1 I-Tăyofil wa ĕkneɣ semɣar: Ǝttărăn ăddinăt ăjjootnen, ad-ĕktĕbăn s-ălmăɣna isălan wi jănen jere-năɣ, 2 s-ĕmmĕk-wa-dăɣ s-hanăɣ-tăn-ăssoɣălăn ăddinăt wi tăn-ĕnhăynen s-tiṭṭawen-năsăn s-tizarăt, ija Măssinăɣ imawayăn n-măjrăd-net. 3 A-wen-dăɣ a făl năkk-dăɣ, ijjăš-ahi-dd ĕnniyăt n-ad-ĕmmăɣăɣ i-isălan-en-dăɣ s-iyyăn-iyyăn ɣur-alăṣăl-năsăn, hundăɣ har ašăl-i-dăɣ, i-ad-hak-hasăn-in-ăjăɣ akătab ăsisăjrăhăn, 4 tĕkkĕssăd ăššăk a-s teɣăre ta tĕjrăwăd, tĕtbat. 5 Ăzzăman wa d-ămoos Harudĕs ămănokal n-teje ta n-Ălyăhudĕyăt, ill'-e ăhalĕs iyyăn dăɣ-wi n-kăl-tikutawen s-isĕm-net Zăkărya, išɣal dăɣ-ehăn n-ămudd wa măqqărăn dăɣ-taggayt n-kăl-tikutawen ta n-ihăyawăn n-Abya, isĕm n-hănne-s Elizăbăt, tahăyawt n-Harun a tămoos. 6 Oɣadăn issĕnăn-essăn dat-Măssinăɣ, ĕṭṭafăn s-ălxaqq fărĕḍăn d-alămărăn n-Emăli, 7 măšan wăr len ara ed Elizăbăt, tăjjojra, tăwwăḍ-tăn-dd daɣ tušăre issĕnăn-essăn. 8 Ašăl iyyăn dd-tăqqăl tasĕssăɣlit taggayt n-kăl-tikutawen ta iha Zăkărya, išl'-e ĕššăɣĕl-net dat-Măssinăɣ hundăɣ har fălla-s oḍănăt tisăɣeren, 9 ămoos a-wen ălɣadăt n-kăl-tikutawen n-a-s afăl oḍanăt tisăɣeren făll-ăwadĕm, ĕnta a-madăn-isĕhhuh matălxer dăɣ-ehăn wa šăddijăn n-Emăli. 10 Ašăl-en, isihĕwhĕw matălxer dăɣ-ehăn-en-dăɣ, a-s ităjj a-wen-dăɣ, ălžămaɣăt wa n-inaɣbadăn, itĕddal Măssinăɣ dat-emm n-ehăn n-ămudd wa s-ijjăš Zăkărya ammas-net. 11 A ĕnḍărrăn, ănfalăl-as-dd ănjălos n-Emăli făll-aɣil n-tasĕskărt-ta făll-tihuh matălxer. 12 Inhăy Zăkărya ănjălos ɣas, iggăd ĕnniyăt, irmăɣ 13 măšan, inn'-as ănjălos: "Zăkărya! A-wa tĕttărăd dăɣ-Măssinăɣ, ad-ăj, hănne-k Elizăbăt, ad-tĕkrĕš ara, tĕjĕd-as isĕm: Exya. 14 Ad-hak-umas ĕssĕbab n-tedăwit d-tisrawt, sĕddĕwĕt daɣ tiwit-net ăddinăt ăjjootnen. 15 Ad-umas ere ilan isĕm ɣur-Emăli d-idĕm ɣur-Măssinăɣ, wăr mad-isĕw aman n-lăɣnăb ăxxiimmărnen wăl' asmĕd wăl' iyyăn, ad-t-iḍnĕy Unfas Šăddijăn n-Măssinăɣ hărwa iha tăsa n-ma-s. 16 Ǝnta a dd-madăn-isuɣĕl a ăjjeen dăɣ-kăl-Iṣrayil Emăli-năsăn, Măssinăɣ, 17 ilkĕm-as s-ĕnniyăt d-ăṣṣahăt wa n-ănnăbi Ɣĕli i-ad-dd-isuɣĕl ulhawăn n-abbatăn aratăn-năsăn, ĕkrĕšăn imĕkkeddĕlăn tayĕtte ta karrăšăn ăddinăt lanen idĕm dat-Măssinăɣ, isĕbdĕd tamĕtte tăsidăwăt i-ad-tĕlkĕm i-Emăli." 