Hudd 1

1A-wa năkk, Hudd, wa n-akli n-Ɣisa Ălmasex n-ă/n/na-s n-Yăqub hin-iktabăn i-ăddinăt wi dd-iɣră Măssinăɣ-i n-Abba s-iman-net, irh'-en, ogaẓ-tăn dăɣ-tĕssĕba n-Ɣisa Ălmasex. 2Ăsnăḍfăs fălla-wăn Măssinăɣ tăhanint d-tenăšše d-ălxer d-tărha-net. 3Imărhan-in, ăsdărhănăɣ hullan ad-hawăn-in-ĕktĕbăɣ dăɣ-isălan n-immun wa nohăr, a-wen-dăɣ a făl hi-iqqăl ăššil ad-hawăn-in-ĕktĕbăɣ tăkarḍe-ta-dăɣ i-ad-kăwăn-sĕmmĕtărăɣ i-ad-tĕnmănɣĕm dăɣ-tĕssĕba n-immun wa dd-ăzzăbbăt Măssinăɣ s-iyyăt făll-imĕššeddĕjăn. 4Ǝktăbăɣ-awăn-in făl-a-s, ĕjjăšăn-kăwăn-dd meddĕn n-ilămamasăn n-inăllăbăsăn făll-wăr tĕssenăm s-ăru d-ăssewălăn ĕlkĕttabăn dăɣ-ăššăreɣa wa dăɣ-săn ilkamăn, safraɣăn ălmăɣna n-ănnuɣmăt n-Măssinăɣ i-ad-hasăn-ijrĕw a-wen ăsaru făl ăsmăḍăsăn iman-năsăn, ĕmmĕk-wen-dăɣ a-s ăkkuddălăn Ɣisa Ălmasex-i n-Emăli n-Ămakraš-nănăɣ. 5Kud-dăɣ ĕssanăɣ a-s a-wa-dăɣ hawăn-ăssewălăɣ, tĕknam-t musnăt, ărheeɣ ad-kăwăn-dd-sĕktoɣ ĕmmĕk wa s-dd-iɣlăs Emăli tamĕtte ta n-kăl-Iṣrayil dăɣ-ăkall wa n-Miṣra, wi unjăynen omănăn săr-s, ḍarăt-a-wen, inɣ'-en kĕrĕf. 6Ǝktĕwăt-dd daɣ ănjălosăn wi dd-ĕzjărnen idăggan-năsăn, ad-tattărăn tărna tojărăt ta ĕjrăwăn, ogaẓ-tăn Măssinăɣ dăɣ-tihay ti n-ider ăssuksăḍnen, han tišĕm ăɣlalnen, ăqqalăn i-ašăl wa ilkămăn măqqărăn. 7Ǝktĕwăt-dd daɣ aɣrĕm wa n-Sodoma d-wa n-Gomora d-iɣărman wi n-edes-hasăn, ĕkfăn imuzăɣăn-năsăn iman-năsăn i-ĕlkăxbu, jan tanmĕšrayt togdăhăt d-ten-dăɣ jăn ănjălosăn-win-dăɣ, ad-tajjăn idubnawăn d-a-wărăn il' ĕmmĕk, ăzzăbbăt-dd Măssinăɣ fălla-săn tisnant n-efew iɣlalăn. A-wa tăn-ijrăwăn, ălmital a ămoos s-hanăɣ-ikkas Măssinăɣ dăɣ-taɣdărt. 8Ilămamasăn-winnin-dăɣ s-hawăn-janneɣ, ĕntăneḍ-dăɣ a-wen-dăɣ a tamašalăn; imĕhhurja ĕlwayăn derhanăn-năsăn, samăḍasăn iman-năsăn, sifĕṭṭun dăɣ-tărna n-Emăli d-ănjălosăn wi ikfa ălxurmăt. 9Wen-hărăt wăla Mikaylu-i n-ănjălos măqqărăn wăr t-ija ed ašăl wa d-iknăs d-Iblis d-tinmĕšĕkkin tafĕkka n-ănnăbi Mosa, wăr t-ikwer Mikaylu, inn'-as ɣas: "Oyyeɣ-kăy s-Măssinăɣ." 10Măšan, ilămamasăn wi s-hawăn-janneɣ, wăr tăn-išla ar tigĕggar n-a-wa s-ĕžhalăn, sikuforăn. A-wa ĕssănăn, wăr t-ĕssenăn ar s-ulhawăn-năsăn šund taɣsiwen, a-wen-dăɣ daɣ a săr-săn dd-orăwăn ĕlhĕllak. 11Imĕskay, jăn tabarăt ta ija Kayin, tăšnămăšrăy-tăn tărha n-aẓrĕf šund a-wa ija Balam, oḍă-dd fălla-săn ălmăṣṣibăt dăɣ-tĕssĕba n-a wa s-ăffullăgăn šund a-wa ija Ăkori. 