Ɣăbranităn 12

1Ămăra, năkkăneḍ-i-hi, šămad ăzzar-anăɣ ălžămaɣăt n-imumĕnăn ijan ĕjut-wen-dăɣ, adiš, nĕbḍĕwet d-e d t-illăm a ăddoben ad-hanăɣ-umas ăẓuk dăɣ-akuyĕd dăɣ-immun, nărsiyet-in fălla-năɣ e d t-illăm abăkkaḍ hanăɣ-iltaɣăn, nĕrurĕdet ămašal wa hanăɣ-issăɣlăf Măssinăɣ, nĕšmăret dăɣ-a-wa nĕhannăy. 2Năjet asăwaḍ-nănăɣ iket-net dăɣ-Ɣisa-i s-ĕnta a-s ekew n-immun-nănăɣ, ĕnta a has-iṭṭafăn tămudre har ašăl wa dd-e-iqqĕl. Ɣisa, oyy'-in tedăwit ta ila, ătwăṣlăb făll-tajĕttewt, iqbăl ad-ăj tamăttant tăsikărakăḍăt. A-wen-dăɣ a făl ašăl-i-dăɣ, ăqqiima daw-aɣil n-Măssinăɣ. 3Zĕnĕzjumĕtăt ɣas dăɣ-Ɣisa, tĕktum-dd ĕmmĕk wa s-t-ĕnkărăn inăsbăkkaḍăn d-aɣăna wa inhăy măšan, išmăr i-a-wen-dăɣ iket-net, dihen wăr fălla-wăn-e-tămmăt taɣĕssa-năwăn, wăr-e ismaḍ ašni-năwăn. 4Akĕnnas wa hăm d-abăkkaḍ, wăr săr-wăn dd-iwwey hărwa tamăttant, 5tĕttĕwăm-in a-s Emăli, asĕmmĕtăr wa ităjj abba i-ara-net a hawăn-ija, ĕnta a innăn: "Alyaḍ-in, wăr kăy-isăɣafet asĕnnĕmĕnhĕy wa kăy-ităjj Emăli d-iman-năk, wăr kăy-iẓăẓẓăkănẓaret asĕnnĕmhĕl wa hak-ităjj, 6ed Emăli, isasaɣad ere irha, ara wa dd-ija s-iman-net a isinmĕnhĕy d-iman-net." 7Ǝšmărăt dăɣ-tisnant ta s-Măssinăɣ a tăt-dd-orăwăn săr-wăn ed ĕnta asĕnnĕmĕnhĕy kăwăn-ija d-iman-năwăn dăɣ, iṭṭaf-kăwăn šund amăraw d-aratăn-net, i n-ad-taɣĕdăm. Ḍarăt-a-wen daɣ, ĕndek ɣas ara wa wăr-inăqq ti-s? 8Afăl wăr kăwăn-isĕnnĕmĕnhĕy Măssinăɣ d-iman-năwăn s-ĕmmĕk wa s-isinmĕnhĕy aratăn-net iket-năsăn d-iman-năsăn, adiš wădden aratăn-net a tămoosăm, ikẓewăn a tămoosăm. 9Ǝktĕwăt-dd abbatăn-nănăɣ-i hanăɣ-tadăbbarnen, wădden naqqăn-anăɣ măšan ajăn a-wen a hin-ikkasăn semɣar wa hasăn-nĕja? Ăniihăjja a-s ojăr semɣar wa nĕja Abba-nănăɣ-i ihăn išĕnnawăn wa tăn-nĕja ed ĕnta tămudre ta tăɣlălăt a hanăɣ-ihakk. 10Abbatăn-nănăɣ, tajjăn dăɣ-năɣ tiwit wăren tĕhijj s-ĕmmĕk wa s-ărhăn a-wen măšan, Măssinăɣ ĕnta, asĕnnĕmĕnhĕy hanăɣ-ija d-iman-nănăɣ dăɣ, i n-tĕnfa-nănăɣ i-ad-nišdaj s-ĕmmĕk wa s-šăddij ĕnta iman-net. 11Ădduuttăt a-s tiwit, a ămoosnăt-dăɣ, wăr-ămoosnăt ĕssĕbab n-tedăwit i-ere wa itămătten, ănn-ak tekenẓart a săr-năɣ dd-tirĕwnăt măšan afăl ijrăh ăwadĕm ăddălil wa făll-itamăttat, ušreyăn-net, ălxer d-tămudre toɣadăt. 12A-wen-dăɣ a făl, ăjăt ăṣṣahăt dăɣ-ifassăn-năwăn, tĕkkĕsăm tisas dăɣ-ifaddăn-năwăn, tĕhĕlĕm s-data, 13ărjĕšăt dăɣ-zăbo wa oɣădăn i-ad-ĕṣṣuhun iḍarăn n-wi jănen aḍăr dăɣ-immun-năsăn. 14Ămlet-t ălxer jere-wăn d-ăddinăt, tišdajăm ed ere wărăn šăddij, wăr-ilkem ad-inhay Emăli. 