Ɣăbranităn 9

1Ărkăwăl wa ăzzarăn, ila alămărăn-net tiɣĕdnen tamĕtte dăɣ-isălan n-ălɣibadăt d-edăgg wa s-irha Măssinăɣ ad-t-tăɣbĕd tamĕtte dăɣ-s. 2Edăgg n-ălɣibadăt ăzzăman-en, a has-itawănnen: ehăket wa n-tămuqqest. Ehăket-en, ija sănatăt tiẓunawen: tăẓune ta s-itizar ăwadĕm, isĕm-net: edăgg wa šăddijăn. Ǝnsanăt dăɣ-s tisĕskar n-imămmălăn ĕẓwaynen d-tasĕskărt tiyyăt făll-ĕnsanăt tijĕlwen n-tikutawen i-Măssinăɣ. 3Illa-hin i-edăgg-en, ill'-e ărido wa s-ĕssin ḍarăt t-illa edăgg wa s-itawănna: Wa iknăn tĕšĕdje. 4Insa ăkoss n-orăɣ wa dăɣ-răqq matălxer ta n-ălɣibadăt. Dăɣ-ammas n-edăgg wa iknăn tĕšĕdje, tĕnsa takbat ta n-ărkăwălăn n-tassaɣt s-ilsa orăɣ ifăyyăn-net. Takbat-en n-ărkăwăl, ĕnta a iha ăkoss n-orăɣ wa iha mana, talimmiẓt n-Măssinăɣ ta dd-ăzzăbbăt făll-kăl-Iṣrayil ăzzăman wa d-ĕzzăɣăn tanĕẓruft. Tĕnsa dăɣ-s tăborit ta dd-tĕnšărăt s-kăla tăt-iṭṭăf Harun d-isĕllumăn n-tihun wi făll-iktab a-wa innă Măssinăɣ. 5Jĕnnĕj-takbat-en, ăṣṣiiwărăn ĕssin ănjălosăn n-ălxurmăt janen tele s-afrewăn-năsăn i-ashăr n-takbat ta n-ărkăwăl. A-wen a isalmadăn tamĕtte s-ălxurmăt n-Măssinăɣ d-emel-net. Ashăr n-takbat n-ărkăwăl en-dăɣ a făll inaqqăl ašni n-tikutawen i-tenăšše n-ibăkkaḍăn-năsăn. Măšan, wăr hawăn-e-ĕjjĕšăɣ asiḍĕn n-hărătăn wi hănen edăgg-en ămăra. 6Ǝmmĕk-wen-dăɣ a-s ĕnsan hărătăn dăɣ-ehăket wa n-tămuqqest. Edăgg wa ăzzarăn, tajjăšăn-t kăl-tikutawen hak ašăl i-ad-ĕjĕn ălxidmăt-năsăn 7măšan edăgg wa iknăn tĕšĕdje, u-tikutawen wa măqqărăn ɣas a ilan s-ujĕš-net iyyăn n-ašăl dăɣ-awătay, wăr has-t-illa daɣ ujĕš n-edăgg-en ar s-ad-ăssinɣăl ašni dăɣ-tĕssĕba n-ibăkkaḍăn wi-net hakd-dăɣ dăɣ-tĕssĕba n-inmĕšriyăn wi s-wăr totes tamĕtte amišĕl-năsăn. 8Ǝnta den-dăɣ daɣ ĕmmĕk wa s-hanăɣ-isalmad Unfas Šăddijăn a-s dăɣ-ăzzăman-en a ikkăs ehăket n-tămuqqest-wen-dăɣ ill'-e, wăr tămera tabarăt s-edăgg wa iknăn tĕšĕdje. 9Ămoos a-wen tele dd-tăssiktăt ăzzăman-wa-dăɣ nĕha, isalmad-anăɣ a-wen a-s ăddinăt wi sănɣalnen ašni wăla wi tajjănen tikutawen ti iyyăḍnen, wăr hasăn-ijrew a-wen iba n-iššaki n-iman-năsăn wăla tĕšĕdje n-ulhawăn. 