Ɣăbranităn 11

1Immun, ălmăɣna-net a-s a-wa dăɣ-ijăr ăwadĕm ăṭṭăma, ad-has-umas šund a-s insa data-s; meɣ daɣ, a-wa-dăɣ wăr-ihĕnnĕy s-tiṭṭawen-net, ad-has-umas šund ăsiḍălalăk dăɣ-s. 2Immun-wen-dăɣ a ikfăn imɣarăn-nănăɣ idĕm ɣur-Măssinăɣ. 3Immun a hanăɣ-issĕflăsăn a-s ăddunya-ta-dăɣ, măjrăd n-Măssinăɣ a has-dd-issĕbăbăn. A-wen-dăɣ a făl a-wa nĕhannăy dăɣ-ăddunya, wăr dd-izjer a ilan mănhoy. 4Immun a ijrăwăn i-Xăbălla ad-ăj i-Măssinăɣ takute tufăt ta n-ă/n/na-s, Kayin. Tĕssĕba n-immun-net-en-dăɣ a făl t-ăssiḍăn Măssinăɣ dăɣ-ăddinăt wi oɣădnen, iqbăl takute-net. Tidĕt, Xăbălla, ăru t-ăba măšan, har ašăl-i-dăɣ, ixaṭṭăb-anăɣ s-immun-net. 5Immun a-s ĕssĕbab wa făl immĕḍkăl Inuk s-išĕnnawăn har ĕjud-i iddar. Wăr t-oles ăwadĕm ahănay ed, iḍkăl-t Măssinăɣ. Dat-amĕḍkĕl-net, Măssinăɣ iman-net a innăn, ijraẓ-as Inuk. 6Immun, wăr t-illa iba-net ed ere t-wărăn ila, wăr t-ill' ĕmmĕk făw s-ijrăẓ i-Măssinăɣ. A-wen-dăɣ a făl ere wa irhăn anmihaẓ d-Măssinăɣ, ămoos-as immun fărĕḍ, iflĕs a-s Măssinăɣ ill'-e, ĕnta daɣ a ɣur-t-ĕllan imraš i-wi has-tammăɣnen. 7Immun a ikfăn Nox taflĕst s-Măssinăɣ a-s has-ijă isălan n-a-wa dd-imalăn wăr ihĕnnĕy. Tuksĕḍa-net i-Măssinăɣ a săr-s dd-orăwăn ad-ikĕn turăft n-aman ta măqqărăt dăɣ-e-iɣlĕs ĕnta d-ejădăš-net. Immun-net ad-dd-ăsfăkkărăn terk timašalen n-tamĕtte, ăḍḍin dăɣ-ăddinăt wi oɣădnen, ămoos ya ălqa/l/li n-ăddunya, ăssoḍ'-et dăɣ-ăššareɣa wa n-Măssinăɣ. 8Immun a dd-orăwăn akiwĕn wa ija Ibrahim i-Măssinăɣ a-s t-iɣră, ibdăd, ikk' ăkall wa s-has-innă ad-t-ikus iket-di d-ilămmăd ma tămoos tamdujt ta ih' ăkall-wen-dăɣ. 9Immun a t-ăzozăɣăn dăɣ-ihĕktan šund amăjar dăɣ-ăkall wa s-has-ijjăš Măssinăɣ ărkăwăl-net. Tamĕzzuɣt-ten-dăɣ ijă, a ijă Isxaqq d-Yaqub-i dăr-s ohărnen tăkasit n-ărkăwăl wa has-ijjăš Măssinăɣ. 10A-wen, ma t-ijăn? Ij'-e a-wa s-ij' Ibrahim ĕnniyăt-net dăɣ-aɣrĕm wa n-tidĕt s-intăm ăssas-net, s-Măssinăɣ iman-net a t-dd-iknăn dăɣ-anĕzjum-net, ibn'-e-dd ĕnta iman-net. 11Immun daɣ a ijrăwăn i-Sarăta kud-dăɣ wăššar, tămoos temĕjjejrut ad-tĕkrĕš ĕnniyăt, tĕkrĕš ihăyawăn ed tomăn a-s Măssinăɣ-i has-ijjăšăn ărkăwăl, wăr-irăẓẓ dăɣ-tĕnna-net. 12Immun a ijrăwăn i-Ibrahim šămad wăššar, wăr has-in-ăqqima ar tamăttant, ad-ikrĕš ihăyawăn janen ĕjut wa jăn etran d-tiblalen n-ăkall dăɣ-asălim n-ejărew wa sĕmmăn, wăr t-illa ere ăddooben asiḍĕn-năsăn. 