Ɣăbranităn 8

1Ămăra, edăgg-wa-dăɣ, ăknăt-t ujreh, ila tĕnfa: "U-tikutawen wa măqqărăn nĕla, wăr t-illa a dăr-ănifăqqa; ăqqiima dăɣ-išĕnnawăn daw-aɣil n-Măssinăɣ i-ilăn tărna." 2Ămašal wa t-iwarăn, itajj'-e dăɣ-edăgg wa šăddijăn ihăn ehăn n-ămudd wa măqqărăn n-tidĕt, wen ĕnta, Emăli a t-idăyăn, wădden dăgg-adĕm. 3Kăl-tikutawen wi măqqornen, ăsmănakăl-tăn Măssinăɣ i-ad-hakkăn, tĕkkatăn făll-iman wi-năsăn; a-wen-dăɣ daɣ a făl u-tikutawen wa măqqărăn nĕla, ăhhuuššăl-as ĕnta-dăɣ ad-ikĕt hărăt i-Măssinăɣ. 4Ǝnnăr iwar Ɣisa ărori n-ăkall, iket-di, wăr-itumas u-tikutawen ed făll-ărori n-ăkall-i, ĕllan-t ăddinăt wi tajjănen a-wen s-ĕmmĕk wa s-t-ifrăḍ alămăr 5măšan ăddinăt-en, a-wa tăn-išlăn, taliwen n-a-wa dăr-olăhăn išĕnnawăn a ămoos făl-a-s ănnăbi Mosa iman-net, a-s has-innă Măssinăɣ ad-idĕy ehăket wa šăddijăn n-tămoqqest, inn'-as: "Ǝqqĕn ehăket olăhăn d-wa kăy-ĕssĕknăɣ făll-taḍaɣt." 6Ămašal wa ufăn iẓlăyăn d-wen-dăɣ, ijrăw-t Ɣisa, făl-a-s, ămoos ămăra, ănabdid n-ărkăwăl n-tassaɣt ufăn wa ăzzarăn. 7Ǝnnăr wăr-ih' ălɣib ărkăwăl n-tassaɣt wa ăzzarăn, wăr-itĕmĕskil ijjĕš-dd iyyăn ăynayăn edăgg-net. 8Ăsmăqqa Măssinăɣ făll-tamĕtte-net, inn'-as: "Ǝlkamăn išilan dăɣ-e-ăjăɣ d-ehăn wa n-kăl-Iṣrayil d-ehăn wa n-kăl-Yăhuda ărkăwăl n-tassaɣt ăynayăn. 9Ărkăwăl iẓlayăn d-wa jeɣ d-tăy-săn ašăl wa tăn-dd-ărmăsăɣ s-ăfuss, ĕzzĕzjărăɣ-tăn-dd Miṣra. Jeɣ dăr-săn ărkăwăl-wen-dăɣ măšan, ărfăḍăn-t; jăn a-wen ɣas, ĕšlăyăɣ-asăn. 10Afăl okăyăn ăzzăman, ad-ahărăɣ ărkăwăl d-ehăn wa n-Iṣrayil; ărkăwăl-en, ĕnta da a-wa făll-ibdăd: ad-ăjăɣ tijĕttewen n-alămărăn-in dăɣ tiyĕtwen-năsăn, ĕktĕbăɣ-tănăt făll-ulhawăn-năsăn, umasăɣ Măssinăɣ-i n-Măssi-săn, umasăn tamĕtte-nin." 11Ad-ăbas-tăn-iha wăl' iyyăn ămiɣatărăn s-ad-isăɣăr ăgg-ăkall-net, wăla i-he-innĕn i-ă/n/na-s: "Uksaḍ Emăli" făl-a-s ad-hi-ĕzzĕyăn iket-dăɣ-năsăn, ɣur-wa ĕnḍărrăn har tawĕḍăd wa wăššărăn; 12ad-hasăn-in-ănšăɣ ălɣibăn-năsăn iket-dăɣ-năsăn, itawăɣ-in daɣ ibăkkaḍan-năsăn iket-dăɣ-năsăn. 13A-wen-dăɣ ija Măssinăɣ a ăssiilmădăn a-s ărkăwăl n-tassaɣt wa ăynayăn ufa wa ărĕwăn ed wăššar. Hărăt-i-dăɣ daɣ, e-d wăššar, išwar t-in-ăba.

will be added

X\