1 Ašăl iyyăn, itĕddal Ɣisa Măssinăɣ dăɣ-edăgg iyyăn, issĕmdă ɣas, inn'-as iyyăn dăɣ-inĕṭṭulab-net: "Ălɣalim, sĕlmĕd-anăɣ tamădilt n-Măssinăɣ šund a-wa ija Exya i-inĕṭṭulab-net." 2 Inn'-asăn ḍarăt-a-wen: "E-d tĕddalăm Măssinăɣ, ănnăt: 'Abba, sĕmɣărnet ăddinăt isĕm-năk wa šăddijăn, taset-dd Tĕmmĕnĕya-năk, 3 ăkf'-anăɣ hak ašăl isudar-nănăɣ, 4 ănš-anăɣ ibăkkaḍăn-nănăɣ ed năkkăneḍ-dăɣ, nĕnašš i-wi hanăɣ-ḍallămnen, wăr toyyed Iblis ăžžurrăbăt-anăɣ, isiḍĕw-anăɣ dăɣ-abăkkaḍ.' " 5 Inn'-asăn daɣ: "Tĕssanăm kăwăneḍ iman-năwăn a-s afăl dăɣ-wăn ila iyyăn amidi har t-osa s-ammas n-ehăḍ, inn'-as: 'Amidi-nin, ĕffĕd-ahi-dd kăraḍăt tijĕlwen 6 făl-a-s leɣ amidi-nin s-iket dd-osa ifal-dd asikĕl, ăzzubbăt ɣur-i, wăr-ĕleɣ a t-ĕššĕkšăɣ', 7 tĕssanăm a-s wăr has-mad-ănn amidi-net: 'Wăr hi-tăsɣăfăd, ăbas ăddobeɣ tanăkra, ehăn iɣfal ămăra-dăɣ, aratăn daɣ ĕnsan.' 8 Ălleɣeɣ-awăn a-s kud-dăɣ wăr ibded i-ad-t-ăkf a-wa dăɣ-s ittăr dăɣ-idĕm n-tĕmmidĕwa ta n-jere-săn, ad-has-t-ăkf făl tĕssĕba n-tăkrakiḍt ta mad-has-umas a-wen afăl ĕslăn ăddinăt i-tăkunt ta ija. 9 Ǝnneɣ-awăn: ădĕlăt Măssinăɣ, ad-kăwăn-ăkf, ĕmmăɣăt, ad-tĕjrĕwăm; ăɣrăt-t, ad-hawăn-ăkawăn. 10 Ere idălăn, ad-ikrĕš, ere immăɣăn, ad-ijrĕw; ere iɣrăn Măssinăɣ dăɣ-tămăɣatert t-tărmasăt, ad-has-tăt-ikkĕs. 11 Ǝndek abba dăɣ-wăn wa s-e-d t-idăl rure-s dăɣ-emăn, ad-t-ăkf taššălt? 12 Meɣ ĕndek wa s-e-d t-idăl dăɣ-tekăkit, ad-t-ăkf teẓerdĕmt? 13 Ɣas kunta kăwăneḍ-i n-inăllăbăsăn, tĕssanăm isuf n-a-wa olăɣăn i-aratăn-năwăn, ăb'-ăṭṭăma n-ad-wăr kăwăn-ikfa Abba-năwăn-i ihăn išĕnnawăn Unfas Šăddijăn, afăl t-dălăm dăɣ-s." 14 Ikkăs Ɣisa ḍarăt-a-wen dăɣ-ăhalĕs iyyăn alšin has-igdalăn măjrăd, izjăr-t alšin, immĕjrăd ɣas, ămoos a-wen tăkunt i-ăddinăt. 15 Ad-jannen iyyăḍ dăɣ-săn: "A-wa tărna n-Abălzăbil, Iblis wa n-ămănokal n-alšinăn a-s itakkăs alšinăn dăɣ-ăddinăt." 16 Ǝttărăn wi iyyăḍnen ad-t-arĕmĕn, ĕnnăn-as: "Ăj data-năɣ iji n-Măssinăɣ hanăɣ-issĕtbătăn a-s tidĕt-dăɣ a-s, Măssinăɣ a kăy-dd-ăšmašălăn." 