Luqa 10

1Ăsnăfrăn ălɣalim Ɣisa ḍarăt-a-wen, ĕssayăt timĕrwen n-ănăṭṭalib d-ĕssin, ăšmašăl-tăn s-ĕssin-ĕssin i-ad-has-izarăn s-idăggan wi s-ikittĕw ad-tăn-immăr. 2Inn'-asăn: "Ašĕkrĕš ăggolăt, ĕttăɣam ijjĕt măšan, wăr-ĕjjĕtăn inaxdimăn t-olăynen, ădĕlăt măssi-s n-ašĕkrĕš i-ad-dd-išĕmmišĕl inaxdimăn olăynen ašĕkrĕš-net. 3Săjdăt! Ăglăt, ăšimašălăɣ-kăwăn i-ad-talăhăm d-ikĕrwatăn ĕllanen jer-tiɣĕs. 4Wăr tiwĕyăt ăẓrĕf, wăla šăkkoš, wăla tifădelen, wăr kăwăn-šĕllunet isofan dăɣ-tabarăt. 5Ehăn tĕjjăšăm-dăɣ, ăjrăt fălla-s ăssălam s-tizarăt. 6Kunta ehăn-en, izzaɣ-t ăgg-ălxer, ad-kăwăn-isĕbbărrĕk, ăns fălla-s ălxer-năwăn, kunta daɣ wăr t-iha ăgg-ălxer, adiš, akĕyăt d-ălxer-năwăn. 7Afăl tĕjrăwăm ehăn wa n-ăgg-ălxer, ĕzzăɣăt dăɣ-s, tĕkšĕm, tĕswĕm a-wa kăwăn-mad-ăkf măssi-s făl-a-s, hak ănaxdim-dăɣ, ărhuj-as ălxaqq n-tide-net, udaɣăt i-tikawt jer-ihănan. 8Aɣrĕm tosăm-dăɣ, ăsbărrăkăn-kăwăn mĕssaw-s, ăkšăt a-wa s-kăwăn-mad-sĕmmĕjurun, 9zuzĕyăt imarhinăn-năsăn, tĕnnĕm i-mĕssaw-s: 'Tĕmmĕnĕya n-Măssinăɣ, tohăẓ-kăwăn-dd' 10măšan, aɣrĕm tosăm, wăr kăwăn-ăsbărrăkăn mĕssaw-s, ilalăt tišarriten-net, tĕnnĕm i-mĕssaw-s: 11'Tăjjĕyhăm a-s wăla-dăɣ ăboqqal n-aɣrĕm-năwăn wa iwărăn iḍarăn-nănăɣ, năbbikbăk-in măšan, ĕlmĕdăt a-s Tĕmmĕnĕya n-Măssinăɣ, tohăẓ-dd.' 12Ǝnneɣ-awăn a-s ašăl wa ilkămăn, ad-tajăr tisnant ta madăt-tărmĕs aɣrĕm-en-dăɣ, ta tărmăsăt aɣrĕm wa n-Sodoma." 13"Imĕskay kăl-Qorazin, imĕskay kăl-Băṭsăyda! Ălmăṣṣibăt ɣas a fălla-wăn madăn-iḍĕw ed ĕnnăr iɣărman wi n-Tir d-Săyda ĕzzăɣăn inĕẓẓulam a dăɣ-jănăt tikunen-ti-dăɣ jănen ɣur-wăn, ăru d-ĕlsăn šakutăn, ĕblĕnbulun dăɣ-eẓĕd făl tĕmɣăre n-tătubt-năsăn. 14A-wen-dăɣ a făl ašăl wa ilkămăn, ad-kăwăn ijjĕš ăddăyyăt ojărăn wa ijjăšăn iɣărman wi n-Tir d-Săyda. 15Kăwăneḍ-i-š-i ĕzzăɣnen aɣrĕm wa n-Qăfărnaxum, ma tăɣelăm? Tordam a-s ad-itimɣar aɣrĕm-năwăn har awĕḍ išĕnnawăn? Xăram-awăn! Ănn-ak, ad-tĕhĕlĕm ider, wăr kăwăn-dd-e-awăɣ ar temse." 