Luqa 12

1Ḍarăt-a-wen, tăddew-dd tamĕtte-i-dăɣ tăjjet s-Ɣisa har dd-ăqqimăn ăddinăt tinmĕkukulăn. Innă Ɣisa i-inĕṭṭulab-net s-tizarăt: "Ăjăt ĕnniyăt i-tăẓẓa ta n-tĕlmĕnufăɣa n-kăl-faris. 2Wăr t-illa a ăttunkălăn s-wădden ad-dd-infilĕl, wăr t-illa a iffarăn s-wădden ad-dd-iffukkăr. 3A-wen-dăɣ a făl, a tĕnnăm dăɣ-takše-dăɣ, ad-dd-iffukkăr, a tăsmătăktăkăm dăɣ-ammas n-ihănan-năwăn-dăɣ, ad-t-săqqĕyĕn ăddinăt făll-afălla n-ihănan-năsăn." 4"Kăwăneḍ-i n-imidiwăn-in, ĕnneɣ-awăn: wăr tăksuḍăm dăgg-adĕm-i wăren ăddobăt ar tenăɣe n-taɣĕssa-năwăn, wăr t-illa a ăddoben săl a-wen-dăɣ. 5Ăyyăt-ahi ad-hawăn-ăllăɣeɣ ere wa s-tĕlam s-ad-t-tuksaḍăm: Uksaḍăt Măssinăɣ-i inaqqăn, ila daɣ ḍarăt-a-wen tărna s-kăwăn-in-ijăr dăɣ-žohănnăma, tidĕt, ĕnta-en-dăɣ a-s lam s-ad-t-tuksăḍăm! 6Ɣur-wăn, wădden tĕssanăm a-s iba n-tĕfărre n-tošĕmba a făl hin-nazzăn sĕmmos dăɣ-săn sănatăt tammaten? Hakd a-wen-dăɣ, wăr tăn-iha i hin-itatăwa Măssinăɣ, 7wăr tărmeɣăm, wăla amẓadăn n-eɣăf-năwăn, ăḍinăn, tojărăm abrĕk n-igḍaḍ ălqim. 8Ălleɣeɣ-awăn a-s ere ăsjăyhăn dăgg-adĕm a-s năkk a t-ilăn, ad-ăjjayhăɣ năkk-dăɣ i n-Ăgg-ăgg-adĕm dat-ănjălosăn n-Măssinăɣ a-s ăwadĕm-en, i-nin. 9Ere daɣ wa hi-ăkkuddălăn dat-dăgg-adĕm, ad-t-ĕkkuddĕlăɣ năkk-dăɣ dat-ănjălosăn n-Măssinăɣ. 10Ere innăn a lăbasăn dăɣ-isălan n-Ăgg-ăgg-adĕm-dăɣ, ăddobăt ad-ijrĕw tenăšše n-a-wen măšan, ăwadĕm wa ăskafărăn dăɣ-isălan n-Unfas Šăddijăn, wăr-ilkem ad-has-in-ătiwănša. 11Afăl tămewăyăm s-ăššăreɣa dăɣ-ihănan n-ăddin wi n-kăl-Ălyăhud, meɣ daɣ dat-kăl-ăššăreɣa d-ĕlxĕkum, wăr kăwăn-ităšăwwašet ĕmmĕk wa s-mad-tĕhĕlĕm iman-năwăn wăla a-wa mad-tĕnnĕm, 12afăl ălwăqq wa d-tamăjradăm, Unfas Šăddijăn a kăwăn-e-isăɣrĕn ăssaɣăt-wen-dăɣ a-wa s-ănihăjja s-ad-tăn-tĕnnĕm." 13Ijanna Ɣisa a-wen-dăɣ a-s dd-iggăd ăwadĕm iyyăn dăɣ-tamĕtte, inn'-as: "Ălɣalim, ănn i-ă/n/na-ɣ a dăr-i uẓan tăkasit-nănăɣ." 14Inn'-as Ɣisa: "Ăhalĕs, mi hi-ijăn ălqa/l/li-năwăn tuẓanăɣ-awăn tăkasit." 