18 Innă Zăkărya ḍarăt-a-wen i-ănjălos: "Ǝndek a-wa s-mad-ĕlmĕdăɣ a-s a-wa hi-jănned tidĕt? Năkk, amɣar wăššărăn a ămoosăɣ, hănne-ɣ daɣ ti-wăššărăt." 19 Inn'-as ănjălos: "A-wa năkk Žibril-wa s-hărkuk ĕbdădăɣ dat-Măssinăɣ, ăšmašăl-ahi-dd săr-k i-ad-kăy-dd-sĕssiwĕḍăɣ isălan-wi-dăɣ ăhuskătnen. 20 Ămăra, šămad wăr hi-tĕflesăd a-s hak-ĕmmĕjrădăɣ s-tizarăt, ad-itwĕṭṭĕf emm-năk, ikrĕs ilĕs-năk hundăɣ har ašăl wa d-mad-itbatăn isălan-wi-dăɣ hak-jeɣ." 21 A-s ităjj a-wen-dăɣ, tamĕtte tăqqal i-Zăkărya, tof'-et tăkunt n-a-wa t-in-išlăn d-a-wa t-in-iṭṭafăn. 22 Ălwăqq wa dd-izjăr, ittăr ad-ămmăjrăd i-ăddinăt măšan, indăr-as, ĕlmădăn a-s hărăt a has-dd-ănfalălăn dăɣ-ehăn-en-dăɣ, ad-hasăn-isitufĕy i-ad-tăn-isĕfhĕm a-wa ijăn. 23 Issĕmdă Zăkărya tăqqăn-net dăɣ-ĕššăɣĕl ɣas, iqqăl ehăn-net. 24 Tĕkrăš hănne-s ḍarăt-a-wen ĕnniyăt ɣas, ja sĕmmos orăn tĕffăr iman-net dăɣ-ehăn-net, 25 janna: "Ǝnta da a-wa hi-ija Emăli-nin, ĕnta a dăɣ-i dd-iswăḍăn, ikkăs făll-i tăkrakiḍt ta ămoosăɣ jer-ăddinăt." 26 Tĕjjăš Elizăbăt ewăr-net wa s-săḍis ɣas, ăšmašăl Măssinăɣ ănjălos-net Žibril s-taɣrĕmt tiyyăt s-itawănna Năṣirăt hat teje ta n-Galila, 27 ăssok'-e tămawaḍt wărăt tĕzzey meddĕn s-isĕm-net Măryăma, ittar ăhalĕs n-ahăya n-ămănokal Dawĕd s-isĕm-net Yusĕf. 28 Osă-dd ănjălos Măryăma, inn'-as: "Ǝjeɣ-am ăsafu kămm-i tĕnnĕfrănăt ed, tĕkrăšăd idĕm ɣur-Emăli-năm." 29 Issărmăɣ-tăt măjrăd-wen-dăɣ, ad-tattăr ălmăɣna n-manăwen-wa-dăɣ. 30 Inn'-as ănjălos: "Măryăma, wăr tărmeɣăd, ăzzăbbăt-dd Măssinăɣ ănnuɣmăt-net fălla-m, 31 kămm da-dăɣ, ad-tĕkrĕšăd ĕnniyăt, tĕkrĕšăd ara, tĕjĕd-as isĕm Ɣisa. 32 Ad-ikrĕš isĕm, iwăr-t isĕm Rure-s n-Măssinăɣ wa iknăn aḍkul, ad-ăj Emăli Măssinăɣ ĕṭṭĕbĕl wa n-ămănokal Dawĕd-i t-ăshăyăwăn dăɣ-ifassăn-net, 33 ad-imnukĕl hărkuk făll-ehăn wa n-ihăyawăn n-Yaqub, tiɣlal tĕmmĕnukĕla." 34 Tĕnnă Măryăma ḍarăt-a-wen i-ănjălos: "Ǝndek ĕmmĕk wa s-e-ăj a-wen ed năkk, wăr-ĕzzeyăɣ meddĕn." 35 Inn'-as ănjălos: "Ad-fălla-m dd-izzubbĕt Unfas Šăddijăn, tăls'-im tărna n-wa iknăn aḍkul, a-wen-dăɣ a făl ara wa šăddijăn dd-e-iwĕn, ad-t-iwăr isĕm Rure-s n-Măssinăɣ. 