Ɣăbranităn 7

1Mălkăssăddiq, ĕnta a-s kăla ămoos ămănokal n-aɣrĕm wa n-Salĕm, ĕnta a-s u-tikutawen n-Măssinăɣ-i iknăn aḍkul. Dăɣ-ăzzăman-net ad-ijăḍ Ibrahim imănokalăn n-ikallăn iyyăḍ, irẓ'-en-dd. Ălwăqq wa dd-iqqăl Ibrahim ifal-dd akĕnnas, ilkăḍ-as Mălkăssăddiq, ittăr-as dăɣ-Măssinăɣ a dăɣ-s ijăn ălbărăka. 2Dăɣ-a-wen-dăɣ ad-t-ikfa Ibrahim tămukăst n-a-wa ila dăɣ-ehăre. Mălkăssăddiq, ălmăɣna n-isĕm-net: "Ămănokal n-iqqud"; aɣrĕm daɣ wa n-Salĕm-i făll-ăminakal, ălmăɣna-net: "Ămănokal n-ălxer." 3Mălkăssăddiq, wăr hanăɣ-jen ĕlkĕttabăn isălan n-abba-net wăla anna-net wăla ăṭṭarex-net; wăr-ătwăssăn ĕmmĕk wa s-iwa wăla ĕmmĕk wa s-ijmăḍ ăddunya, ătiwăssăn ɣas a-s olăh d-Rure-s n-Măssinăɣ ed tumast-net i-u-tikutawen, tăɣlal. 4Ăhalĕs-i-dăɣ, tidĕt-dăɣ a-s i măqqărăn. Tĕmɣăre-net a dd-torăwăt a-s wăla Ibrahim-i n-amɣar n-amăzzaɣ, ikkăs-as tămukăst n-a-wa dd-ohăɣ dăɣ-akĕnnas iket-net. 5Dăgg-Lewi-i n-kăl-tikutawen, innă alămăr wa n-ănnăbi Mosa, ĕntăneḍ a he-rammăsnen timukăsen n-tamĕtte ta n-kăl-Iṣrayil-i n-temiḍt-năsăn kud-dăɣ iket-dăɣ-năsăn ijĕllan n-Ibrahim a dd-ĕzjarăn. 6Mălkăssăddiq ĕnta, kud-dăɣ, wăr-ih' ăṭṭarex wa dd-itrăn tumast n-u-tikutawen, irmăs dăɣ-Ibrahim-i s-ijjăš Măssinăɣ ărkăwăl, tămukăst, olăs daɣ ḍarăt-a-wen, ittăr dăɣ-Măssinăɣ a ijăn ălbăraka dăɣ-Ibrahim. 7Wăr t-ih' ăššăk a-wen a-s ăwadĕm wa ojărăn, a itajjăn ălbăraka dăɣ-wa ojăr. 8Dăgg-Lewi i-n-kăl-tikutawen, tidĕt, ĕntăneḍ a rammăsnen timukăsen măšan dăgg-adĕm ɣas a ămoosăn făll-la tamăttant tărna, a-s ija a-wen, Mălkăssăddiq-i irmăsăn tămukăst făll-Ibrahim, ĕnnăn-anăɣ ĕlkĕttabăn a-s iddar hărkuk. 9Năddoobăt făw ămăra-dăɣ ad-nănn a-s dăgg-Lewi-i rammăsnen tămukăst, ĕntăneḍ iman-năsăn, ĕkkasăn-tăt i-Mălkăssăddiq ed ikkăs-as-tăt Ibrahim-i tăn-dd-ăshăyăwăn. 10A-wen, ma t-ijăn? Ij'-e a-wa s-a-s ităjj a-wen-dăɣ, iha Lewi tiktukar n-ti-s Ibrahim ăzzăman wa d-ămmoqqăs d-Mălkăssăddiq. 11Alămăr wa ikfă Măssinăɣ tamĕtte ta n-kăl-Iṣrayil, tikutawen ti tăjjăn kăl-Lewi-i n-kăl-tikutawen, a făl igla. Ǝnnăr ĕjrawnăt tikutawen-tin-dăɣ tenăšše n-ibăkkaḍăn, iket-di, wăr-itĕmɣutor Măssinăɣ s-asĕssiwi n-u-tikutawen iyyăn dăr-săn iẓlayăn ijan alădăb wa n-Mălkăssăddiq, ănn-ak, ad-ăqqayĕm-wen-dăɣ ilkămăn i-Lewi-i dd-ijmăḍăn alădăb wa n-Harun. 12Ămăra, šămad immĕskăl ălxal wa n-kăl-tikutawen, adiš, ăhhuušsăl daɣ ad-ămmăskăl alămăr wa tăn-dd-iqqălăn. 13Emăli-i s-hawăn-nĕha ti-net, isălan-net hakd-dăɣ tawset ta dd-izjăr, wăr tăt-iha ere s-kăla iqqăl u-tikutawen; wăr t-illa ere ihan temiḍt-net s-kăla ăshaha aḍutăn wi n-tikutawen dăɣ-edăgg wa dăɣ-raqqănăt. 