Ɣăbranităn 5

1U-tikutawen wa măqqărăn, jer-tamĕtte ta n-kăl-Iṣrayil a dăɣ-dd-itanăfran, isăxdĕm-t Măssinăɣ, umas ănabdid n-dăgg-adĕm jere-săn d-Măssinăɣ. A-wa ihakk ăgg-adĕm i-Măssinăɣ, hakd tikutawen ti ităjj i-Măssinăɣ, u-tikutawen a iwar ad-ikĕt a-wen i-Măssinăɣ i-tenăšše n-ibăkkaḍăn. 2U-tikutawen wa măqqărăn, ăddobăt ad-aḍĕn tăhanint i-wi ĕžhălnen i-a-wa innă alămăr d-wi has-tinmĕšriynen ed ĕnta iman-net ăgg-adĕm šund ĕntăneḍ. 3A-wen-dăɣ a făl t-iwar ĕnta iman-net ad-ikkĕs takute făll-iman-net i-ibăkkaḍăn s-tizarăt s-ĕmmĕk wa s-itĕkkat făll-ăddinăt wi iyyăḍnen i-ad-ĕjrĕwăn tenăšše. 4Wăr t-illa ăwadĕm ăddooben ad-dd-iggĕd ɣas, ăj iman-net u-tikutawen wa măqqărăn, ed Măssinăɣ a dd-iɣarrăn ăwadĕm s-a-wen, s-ĕmmĕk wa s-dd-iɣra ibda Harun s-iman-net. 5Ălmasex daɣ, wăr dd-igged ɣas, ijă iman-net ămănokal n-kăl-tikutawen, Măssinăɣ a t-ikfăn turhajăt-ten-dăɣ ed iɣr'-e-hi-dd, inn'-as: "Kăyy a-s Rure-ɣ, ɣur ašăl-i-dăɣ, năkk a-s Abba-năk." 6Olăs daɣ innă Măssinăɣ dăɣ-edăgg iyyăn dăɣ-ĕlkĕttab: "Tumast-năk n-u-tikutawen wa măqqărăn, tăɣlal ed tĕlkam i-ta n-Mălkăssăddiq." 7Ăzzăman wa ikkăs Ɣisa făll-ărori n-ăkall-i-dăɣ, ikkas ăššăk n-a-s Măssinăɣ ila tărna s-t-iɣlăs-dd dăɣ-tamăttant; a-wen-dăɣ a făl ijjĕynăn Măssinăɣ, ittăr dăɣ-s ălhimmăt s-ăṣṣahăt, iɣlăs-t Măssinăɣ, iqbăl tittar-net ed ăsrăs iman-net data-s. 8Ɣisa, tidĕt, Rure-s n-Măssinăɣ a ămoos măšan a-wen wăr fălla-s in-iwweɣ ahănay n-aɣăna. 9Šămad ămešăl a-wa fălla-s irha Măssinăɣ iket-net ad-ijrăw turhajăt n-ad-umas i-ăddinăt wi has-sajadnen Ămaɣlas wa tăn-ihakkăn ĕlɣĕllas iɣlalăn. 10Măssinăɣ a t-ijăn U-tikutawen wa măqqărăn ilkamăn i-tumast ta n-Mălkăssăddiq. 11Ayĕtma! Ill'-e a ăjjeen s-nărha ad-hawăn-tăn-nănn dăɣ-isălan-wi-dăɣ măšan wăr hanăɣ-lămmiḍ asĕssĕjrah-năwăn ed wăr-irmeḍ ujreh-năwăn. 12Kăwăneḍ-i s-ašăl-i-dăɣ, ănihăjja s-aru d-tămoosăm imusănăn saɣranen, nĕhannăy a-s hărwa-dăɣ tămiɣatărăm s-ere kăwăn-issăɣrăn tijĕttewen ti ăzzarnen n-măjrăd n-Măssinăɣ. Tolăhăm hărwa d-aratăn tattăḍnen, wăr tăddobem tetăte n-imĕnsiwăn ăẓẓaynen. 13Ăwadĕm ya itattăḍăn, amărkĕs a ămoos; amărkĕs daɣ, tĕssanăm a-s wăr t-illa a ijrah dăɣ-tămudre băršeɣ ad-ilmĕd a-wa oɣădăn. 14Imĕnsiwăn wi ăẓẓaynen, ăddinăt ăɣradnen lanen tayĕtte s-ĕbḍăn a-wa olăɣăn d-a-wa lăbasăn a tăn-tattănen.

will be added

X\