15Inna Ɣisa i-tamĕtte ḍarăt-a-wen: "He kăwăneḍ! Agĕẓăt iman-năwăn dăɣ-tărha n-hărăt făl-a-s, ăgg-adĕm, kud-ila hărăt-dăɣ, wădden ărrĕzăɣ-net a iḍmanăn tămudre-net." 16Issăɣlăy-tăn tangalt, inn'-asăn: "Kăla t-illa ăhalĕs n-amărrĕzăɣ ilan išĕkraš has-dd-izajjăr ălfăyda măqqoorăn. 17Inhăy a-s ibbăɣăr hullan ɣas, iqqăl-dd ad-ijanna i-iman-net: 'Năkk-i-dăɣ, ma mad-ăjăɣ, ăbas leɣ edăgg ăwwayăn ĕttăɣam-in?' 18Ij' ăddăbara i-iman-net, innă: 'Ad-ărẓăɣ ijăndăn-in, sădĕyăɣ i tăn-ojărnen, sădwăɣ dăɣ-săn ălkăma-nin d-a-wa leɣ iket-net, 19dihen, ad-ănnăɣ i-iman-in: Ya iman-in, sunfăt, tĕkšĕm, tĕzhĕm dăɣ-tănoflayt, itwar-awăn ărrĕzăɣ madăn-ăj iwĕtyan ăjjootnen.' 20Diha-dăɣ d-issĕmda tĕnna n-a-wen, ad-has-innă Măssinăɣ: 'Isĕm n-enĕbbeddĕl, ad-kăy-iba ehăḍ-i-dăɣ, ɣas mi madăn-ikus a-wa ăjjen tăsdăwăd?' 21Šund a-wen-dăɣ a madăn-irmĕs ere ijmarăn iman-net wăr-ikĕttĕw Măssinăɣ." 22Innă Ɣisa ḍarăt-a-wen i-inĕṭṭulab-net: "A-wen-dăɣ a făl hawăn-janneɣ: wăr kăwăn-jărrăwnet inĕzjam n-a-wa mad-tĕkšĕm d-a-wa mad-tĕswĕm d-a-wa mad-tĕlsĕm. 23Iman-năwăn, ojărăn tetăte; ăssexăt n-taɣĕssa-năwăn daɣ, ojăr isĕlsa. 24Ǝkyĕdăt ɣas dăɣ-iẓuyaj, wăr tĕdumun, wăr tĕjlubun, wăr len timšiten wăla ijăndăn măšan, ăssodăr-tăn Măssinăɣ, tufăm-tăn s-a ăjjeen. 25Ǝndek ɣas dăɣ-wăn wa ăddoben s-inĕzjam-net, ad-isiwĕḍ taɣrĕst-net wăla s-a ogdăhăn d-emm n-asĕnnan? 26Šămad a ogdăhăn d-a-wen-dăɣ tĕmmĕtkit wăr t-tăddobem, adiš ma dăɣ-toẓarăm dăɣ-a-wa săl a-wen? 27Ǝkyĕdăt ɣas dăɣ-tadăwla n-tăboyt: wăr ẓĕtt, wăr ẓĕmmĕy măšan, wăl' ămănokal Sulăyman hakd terše-net iket-net, wăr kăla ojăr tăboyt-i-dăɣ asĕssihăɣ n-ašăl. 28Ɣas kunta Măssinăɣ isalsa teyĕšše n-išĕkraš s-ašăl-i-dăɣ tĕbdaj, ašĕkka ad-hin-tărɣ dăɣ-efew s-ĕmmĕk-wen-dăɣ, ăb' ăṭṭăma n-ad-wăr hawăn-iẓẓĕẓmăy kăwăneḍ. Tĕmmĕtkit ija immun-năwăn! 29Wăr kăwăn-daggăẓnet inĕzjam n-a-wa mad-tĕkšĕm d-a-wa mad-tĕswĕm. 