10Ălɣibadăt-năsăn, insa făll-ălɣadatăn n-dăgg-adĕm har ašăl wa d-isimtĕttĕy Măssinăɣ hărăt iket-net. Ălɣadatăn-en, ĕnsan făll-ălwă/l/latăn d-isălan n-a-wa s-ila ăwadĕm s-ad-t-ăkš d-a-wa s-ila s-ad-t-isĕw. 11Igla a-wen-dăɣ s-ĕmmĕk-en-dăɣ har dd-osa ăzzăman wa d-ăsmăttăy Măssinăɣ talɣa, išrăy-dd a ăynayăn. Osă-dd Ălmasex, ĕnta a-s ămănokal n-kăl-tikutawen wa hanăɣ-ijrăwăn a-wa s-hanăɣ-ijjăš Măssinăɣ ărkăwăl-net, ĕnta a ijjăšăn ehăn n-ămudd wa ojărăn ufăn wa ăzzarăn ikrăs ăgg-adĕm; wen-hi, wăr t-la daɣ ăddunya-ta-dăɣ dd-tătwăxlăkăt. 12Ehăn-en-hi, iyyăn n-ujĕš a has-ija Ălmasex, wăr t-ijješ s-ašni n-išulaɣ wăla iwdesăn, ašni-net ĕnta iman-net a inɣălăn i-ad-hanăɣ-išĕšdĕj, nĕjrĕw tenăšše n-ibăkkaḍăn tĕmdat. 13Ăddinăt wi ănmăšrăynen, tĕšĕdje ta fălla-săn ifrăḍ alămăr, ašni n-išulaɣ d-iwdesăn d-imĕkkărora n-iwan a fălla-săn inaqqălăn i-ad-išdajăn dăɣ-ibăkkaḍăn-năsăn, 14ăb' ăṭṭăma n-ămăra-i s-ašni n-Ălmasex-i ojărăn a-wen a hanăɣ-iššĕšdăjăn dăɣ-ibăkkaḍăn-nănăɣ. Tărna n-Unfas Šăddijăn-i iɣlălăn a t-ikfăn tădabit ta s-ikf' iman-net, ămoos takute wăr iwer ălɣib. Ašni-net ĕnta-en-dăɣ a ăddooben ad-hanăɣ-ikkĕs dăɣ-iššaki n-iman-nănăɣ d-erk imojjan wi wăr hanăɣ-iha a săl tamăttant, nudabăt ălxidmăt i-Măssinăɣ-i iddărăn. 15A-wen-dăɣ a făl ărkăwăl n-tassaɣt wa ăynayăn, Ɣisa a ămmun i-ad-umas ănabdid-nănăɣ dat-Măssinăɣ i-ad-iɣlĕs dăgg-adĕm dăɣ-ibăkkaḍăn wi ămešălăn dăɣ-ărkăwăl wa ăzzarăn, ĕmmĕk-wen-dăɣ a-s ikfa Măssinăɣ ăddinăt wi dd-iɣră d-wi s-ijjăš ărkăwăl turhajăt n-ad-ĕjrĕwăn ɣur-Măssinăɣ tăkasit tăɣlalăt. 16Ămăra, isălan n-tăkasit a nĕha. Tăkasit ya, nĕssan a-s wăr t-illa ĕmmĕk s-tăẓun ar s-ad-iba ăwadĕm wa itĕtwĕkusun tĕzzar dihen, ad-e-tuẓan s-a-wa innă. 17Ălmăɣna n-a-wen a-s a ikk' ăwadĕm iddar, wăr dd-iḍĕkkĕl iyyăn isălan n-ĕlkĕnnaš wa n-tăkasit, har t-iba tĕzzar. 18A-wen-dăɣ a făl ărkăwăl n-tassaɣt wa ăzzarăn, wăr t-illa a infa dăɣ-ăzzamăn-net ar s-ašni wa sănɣalăn ăddinăt. 