Ɣăbranităn 4

1Măssinăɣ iman-net a hanăɣ-ijjăšăn ărkăwăl n-a-s ilkam ad-ɣur-s nĕjrĕw tăsonfat, adiš năjet ĕnniyăt i-iman-nănăɣ; wăr kăwăn-ităjjăšet wăl' iyyăn inkaẓăn i-iman-net ujĕš n-ăkall-wen-dăɣ n-tăsonfat. 2Ălĕnžil-wa-dăɣ s-nĕsla a-s ĕslăn imărawăn-nănăɣ măšan, wăr tăn-infa s-hărăt, ăsjădăn-asăn măšan wăr săr-s omenăn i-ad-tăn-infĕw s-hărăt. 3Nĕẓlay dăr-săn năkkăneḍ-i omănnen s-Ɣisa ed nĕjjăš tăsonfat ta hanăɣ-ikittĕw Măssinăɣ a-s innă i-imărawăn-nănăɣ ibda: "Ijjăš-ahi fălla-săn aḍkăr, hăḍăɣ-asăn a-s wăr-ilkem ad-ĕjjašăn ăkall wa dăɣ-hasăn-kittĕwăɣ i-tăsonfat." Wen-măjrăd, a-s t-ija Măssinăɣ, ixlak-dd a-wa t-illăn iket-net. 4Ill'-e edăgg dăɣ-ĕlkĕttab n-Măssinăɣ innăn făll-ašăl-wen-dăɣ n-ĕssa: "Ašăl wa s-ĕssa, ăssunfa Măssinăɣ dăɣ-a-wa t-išlăn iket-net." 5Ătwănnă daɣ a-s: "Ăkall wa s-hasăn-ĕjjăšăɣ ărkăwăl-net, wăr dăɣ-săn ilkem ad-t-ĕjjašăn i-tăsonfat." 6Ăddinăt wi ăzzarnen s-măsăllăt n-Ălĕnžil, wăr ĕjješăn tăsonfat-net ed unjăyăn s-asjĕd-has. Măšan, wăr hin-ikkes a-wen a-s ĕllan-t iyyăḍ he-ijjĕšnen tăsonfat-ten-dăɣ. 7A-wen-dăɣ a făl issĕbdăd Măssinăɣ ašăl iyyăn daɣ s-ijă isĕm: "Ašăl-i-dăɣ." Okăy ăzzăman-wen-dăɣ s-a ăjjeen, olăs daɣ măjrăd-wen-dăɣ atwĕnn s-emm n-ănnăbi Dawĕd, ătwănn'-anăɣ, innă Măssinăɣ: "Afăl tĕslăm i-măjrăd dd-ifalăn Măssinăɣ ašăl-i-dăɣ, wăr has-tăsɣărăm ulhawăn-năwăn." 8Ăkall wa s-ijjăš Măssinăɣ ărkăwăl-net i-kăl-ibda, ĕnnar ijraw Yešwa i-tamĕtte-net ujĕš-net i-ad-dăɣ-s sunf, wăr-itĕmɣutor Măssinăɣ s-ad-ăj isălan n-ašăl n-tăsonfat ilkamăn. 9Tăsonfat šund-ten-dăɣ a tĕlkamăt dăɣ-tamĕtte ta n-Măssinăɣ. 10Ăwadĕm wa ijjăšăn tăsonfat ta dd-ijă Măssinăɣ, ad-ijrĕw tăsonfat dăɣ-a-wa t-išlăn iket-net šund ĕmmĕk wa s-ăssunfa Măssinăɣ dăɣ-a-wa t-išlăn ĕnta iman-net. 11A-wen-dăɣ a făl, rurĕdăt-anăɣ ujĕš n-tăsonfat-ten-dăɣ, wăr hanăɣ-ităjjăšet ăwadĕm wăl' iyyăn hin-oḍan făl-a-s innin unjăy s-asjĕd i-a-wa innă Măssinăɣ šund a-wa jăn imărawăn-nănăɣ ibda. 12Măjrăd n-Măssinăɣ, ihakk tămudre, ila tărna, ojăr tăkoba n-ĕssin imawăn ĕmsădnen amsud, ibiḍḍĕw iman d-unfas, itakk jer-izĕmmuz d-axărăbba; wăr t-illa derhan wăla anĕzjum ihan ăgg-adĕm s-wădden ihannăy-t, issan săr-s. 13Wăr t-illa făw a ihan ăddunya idrajăn i-Măssinăɣ. Wăr t-illa a dd-ixlakăn s-wădden izzaf data-s, ĕnta-en-dăɣ daɣ a-s ilkam a data-s dd-nĕbdĕd iket-dăɣ-nănăɣ, iffukkăr-dd a-wa nămešăl iket-net. 14Šămad, wăr t-ih' ăššăk a-s nĕla U-tikutawen ijan tĕmɣăre-ten-dăɣ, irăs išĕnnawăn, ikkă wa dăɣ-săn-in-illan, ămoos-anăɣ ănabdid ɣur-Măssinăɣ, a-wen a t-ămoosăn Ɣisa-i n-Rure-s n-Măssinăɣ, adiš, năknet uḍĕf n-tijĕttewen n-immun-nănăɣ. 15U-tikutawen wa măqqărăn nĕla, wădden-i s-wăr ha tăhanint ulh-net wăla-i wărăn ăddobăt ad-hanăɣ-idhĕl dăɣ-iba n-ăṣṣahăt-nănăɣ. Ăžžurrăb-t Iblis s-ĕmmĕk wa s-hanăɣ-itižărrub dăɣ-hărăt iket-net măšan, wăr t-illa abăkkaḍ ămešăl. 16Wăr hanăɣ-isărmaɣet hărăt, nahĕẓet-in tasăqqaymut n-Măssinăɣ ta n-ănnuɣmăt s-ĕnniyăt ozjan i-ad-hanăɣ-aḍĕn tăhanint, ăkf'-anăɣ ănnuɣmăt, ilal-anăɣ ălwăqq wa d-nămɣatăr s-tidĕt-dăɣ s-a-wen.

will be added

X\