30Hărătăn-win-dăɣ, kăl-ăddunya a ɣallăbăn. Kăwăneḍ, Abba-năwăn-i ihăn išĕnnawăn, wăr t-illa a-s tămiɣatărăm s-wădden, issan-t. 31Ǝmmăɣăt s-tizarăt i-Tĕmmĕnĕya n-Măssinăɣ, dihen, ad-hawăn-in-iwwaḍ a-wa iyyăḍăn. 32Tahrut-in ta ĕnḍărrăt, wăr tărmeɣăm făl-a-s, irha Abba-năwăn, ad-ăj Tĕmmĕnĕya-net dăɣ-ifassăn-năwăn, 33tužžărăt-in a-wa lăm, tĕktĕm-t i-tilăqqiwen, tĕjĕm i-iman-năwăn aẓrĕf iɣlalăn d-ijăndăn s-wăr-iɣĕššĕd a-wa dăɣ-săn itwărăn ed išĕnnawăn, wăr tăn-hen imăkrăḍăn wăla temedhe. 34Tidĕt-dăɣ a-s inĕzjam n-ulh n-ăwadĕm, wăr tĕffilăn dihad itwăr tĕla-net." 35"Ɣaymăt tasidăwăm, tĕjbasăm, tăssirɣăm tiftĕl-năwăn. 36Alăhăt d-inaxdimăn ĕqqalnen i-măssi-săn dd-ifalăn aẓli s-tišrayăt n-ehăḍ s-ad-dd-itis ɣas, oran-as emm n-ehăn. 37Tĕnḍĕḍ i-eklan-en-dăɣ dd-mad-agĕẓ măssi-săn okayăn ăssaɣăt s-tăn-dd-osa-dăɣ. Ăsidătteɣ-awăn a-s afăl tăn-dd-osa, ad-ijbĕs ĕnta iman-net, isăqqaym'-en, isĕmmĕnsĕw-tăn. 38Jer-iqqăl-dd s-tišrayăt n-ehăḍ wăla s-emăɣăr, tĕnḍĕḍ i-inaxdimăn-wi dd-mad-agĕẓ okayăn. 39Wădden kăwăneḍ iman-năwăn tĕssanăm a-s ĕnnăr issan măssi-s n-ehăn ăssaɣăt wa s-t-dd-itis emăkrăḍ s-ehăḍ i-ad-ărẓ ehăn-net, iket-di, wăr-itĕṭṭĕs i-ad-has-ărẓ emăkrăḍ ehăn-net. 40Kăwăneḍ-dăɣ, ɣaymăt tăsidăwăm, tăɣtafăm ed Ăgg-ăgg-adĕm, ad-dd-ass s-ăssaɣăt d-wăr fălla-s jem." 41Iggăd-dd Bĕṭrus, innă i-Ɣisa: "Ălɣalim, năkkăneḍ ɣas a tăssiɣlăyăd tangalt-ta-dăɣ meɣ nohar-tăt d-ăddinăt-wi iyyăḍnen?" 42Inn'-as ălɣalim Ɣisa: "Ǝndek ănaxdim wa n-ăgg-ărkăwăl ijrahăn hărăt? Ǝnta-en-dăɣ a mad-isăɣlĕf măssi-s ehăn-net i-ad-ituẓan imĕnsiwăn i-inaxdimăn-wi iyyăḍnen. 43Tĕnḍĕḍ i-akli wa dd-mad-agĕẓ măssi-s ăddunkăt dăɣ-ălxidmăt wa dăɣ-t ija, ălwăqq s-t-dd-osa-dăɣ. 44Ăsidătteɣ-awăn a-s wen ĕnta, ad-t-isăɣlĕf măssi-s ehăre-net iket-net 45măšan, ănaxdim wa innăn dăɣ-iman-net: 'Năkk, măssi-ɣ ăhoja-hin făll-i', oḍa ḍarăt-a-wen dăɣ-inaxdimăn d-tinaxdimen ti iyyăḍnen, ad-tăn-itĕggat, itatt, isass ĕlxĕmăr har t-ijmăḍ ĕnniyăt, 46ănaxdim-en, ilkam ad-t-dd-iɣdăr măssi-s dăɣ-ašăl d-ăssaɣăt d-wăr fălla-s ija, ilmĕd s-erk ĕššăɣĕl wa t-išlăn a ija a-wa-dăɣ; afăl t-dd-osa, ad-t-iqquzzĕbĕt, isărtĕy-t d-inămăšrayăn dăɣ-edăgg wăr-iha ar tahăla d-aẓĕmmăkărkĕẓ n-isenăn făl tămujriẓt. 