17 Ilmăd Ɣisa ɣur-iman-net a-wa ihăn ĕnniyăt-năsăn, inn'-asăn: "E d t-illăm ĕddĕwĕl s-dd-ĕqqălăn mĕssaw-s ĕknasăn jer-iman-năsăn, ad-t-iba; ehăn daɣ wa s-dd-ĕqqălăn mĕssaw-s ĕknasăn jer-iman-năsăn, ad-ănd. 18 Afăl-dd iqqăl Iblis iknas imĕššerĕkăn-net, ĕndek ĕmmĕk wa s-e-tăhaj tĕmmĕnĕya-net? Wădden tĕnnăm năkk, tărna ta n-Abălzăbil a-s takkăsăɣ alšinăn dăɣ-ăddinăt? 19 Kunta daɣ a-wa jănnem tidĕt, adiš inĕṭṭulab wi-năwăn ĕntăneḍ, mi tăn-ikfăn tărna ta s-takkăsăn alšinăn dăɣ-ăddinăt? Inĕṭṭulab-năwăn en-dăɣ a-s ilkam ad-ăjjayhĕn fălla-wăn, sĕḍlĕmăn-kăwăn. 20 Măšan, kunta năkk, tărna n-assĕkăḍ n-Măssinăɣ a-s takkăsăɣ alšinăn, adiš Tĕmmĕnĕya n-Măssinăɣ, tĕll'-e jere-wăn. 21 A ikk' ăhalĕs n-anăkfor ijbas făll-tăẓoli-net, iɣlaf ehăn-net, ad-ogaẓ ehăre-net 22 măšan, afăl fălla-s dd-oḍa ere t-ojărăn ăṣṣahăt, ad-t-ărn, ahăɣ dăɣ-s tăẓoli-net ta făll-ăsifălla, uẓan ḍarăt-a-wen ehăre-net. 23 Ǝlmĕdăt a-s ere hi-wărăn irha-dăɣ, a-di, ašănjo-nin; ere daɣ wa hi-wărăn itilal s-asdu, ašĕmmăhĕš ɣas a t-išlan. 24 E-d izjăr alšin ăwadĕm, ad-ăkk tinariwen i-ad-dăɣ-snăt immăɣ i-edăgg dăɣ-ăssunfa, afăl has-t-ăba, ad-ănn i-iman-net: 'Năkk-i-dăɣ, ma hi-idgaẓăn, ăqqĕlăɣet ɣas ehăn-in wa dd-fălăɣ.' 25 Afăl dd-iqqăl edăgg wa ifăl s-tizarăt, ad-t-dd-ass ifraḍ, ămmujnăt. 26 Iglĕw ălwăqq-wen, awĕy-dd ĕssa alšinăn t-ojărnen tăllăbăst, ĕjjĕšăn ăwadĕm-ĕnnin-dăɣ, ĕzzăɣăn dăɣ-s; umas a-s talɣa n-ăwadĕm-en ta tăzzarăt, tĕššăm i-ta tĕšrăyăt." 27 Ămmiijrăd Ɣisa dihen-dăɣ a-s tĕḍkăl tamăḍt tiyyăt emăsli-net dăɣ-tamĕtte, tĕnn'-as: "Tĕnḍĕḍ i-tăsa ta dd-tĕzjărăd, tĕnḍĕḍ i-ifăfan-wi tĕṭṭăḍăd." 28 Inn'-as Ɣisa: "Ănn-ak, tĕnḍĕḍ i-wi sajadnen i-măjrăd n-Măssinăɣ, tamašalăn a-wa inna." 29 Inhăy Ɣisa a-s tidawăn-dd săr-s ăddinăt ɣas, inn'-asăn: "Ǝzzurĕyăt-ta-dăɣ, tenăllăbăst, wăr tĕmmăɣ ɣas ar ad-ĕtwĕjjĕn ijităn n-Măssinăɣ data-s măšan, tĕlmĕdet a-s wăr dăɣ-s ilkem iji n-Măssinăɣ săl wa n-ănnăbi Yunĕs. 