1 Ămmiijrăd Ɣisa hărwa a-s t-dd-osăn ăddinăt has-jănnen isălan n-aɣăras wa ija Bilatĕs wa n-ămănokal n-teje ta n-Ălyăhudĕyăt i-meddĕn n-Galila tĕzzar, issărtăy ašni-năsăn d-wa n-tikutawen-năsăn. 2 Inn'-asăn: "Ak tordam a-s kăl-Galila win-dăɣ ĕnhaynen tamăttant-ten-dăɣ sĕmmăt, ojărăn kăl-Galila-wi iyyăḍnen tumast n-inăsbăkkaḍan? 3 Făw, măšan, ăsidătteɣ-awăn kăwăneḍ-dăɣ, a-s afăl wăr tătubăm, ad-tĕjĕm tamăttant šund-ten-dăɣ. 4 Meɣ daɣ tordam a-s meddĕn wi n-măraw d-ĕttam hănen Yărussălam făll-dd-oḍa ăɣalla wa n-tăsahaɣt ta s-itawănna ta n-Silwi inɣ'-en, tordam a-s ojărăn kăl-Yărussălam wi iyyăḍnen tumast n-inăsbăkkaḍăn? 5 Făw, măšan, ăsidătteɣ-awăn daɣ a-s afăl wăr tătubăm, ad-tĕjĕm tamăttant šund-ten-dăɣ jăn." 6 Issăɣlăy-tăn-dd daɣ tangalt tiyyăt dăɣ-hasăn-innă: "Kăla ăddomăt ăhalĕs ašar dăɣ-ašĕkrĕš-net n-lăɣnăb, iwwăḍ-dd ăzzăman n-tirwe-net ɣas, osă-dd i-ad-dăɣ-s ijrĕw a lăn aratăn măšan, wăr t-illa a fălla-s ijraw. 7 Innă i-ănaxdim n-ašĕkrĕš: 'Awătay wa s-kăraḍ da-dăɣ tisăɣ-dd, jarăɣ ăṭṭăma n-ad-ĕjrĕwăɣ aratăn dăɣ-ašar-wa-dăɣ măšan, wăr t-illa a t-dd-ijammăḍăn, ămăra, ăɣtĕs-t-in ed, ăsinăkmăm edăgg bănnan.' 8 Inn'-as ănaxdim: 'Măssi-ɣ, ărheɣ dăɣ-k ad-t-tĕyyĕd tene-ta-dăɣ ɣas, ad-ăɣĕšăɣ dawa-s, ăjăɣ dawa-s ădanda, 9 iha miši s-awătay wa dd-imalăn, ad-ikrĕš aratăn, afăl wăr-ija a-wen, ăɣtĕs-t-in.' " 10 Ašăl iyyăn n-ĕssĕbĕt, isaɣra Ɣisa dăɣ-ehăn n-ăddin wa n-kăl-Ălyăhud. 11 Tĕll'-e dihen tamăḍt lat măraw iwĕtyan d-ĕttam iṭṭaf-tăt alšin tăt-ăsikărănbăyăn har ăbas tăddobăt iqqud n-tebădde-net. 12 Inhăy-tăt Ɣisa, iɣr'-et, inn'-as: "Tamăḍt, ălɣib-năm, tĕbḍed dăr-s." 13 Ăswăr-tăt ifassăn-net, toɣăd tebădde-net ălwăqq-wen-dăɣ, ad-tiimĕl Măssinăɣ. 14 Inhăy ălfăqqi n-ehăn n-ăddin a-s ăzozăy-tăt Ɣisa dăɣ-ašăl n-ĕssĕbĕt ɣas, ijjăš-t ălhăm fălla-s, inna i-tamĕtte: "Ajăn wădden săḍis išilan a t-ĕllanen i-ălxidmăt, tisăt-dd dăɣ-išilan-win-dăɣ, tĕyyĕm-dd ass ašăl wa n-ĕssĕbĕt-i n-tăsonfat." 15 Ăwwežăb-as Ɣisa, inn'-as: "Ălmunafeɣăn, ajăn ih'-iwăn-i s-wădden itir awdes-net meɣ ešeḍ-net dăɣ-ašăl n-ĕssĕbĕt i-ad-t-išrĕj? 16 Ma hawăn-ijrawăn, ad-tĕfhamăm ašăroj n-awdes-năwăn meɣ ešeḍ-năwăn dăɣ-ašăl n-ĕssĕbĕt-i n-tăsonfat, a-s ija a-wen, indar-awăn, ad-tĕfhĕmăm azuzi wa jeɣ i-tahăyawt-ta-dăɣ n-Ibrahim lat măraw iwĕtyan d-ĕttam iṭṭaf-tăt Iblis dăɣ-tišĕm-net." 17 Innă Ɣisa a-wen ɣas, tĕlsa tăkrakiḍt imiksănăn-net iket-năsăn, tăqqăl-dd tamĕtte ĕnta, tăddiiwăt dăɣ-tĕssĕba n-timašalen-ti ăhuskătnen ităjj. 18 Inna Ɣisa daɣ: "Ma dăr-tolăh Tĕmmĕnĕya n-Măssinăɣ? Ma dăr-tăt-mad-sĕssilĕhăɣ? 