Ɣăbranităn 3

1Tĕssĕba n-a-wen-dăɣ a făl, ayĕtma-ɣ, kăwăneḍ-i dd-iɣră Măssinăɣ s-iman-net, ij'-iwăn imĕššeddĕjăn, zĕjjĕzzăt tămudre ta iṭṭăf Ɣisa, ɣaymăt t-dd-kittĕwăm, ĕnta-i n-ănămmašul d-U-tikutawen măqqărăn hanăɣ-itajjăn isălan n-tijĕttewen ti făll-igla immun-nănăɣ. 2Ăsnăfrăn-t Măssinăɣ, iɣdăl dăɣ-ălxidmăt wa t-issăɣlăf s-ĕmmĕk wa s-ibda, iɣdal ănnăbi Mosa dăɣ-ehăn-net. 3Măšan, semɣar wa dăr-ăniihăjja Ɣisa, ojărnăt tisenen-net wa n-Mosa s-a ăjjeen ed ere wa idăyăn ehăn, ojărnăt tisenen-net ehăn wa idăy. 4A-wen ălmăɣna-net a-s, ehăn, a ămoos-dăɣ, ăgg-adĕm n-ălbănna ɣas a t-idăyăn măšan, Măssinăɣ ĕnta, wăr t-illa a t-illan s-wădden ĕnta a t-idăyăn. 5Ănnăbi Mosa, akli n-Măssinăɣ, ĕnta a ăsnăfrăn i-ad-izar i-tamĕtte dăɣ-ălxidmăt wa ija dăɣ-ehăn n-Măssinăɣ; a innă Măssinăɣ-dăɣ, ĕnta a iwar ad-t-in-isĕssiwăḍ tamĕtte. 6Măšan Ălmasex ĕnta, ăzzăr-t Măssinăɣ dăɣ-ehăn-net, ij'-e jĕnnĕj-hărăt iket-net ed ĕnta a-s Rure-s. Ašăl-i-dăɣ, năkkăneḍ a-s ehăn n-Măssinăɣ-wen-dăɣ a nĕkkăs wăr nĕja ăššăk dăɣ-immun-nănăɣ, ăsihălăylăy-anăɣ ăṭṭăma wa hanăɣ-ăsjăr. 7Isălan n-a-wen-dăɣ a dăɣ-immĕjrăd Unfas Šăddijăn a-s innă: "Ašăl-i-dăɣ, afăl tĕslăm i-măjrăd dd-ifalăn Măssinăɣ, 8wăr has-tăsɣărăm ulhawăn-năwăn šund a-wa jăn imărawăn-năwăn-i hi-jănen tĕmmaẓ n-tihăyyen dăɣ-tanĕẓruft. 9Ăzzăman-en orămăn-ahi imărawăn-năwăn, kud-dăɣ wăr t-illa iji n-Măssinăɣ s-wădden jeɣ-t data-săn har ĕkkoẓăt timĕrwen n-awătay. 10Ijjăš-ahi fălla-săn aḍkăr, ĕnneɣ-asăn: 'Ǝfraɣăn ulhawăn-năwăn hahi, tabarăt ta s-ăɣelăɣ, ad-tăt-tărmĕsăm, tunjăyăm săr-s.' 11A-wen-dăɣ a făl, a-wa dăɣ hi-ija aḍkăr-năsăn, hăḍăɣ-asăn kud ilkam ad-ĕjjašăn ăkall wa dăɣ-hasăn-kittĕwăɣ i-tăsonfat." 12Ayĕtma-ɣ, ăjăt ĕnniyăt i-iman-năwăn; wăr-itătăjrawet wăl' iyyăn dăɣ-wăn s-lăbas wăla-i s-ăqqur ulh-net, igdal-as a-wen-dăɣ asjĕd i-tĕnna n-Măssinăɣ-i iddărăn. 13Măssinăɣ a innă: "Ašăl-i-dăɣ", a-wen-dăɣ a făl hak iyyăn dăɣ-wăn, ăqqaymet hak ašăl isamatăr amidi-net i-ad-wăr-ăsɣăr wăl' iyyăn dăɣ-wăn ulh-net, itiḍĕw dăɣ-abăkkaḍ. 14Ădduuttăt ămăra a-s nămeedăw d-Ălmasex a nĕkkăs nĕjlay dăɣ-alkum-has s-ĕmmĕk wa s-săr-s nomăn ašăl ăzzarăn. 15Inn'-anăɣ ĕlkĕttab n-Măssinăɣ: " 'Ašăl-i-dăɣ', afăl tĕslăm i-măjrad dd-ifalăn Măssinăɣ, wăr has-tăsɣărăm ulhawăn-năwăn šund a-wa jăn imărawăn-năwăn ibda a-s has-ănmăšrăyăn." 16Ămăra, ma ămoosăn ăddinăt-win-dăɣ ĕslănen i-măjrăd n-Emăli măšan ănmăšrăyăn-as? Wăr t-illa a ămoosăn ar tamĕtte-tĕdi-dăɣ dd-izzĕzjăr ănnăbi Mosa ăkall wa n-Miṣra. 17Mi făll t-ijjăš aḍkăr har ijă ĕkkoẓăt timĕrwen n-awătay? Ăddinăt wi di-dăɣ ofănen abăkkaḍ s-ašăl-i-dăɣ, ăba-tăn, ĕnsănăt tifĕkwen-năsăn dăɣ-tanĕẓruft. 18Mi s-iha Măssinăɣ ti-net a-s ihăḍ innă: "Wăr-ilkem ad-ĕjjašăn ăkall wa dăɣ-hasăn-kittĕwăɣ i-tăsonfat?" Ăddinăt-wi-dăɣ fălla-s ăffulăgnen, a-s iha ti-năsăn. 19A-wa isalmad-anăɣ a-s ăddinăt-en, tăɣart n-ulhawăn-năsăn a hasăn-igdălăn ad-ĕjjĕšăn ăkall wa n-tăsonfat.

will be added

X\