15Nĕmĕssĕnăt hărăt jer-iman-năwăn i-ad-wăr dd-inĕttĕš wăl' iyyăn dăɣ-wăn iman-net dăɣ-ănnuɣmăt n-Măssinăɣ, wăr toyyem tĕsĕmme naššăr-dd dăɣ-ulhawăn-năwăn, tumas-awăn ĕssĕbab n-ikĕnnasăn d-tagăršăt jer-ăddinăt, 16wăr kăwăn-ităjjăšet enămmăḍăs wăla ăkafăr šund a-wa ija Iso-i ăsmălkăwăn tumast-net n-amăqqar telleɣt, 17tĕssanăm a-s ḍarăt-a-wen, ihall, itattăr dăɣ-ti-s ad-has-ittăr, ăj dăɣ-s ălbăraka i-ad-t-ikus măšan, unjăy-as s-a-wen, ămmujrăẓ a-wa ija kud-dăɣ wăr t-illa a săr-s dd-ăssiɣsăl a-wen. 18Kăl-Iṣrayil ăzzăman-wen-dăɣ d-ĕzzăɣăn tanĕẓruft, ărheeɣ ad-kăwăn-sĕssĕjrăhăɣ a-s tassaɣt ta jăm d-Emăli Ɣisa Ălmasex, wăr toleh d-ta s-kăla tăt-jăn ĕntăneḍ dăɣ-tanĕẓruft. Dăɣ-ăzzăman-năsăn, ĕzzaɣăn edes i-taḍaɣt s-ere irhăn eḍes-net dăɣ-ad-tăt-iḍĕs, taḍaɣt-en, iraqq dăɣ-s efew, ăɣlaynăt-tăt tijărăken kăwalnen d-tihay d-aḍu ăṣṣoohen. A-wen iket-net, wăr fălla-wăn ija kăwăneḍ, 19wăr tĕslem i-tăsinsăɣt ta n-emăsli ăṣṣoohen d-emăsli wa ăssuksăḍăn s-ĕslăn hasăn-ijăn asărmaɣ wa dăɣ făl hărăn timĕẓẓujen-năsăn i-ad-ăbas has-sallăn. 20Issărmăɣ-tăn hullan a-wa s-ătwănna: "Ere iḍăsăn taḍaɣt-dăɣ, jer-ămudăr wăl' ăgg-adĕm, ămmătet s-sămmăjori n-tihun." 21A-wa ĕnhăyăn, ij'-asăn asărmaɣ-wa-dăɣ făl ănnăbi Mosa-i hasăn-ăzzarăn, ija tarĕmmeɣt ta-dăɣ făl dd-iha ɣas ăšikăḍkăḍ. 22Kăwăneḍ, wăr fălla-wăn ija a-wa tăn-irmăsăn ed taḍaɣt ta n-Sayon s-dd-mălăm edes-has, aɣrĕm wa n-Măssinăɣ, a-wen a t-ămoosăn, Yărussălam ta n-išĕnnawăn dăɣ-ĕzzăɣăn afḍăn făll-afḍăn n-ănjălosăn ĕzhanen, 23tĕjjăšăm ălžămaɣăt n-tiɣăffaddiwen s-ĕktabăn ismawăn-năsnăt dăɣ-išĕnnawăn; ašăl-i, tohăẓăm-dd Măssinăɣ i-išarrăɣăn ăddinăt iket-dăɣ-năsăn, tărtăyăm dăɣ-iyyăn n-edăgg d-iman n-imumĕnăn wi hin-ăwwăḍnen dihad izzaɣ Măssinăɣ. Ǝntăneḍ-en-hi, ašăl-i-dăɣ, wăr t-illa ălɣib tăn-iwarăn. 24Tărtăyăm d-Ɣisa-i ămoosăn ănabdid n-ărkăwăl n-tassaɣt wa ăynayăn, imăl jere-năɣ d-Măssinăɣ, infăs-kăwăn s-ašni-net wa iknăn mijraw n-wa n-Xăbălla. 25Ăjăt ĕnniyăt, wăr tăẓmăẓẓăjăm iman-năwăn i-ere wa hawăn-ămmijrădăn. Kăl-Iṣrayil wi unjăynen s-asjĕd-has, ăssoḍă-dd fălla-săn ălmăṣṣibăt, ɣas, šămad ĕnta-den-dăɣ a-wa tăn-ijrăwăn, ĕndek ĕmmĕk wa s-e-năɣlĕs năkkăneḍ afăl nunjăy s-asjĕd i-Măssinăɣ-i hanăɣ-ămmijrădăn dăɣ-išĕnnawăn. 26Ăzzăman-en, ij' emăsli n-Măssinăɣ ĕṣṣuhu wa dăɣ făl ăššăkăḍkăḍ ăkall, măšan ămăra, ijjăš Măssinăɣ ărkăwăl dăɣ-innă: "Ăsihe wa dd-imalăn, wădden ăkall ɣas a he-iškăḍkĕḍăn, išĕnnawăn iman-năsăn ad-ĕškĕḍkĕḍăn." 27Ma ămoos ălmăɣna n-"ăsihe wa dd-imalăn"? A-wen a hanăɣ-ikkasăn dăɣ-taɣdărt n-a-s ăddunya-ta-dăɣ d-a-wa tăt-ihăn iket-net, ilkam ad-iškĕḍkĕḍ, iba-t i-ad-wăr dd-ităɣimĕy ar a-wa iknăn antum, wărăn itĕnhĕynĕhĕy. 28Šămad Tĕmmĕnĕya ta dăɣ-năɣ tĕlkamăt, ja antum ogdahăn d-a-wen-dăɣ, adiš numayet i-Măssinăɣ, namĕlet-t s-a-wa has-ijrăẓăn dăɣ-semɣar d-tuksĕḍa-net. 29He kăwăneḍ! Măssinăɣ-i hanăɣ-ilăn, olăh d-efew itattăn.

will be added

X\