19 Tolăh d-temătăwt-ta tojărăt tĕmmĕtkit ăddomăt ăwadĕm dăɣ-ašĕkrĕš, tĕdwăl-dd, tăqqăl ahĕšk, ad-ẓattăn igḍăḍ iskak-năsăn dăɣ-ilĕktan-net." 20 Inn'-asăn daɣ: "Ma dăr-e-sĕssilăhăɣ Tĕmmĕnĕya n-Măssinăɣ? 21 Tolăh d-takmĕttet n-tăẓẓa tĕssărtăy tamăḍt d-kăraḍ ănnăfăɣatăn n-ejel n-ălkăma i-ad-ikĕf iket-net." 22 Ifăl Ɣisa dihen ɣas, ăllil iɣărman d-tidbi iket-năsnăt, isaɣra ăddinăt, ija tabarăt ta n-Yărussălam. 23 Igla a-s has-innă ăhalĕs iyyăn: "Ălɣalim, wădden ăddinăt wi maden-ĕjjĕš ălžănnăt, wăr-ĕjjĕtăn?" 24 Innă Ɣisa i-tamĕtte: "Băllănăt i-ad-tĕjjăšăm s-ăṣṣahăt tămudre ta n-tidĕt s-emm wa kărruẓăn făl-a-s, ăsidătteɣ-awăn a-s ăddinăt ăjjootnen, ad-ĕttărăn ujĕš-net măšan, ad-hasăn-indăr. 25 Afăl iɣfăl măssi-s n-ehăn tashărt n-ehăn făll-iman-net, ad-dd-tĕbdĕdăm data-s ad-tăt-takăwkawăm, ɣarrăm-t, jannem-as: 'Măndam, măndam! Arr-anăɣ-in emm n-ehăn' măšan, ad-hawăn-ănn: 'Ălɣafyăt-năwăn, wăr kăwăn-ĕzzeyăɣ, wăr ĕssenăɣ ĕndek siha s-dd-hăm;' 26 tĕnnĕm-as daɣ: 'Ajăn wădden, nohăr dăr-k išĕkša d-isĕswa, tĕssăɣrăd dăɣ-tišarriten n-iɣărman-nănăɣ?' 27 Măšan, ad-hawăn-ănn: 'Ya inăsbăkkaḍăn-i-dăɣ, năkk ya wăr kăwăn-ĕzzeyăɣ, ăjĕjăt-ahi.' 28 Ašăl-wen-dăɣ, ad-tăj tahăla d-aẓĕmmăkărkĕẓ n-isenăn făl tămujriẓt, ed ad-tĕnhĕyăm Ibrahim d-Isxaqq d-Yaqub d-ănnăbităn iket-dăɣ-năsăn ăqqiimăn dăɣ-Tĕmmĕnĕya n-Măssinăɣ, a-s ija a-wen kăwăneḍ, ejer a-hin-mad-tĕtwĕjjĕm dăɣ-žohănnăma." 29 "Ašăl-en, ad-dd-ĕfĕlĕn ăddinăt emăynăj d-atăram d-afălla d-ajus, ănɣĕymĕn dăɣ-amăjaru wa madăn-ăj dăɣ-Tĕmmĕnĕya n-Măssinăɣ. 30 Ašăl-en, ĕnhĕywăt! Wi hănen ajilal, ad-izarăn, wi ăzzarnen, ad-ĕjjĕšăn ajilal." 31 Ohăẓăn-t-dd hărăt dăɣ-kăl-faris, ĕnnăn-as: "He kăyy, jawăḍ făl-a-s, irha Harudĕs ad-ăj iman-năk." 32 Inn'-asăn: "Ăglăt, ănnăt i-isĕm n-ebăgg-di a-s năkk, takkăsăɣ alšinăn dăɣ-ăddinăt, zizuyăɣ ašăl-i-dăɣ d-ašĕkka, ašăl wa s-kăraḍ, ad-imdĕw a-wa hi-išlăn. 33 Ădduuttăt a-s ĕkkeɣ Yărussălăm ašăl-i-dăɣ d-ašĕkka d-ašăl-wen făl-a-s, wăr-ămmukkăn ad-ib' ănnăbi dăɣ-edăgg săl Yărussălam." 34 Innă Ɣisa: "Yărussălam, ya Yărussălam! Tamăskoyt kămm-i tăjjăt iman n-ănnăbităn, hakkăd sămmăjori n-tihun inĕmmušal wi săr-m dd-ăšmašăl Măssinăɣ, ĕndek ɣas a-wa-dăɣ wăr jeɣ dăɣ-utăr n-asdu n-imuzăɣăn-năm šund a-wa tăjj tekăzzit i-ikărtăn-net daw-tafriwen-net măšan, tĕssĕndărăd-ahi. 35 Ămăra, isălan ĕmdăn, ad-kăwăn-ăyy Măssinăɣ d-iman-năwăn, umas aɣrĕm-năwăn timšar, wăr-ilkem ad-hi-tĕnhayăm hundăɣ har ašăl wa d-mad-talĕsăm tĕnna n-a-s: 'Năkfet wa dd-osăn dăɣ-isĕm n-Emăli semɣar.' "