13Ăddinăt-wi-dăɣ, ăba-tăn ĕṭṭafăn immun iket-dăɣ-năsăn hărwa wăr-ĕjrewăn ărkăwăl wa hasăn-ijjăš Măssinăɣ măšan, wăr săr-săn iẓley d-a-s t-ĕnhayăn, ĕllăfăn-as dăɣ-ijĕj, ĕddĕwen, ĕlmădăn a-s ĕntăneḍ imăjarăn n-imĕssukal a ămoosăn făll-ărori n-ăkall-i-dăɣ. 14Ǝntăneḍ-i ăddoobătnen tĕnna n-a-wen-dăɣ, salmadăn-anăɣ a-s ăkall ăynayăn a-s ĕmmaɣăn ed, 15ĕnnar jan tărha n-hărăt dăɣ-ăkall wa dd-fălăn, iket-di, ĕqqĕlăn-t ɣas 16măšan, wăr jen a-wen ed ăkall ufăn wa dd-fălăn a-s ĕmmaɣăn; a-wen a t-ămoosăn, ăkall ihan išĕnnawăn. Ǝnniyăt-wen-dăɣ ĕṭṭăfăn a făl hasăn-irḍa Măssinăɣ, wăr t-ăskărakăḍ a-wa s-t-jăn-t Măssi-săn ed, ĕntăneḍ a-s idăy aɣrĕm wa hasăn-itwăr. 17Immun a ijrăwăn i-Ibrahim ašăl wa t-oyăs Măssinăɣ i-ad-has-ikĕt Isxaqq, rure-s wa n-iyyăn t-ikfă. Măssinăɣ a t-omărăn s-ad-ăj a-wen, a-s ija a-wen, dat-a-wen, ijjăš-as ărkăwăl, inn'-as: 18"Isxaqq a he-isĕtĕyĕn ĕzzurĕyăt ta he-iwăr isĕm-năk s-hak-ĕjjăšăɣ ărkăwăl-net." 19Ijă Ibrahim a-wa has-innă Măssinăɣ ed ikkas ăššăk a-s kud-dăɣ ăba Isxaqq, ila Măssinăɣ tărna s-t-dd-issĕnkăr jer-inĕmmuttan. Ǝnta-den-dăɣ a-wa ămoosăn ĕssĕbab wa făl t-dd-ăssoɣăl Măssinăɣ rure-s iket-di d-t-itĕkkat Ibrahim ed inhăy Măssinăɣ a-s wăr unjăy s-a-wa s-has-innă. Ămoos a-wen, tangalt n-a ilkamăn. 20Immun a ijrăwăn i-Isxaqq ad-ittăr dăɣ-Măssinăɣ a ijăn ălbărăka dăɣ-mĕddana-s, Yaqub d-Iso, dăɣ-iwĕtyan wi ĕlkămnen. 21Immun a ijrăwăn i-Yaqub ăssaɣăt wa d-ijammăḍ ăddunya ad-dd-isĕhhĕtĕl s-tăborit-net, irkăɣ, tĕzzar ittăr dăɣ-Măssinăɣ a ijăn ălbăraka dăɣ-hak iyyăn dăɣ-mĕddana-s n-Yusĕf-i n-rure-s. 22Immun a ijrăwăn i-Yusĕf a-s dd-tohăẓ tamăttant-net ad-ăllăɣăt i-kăl-Iṣrayil s-ilkam ad-ĕzjărăn ăkall wa n-Miṣra, omăr-tăn s-ad-hin-ĕmmărăn iɣăsan n-tafĕkka-net s-ăkall wa ĕkkăn afăl t-ăba. 23Immun a ijrăwăn i-imărawăn n-Mosa ad-t-ĕffărăn har kăraḍ orăn ḍarăt tiwit-net ed ĕnhăyăn tihusay ti ija rure-săn, wăr tăn-issărmăɣ ălhăm n-Firɣăwna-i dd-izzĕzjărăn alămăr dăɣ-isălan n-tamăttant n-aratăn wi n-eyyan n-kăl-Iṣrayil. 24Immun a ijrăwăn i-Mosa šămad ămoos ăhalĕs ad-unjĕy s-ad-itawăɣră s-isĕm: rure-s n-elle-s n-Firɣăwna, 25ăssof ad-ahăr aɣăna d-tamĕtte n-Măssinăɣ, uhĕn tămudre jer-inămăšrayăn dăɣ-tănoflayt wărăt la ušreyăn. 26Inhăy a-s ufa aɣăna wa ohar ăwadĕm d-Ălmasex uhĕn ărrăxmăt n-Miṣra făl-a-s, ĕnniyăt-net, ij'-e dăɣ-imraš wi dd-malĕnen wădden dăɣ-a-wa t-illăn data-s. 27Immun-net a has-ijrăwăn ad-wăr has-tĕgdel tuksĕḍa n-ămănokal efel n-Miṣra, ikna tebădde făll-iman-net dăɣ-a-wa iha, ikyad ɣas dăɣ-Măssinăɣ-i wărăn itĕtwĕnhĕy. 