19Ăzzăman wa n-ănnăbi Mosa, iffĕssăr i-tamĕtte tijĕttewen n-alămăr n-Măssinăɣ tĕzzar iḍkăl ašni n-iwdesăn d-išulaɣ d-ălxărer wa šăggăɣăn, issărtăy a-wen-dăɣ iket-net d-aman, tĕzzar ănfăsnăfăs săr-s s-tisiḍseḍen ĕlkĕttab wa n-alămăr hakd tamĕtte iket-net. 20Innă i-tamĕtte ḍarăt-a-wen: "Ǝnta da ašni n-ărkăwăl n-tassaɣt ta dăr-wăn ija Măssinăɣ i-ad-tumasăm tamĕtte-nin." 21Ănfăsnăfăs daɣ Mosa ḍarăt-a-wen ehăket wa n-tămuqqest d-ikassăn wi n-ălɣibadăt iket-năsăn s-ašni. 22Ašni, iẓẓĕwăt a t-illan wăr-išĕšdĕj, a ikka daɣ ašni wăr-inɣel, wăr t-tĕlla tenăšše n-ibăkkaḍăn. 23Hărătăn-wi-dăɣ dd-nokăy iket-dăɣ-năsăn, taliwen a ămoosăn ănifăqqănen d-hărătăn wi hănen išĕnnawăn, a-wa ihăn ehăn wa n-tămuqqest, ašni a t-išašdajăn, ĕmmĕk-wen-dăɣ daɣ a-s hărătăn wi hănen išĕnnawăn, ămiɣatărăn ĕntăneḍ-dăɣ s-ad-tăn-šĕšdĕj takute tojărăt ta jăt făll-ărori n-ăkall. 24Ălmasex, wădden ehăn n-ămudd dayăn ifassăn n-dăgg-adĕm ănifăqqăn d-wa ihăn išĕnnawăn a ijjăš, ănn-ak, ehăn n-ămudd wa n-tidĕt ihăn išĕnnawăn a ijjăš i-ad-umas ănabdid-nănăɣ dat-Măssinăɣ. 25Ɣur-kăl-Ălyăhud, U-tikutawen wa măqqărăn, wăr has-t-illa ar iyyăn n-ujĕš dăɣ-awătay i-edăgg wa iknăn tĕšĕdje-i s-a-s t-itajjăš daɣ, ăwway ašni măšan, Ălmasex, wăr-ămɣatăr s-ad-itajjăš dihen hak awătay; iyyăn n-ujĕš a has-ija, iknă-dd ĕššăɣĕl. 26Ǝnnar wăr ija a-wen, adiš, ad-dd-tĕnta ăddunya har ašăl-i-dăɣ, wăr has-tĕgdeh tiyyăt tamăttant; adiš, ăhhuuššăl-as ad-wăr t-itĕffil aɣăna măšan Ălmasex, dăɣ-ajilal n-ăddunya-i-dăɣ, iyyăn n-ass ɣas a dd-ijă, ikfă iman-net, ămoos takute ta jarrăwăt tenăšše n-ibăkkaḍăn. 27Dăgg-adĕm, tiyyăt tamăttant a hasăn-tăqqalăt, ḍara-s tebădde dat-Măssinăɣ. 28Dăɣ-isălan n-a-wen-dăɣ a făl, Ălmasex, ikf' iman-net s-iyyăt i-ad-dd-ikkĕs dăgg-adĕm ăjjootnen dăɣ-ibăkkaḍăn, wăr dăɣ-s tĕlkem tiyyăt săl-ten-dăɣ. Ilkam dăɣ-s ad-dd-ăj ass wa s-ĕssin măšan ăsihe-wa, wădden dăɣ-isălan n-tenăšše n-ibăkkaḍăn, ăddinăt wi has-ăqqălnen a-s dd-e-ass i-ad-tăn-iɣlĕs.

will be added

X\