36 Ara n-meddĕn-năm, Elizăbăt, wădden ti-wăššărăt măšan, ad-tĕkrĕš ara ĕnta-dăɣ, ĕnta-i s-kăla tămoos temĕjjejrut, ha ămăra ewăr-net wa s-săḍis 37 ed, wăr t-illa a-s wădden ăddoobăt-t Măssinăɣ." 38 Tĕnn'-as Măryăma: "Năkk, taklit n-Emăli, itwĕjjet-ahi a-wa s-tĕnned." Ifăl-tăt ănjălos ăssaɣăt-wen-dăɣ, iglă. 39 Tĕkkă Măryăma išilan-win-dăɣ taɣrĕmt tiyyăt n-kăl-Yăhuda hat iḍaɣăn. 40 Tăwwăḍ-in ehăn wa n-Zăkărya, ad-tinmĕjj isofan d-Elizăbăt. 41 Diha-dăɣ d-has-tĕja Măryăma ăsafu, ad-iggăd, iɣbăr-tăt alyaḍ wa ihăn tăsa-net, iḍnăy-tăt Unfas Šăddijăn ălwăqq-wen-dăɣ. 42 Tĕḍkăl Elizăbăt emăsli-net, tĕnnă: "Tĕnḍĕḍ-am kămm jer-tiḍeḍen, tĕnḍĕḍ daɣ i-ara wa ihăn tăsa-năm. 43 Ǝnta năkk-i-dăɣ, ma ămoosăɣ tis-ahi-dd anna n-Emăli-nin? 44 Ijmaḍ-t ăššăk a-s diha-dăɣ d-ĕslănăt timĕẓẓujen-in i-ăsafu-năm, ad-iggăd ara-wa ihăn tăsa-nin s-tedăwit. 45 Tĕnḍĕḍ-am kămm-i tĕflăsăt a-s Emăli a ijăn-dăɣ, ilkam ɣas, ad-isĕtbĕt a-wa s-ijjăš ărkăwăl-net." 46 Tĕnnă Măryăma: "Timĕlĕn iman-in tĕmɣăre n-Emăli, 47 ăddiwăt ulh-in făl tĕssĕba n-a-wa hi-ija Măssinăɣ-i n-Ămaɣlas-in. 48 Ikyăd-dd dăɣ-tĕmmăḍrit n-taklit-net. Ɣur-ašăl-i-dăɣ, e d t-illăm ere ilkamăn făll-ărori n-ăkall, ad-hi-ănn: 'Tĕnḍĕḍ-am' 49 făl-a-s, Wa ilăn tărna, ij'-ahi a ăjjeen, šăddiij isĕm-net. 50 Tăhanint-net tĕnsa făll-ĕzzurĕyatăn ti t-ăksuḍnen dăɣ-iwĕtyan iket-năsăn. 51 Issĕkna tărna n-ăfuss-net, ăsmăḍrăy s-ăṣṣahăt-net ăddinăt wi iha ĕttĕkĕbru, 52 ikkăs-dd daw-kăl-ăṣṣahăt tĕmmĕnukĕla-năsăn, issĕfrăr tilaqqiwen, 53 ăsyăwăn imĕlluẓa dăɣ-a-wa ăẓedăn, ăsɣăr ifassăn n-kăl-ehăre. 54 Idhăl kăl-Iṣrayil-i n-eklan-net, wăr hin-iṭṭef fălla-săn tăhanint-net 55 ed, ămoos a-wen ărkăwăl iɣlalăn ijjaš i-imărawăn-nănăɣ wi n-ibda s-ĕmmĕk wa s-t-ija i-Ibrahim d-ihăyawăn-net." 56 Tĕzzăɣ Măryăma ɣur-Elizăbăt har tăssakăy ĕḍḍĕkuḍ n-kăraḍ orăn tĕzzar, tăqqăl ehăn-net. 57 Tăwwăḍ-dd tăqqăn ta dăɣ-jarrăw Elizăbăt eɣăf-net, tĕkrăš ara n-eyy. 58 Ǝslăn ănhărajăn-net d-išăqqaɣăn-net tihusay n-a-wa has-ija Emăli ɣas, ohărăn dăr-s tedăwit ta ja. 59 Ikrăš ara ĕttam išilan ɣas, ămelăy, jăn-as ăddinăt