Yaqub 5

1Ăywa, kăwăneḍ-i n-kăl-ehăre, ălhăt, šuršĕm dăɣ-tĕssĕba n-ălmăṣṣibatăn wi fălla-wăn dd-madăn-iḍĕw. 2Ehăre-năwăn wa irkăhăn, tattănăt-t tiwĕkkawen, isĕlsa-năwăn, tatt'-en temedhe; 3tĕkša tenekt ta s-ilkam ad-fălla-wăn tăjjăyh, sărɣ tiɣĕswen-năwăn šund temse, orăɣ-năwăn d-aẓrĕf-năwăn ed tăsbăkănăm i-iman-năwăn ehăre n-tikunen dăɣ-išilan-wi-dăɣ s-ĕntăneḍ a-s wi n-ajilal n-ăddunya. 4Ǝnhĕywăt inaxdimăn wi dd-omădnen išĕkraš-năwăn, ĕntăneḍ-da-dăɣ s-tĕkšam ălxaqq n-tide-năsăn, ăsikălălăn ămăra hundăɣ har tăwwăḍ tekălelt-năsăn timĕẓẓujen n-Emăli n-ajhanăn wi n-išĕnnawăn. 5Făll-ărori n-ăkall-i-dăɣ, tăsnăflăyăm iman-năwăn dăɣ-iẓĕjraẓ d-tiẓudawen ti n-ulh d-tiṭṭawen, tĕknăm tewwant, tĕttĕwăm-in ašăl wa ilkămăn, 6tăswărăm imaɣdalăn uḍlem, jăm iman-năsăn, wăr t-illa a hawăn-ăɣšadăn. 7Ayĕtma-ɣ, a ikkă Emăli-dăɣ wăr dd-iqqel, tĕjjĕšet-kăwăn taẓidert. Zĕjjĕzzăt ɣas ănasdamu, ăẓiẓăydăr, iqqal i-ašăl wa d-mad-ă/n/n ašĕkrĕš-net. Taẓidert ta t-tĕhăt ašăl wa d-wătăn ijĕnnawăn wi ăzzarnen, ĕnta daɣ a t-hat a-s mad-ĕwĕtĕn wi ĕšrăynen. 8Ǝṭṭĕfăt kăwăneḍ-dăɣ taẓidert-ten-dăɣ, sĕṣṣuhum ulhawăn-năwăn, tĕjbĕsăm ed Emăli išwar dd-iqqal. 9Ărheɣ dăɣ-wăn ayĕtma-ɣ, ad-wăr ijĕnn wăl' iyyăn-dăɣ a lăbasăn făll-amidi-net făl-a-s ălqa/l/li wa ojărăn išwar dd-osa, os'-iwăn făw. 10Tălălăt ayĕtma taẓidert ta kăwăn-sahalăt s-data dăɣ-tisnant šund a-wa jăn ănnăbităn-i hawăn-jănen isălan n-Emăli. 11A-wen-dăɣ a făl nĕjanna: tĕnḍĕḍ i-wi dăɣ-wăn hălnen iman-năsăn. Wădden tĕslam ăṣṣăbarăt wa ija Ăyyuba dăɣ-tisnant ta t-tărmăsăt, tĕssanăm daɣ s-ušreyăn wi t-ikfa Emăli ed Emăli, milɣaw-net d-tăhanint-net, wăr len eket. 12Ărheɣ dăɣ-wăn ayĕtma-ɣ, dat-hărăt iket-net, ad-wăr tăhhiḍăm s-išĕnnawăn wăla ăkall wăla s-hărăt wăl' iyyăn. Umaset ĕyya-năwăn, ĕyya i-a wa ămoosăn tidĕt, umaset daɣ ăbo-năwăn, ăbo i-a-wa ămoosăn bahu i-ad-dd-wăr-isiḍĕw Măssinăɣ ăššăreɣa-net fălla-wăn. 13Ak oẓar iyyăn dăɣ-wăn? Adiš idĕlet Măssinăɣ. Ak ăsriiw iyyăn dăɣ-wăn? Adiš, awĕyet tĕmmal i-Măssinăɣ. 14Ak ikna iyyăn dăɣ-wăn turhĕnna? Adiš, ăɣret-dd inušămăn n-ălkănisăt, ĕdĕlnet-as Măssinăɣ, ĕšwĕynet-as s-ĕzzăyt s-isĕm n-Emăli. 15Afăl has-dălăn Măssinăɣ s-ulhawăn săr-s omannen, ad-iɣlĕs ăwadĕm-en, ijrĕw ălafu. Kunta ămarhin, turhĕnna-net, abăkkaḍ a săr-s tăt-dd-orawăn, ad-has-t-in-ănš Măssinăɣ. 16Nĕmĕnšăt a-wa ikkăn jere-wăn, tăqqimăm hak iyyăn itĕddal Măssinăɣ i-amidi-net i-ad-t-izuzĕy făl-a-s tamădilt n-ere ilan idĕm dat-Măssinăɣ, la tădabit, tĕkna tĕla n-tĕnfa. 17Wădden, tĕslam isălan n-ănnăbi Ɣĕli, wăr dăr-s nĕẓley, ăgg-adĕm dăr-năɣ olăhăn a ămoos, măšan ija i-Măssinăɣ tamădilt dăɣ-ijlay i-ad-wăr iwet ajĕnna, ij' ajĕnna kăraḍ iwĕtyan d-săḍis oran, wăr-iwet; 18tokăy tăqqăn-ten ɣas, idăl Măssinăɣ i-ad-iwĕt ajĕnna, iks' ăkall. 19Ayĕtma-ɣ, afăl dăɣ-wăn ănmăšrăy iyyăn i-tidĕt har t-dd-ăssoɣăl dăɣ-s iyyăn, 20ĕlmĕdăt a-s ere dd-ăssoɣălăn anămăšray tabarăt ta oyya, ad-t-iɣlĕs Măssinăɣ dăɣ-tamăttant, ănš-as-in ĕjut n-ibăkkaḍăn-net.

will be added

X\