30 Ǝmmĕk wa s-kăla săr-s ămoos Yunĕs iji n-Măssinăɣ i-kăl-Nĕniba a-s ija kăraḍ išilan dăɣ-tăsa n-emăn, ĕmmĕk-wen-dăɣ daɣ a-s mad-umas Ăgg-ăgg-adĕm iji n-Măssinăɣ i-ĕzzurĕyăt-ta-dăɣ. 31 Ašăl wa n-tebădde, ad-dd-tĕnkăr tămănokalt ta s-kăla tăxkăm făll-ăkall wa n-ajus s-isĕm-net Saba, tăjjayh făll-kăl-ăzzăman-i-dăɣ, sĕḍlĕm-tăn ed, ĕnta făl-dd diha dd-imda ăkall i-ad-sĕjĕd i-imĕjridăn n-sărho wi ităjj ămănokal Sulăyman. Săjdăt! Ašăl-i-dăɣ, ĕnhĕywăt-ak, ill'-e jere-wăn ere ojărăn ămănokal Sulăyman măšan hakd a-wen-dăɣ, tunjăyăm s-asjĕd-has. 32 Ašăl wa n-tebădde, ad-dd-ĕnkărăn kăl-aɣrĕm wa n-Nĕniba, sĕḍlĕmăn kăl-ĕzzurĕyăt-ta-dăɣ ed ašăl wa d-hasăn-ixṭăb ănnăbi Yunĕs, ătubăn. Săjdăt! Ašăl-i-dăɣ, ĕnhĕywăt-ak, ill'-e jere-wăn ere ojărăn Yunĕs măšan hakd a-wen-dăɣ, tunjăyăm s-ad-tutabăm." 33 "Wăr t-illa ere isarmasăn tefătelt tĕzzar iffăr-tăt meɣ tăt-ija daw-ăkoss, ănn-ak, aswăr a tăt-itajj edăgg iḍkalăn i-ad-hannăyăn ăddinăt wi dd-tajjăšnen ehăn ănnur-net. 34 Tiṭṭ-năk a-s tefătelt n-taɣĕssa-năk. Afăl toolaɣ tiṭṭ-năk, adiš taɣĕssa-năk, hannăy iket-net măšan, afăl wăr toleɣ tiṭṭ-năk, taɣĕssa-năk iket-net a ihan tihay. 35 Ɣas he kăyy! Ăj ĕnniyăt i-iman-năk, wăr-itumaset ănnur-năk tihay i-taɣĕssa-năk. 36 Afăl ha taɣĕssa-năk iket-net ănnur, wăr tăt-iha făw a ihan tihay, ad-tajjăd ahănay wa tăjjăd afăl hed edăgg tăsimălăwlăw tefătelt." 37 Issĕmdă Ɣisa măjrăd ɣas, issĕkl'-e u-faris iyyăn ɣur-iman-net. Osă-dd Ɣisa ehăn n-u-faris ɣas, ikk' edăgg wa dăɣ-ĕskarăn imĕnsiwăn, ăsɣămăr dăɣ-s. 38 Ăkun u-faris dăɣ-a-wa s-issĕnta Ɣisa tetăte wăr-ăsserăd ifassăn-net s-ălxal wa n-kăl-Ălyăhud. 39 Inn'-as ălɣalim Ɣisa: "Kăwăneḍ-i n-kăl-faris, šašdajăm afălla n-kara d-ikassăn wi iyyăḍnen, a-s ija a-wen, ammas n-ulhawăn-năwăn, wăr-iḍney ar tikra d-tăllăbăst. 