16Innă daɣ Ɣisa i-inĕṭṭulab-net: "Ere hawăn-ăsjădăn, năkk a-s ăsjăd, wa kăwăn-irfăḍăn, năkk a irfăḍ, ere daɣ wa hi-irfăḍăn, wa hi-dd-ăšmašălăn a irfăḍ." Issĕmdă Ɣisa măjrăd ɣas, issĕglă inĕṭṭulab-net i-ad-hin-sĕssiwĕḍăn ămašal-net. 17Ǝglăn inĕṭṭulab wi n-ĕssayăt timĕrwen d-ĕssin, a-s dd-ĕqqălăn ĕknan dăɣ-tedăwit. Osăn-dd ɣas, ĕnnăn-as: "Ălɣalim, wăl' alšinăn, rakkăɣăn-anăɣ e-d hasăn-năɣra isĕm-năk." 18Inn'-asăn: "Hannăyăɣ Iblis har dd-ătrăkkăt dăɣ-išĕnnawăn šund essam. 19Ǝlmĕdăt a-s ĕkfeɣ-kăwăn tărna făll-taššălen d-tiẓerdĕmen d-a-wa ila Iblis dăɣ-tărna iket-net, wăr t-illa făw a ăddooben ad-hawăn-iɣšĕd hărăt 20măšan, wăr kăwăn-isădăwatet a-wa s-data-wăn rakkăɣăn alšinăn, ănn-ak, isĕddĕwĕtet-kăwăn a-wa s-ĕktăbăn ismawăn-năwăn dăɣ-išĕnnawăn." 21Tăsdăwăt tărna n-Unfas Šăddijăn Ɣisa ălwăqq-wen-dăɣ, innă: "Abba, kăyy-i n-Emăli n-išĕnnawăn d-ăkall, timĕlăɣ-kăy făl-a-s hărătăn-wi-dăɣ, tĕffărăt-tăn i-imĕssorha d-imusănăn n-ăddunya-ta-dăɣ măšan, tăsnăfalălăd-tăn-dd wăla i-aratăn. Tidĕt Abba, kăyy a timĕlăɣ ed ădduuttăt a-s ĕnta-den-dăɣ erhet-năk wa ăhusken. 22Wăr t-illa a-s wădden ij'-e Abba-nin dăɣ-ifassăn-in, wăr t-illa ere hi-ijan muzĕyăt imdan kunta wădden Abba, wăr t-illa daɣ ere ijan muzĕyăt imdan i-Abba kunta wădden năkk-i n-Rure-s-i t-dd-ifălăn d-ere wa s-ărheɣ ad-has-t-zuzĕyăɣ." 23Innăḍ-dd Ɣisa ḍarăt-a-wen s-inĕṭṭulab-net, ikkăs-tăn-dd s-takše, inn'-asăn: "Tĕnḍĕḍ i-tiṭṭawen ti hannăynen a-wa hannăyăm! 24Ăssiilmădăɣ-kăwăn a-s ăsdărhănăn ănnăbităn ăjjootnen d-imănokalăn ahănay n-a-wa hannăyăm măšan, wăr t-ĕnheyăn, ăsdărhănăn măsăllăt n-a-wa s-sallăm măšan, wăr has-ĕslen." 25A ĕnḍărrăn ălɣalim n-Ăṭṭăwrăt iyyăn da-dăɣ dd-inkărăn, ija i-Ɣisa asĕstan dăɣ-otas irrum-net, inn'-as: "Ălɣalim, ma s-leɣ s-ad-t-ăjăɣ i-ad-ĕkkusăɣ tămudre ta tăɣlălăt?" 26Inn'-as Ɣisa: "Ma iktabăn dăɣ-Ăṭṭăwrăt, ma dăɣ-s tăɣred?" 