Yaqub 2

1Kăwăneḍ-i n-ayĕtma-ɣ omănnen s-Emăli-nănăɣ Ɣisa Ălmasex-i ilăn ălxurmăt, wăr tăẓmăẓlăyăm ăddinăt. 2Năjet ălmital n-a-s kunta ijjăš-dd ăhalĕs ilan ehăre, ĕmdan issĕkaḍ-net s-tiḍhoten n-orăɣ, ăẓẓiẓmăy, ălžămaɣăt-năwăn, a-s ija a-wen daɣ, ijjăš-t-dd iyyăn n-talăqqe; 3kunta dăɣ-a-wen, tĕjrăhăm-in wa iknăn aẓĕẓmi, tĕggădăm-dd săr-s, tĕnnăm-as: "Măndam, ărhuj-ak, ɣayĕm diha, nuflĕy"; a-s ija a-wen, wa n-talăqqe ĕnta, tĕnnăm-as: "Jăy, kăyy ĕbdĕd-in sidi-dăɣ meɣ ĕyyăw ɣayĕm daw-iḍarăn-nănăɣ", 4afăl jăm a-wen, wădden ĕnta-den-dăɣ a-wa isălmadăn s-aẓĕmmăẓli wa tinmĕjjim jer-iman-năwăn, tinmĕšreɣăm jer-iman-năwăn s-erk inĕzjam. 5Ayĕtma-i ĕkneɣ tărha, săjdăt-ahi: ăddinăt wi s-ɣur-ăddunya lăqqĕwăn, ĕntăneḍ a-s irzăɣ Măssinăɣ immun-năsăn, ij'-en imĕkkusa n-Tĕmmĕnĕya ta s-ijjăš ărkăwăl-net i-wi t-ărhanen. 6Ɣas mafăl lakkăhăm tilăqqiwen? Ajăn wădden kăl-ehăre-i-dăɣ tăssimɣărăm a kăwăn-ăšihănšarăḍnen, šikkun-awăn s-ăššăreɣa? 7Ajăn wădden ĕntăneḍ a jănen isĕm wa ăhusken kawăn-ikfa Măssinăɣ tekăškăšt. 8Innă ĕlkĕttab n-Măssinăɣ: "Ăj i-ănhăraj-năk tărha ta-dăɣ jed i-iman-năk", ĕnta-den-dăɣ alămăr wa n-Tĕmmĕnĕya n-Măssinăɣ, ere t-ămešălăn, ămešăl tihusay. 9Ǝlmĕdăt a-s afăl tăẓmăẓlăyăm ăddinăt, ad-tifum abăkkaḍ, abăkkaḍ daɣ ere t-ofăn, ad-t-isĕwăr alămăr uḍlem, iḍḍan dăɣ-inămăšrayăn. 10Ădduuttăt a-s ere ămešălăn a-wa innă alămăr iket-net har ănmăšrăy i-tajĕttewt-net tiyyăt, a-di alămăr iket-net a-s ănmăšrăy. 11Făl-a-s Măssinăɣ-i innăn: "Wăr jed ĕzzĕna", ĕnta daɣ a innăn: "Wăr jed iman", ɣas kunta kăyy tăqqimăd wăr jed ĕzzĕna uhĕn-dăɣ, jed iman, a-di hărăt iyyăn, tănimăšrăyăd hărwa i-alămăr. 12Ɣas tajjăt imĕjridăn d-timašalen n-ăddinăt ĕssannen s-alămăr wa isadărfen a-s ilkam ad-tăn-išrăɣ; 13ăššăreɣa daɣ wen, ašăl wa d-e-ăj, wăr dăɣ-s-e-tĕtwiḍĕn tăhanint i-ere wa s-kăla wăr tăt-oḍen i-ăddinăt ed ere wa s-oḍăn Măssinăɣ tăhanint, wăr t-issărmăɣ ăššăreɣa-net. 14Ayĕtma-ɣ, ak ma s-infa ăgg-adĕm, ad-itabăraj s-oman s-Măssinăɣ, a-s ija a-wen, wăr ila imărkedăn ăsidăttătnen a-wen? Ak ajăn orda s-ad-t-iɣlĕs immun-wen-dăɣ? 15Kunta lam wălătma-wăn meɣ ă/n/na-wăn ɣălulăn, ălluẓ, 16ma s-infa a dd-iggĕd ɣas iyyăn dăɣ-wăn, ănn'-asăn: "Iɣlăs-kăwăn Măssinăɣ dăɣ-esămeḍ d-laẓ, tĕglăm dăɣ-ălxer"? A-s ija a-wen, tĕnsam făll-ehăre, măšan, wăr t-illa a-s tăn-tĕdhalăd dăɣ-a-wa s-ămiɣatărnăt tiɣĕswen-năsăn. 17Ǝmmĕk-wen-dăɣ daɣ a-s immun s-Măssinăɣ wărăn dd-itirĕw s-ăwadĕm imărkedăn, ămmut. 18Iha miši a-s ămăra, ad-hi-ănn iyyăn dăɣ-wăn: "Kăyy led immun măšan wăr-ăddew d-imărkedăn, a-s ija a-wen, năkk, leeɣ-tăn." Wa dăɣ-wăn ordăn a-wen, ĕnneɣ-as: "Sĕkĕn-ahi a-wa ăssitbătăn immun wărăn ăddew d-imărkedăn, ad-hak-sĕtbĕtăɣ năkk immun-in s-imărkedăn-in. 19Ak tăsităɣrăfăd a-s Măssinăɣ iyyăn? Ikna, măšan, ĕlmĕd a-s alšinăn dăɣ-omanăn s-a-wen, ăšišăkăḍkăḍ-tăn. 20Ǝyyaa, kăyy-i n-ălžahil wăr ih' ălfăyda, ăyy-ahi ad-kăy-sĕfhĕmăɣ, a-s immun warăn ăddew d-imărkedăn, wăr t-illa a infa." 21Ajăn wădden amɣar-nănăɣ Ibrahim, ašăl wa d-iqbăl ad-ikĕt i-Măssinăɣ rure-s Isxaqq, tămašalt-ten-dăɣ ija, a t-ikfăn idĕm data-s? 22Wădden hannăyăd a-s immun ăddeew hărkuk d-imărkedăn wi t-satbatnen! 23Ǝnta-den-dăɣ a-wa isatbatăn a-wa innă ĕlkĕttab a-s innă: "Omăn Ibrahim s-Măssinăɣ, a-wen-dăɣ a t-ikfan idĕm ɣur-s, iwăr-t isĕm: Amidi n-Măssinăɣ." 24Wădden, hannăyăm a-s ăgg-adĕm, imărkedăn ad-t-hakkănen idĕm dat-Măssinăɣ wădden immun ăstikăn. 25Ǝmmĕk-wen-dăɣ daɣ a-s tĕkrăš Rahab ta n-tălkăxbat idĕm dat-Măssinăɣ; tĕja tămašalt tăhuusket ašăl wa d-tĕffăr inaramăn wi n-kăl-Iṣrayil dd-oyăsnen ăkall-net, tĕffăr-tăn, tĕj'-asăn daɣ ăddăbara tăn-issĕjmăḍăn ăkall hărwa wăr tăn-irmes ĕlxĕkum n-ăkall-en. 26Săjdăt: ĕmmĕk-wa-dăɣ s-taɣĕssa wăr hen iman, tămmut, ĕmmĕk-wen-dăɣ daɣ a-s immun wărăn ila imărkedăn, ămmut.

will be added

X\