14Ădduuttăt a-s Emăli-nănăɣ, tawset ta n-Yăhuda ad-dd-izjăr. Ăzzăman daɣ wa d-immĕjrăd ănnăbi Mosa dăɣ-isălan n-kăl-tikutawen, wăr dd-iḍkel isălan n-tawset ta n-Yăhuda. 15Tumast n-Ɣisa i-u-tikutawen, tămoos a iglan făll-tumast ta n-Mălkăssăddiq; ăssiitbăt a-wen a-s ĕnta d-Lewi, wăr-olehăn. 16Tumast-net i-u-tikutawen, wădden erhet n-ăgg-adĕm a tăt-dd-orăwăn; ijrăw-tăt s-ăṣṣahăt n-tămudre-net ta tăɣlălăt. 17Ăjjĕyha Măssinăɣ dăɣ-isălan-net dăɣ-ĕlkĕttab a-s innă: "Ad-kăy-ăjăɣ u-tikutawen iɣlalăn iglan făll-tumast ta n-Mălkăssăddiq." 18Alămăr wa dd-ăzzarăn, izjăr-in ed wăr-ila tărna s-iɣlăs ăddinăt dăɣ-ibăkkaḍăn-năsăn, wăr t-illa ălfăyda t-ihan. 19Alămăr wa n-ănnăbi Mosa, indăr-as ad-săr-năɣ dd-isĕmdĕw tĕšĕdje, a-wen-dăɣ a făl ămăra, nĕkrăš ăṭṭăma ufăn wa hanăɣ-ăsjăr alămăr. Ǝnta-den-dăɣ a-wa hanăɣ-ikfăn turhajăt d-ad-nĕnmihăẓ d-Măssinăɣ. 20Ḍarăt-a-wen daɣ, Măssinăɣ iman-net a ihăḍăn n-a-s ad-umas Ɣisa u-tikutawen wa măqqărăn. Tahuḍe šund ten-dăɣ, wăr t-illa u-tikutawen s-kăla has-tăt-ija. 21A-wen-dăɣ a făl ašăl wa d-ămoos Ɣisa u-tikutawen, ihăḍ-as Măssinăɣ, inn'-as: "Năkk Emăli a ihăḍăn, a-wa ĕnneɣ daɣ wăr-ilkem ad-săr-s ăqqalăɣ: ad-tumasăd u-tikutawen iɣlalăn." 22Ămăra, Ɣisa a-s tasĕtbat n-tassaɣt ta nĕja d-Măssinăɣ, ĕnta a hanăɣ iḍmănăn ărkăwăl n-tassaɣt ufăn wa n-ibda. 23Kăl-tikutawen, ĕjjĕtăn, nĕssan a-s wăr tăn-iha-i ăhojăn dăɣ-tumast n-u-tikutawen, ed tĕgdal-asăn tamăttant a-wen. 24Ɣisa ĕnta, iddar hărkuk. A-wen-dăɣ a făl tumast-net i-u-tikutawen, wăr-ilkem ad-t-tĕjmaḍ tăɣlal. 25A-wen-dăɣ a făl ăddinăt wi jănen Ɣisa ĕssĕbab n-tassaɣt-năsăn d-Măssinăɣ, ila tărna s-tăn-dd-iɣlăs dăɣ-e d t-illăm abăkkaḍ ed hărkuk iddar, itĕddal-asăn daɣ Măssinăɣ. 26Ijmaḍ-t ăššăk a-s ămănokal n-kăl-tikutawen šund-wen-dăɣ a-s nămiɣatăr itĕmmalăn jere-năɣ d-Măssinăɣ. Ɣisa, ăddoobăt a-wen ed šăddiij, wăr t-illa iššaki t-iwarăn, wăr-il' ălɣib, ibḍ'-e Măssinăɣ d-inăsbăkkaḍăn, iḍkăl-t s-diha dd-ĕmdăn išĕnnawăn. 27Wăr-ămɣatăr daɣ šund a-wa jăn kăl-tikutawen wi iyyăḍnen-i s-ămoos fărĕḍ ad-tĕkkatăn făll-ibăkkaḍăn-năsăn hak ašăl tĕzzar, ĕkĕtăn făll-wi n-tamĕtte. Ɣisa ĕnta, ikf'-iman-net s-iyyăt, takute ta ija tĕgdăh hărkuk, ăbas tĕlkam daɣ tiyyăt săl ten-dăɣ. 28Ăddinăt wi ija Ăṭṭăwrăt wa n-ănnăbi Mosa kăl-tikutawen wi măqqornen, han-tăn ăddinăt rĕkkĕmnen măšan, măjrăd wa ija Măssinăɣ a-s ihăḍ ḍarăt a-s dd-ăzzăbbăt alămăr, măjrăd-wen-dăɣ a-s ĕssĕbab wa dd-orăwăn a-s ămoos Rure-s n-Măssinăɣ u-tikutawen wa măqqărăn iɣlalăn s-wăr t-illa ălɣib t-iwarăn.

will be added

X\