28Immun a has-ijrăwăn ad-ikĕt Faṣka ta dd-saktet azăjor n-kăl-Iṣrayil i-ĕkkĕlu, omăr-tăn s-ad-sĕwĕrĕn ašni n-išɣal imawăn n-ihănan-năsăn i-ad-wăr-iɣĕššĕd ănjălos wa iṭṭăfăn tamăttant hărăt i-tiɣăffaddiwen-năsăn. 29Immun a ijrăwăn i-kăl-Iṣrayil ad-ărĕsăn ejărew wa sĕmmăn šăggăɣăn, ĕjlăyăn-t šund ăkall ăqqurăn a făll-ărjašăn; a-s ĕttărăn kăl-Miṣra ad-ĕjlĕyăn ejărew ḍarăt-a-wen, ămlămmalăt-dd fălla-săn, ĕkšăn-tăn aman. 30Immun a ijrăwăn i-kăl-Iṣrayil asiḍĕw n-ăɣalla wa ifrăjăn aɣrĕm wa n-Žărriko šămad jan ĕssa išilan tiɣlĕyɣĕlĕyăn-t. 31Immun a ijrăwăn i-Rahab ta n-tălkăxbat ad-wăr toher tamăttant d-inămăšrayăn wi n-ăkall-net, ĕnta a tăsmăjaret inaramăn wi dd-ăzzarnen i-ad-zĕjjĕzzĕn aɣrĕm wa tĕzzăɣ. 32Ma săl a-wen? Iket iyyăn dăɣ s-ăddoobeɣ ad-hawăn-dd-ĕḍkĕlăɣ isălan-net, măšan hannăyăɣ a-s osăs-ahi-dd ălwăqq. Ǝnnăr wădden a-wen, siwĕlăɣ-awăn dăɣ Žădyon d-Bărăyka d-Samsun d-Yăfti d-Dawĕd d-Sumăyla d-ănnăbităn wi iyyăḍnen. 33Immun-năsăn a tăn-ikfăn ašăl făll-ĕddĕwĕlăn ĕmdanen, ărẓăn-tăn; ĕkfăn iman-năsăn iqqud, ĕnhăyăn tisĕtbat n-ărkăwălăn wi hasăn-ijjăš Măssinăɣ, ătwăjărăn-in iyyăḍ dăɣ-săn i-ehran măšan, ăɣlăsăn-dd dăɣ-săn; 34ănnunnăẓen iyyăḍ dăɣ-săn dăɣ-efew măšan, wăr tăn-issărɣa; iyyăḍ, ăɣlăsăn-dd dăɣ-imawăn n-tikobawen; ijmăḍ ăṣṣahăt iyyăḍ dăɣ-săn măšan, iqqăl-tăn-dd. Iyyăḍ ĕbbărăḍăn dăɣ-amjăr har data-săn ošălăn ajhanăn wi dd-jăḍnen ăkall-năsăn. 35Tiḍeḍen tiyyăḍ, issĕnkăr-asnăt-dd Măssinăɣ ăddinăt-năsnăt ăba, ăsɣărrawen iyyăḍ dăɣ-săn măšan, wăr-ĕtterăn ad-ăɣlĕsăn iman-năsăn dăɣ-a-wen, ăssofăn tamăttant i-ad-dd-alĕsăn tanăkra ɣur-Măssinăɣ. 36Jăn ăddinăt iyyăḍ dăɣ-săn tekăškăšt, ăslălăn iyyăḍ dăɣ-săn tiwit s-ebărtăk, jăn tišĕm dăɣ-iyyăḍ, jărăn-in iyyăḍ dăɣ-takărmut. 37Iyyăḍ, ănɣăn-tăn s-sămmăjori n-tihun, iyyăḍ kăškăši a-s tăn-ĕblăjăn, jăn iman n-iyyăḍ s-tăkoba; tămudre-năsăn iket-net, jăn-tăt dăɣ-amtĕnjăr, wăr-ĕlsen a săl ilămawăn n-tihatten d-ulli; ĕnhăyăn iyyăḍ ĕllăqqu lăbasăn, ăqquzzăben-tăn ăddinăt, ăsmăḍrăyăn-tăn. 38Han a-wen-dăɣ iket-net, a-s ija a-wen, wăr tănhăjja ăddunya-ta-dăɣ făw d-ad-tĕnhĕy ăddinăt janen milɣaw-wa-dăɣ; iyyăḍ dăɣ-săn, ăwwăyăn tinariwen, ĕzzăɣăn iḍaɣăn d-isĕlwan d-unan. 39Ăddinăt-wi-dăɣ, ijrăw-asăn immun-năsăn idĕm dat-Măssinăɣ kud-dăɣ, ărkăwăl wa hasăn-ijjăš, wăr săr-săn dd-ixsel. 40A-wen, ma t-ijăn? Adiš făl-a-s innin itwar'-anăɣ Măssinăɣ iket-nănăɣ a ufăn a-wen, irha ad-dăr-săn nĕmzĕyyĕt ujĕš n-ărkăwăl-wen-dăɣ hasăn-ijjăš.

will be added

X\