isĕm Zăkărya i-ad-umas anĕmmăɣru n-ti-s 60 măšan, tĕnn'-asăn ma-s: "Ăbo! Iwăret-t isĕm Exya." 61 Ǝggădăn-dd săr-s ăddinăt, ĕnnăn-as: "Wăr t-illa ăwadĕm dăɣ-ihănan-năwăn iwar isĕm-wen-dăɣ." 62 Ăstafăyăn i-ti-s n-alyaḍ i-ad-ănn ĕnta isĕm wa s-irha ad-iwăr rure-s. 63 Ăstafăy-asăn i-ad-t-dd-ĕkfĕn a făll-iktăb, iktăb-asăn fălla-s: "Isĕm-net: Exya." Ǝqqălăn-dd ăddinăt ɣas oran imawăn. 64 Ămera ilĕs n-Zăkărya ălwăqq-wen-dăɣ, ad-itamăjrad, itimĕl Măssinăɣ. 65 Tărmăs tuksĕḍa n-Măssinăɣ ăddinăt-wi ĕzzăɣnen dăɣ-attayăn-en-dăɣ d-kăl-iḍaɣăn wi n-Ălyăhudĕyăt, ad-timsiɣulăn isălan-wi-dăɣ. 66 Ǝṭṭăfăn ăddinăt iket-năsăn wi ĕslănen a-wa ijăn dăɣ-ulhawăn-năsăn, ăqqimăn-dd ɣas, jannen: "Ak ara-wa-dăɣ, ma mad-umas?" Ara-i, ăsiwăr-t Măssinăɣ ăfuss-net. 67 Zăkărya-i n-ti-s n-alyaḍ, iḍkăr-t Unfas Šăddijăn, ălolăy, inna: 68 "Tĕmmal i-Emăli-i n-Ămakraš n-Iṣrayil făl-a-s, ĕnta, ad-dd-iššărjăšăn tamĕtte-net, ăsdărf'-et. 69 Ăsfăqqăt-anăɣ-dd isĕk n-ĕlɣĕllas dăɣ-ehăn n-akli-net Dawĕd. 70 A-wen ăru tăn-inna Măssinăɣ s-imawăn n-ănnăbităn-net wi n-imĕššeddĕjăn. 71 Issĕlmăd-anăɣ a-s ad-hanăɣ-agĕẓ dăɣ-išĕnja-nănăɣ, ikkĕs-anăɣ dăɣ-ifassăn n-imiksănăn-nănăɣ iket-dăɣ-năsăn. 72 A-wen-dăɣ a făl oḍăn tăhanint i-abbatăn-nanăɣ wi n-ibda, iktă-dd ărkăwăl-net wa n-tassaɣt šăddijăn hasăn-ijjăš. 73 Ămoos a-wen tahuḍe ija i-abba-nănăɣ Ibrahim 74 a-s has-innă, ad-hanăɣ-agĕẓ dăɣ-išĕnja-nănăɣ, ad-nĕzzaɣ jere-săn măšan, wăr tăn-năksuḍ. 75 A-wen ij'-e, i-ad-t-năɣbĕd hak ašăl dăɣ-tĕšĕdje d-iqqud dăɣ-tuksĕḍa-net. 76 Kăyy daɣ i n-rure-ɣ, ad-kăy-iwăr isĕm ănnăbi n-Măssinăɣ wa iknăn aḍkul, kăyy a-madăn-izar i-Emăli i-ad-tĕknĕd ibaran-net, 77 sĕlmĕdăd ăddinăt-net s-ĕlɣĕllas wa t-illăn ɣur-Măssinăɣ i-tenăšše n-ibăkkaḍăn-năsăn 78 făl-a-s, Măssinăɣ oḍăn-anăɣ tăhanint. Dăɣ-idĕm n-ehăf n-ărrăxmăt-net, ad-hanăɣ-dd-isĕssiwĕy Ămaɣlas olăhăn d-tăfukt dd-tĕjammăḍăt išĕnnawăn 79 i-ad-imlĕwlĕw ănnur-net făll-ăddinăt wi ăqqimănen dăɣ-tihay, han tele ta n-tamăttant, i-ad-hanăɣ-išărjĕš dăɣ-tabarăt ta n-ălxer." 80 Idaggăl Exya, tiwwaḍ tayĕtte-net, izzaɣ tinariwen hundăɣ har ašăl wa t-dd-ăšmašăl Măssinăɣ s-kăl-Iṣrayil.