27Inn'-as ălɣalim, iktab dăɣ-s a-s: "Ad-tărhĕd Emăli-năk Măssinăɣ s-ulh-năk imda, tărhĕd-t s-iman-năk ĕmdan, d-ăṣṣahăt-năk imda d-tayĕtte-năk tĕmda, tărhĕd daɣ ănhăraj-năk s-ĕmmĕk wa s-tărhed iman-năk." 28Inn'-as Ɣisa: "Toɣadăd, ăj a-wen, ad-tĕddărăd." 29Măšan irha ălɣalim-en ad-ikrĕš tidĕt ɣas, innă daɣ i-Ɣisa: "Mi ămoosăn ănhăraj-in?" 30Inn'-as Ɣisa: "Kăla dd-ătrara ăhalĕs iyyăn aɣrĕm wa n-Yărussălam s-wa n-Žărriko, igla har fălla-s oḍan inaɣtafăn, ohăɣăn a-wa ila, tithĕkkin-t har ăktăyyăt tĕzzar, ĕšlăyăn-as. 31Israd dihen-dăɣ, a-s t-dd-immar u-tikutawen dd-ijan tabarăt-ten-dăɣ, inhăy-t măšan, okăy-t šund wăr t-ihĕnnĕy; 32immăr-t-dd iyyăn n-u-Lewi, okăy-t ĕnta-dăɣ. 33Măšan, immăr-t-dd u-Sămari dd-ijan tabarăt-ten-dăɣ, inhăy-t ɣas, tănɣ'-e tăhanint-net, 34os'-e-hi-dd, ăsserăd ibuyĕsăn-net s-ĕzzăyt d-asmĕd n-lăɣnăb, ittăl-tăn tĕzzar, ăsnăy-t tasnit-net, ăwwăy-t s-tăhănzabbut, iṭṭăf-as tămĕzzuɣt d-tămudre. 35Ăffăw-t ɣas, ikfă ĕssin ărriyalăn n-aẓrĕf ahănzabbu, inn'-as: 'Taɣălift-năk ăhalĕs-i-dăɣ har dd-ăqqĕlăɣ, a fălla-s tĕbxăsăd-dăɣ, afăl dd-ăqqălăɣ, ad-hak-ăẓlăɣ.' " 36Innă Ɣisa ḍarăt-a-wen i-ălɣalim: "Ǝndek dăɣ-ăddinăt-wi-dăɣ n-kăraḍ wa s-torded a-s ĕnta a-s ănhăraj n-ăhalĕs-wa oḍăn dăɣ-ifassăn n-inaɣtafăn?" 37Inn'-as: "Wa has-oḍănăn tăhanint." Inn'-as Ɣisa: "Adiš, ĕglĕw kăyy-dăɣ, tĕjĕd šund a-wen-dăɣ." 38Ifăl Ɣisa dihen ăddeew d-inĕṭṭulab-net hăr dd-răsăn taɣrĕmt tiyyăt dăɣ-tăn-tăsbărrăk tamăḍt s-isĕm-net Marta, 39tĕla wălătma-s s-isĕm-net, Măryăma. Tăqqiima Măryăma ɣur-ălɣalim Ɣisa, ad-sajad i-a-wa ijănna, 40a-s ija a-wen Marta ĕnta, tĕdgaẓ dăɣ-imjora n-Ɣisa. Tăhoja ɣas, tĕjjăš-dd fălla-săn, tĕnn'-as: "Ălɣalim, ajăn wăr kăy-ikma a-wa s-tăqqiima wălătma-ɣ wăr hi-tilal s-ĕššăɣĕl, ănn'-as, ad-tĕbdĕd tilal-ahi." 41Inn'-as Ɣisa: "Marta, Marta! Toẓarăd dăɣ-a ăjjeen wărăn infa hărăt, 42hărăt iyyăn a ilan tĕnfa, wen ĕnta, tăsnăfrăn-t Măryăma, wăr-ilkem daɣ ad-dăɣ-s ămehăɣ."

will be added

X\