Ɣăbranităn 13

1Nĕmărhăt jer-iman-năwăn šund ă/n/natăn. 2Ijjĕšet-kăwăn amăjaru, wăr hin-tĕšlelăm făl a-wen; wi ijjăš amăjaru, dăɣ-ăzzăman hin-okayăn, ăsmăjaren ănjălosăn dăɣ-a wăr-ĕssenăn. 3Ɣaymăt kittĕwăm ăddinăt wi hănen tikarmuten šund ɣas a-s toharăm dăr-săn takărmut-ten-dăɣ. Ɣaymăt daɣ kittĕwăm wi irammăs ălɣizabăt šund a-s tiɣĕswen-năwăn a irmas ălɣizabăt-wen-dăɣ. 4Sĕmɣărăt adubĕn, tĕnhirĕjĕm dăɣ-tĕšĕdje. Wăr itikăret ăhalĕs i-hănne-s, wăr tikăret daɣ tamăḍt i-ăhalĕs-net ed asĕmmăḍĕs n-iman-năsăn a-wen. Hewăt! Măssinăɣ, ăssiilkăm dăɣ-imĕzzĕna d-imĕkkĕrukaḍ. 5Wăr tăggădet tărha n-aẓrĕf d-ĕnniyătăn-năwăn, wăr tăẓoẓăm a-wa lăm ed Măssinăɣ, innă: "Wăr kăy-e-ĕžɣĕlăɣ, wăr kăy-e-ăyyăɣ d-iman-năk." 6A-wen-dăɣ a făl wăr nĕkkes ăṭṭăma, năkoyăd, năddobăt făw ad-nănn dăɣ-hărăt iket-net: "Emăli a-s ămadhal-in, ma ăksuḍăɣ? Ma s-ăddobăt ad-hi-t-iɣšĕd ăgg-adĕm?" 7Ǝktĕwăt-dd imizărăn-năwăn wi n-ibda kăwăn-in-ăssawăḍnen măjrăd n-Măssinăɣ, ĕṭṭĕfăt a-wa dd-oyyăn, tăttălălăm immun-năsăn. 8Ɣisa Ălmasex, a-wa ămoos ĕnḍĕšel, ămoos-t ašăl-i-dăɣ, ămoos-t daɣ hărkuk. 9Săjdăt, wăr toyyem ăddinăt šiškin-kăwăn s-ălmăt teɣăre tăynayăt wărăt toher hărăt d-măjrăd n-Măssinăɣ. Sĕṣṣuhĕtăt ulhawăn-năwăn dăɣ-ănnuɣmăt n-Măssinăɣ. A-wen, uf'-awăn asĕṣṣuhu n-iman-năwăn dăɣ-uḍĕf n-iba n-tetăte n-imĕnsiwăn s-ăddinăt wi ĕṭṭăfnen iba n-tetăte-năsăn, wăr t-illa ad-dd-ăššišrăy a-wen săr-săn. 10Ɣur-năɣ năkkăneḍ-i n-kăl-Ălyăhud, kăl-tikutawen wi ɣarrăsnen i-tikutawen dăɣ-ehăket n-tămoqqest, wăr hasăn-t-tĕlla tetăte n-a-wa s-ăɣrăsăn. 11Taɣsiwen ti s-itiwĕy U-tikutawen wa măqqărăn ašni-năsnăt s-edăgg wa iknăn tĕšĕdje i-ad-ĕtwĕnšĕn ibăkkaḍăn n-tamĕtte, asărɣ a titwĕjjin isan-năsnăt dăɣ-edăgg hin-ăššinkăšăn făll-amăzzaɣ. 12A-wen-dăɣ a făl Ɣisa, inɣăl ašni-net illa-hin i-aɣrĕm sihen i-ad-išĕšdĕj tamĕtte dăɣ-ibăkkaḍăn. 13Ămăra, năkkăneḍ-dăɣ, nĕlkĕmet-as s-edăgg-en-dăɣ, nahăret dăr-s ĕmmăḍri wa inhăy. 14Ăddunya-ta-dăɣ, wăr dăɣ-s nĕla aɣrĕm iɣlalăn, ănn-ak, aɣrĕm wa ilkămăn, ufăn a ḍarăt nošal. 15Năkfet s-isĕm wa n-Ɣisa i-Măssinăɣ hak ašăl tĕmmalen ăɣbadnen isĕm-net. Takute-nănăɣ has-den-dăɣ. 16Wăr hin-tĕttĕwăm tanmĕdhalt d-anmĕkkas n-tămăɣatert jer-iman-năwăn ed ĕntănăteḍ-den-dăɣ tikutawen ti ĕjrăẓnen i-Măssinăɣ. 17Săjdăt i-a-wa hawăn-jannen imizărăn-năwăn, ɣaymăt-hasăn bălluhăm ed ĕntăneḍ a dăɣ-ăssiḍmăn Măssinăɣ iman-năwăn, ilkam daɣ ad-tăn-isĕstĕn d-isălan n-iman-năwăn. Afăl hasăn-sajadăm, ad-hawăn-ĕjĕn ĕnniyăt s-iman ăsriwnen, wăr-e ẓĕkkĕnẓărăn. Afăl wăr jem a-wen, kăwăneḍ a ikma. 18Ǝttărăt-anăɣ-in dăɣ-Măssinăɣ. Dăɣ-a-wa hanăɣ-dd-iqqălăn, wăr t-illa a dăɣ-nĕššak iman-nănăɣ. Wăr t-illa a năsidărhăn ar tekle dăɣ-iqqud dăɣ-hărăt iket-net. 19Ǝttărăt-ah'-in hullan dăɣ-Măssinăɣ i-ad-hin-ĕtwĕyyăɣ, ăqqĕlăɣ-kăwăn-in šik. 20Dalăɣ Măssinăɣ-i n-Măssi-s n-ălxer, dalăɣ-t ĕnta-i dd-issĕnkărăn jer-inĕmmuttan Amăḍan-nănăɣ wa măqqărăn Emăli Ɣisa-i s-hanăɣ-ikfă ašni-net ărkăwăl n-tassaɣt tăynayăt d-Măssinăɣ. 21Idhăl-kăwăn Măssinăɣ iket-dăɣ-năwăn i-ad-tudabem amišĕl n-a-wa olăɣăn iket-net, tamašalăm erhet-net, tĕjĕm hărkuk a has-ijraẓăn dăɣ-isĕm n-Ɣisa Ălmasex-i ăniihăjjăn d-semɣar hărkuk. Amin! 22Ayĕtma! Wăr-ĕtterăɣ ad-hawăn-šĕššĕjreɣ măjrăd dăɣ-isĕmmĕterăn-wi-dăɣ hawăn-in-ĕktăbăɣ i-ad-wăr kăwăn-kĕmmun iman. 23Ǝlmĕdăt a-s ă/n/na-năɣ dăɣ-ăddin Timoti, ătwăyy-dd; os'-ahi-dd ɣas, năddew-in săr-wăn. 24Tăhuulăm-anăɣ-in imizărăn-năwăn d-imĕššeddĕjăn iket-dăɣ-năsăn. Ăhuulăn-kăwăn-in ayĕtma-wăn wi n-imumĕnăn ĕzzăɣnen Iṭali. 25Issĕnsa Măssinăɣ ănnuɣmăt-net fălla-wăn iket-dăɣ-năwăn. Amin!

will be added

X\