47A-wen-dăɣ a făl ănaxdim-wa issanăn erhet n-măssi-s, ăqqima wăr t-ija, ĕlkamnăt dăɣ-s tiwit ăjjootnen 48măšan, ănaxdim-wa wărăn issen erhet n-măssi-s, ija a wărăn oɣed, ad-ijrĕw tiwit wăren ĕjjĕt. Ere ijrawăn a ăjjen, ad-dăɣ-s itwĕttar a ăjjeen, ere iɣlafăn a măqqoorăn, ad-dăɣ-s itwĕttar daɣ ad-dd-ikkĕs a măqqoorăn." 49Inn'-asăn Ɣisa ḍarăt-a-wen: "Oseɣ-dd i-ad-sărɣăɣ efew făll-ăkall, ăsidărhănăɣ a-s ăru d-irɣa. 50Ilkam dăɣ-i atwĕsĕlmaɣ s-wăr mad-sunfăɣ făw wăr-ija. 51Ak tăɣelăm ălɣafyăt a-s dd-oseɣ i-ad-t-ăkfăɣ i-ăkall? Ăbo, ĕnneɣ-awăn, tăbĕḍḍawt a săr-s dd-ăwwăyăɣ. 52Ɣur-ašăl-i-dăɣ, wăla-dăɣ ehăn han sĕmmos ăddinăt, ad-ĕnmĕkšărăn jer-iman-năsăn, ad-ĕššunjun wi n-kăraḍ wi n-ĕssin, ĕššunjun daɣ wi n-ĕssin wi n-kăraḍ. 53Ad-ibḍĕw abba d-rure-s, ibḍĕw alyaḍ d-ti-s, tĕbḍĕw anna d-elle-s, tĕbḍĕw talyaḍt d-ma-s, tĕbḍĕw taḍăggalt d-hănne-s n-rure-s, tĕbḍĕw tamăḍt d-taḍăggalt-net." 54Innă Ɣisa daɣ i-tamĕtte: "Wădden e-d tĕnhăyăm tejărăkt tĕzjar-dd s-emăynăj, ad-tĕnnĕm: 'Os'-anăɣ ajĕnna', ăj a-wen s-ĕmmĕk-wa-dăɣ s-tăn-tĕnnăm; 55e-d tĕnhăyăm daɣ aḍu wa dd-ihan s-afălla, ad-tĕnnĕm: 'Ilkam dăɣ-năɣ ašăl ăkkuusăn', ăj a-wen s-ĕmmĕk-wa-dăɣ s-tăn-tĕnnăm. 56Ălmunafeɣăn a tămoosăm! Kăwăneḍ-i ĕssănnen teɣăre n-išmal wi n-išĕnnawăn d-ăkall, uhĕn-dăɣ, indar-awăn ad-tĕfhĕmăm ăzzăman wa fălla-wăn ijăn ašăl-i-dăɣ. 57Mafăl wăr tăddobem ad-tĕlmĕdăm ɣur-iman-năwăn iji n-a-wa olăɣăn? 58E-d kăy-iɣra ere kăy-ăsiwărăn uḍlem s-ăššăreɣa, ĕttăr ĕmmĕk s-dăr-s tănmăknăd hărwa wăr hin-tăwweḍăm ehăn wa n-ăššăreɣa, dihen, wăr mad-kăy-irmĕs ăgg-ăššăreɣa, ăj'-ik dăɣ-ifassăn n-ĕlxĕkum ed, ĕlxĕkum afăl tĕjjăšăd ifassăn-net, ad-kăy-ăj dăɣ-takărmut. 59Ăsidătteɣ-ak a-s edăgg-en, wăr mad-t-dd-tĕzjărăd a tĕkkăsăd wăr ẓelăd har tămma ta kăy-irwăs."

will be added

X\