edăgg hărwa.' 23Inn'-as măssi-s: 'Ǝqqĕl šik, ilal tišarriten, ăkk attayăn n-ifĕrjan, šĕhhĕššĕl ăddinăt ad-dd-asĕn i-ad-iḍnĕy ehăn-in. 24Ǝḍmanăɣ-awăn a-s meddĕn-winnin-dăɣ dd-ăsmăjareɣ s-tizarăt, wăr tăn-e-ijjĕš-i madăn-ikrĕbbĕt imĕnsiwăn-in.' " 25Innăḍ-dd Ɣisa s-tamĕtte ta tăjjet has-tĕlkămăt, innă: 26"Ere irhăn alkum-hahi, a-s ija a-wen, wăr tojer tărha ta hi-ija ta ija i-abba-net, d-anna-net, d-hănne-s, d-aratăn-net, d-ayĕtma-s, d-šătma-s d-iman-net, wăr-ăddobăt ad-umas ănăṭṭalib-in. 27Ere wărăn ăsdăw i-alĕnji n-tajĕttewt-net ta n-tamăttant i-ad-hi-ilkĕm, wăr-ăddobăt ad-umas ănăṭṭalib-in. 28Ǝndek dăɣ-wăn wa s-wădden afăl irha edey n-ehăn, ad-ăqqayĕm tĕzzar ixsĕb ălqim n-a-wa dăɣ-s mad-ăkš tĕzzar isănt edey-net, 29afăl wăr ija a-wen, ad-isănt ăssas n-ehăn, indăr-as ad-t-in-isĕmdĕw, ĕjĕn-t ăddinăt tadăẓẓa 30ed, ad-ĕnnĕn: 'Wa ăwadĕm, issĕntă edey n-ehăn, indăr-as ad-t-in-isĕmdĕw.' 31Ajăn wădden e-d irha ămănokal ad-ijăḍ amidi-net, ad-issĕn ăddobăt ad-ikrĕš fălla-s ašăl ĕnta-i ilăn măraw afḍăn n-ăhalĕs făll-ămănokal wa dăr-mad-iknĕs-i ilăn ĕnta sănatăt timĕrwen n-efăḍ n-ăhalĕs. 32Afăl inhăy a-s a-wen wădden a dăr-ăddobăt amjăr, ad-išĕmmišĕl săr-s ălžămaɣăt n-ălxer, ittăr dăɣ-s ĕmmĕk n-ălɣafyăt hărwa-dăɣ ogaẓ. 33A-wen-dăɣ a făl hawăn-janneɣ, ere wa dăɣ-wăn wărăn iksen a-wa ila iket-net, wăr-ăddobăt ad-umas ănăṭṭalib-in. 34Tesĕmt, hărăt olaɣăn măšan, afăl tăt-tĕjmăḍ temḍe-net, ma s-tăt-e-isĕsmĕm ăwadĕm? 35Ad-ăbas tĕnfa ăkall wăla ădanda, ad-hin-tăḍf ɣas. Ere ilăn timĕẓẓujen s-islă-dăɣ, isăjdet!"

will be added

X\