Ɣăbranităn 6

1A-wen-dăɣ a făl tijĕttewen ti ăzzarnen, răqqisnen făll-nătt teɣăre dăɣ-isălan n-Ălmasex, nakĕyet-tănăt s-a-wa hanăɣ-itajjăn meddĕn ăɣradnen. Tijĕttewen-en-hi, a tănăt-ămoosăn: tătubt dăɣ-timašalen ti wăren ĕnfa hărăt, immun s-Măssinăɣ, 2itwĕsĕlmiɣăn dăɣ-aman, isălan n-asĕwăr n-ifassăn iɣăfawăn n-ăddinăt i-ad-dăɣ-săn ijăn ălbăraka, tanăkra jer-inĕmmuttan d-isălan n-ašăl wa n-tebădde. 3Ămăra, năhĕlet data-năɣ; a-wen-dăɣ daɣ a he-năj kunta irḍă Măssinăɣ. 4Ămăra, ăddinăt wi s-ora ănnur n-măjrăd n-Măssinăɣ tiṭṭawen-năsăn, ăkrăbben tiẓudawen ti ihăkk Măssinăɣ, osăɣăn d-Unfas Šăddijăn, 5ăžžorrăben tăẓude ta ija măjrăd n-Măssinăɣ, ĕlmădăn s-tĕmɣăre n-ăddunya ta dd-malăt, 6măšan hakd a-wen-dăɣ iket-net, ĕqqălăn ḍara-s, oḍăn dăɣ-erk imojjan-năsăn wi n-ibda, a-di, ăbas hasăn-t-tĕlla tămujriẓt tăn-dd-siɣulăt Ălmasex ed a-wa jăn, wăr-iẓley d-a-s atwĕṣlĕb ăynayăn a tajjăn i-Rure-s n-Măssinăɣ, tajjăn-t isĕḍsa dat-ăddunya iket-net. 7Ăkall, wădden, e-d t-iwăt ajĕnna har dăɣ-s ăddomăt ăwadĕm hărăt, ad-dd-isĕdwĕl teyĕšše tĕnfat ăddinăt wi t-ĕjyăknen măšan, Măssinăɣ ad-dd-izizĕbben ărrăxmăt-net făll-ăkall-en. 8Afăl wăr dd-isĕdwĕl ăkall-en ar isĕnnanăn d-tabĕ/n/nĕnt, adiš, wăr-infa hărăt, wăr has-in-ăqqima ar ad-t-ilɣĕn Măssinăɣ, isĕntĕs terk teyĕšše ta dd-issĕdwăl. 9Ayĕtma-i nĕkna tărha, a hawăn-ija măjrăd wa hawăn-nĕtăjj dăɣ-tăkmo-dăɣ, insa ĕnniyăt-nănăɣ dăɣ-isălan-năwăn, wăr nĕkkes ăṭṭăma, ed nĕssan a-s ašrut wa olăɣăn a warăm, ĕnta-den-dăɣ daɣ ašrut wa ih' ĕlɣĕllas. 10Măssinăɣ, oɣad dăɣ-a-wa ităjj iket-net, wăr hin-ittĕwa a-wa kăwăn-išlăn d-tărha ta jăm i-imĕššeddĕjăn; a-wen jăm-t, ĕnta-den-dăɣ daɣ a-wa kăwăn-išlăn har ašăl-i-dăɣ. 11Derhan-nănăɣ hawăn da: Ǝdgĕẓăt dăɣ-a-wa hăm hărkuk i-ad-kăwăn-ăkf Măssinăɣ a-wa ih' ăṭṭăma-năwăn imda. 12Ăyyăt fălla-wăn sendad, tălălăt immun d-akuyĕd wa jăn ăddinăt wi omănnen s-Măssinăɣ s-ijjăš ărkăwăl n-ad-tăn-ăkf a-wa s-hasăn-innă. 13Ăzzăman wa d-ijjăš Măssinăɣ ărkăwăl i-ănnăbi Ibrahim, inhăy a-s wăr t-illa ere t-illan jĕnnĕj-s s-has-ihăḍ ɣas, ihăḍ-as s-iman wi-net, inn'-as: 14"Ibrahim, haḍăɣ-ak a-s ad-dăɣ-k ăjăɣ ălbărăka, tĕtĕy ĕzzurĕyăt-năk." 15A-wa innă Măssinăɣ i-Ibrahim, ăẓẓăydăr-as, iqqăl-as, ijrăw-t daɣ. 16Dăgg-adĕm ăzzăman-en, e-d itĕhhaḍ ăwadĕm i-iyyăn, ad-ĕjĕn tahuḍe s-ere tăn-ojărăn; tahuḍe daɣ ten-dăɣ a he-tumasăt ăḍḍimmana n-ărkăwăl wa ănmăjjăšăn. 17A-wen-dăɣ a făl Măssinăɣ iman-net, irha ad-isĕkĕn imĕkkusa wi tĕkka tĕnfa n-ărkăwăl wa hasăn-ijjăš, issĕlmăd a-s wăr-ilkem ad-irẓa dăɣ-tĕnna-net, a-wa innă, ad-ăj. 18Ǝllan-t ĕssin ijităn s-wăr-ilkem ad-săr-săn iqqal Măssinăɣ wăla ad-ăbbuggăt a-wa innă: ărkăwăl wa ijjăš d-tăhuḍe ta ăssewăḍ făll-a-wen i-ad-isĕdduttĕt ărkăwăl-en. A-wen-dăɣ a făl năkkăneḍ-i ĕjrăwnen tinahăɣen ɣur-Măssinăɣ, măjrăd-wa-dăɣ, ăsikoyăd-anăɣ s-ăṣṣahăt i-ad-nĕjrĕw ăṭṭăma wa hanăɣ-ăsjăr Măssinăɣ. 19Ăṭṭăma daɣ wa-hi, olăh d-asĕmdi wa ăṣṣohen n-ti n-ăho, intam dăɣ-ulhawăn-nănăɣ, wăr-ijĕnn bahu. A-wen-dăɣ a făl ărido wa ibḍăn edăgg wa šăddijăn d-wa iknăn tĕšĕdje dăɣ-ehăn n-ămudd wa măqqărăn, ămer'-anăɣ ămăra i-ad-nĕjjĕš har ammas-net. 20Edăgg-en-hi, ăzzar-anăɣ săr-s Ɣisa, ămoos U-tikutawen wa măqqărăn iɣlălăn, ilkamăn i-tumast ta n-Mălkăssăddiq.

will be added

X\