1 A-wa năkk Yaqub wa n-akli n-Măssinăɣ d-Emăli Ɣisa Ălmasex hin-ăhuulăn mărawăt tiwsaten d-sănatăt ti ĕmmăhăšnen jer-ikallăn. 2 Ayĕtma-ɣ, ărheeɣ dăɣ-wăn a-s talɣa kăwăn-tărmăsăt-dăɣ, a tămoos-dăɣ, tumaset-awăn ĕssĕbab n-tedăwit 3 ed ădduuttăt a-s tissust tĕnhăyăm dăɣ-tĕssĕba n-immun-năwăn dăɣ, ad-săr-wăn dd-arĕw a-wen ĕššĕmurăt, 4 măšan, wăr-e ăj a-wen ar s-ad-tĕṣbarăm hullan i-ad-tumasăm meddĕn ĕmdanen s-wăr t-illa a dăɣ-šaɣšadăn. 5 Wa dăɣ-wăn wăr-iwer sărho, ittăret-t dăɣ-Măssinăɣ-i ihakkăn ăddinăt iket-năsăn bănnan wăla imoqqan, ad-t-ijrĕw; 6 măšan ittăret s-immun dăɣ-wăr ij' ăššăk wăl' iyyăn făl-a-s ere ijan ăššăk dăɣ-a-wa ittăr dăɣ-Măssinăɣ, wăr-iẓley d-tinăzzămăren n-ejărew wa sĕmmăn ăzziiwăt aḍu, itaggăd dăr-snăt siha d-siha. 7 Wa ijăn a-wen, wăr-itĕjjaret ăṭṭăma n-ad-ijrĕw hărăt ɣur-Emăli 8 ed ăwadĕm šund-wen, ănimăntăš, ija ĕssin ulhawăn, wăr t-illa a dăɣ-itbat. 9 Ere dăɣ-wăn lăqqĕwăn-dăɣ ijrăẓet-as a-wen ed dat-Măssinăɣ, irzaɣ 10 măšan wa dăɣ-wăn irzăɣăn, ijrăẓet-as ĕllăqqu-net dat-Măssinăɣ ed ĕnta hakd ehăre-net togdăh taɣrĕst-năsăn d-ta n-tăboyt-i 11 s-e-d tădwăylăl tăfukt, tăkkus, ad-sărɣ teyĕšše, tĕtrĕkkĕt-in tăboyt-net, iba-hin asmăɣmăɣ n-tihusay-net. Alĕsu šund-wen-dăɣ a hin-mad-ăj ere ăsifăllăn făll-ehăre-net ĕnta hakd a-wa itamašal. 12 Tĕnḍĕḍ i-ăwadĕm wa išmărăn dăɣ-talɣa fălla-s dd-tăzzubbet-dăɣ ed afăl tăt-dd-izjăr, ad-t-ăkf Emăli, korona, a-wen, takĕnbut n-tĕmmĕnukĕla ta s-ijjăš ărkăwăl-net i-wi t-ărhanen, a-wen, a t-ămoosăn tămudre ta tăɣlălăt. 13 I dăɣ-wăn ătwarămăn, wăr-ijănnet Măssinăɣ a hi-orămăn făl-a-s Măssinăɣ wăr-itĕtwirĕm s-a lăbasăn, wăr săr-s itirĕm daɣ ăwadĕm wăl' iyyăn, 14 ănn-ak, hak ăwadĕm-dăɣ erk derhan-net a has-itumasăn sărmas wa t-inattăšăn, isiḍĕw-t dăɣ-erk ĕmmĕk, 15 ḍarăt-a-wen, e-d ăssakăy erk derhan dăɣ-ăwadĕm, ad-săr-s dd-arĕw abăkkaḍ; abăkkaḍ daɣ ĕnta, e-d dd-imda s-ăwadĕm, ad-săr-s dd-arĕw tamăttant dat-Măssinăɣ. 16 Ayĕtma-ɣ wi ĕkneɣ tărha, wăr săswadăt iman-năwăn. 17 Wăr t-ĕllen isuf olaɣnen wăla-i ĕfrannen s-wădden išĕnnawăn a dd-falăn ɣur-Măssinăɣ-i n-Abba dd-ixlăkăn e d-t-illăm ănnur, ĕnta-i wărăn itĕmĕskil, wăr-oleh d-tele-i timtĕttiyăt. 18 Ǝnta a hanăɣ-dd-ixlăkăn dăɣ-erhet-net s-tărna n-măjrăd-net-i ădduutten i-ad-numas tiɣăffaddiwen n-a-wa dd-ixlăk. 19 Ayĕtma-i ĕkneɣ tărha, săjdăt: ĕttarăɣ dăɣ-hak iyyăn dăɣ-wăn, ad-ăsijăt asjĕd, wăr-ărorăd măjrăd, wăr-issărmăḍ aḍkăr 20 făl-a-s ere s-irmăḍ aḍkăr-net, wăr-itĕmišĕl iqqud wa n-erhet n-Măssinăɣ. 21 A-wen-dăɣ a făl ĕbḍĕwăt iman-năwăn d-a-wa kăwăn-isamăḍasăn d-ălxalăn wi kăwăn-salbasnen, tăqbĕlăm s-ĕnniyăt ăẓedăn măjrăd n-Măssinăɣ wa issĕntăm dăɣ-ulhawăn-năwăn ăddooben ad-kăwăn-iɣlĕs dăɣ-temse. 22 Umasăt ăddinăt tamašalnen măjrăd n-Măssinăɣ wădden ăddinăt has-sajadnen, ɣas saswadăm iman-năwăn s-erk inĕzjam 23 făl-a-s ere isajadăn i-măjrăd wăr t-itĕmišĕl, olăh ɣas d-ere ikyădăn iman-net dăɣ-tiset, 24 ifăl-tăt ɣas ittĕw'-in ălwăqq-wen-dăɣ a-wa dăr-olăh, ăqqima wăr-ăsmăttăy talɣa făll-iman-net; 25 măšan ăwadĕm wa ăjjunfăn dăɣ-alămăr wa ifrănăn n-Măssinăɣ, alămăr wa isadărfen, iṭṭăf a-wa s-t-omăr, tĕnḍĕḍ-as. 26 Ere ordăn a-s ăddiin, a-s ija a-wen, wăr-innăhăḍ dăɣ-ilĕs-net, iman-net ɣas a itakărras; ăddin-net, wăr t-illa 27 făl-a-s dat-Abba Măssinăɣ, ăddin wa n-tidĕt wăr-iwer ălɣib, a t-ămoosăn: uḍĕf n-ijuhelăn, tadhĕlt n-tinuḍăfen dăɣ-timɣutar-năsnăt d-ad-wăr kăy-ăsmăḍăs a-wa făll-tĕgl' ăddunya.
