Yaqub 3

1Ayĕtma, wăr kăwăn-tăjjăšnet ălɣulam ăjjootnen făl-a-s năkkăneḍ-i n-ălɣulam, ilkam dăɣ-năɣ ăššăreɣa ojărăn wa n-ăddinăt wi iyyăḍnen tĕsĕmme. 2Wăr hanăɣ-iha ere s-wădden išaɣšad dăɣ-măjrăd măšan, wa ăddooben dăɣ-năɣ, ad-ăqqayĕm wăr-išăɣšid dăɣ-măjrăd, ăhalĕs imdan ănnihăḍăn dăɣ-iman-net a ămoos. 3Tĕnhayăm a-s afăl ija ăwadĕm aɣăba dăɣ-emm n-ebăje, ad-t-oɣad, ănnihăḍ dăɣ-taɣĕssa-net iket-net, 4zĕnnĕzjumĕtăt dăɣ-ĕd-tin-ăho, a dăr-togdăh tiyyăt tĕmɣăre d-a dăr-ogdăh aḍu wa tăt-imahhălăn, hărăt n-taɣăya ĕnḍărrăt a-s tăt-oɣad wa tăt-ăššešălăn, itannăḍ-tăt siha s-irha. 5A-wen-dăɣ daɣ a dăr-olăh ilĕs, mĕtki măšan, itabăraj s-a ăjjeen, temăntăst ĕnḍărrăt măšan, ĕnta-da-dăɣ he-sĕntĕsăt ăroj imdan. 6Ilĕs daɣ, olăh d-efew, wăr t-illa ĕẓẓĕnĕf n-tăllăbăst t-dd-wărăt tĕffil, iha tislaḍ-nănăɣ, isamălsa făll-taɣĕssa-nănăɣ iket-net, ăssintăs fălla-năɣ efew wa n-žohănnăma, ăssintăs daɣ tămudre-nănăɣ. 7Wăr t-illa ĕẓẓĕnĕf n-tawăqqast wăla n-igḍaḍ wăla n-iẓlulam wăla n-imudărăn wi n-aman s-wădden itinĕn, ăssenăn-t daɣ ăgg-adĕm 8măšan, ilĕs, wăr t-illa ere ăddoben ad-t-isinĕn, tagăršăt a ămoos, ihărăynăn-net, ăssăm dd-wăr-išărrĕy ăwadĕm, hărkuk ɣas ămiɣălɣăl. 9Ilĕs a-s nĕtimĕl Abba-nănăɣ Emăli, ĕnta daɣ a-s nĕsawar tilɣant dăgg-adĕm-i dd-ixlăk Măssinăɣ dăɣ-milhaw-net. 10Emm iyyăn, zajjărnăt-dd tittar ti olăɣnen hakd ti lăbasnen. Ayĕtma, wăr-ităjjet dăɣ-wăn a-wen. 11Ak kăla tĕnhăyăm terĕst s-dd-zazjar tiṭṭ-net aman ăẓednen d-i ăkosămnen? 12Ayĕtma-ɣ, ajăn ahĕšk n-ašar, tĕggarăn-t aratăn n-ĕzzăytun meɣ ahĕšk n-lăɣnăb, tĕggarăn-t aratăn n-ašar? Terĕst daɣ tăkosămăt, wăr tăt-dd-e-ĕzjărăn aman ăẓednen. 13Ǝndek dăɣ-wăn wa n-emăssărho, ilăn tayĕtte? Adiš, isăknet a-wen s-ălxal-net d-imărkedăn dăɣ-wăr-itter aḍkul n-iman-net ed a-wen-dăɣ a-s ašămol wa n-sărho. 14Măšan, kunta kăwăneḍ ăssiismămnăt tismiten ulhawăn-năwăn, tăsidăwăm a-wen d-asĕgdah n-iman-năwăn d-ăddinăt, wăr jem a-wen abăraj, wăr jem bahu tidĕt 15făl-a-s, sărho-wen, wădden Măssinăɣ-i ihăn išĕnnawăn a dd-ifal, i n-ăddunya-i-dăɣ, i n-ere ilkamăn i-derhan n-iman-net d-Iblis 16făl-a-s edăgg meɣ ulh ăssiismămnăt tismiten d-asĕgdah n-iman, ănimahăẓ d-amšĕnḍaw d-e d t-illăm erk ămašal. 17Sărho wa dd-ifălăn Măssinăɣ, ăzizăr tĕšĕdje, iqqal ăgg-ălxer, olaɣ, išmăr, tĕh'-e tăhanint, ăsijăt imărkedăn wăr henăt timudda wăla tĕlmĕnufăɣa. 18Ăddinăt wi ĕdgaẓnen dăɣ-umăɣ n-ălɣafyăt, saɣsalăn-dd s-iman-năsăn dăɣ-ălɣafyăt, timašalen hasăn-ĕjrawnen idĕm ɣur-Măssinăɣ.

will be added

X\