40 Tidĕt-dăɣ a-s irmas-kăwăn iba n-tayĕtte! Ajăn wădden wa dd-ijăn afălla n-ăkoss, ĕnta daɣ a dd-ijăn ammas-net? 41 Ăktăt a-wa ihăn karatăn-năwăn d-ikassăn-năwăn i-tilăqqiwen, dihen, ad-data-wăn išdaj hărăt iket-net. 42 Imĕskay kăwăneḍ-i n-kăl-faris! Hakkăm s-iqqud a-wa ămoosăn tămukăst-năwăn dăɣ-ĕnnăɣnaɣ d-tiyĕššawen-ti iyyăḍnen, a-s ija a-wen, tĕšlalăm-in făll-a-wa ămoosăn iqqud d-tărha n-Măssinăɣ, hărătăn-win-dăɣ a-s ăniihăjja a-s tĕssĕntăm săr-săn, sĕlkĕmăm-asăn amišĕl n-wi iyyăḍnen olăɣnen. 43 Imĕskay kăwăneḍ-i n-kăl-faris! Tărham tisăqqima ti ănnuflăynen dăɣ-ihănan n-ăddin wi n-kăl-Ălyăhud, ijraẓ-awăn ad-hawăn-tajjăn ăddinăt isofan dăɣ-tišarriten. 44 Imĕskay-năwăn făl-a-s, tolăhăm ɣas d-tiẓĕska făll-irajjăš ăwadĕm wăr-issen s-a-wen, sĕmmĕḍĕsnăt-t." 45 Inna iyyăn dăɣ-ălɣulam n-Ăṭṭăwrăt i-Ɣisa: "Ălɣalim, kăyy ya năkkăneḍ-dăɣ, jed-anăɣ erk măjrăd." 46 Inn'-as Ɣisa: "Imĕskay kăwăneḍ-dăɣ ălɣulam n-Ăṭṭăwrăt! Sawarăm ăddinăt ăẓuk s-iẓẓĕwăt aggay-net, a-s ija a-wen, wăr kăwăn-iha ad-hasăn-tilalăm s-aggay-net wăla-dăɣ s-emm n-assĕkăḍ. 47 Imĕskay kăwăneḍ-i tĕqqašnen iẓĕkwan ăhuskătnen i-ănnăbităn wi ănɣăn abbatăn-năwăn. 48 Ǝmmĕk-wen-dăɣ a-s saknem a-s tărḍam s-a-wa jăn ed ĕntăneḍ, ănɣăn-tăn, kăwăneḍ ɣăšăm iẓĕkwan-năsăn. 49 A-wen-dăɣ a făl inna Măssinăɣ dăɣ-tĕmɣăre n-sărho-net: 'Ad-săr-săn-dd-šĕmmišĕlăɣ ănnăbităn d-inĕmmušal ăjjootnen, ad-ĕjĕn iman iyyăḍ dăɣ-săn, ăqquzzĕbun wi iyyăḍnen.' 50 Han iman n-ănnăbităn wi ăba ɣur-sănto n-ăddunya har ašăl-i-dăɣ dăɣ-kăl-ĕzzurĕyăt-ta-dăɣ, 51 issĕntă-dd a-wen ɣur-iman wi n-Xăbălla-i ăba s-tizarăt făll-ăkall-i-dăɣ har iman wi n-Zăkărya wa n-ămănokal n-kăl-tikutawen wa išrăyăn s-inɣăl ašni-net dăɣ-ehăn n-ămudd wa măqqărăn, jer-edăgg wa n-tikutawen d-edăgg wa šăddijăn. Tidĕt, ăssiilmădăɣ-kăwăn a-s ăddinăt-win-dăɣ, ĕḍmanăn iman-năsăn iket-dăɣ-năsăn dăɣ-kăl-ĕzzurĕyăt-ta-dăɣ. 52 Imĕskay kăwăneḍ-i n-ălɣulam n-Ăṭṭăwrăt! Tĕṭṭafăm asăyar wa n-musnăt măšan, wăr lĕmmĕdăm, ăddinăt daɣ wi ărhănen almud, tĕnkaẓăm-asăn-t." 53 A-s ifăl Ɣisa ehăn-ĕnnin-dăɣ, samădadăn ălɣulam d-kăl-faris fălla-s, tajjăn-as isĕstanăn ăjjootnen 54 dăɣ-otasăn ad-t-sĕwwĕnnĕn a wărăn oɣed, i-ad-ĕjrĕwăn ăsaru s-t-ĕssĕḍlămăn.