12Tămoos tăhaḍra-năsăn dăɣ-imjora-năwăn a ăsikărakăḍăn făl-a-s ed tăn-ĕjjăšăn wăr t-illa a ăherăkken hasăn-igdalăn tăzăhhawt dăɣ-wăr kĕttĕwăn ar iman-năsăn. Olăhăn d-tijărăken wăr hen aman ăwway aḍu, olăhăn d-ihĕškan wăren tiirĕw kud-dăɣ s-ăzzăman n-a-wen, olăhăn ɣas d-ihĕškan ămmutnen ihĕnnin-dăɣ s-afăl hin-ĕttĕlbăyăn, ad-ĕjĕn tamăttant ta s-sănatăt. 13Ănifăqqăn d-tinăzzămăren n-ejărew ăṣṣohătnen, wăr tăn-išla ar ejer data-săn n-tăkuffe n-ijităn-năsăn wi ăsikărakăḍnen. Olăhăn d-etran n-imĕššoraj, itwar-asăn Măssinăɣ edăgg hărkuk dăɣ-ehăḍ wa ojărăn tăkkăwălt dăɣ-ihăḍan. 14Ăru fălla-săn ălolăy Inuk wa n-ahăya n-Adĕm wa s-ĕssa a-s innă: "Ǝnhĕywăt Emăli, imal-dd ĕnta d-timĕrwen n-afḍăn n-ănjălosăn-net wi šăddijnen" 15i-ad-išrăɣ dăgg-adĕm iket-năsăn, ănɣ s-ăššăreɣa-net e d t-illăm anăsbăkkaḍ dăɣ-tĕssĕba n-e d t-illăm erk iji jan dăɣ-ĕffullĕg wa jăn făll-Măssinăɣ d-e d t-illăm măjrăd lăbasăn jan ăddinăt-ĕnnin-dăɣ s-wăr t-illa a dăɣ-ăssimɣărăn Măssinăɣ. 16Meddĕn-win-dăɣ, hărkuk ĕkmăn-tăn iman-năsăn, salăqqawăn iman-năsăn i-ad-hasăn-aḍĕnăn ăddinăt tăhanint, wăr-ĕlkemăn ar i-derhanăn n-iman-năsăn, wăr tăn-išla ar abĕrĕj dat-ăddinăt d-tĕmmal n-ăddinăt i-ad-dăɣ-săn dd-ĕkkĕsăn hărăt. 17Imărhan-in, kăwăneḍ, wăr jem a-wen, ɣaymăt kittĕwăm a-wa s-ăru d-hawăn-t-ĕnnăn inĕmmušal n-Emăli-nănăɣ Ɣisa Ălmasex a-s hawăn-jannen: 18"Dăɣ-ajilal n-ăddunya ad-dd-asĕn ăddinăt wăren ĕlkem ar i-derhanăn n-iman-năsăn kăwăn-jănen isĕḍsa." 19Tăbĕḍḍawt ɣas a dd-tirĕwăn jer-ăddinăt, wăr-ĕlkemăn ɣas ar i-a-wa hannăyăn, wăr t-illa a oharăn d-Unfas n-Măssinăɣ. 20Kăwăneḍ-i n-imărhan-in, ɣaymăt binnĕwăm kăwăneḍ iman-năwăn tămudre-năwăn făll-ăddin-năwăn wa šăddijăn, tajjăm ălhimmăt s-tărna ta n-Unfas Šăddijăn. 21Sĕntĕmăt iman-năwăn dăɣ-tărha n-Măssinăɣ dăɣ-a-s tăqqalăm i-ad-kăwăn-ăkf Emăli-nănăɣ Ɣisa Ălmasex dăɣ-tăhanint-net tămudre ta tăɣlălăt. 22Aḍĕnăt tăhanint i-ăddinăt wi jănen ulhawăn ĕssin, 23iyyăḍ dăɣ-săn, tăddoobem ad-tăn-dd-tĕntĕšĕm dăɣ-temse, tăɣlĕsăm-tăn; wi iyyăḍnen, aḍĕnăt-asăn tăhanint, tăhanint tărtayăt d-tuksĕḍa. Udaɣăt făw i-anmĕḍas dăr-săn kud-dăɣ anmĕḍas d-isĕlsa-năsăn wi ăsmăḍăsăn s-erk imojjan-năsăn. 24I-Wa ăddooben ad-kăwăn-agĕẓ dăɣ-e d t-illăm iba n-iqqud, isĕbdĕd-dd-kăwăn dăɣ-ălxurmăt n-idĕm-net wăr kăwăn-iwer ălɣib, tĕknam tedăwit, 25i-Măssinăɣ-i s-ĕnta ɣas a t-illan, ĕnta-i n-Ămaɣlas-nănăɣ dăɣ-idĕm n-Ɣisa Ălmasex wa n-Emăli-nănăɣ, ălxurmăt d-tĕmɣăre d-tărna d-ălxikmăt hărkuk dăɣ-ăzzămanăn iket-năsăn jer-wi okăynen wi n-ămăra-dăɣ hakd wi dd-malĕnen. Amin!

will be added

X\