Ɣăbranităn 2

1A-wen-dăɣ a făl ĕlɣĕllas wa hanăɣ-ikfa Măssinăɣ, nĕjlĕyet dăɣ-s i-ad-wăr hanăɣ-itĕzĕwit emănăn wa n-tanmĕšrayt săr-năɣ dd-e-arĕwăn ĕlhĕllak. 2Dăɣ-ăzzăman hin-okayăn, măjrăd wa jăn ănjălosăn i-imărawăn-nănăɣ, itbăt, wi dăɣ-săn ănmăšrăynen, hakd wi unjăynen s-asjĕd i-măjrăd-wen-dăɣ, ănmănhăyăn d-iman-năsăn s-a-wa dăr-ogdăh a-wa ăɣšădăn. 3Ǝlɣĕllas wa hanăɣ-ikfa Măssinăɣ, Emăli iman-net a săr-năɣ dd-ăzzarăn, ij'-anăɣ isălan n-tĕmɣăre-net. Ḍara-s, ăsdătten-anăɣ-t inĕmmušal wi ăjjihănen i-a-wa innă. Ak ĕlɣĕllas ogdăhăn d-a-wen-dăɣ, afăl has-in-năšbăššăḍ, ma t-illan daɣ hanăɣ-e-iɣlĕsăn dăɣ-ăššar wa ilkămăn? 4Ăddinăt wi hanăɣ-ăjjihănen s-ĕlɣĕllas-wen-dăɣ, ăsdăttăt Măssinăɣ a-wa ĕnnăn s-ijităn n-Măssinăɣ d-ănnuɣăn n-hărătăn ăssuksăḍnen wi ămešălăn, ij'-asăn daɣ Unfas Šăddijăn isuf wi ităjj i-ăddinăt dăɣ-erhet-net. 5Ǝnhĕywăt! Ăddunya ta dd-malăt s-hawăn-nĕha isălan-net, dăgg-adĕm a dăɣ-s-e-izarăn wădden ănjălosăn. 6Isălan n-a-wen-dăɣ a dăɣ-innă ĕlkĕttab n-Măssinăɣ dăɣ-edăgg iyyăn: "Măssinăɣ! Ak ăgg-adĕm-i-dăɣ, ma ămoos, kittĕwăd-t-dd? Ak ma iqqal rure-s n-Adĕm, ḍanăd-t? 7Tidĕt-dăɣ a-s jed-t daw-ănjălosăn i-hărăt n-ăzzăman dăruusăn, tĕkfed-t ălxurmăt d-semɣar, 8jed-t jĕnnĕj-hărăt iket-net." Dăɣ-tărna ta ikfa Măssinăɣ i-ăgg-adĕm făll-hărăt iket-net, wăr t-illa a hin-oyya s-wădden ij'-e jĕnnĕj-s măšan, hakd a-wen-dăɣ, nĕhannăy a-s ămăra-dăɣ, wădden hărăt iket-net a făll-ila tărna, hărăt ilkamăn a-wen. 9Ɣisa, ămăra-dăɣ, ij'-e Măssinăɣ i-hărăt n-ăzzăman dăruusăn daw-ănjălosăn i-ad-ămmăt dăɣ-ănnuɣmăt n-Măssinăɣ dăɣ-tĕssĕba n-ibăkkaḍăn n-ăddinăt iket-dăɣ-năsăn. A-wen-dăɣ a făl ašăl-i-dăɣ, ij'-as Măssinăɣ ălxurmăt d-semɣar ălhăk. 10Wăr t-illa a t-illan s-wădden Măssinăɣ a t-iṭṭafăn s-emel. Ǝnta a irhăn ad-inhĕy Ɣisa tersĕmmawen, imdĕw-dd săr-s semɣar iket-net, umasăn ăddinăt ăjjootnen aratăn n-Măssinăɣ, ĕjrĕwăn ălxurmăt ed tăɣlăs-tăn tărna n-Ɣisa-i 11iššĕšdăjăn dăgg-adĕm dăɣ-ibăkkaḍăn-năsăn, ohăr dăr-săn Abba. A-wen-dăɣ a făl wăr tăn-ăssajăr iman-net, iglă har tăn-iɣarr s-isĕm: "Ayĕtma-ɣ." 12Tĕssĕba n-a-wen-dăɣ a făl innă Ɣisa i-Măssinăɣ, iktab a-wen dăɣ-ĕlkĕttab, innă: "Măssinăɣ! Ad-ăjăɣ isălan-năk i-ayĕtma-ɣ, Amĕlăɣ-kăy dăɣ-ammas n-idăggan wi dăɣ-tažămmaɣăn." 13Olăs daɣ innă: "Ăsifăllăɣ făll-Măssinăɣ", tĕzzar ăssewăḍ făll-a-wen: "Măssinăɣ, tamĕtte ta hi-tĕkfed, năkk d-ĕnta da, năžžimmăɣ data-k." 14Ɣisa, ĕlɣĕllas n-dăgg-adĕm a-s dd-osa, a-wen-dăɣ a făl ĕnta-dăɣ, ămoos-dd ăgg-adĕm. Osă-dd, ămmut; tamăttant-net-en-dăɣ a t-tĕkfăt ašăl făll-Iblis-i ănnihăḍăn dăɣ-tamăttant, 15ikkăs-dd ăddinăt iket-năsăn dăɣ-ĕkkĕlu wa dăɣ-tăn-ja tuksĕḍa n-tamăttant. 16Ɣisa, wădden ănjălosăn a-s dd-osa i-ad-hasăn-ahăɣ tinahăɣen, ihăyawăn n-ănnăbi Ibrahim a-s dd-osa. 17A-wen-dăɣ a făl ămoos-as tăhaššilt, ad-dd-umas ere olăhăn d-ayĕtma-s dăɣ-hărăt iket-net, umas U-tikutawen wa măqqărăn s-ha tăhanint ulh-net, ămašăl a-wa fălla-s irha Măssinăɣ i-ad-ĕjrĕwăn ɣur-Măssinăɣ tenăšše n-ibăkkaḍăn-năsăn. 18Ɣisa, ittăr Iblis a-wa dăɣ he-ăj ižžurrĕb-t, idgăẓ-t hullan măšan, indăr-as ad t-isiḍĕw. A-wen-dăɣ a-s ašăl-i-dăɣ, ăddoobăt ad-ahăɣ tinahăɣen i-wi itižărrub Iblis.

will be added

X\