1 Ămăra, hărătăn-wi hanăɣ-issĕkna Măssinăɣ dăɣ-alămăr-net, taliwen ănifăqqănen d-tidĕt a ămoosăn. Wăr hanăɣ-sĕnnĕfliyăn dăɣ-ujreh n-a-wa dăr-olăhăn. A-wen-dăɣ a făl ăddinăt wi jărnen ăṭṭăma-năsăn dăɣ-a-wa innă alămăr, indăr-as ad-tăn-ăj ăddinăt ăɣradnen ed hak awătay-dăɣ, sanalasăn tikutawen-tin-dăɣ. 2 Tikutawen-tin-dăɣ ĕšlănen ăddinăt, ĕnnar jarrăwnăt tenăšše n-ibăkkaḍăn i-ăddinăt s-iyyăt, iket-di, iba-tănăt-in; ad-ăbas tănăt-sanalasăn; ad-ăbas ĕššakăn ăddinăt iman-năsăn abăkkaḍ. 3 Măšan tikutawen-en-hi, hak awătay-dăɣ, siktunăt-dd tamĕtte ibăkkaḍăn-net 4 făl-a-s, wăr t-illa ĕmmĕk făw s-hin-omăs ašni, jer-wa n-iwdesăn wăla wa n-išulaɣ, ibăkkaḍăn n-ăddinăt. 5 A-wen-dăɣ a făl Ălmasex, a-s dd-ijjăš ăddunya, innă i-Măssinăɣ: "Wăr hak-tĕjrĕẓ takute ta jăt s-ašni wăla ta wărăt ja săr-s, măšan tĕkfed-ahi taɣĕssa s-ăddoobeɣ ad-tăt-ăktăɣ. 6 Wăr hak-ĕjreẓnăt tikutawen ti răqqănen har tănăt-akš efew, wăla ti jarrăwnen tenăšše n-abăkkaḍ." 7 Ǝnhăyăɣ a-wen ɣas ĕnneɣ: "Măssinăɣ, năkk da! Oseɣ-dd i-ad-ăjăɣ erhet-năk." 8 Innă Ɣisa ḍarăt-a-wen: "Wăr hak-tĕjrĕẓ takute ta jăt s-ašni wăla ta wărăt ja săr-s, wăr hak-ĕjreẓnăt tikutawen ti răqqănen har tănăt-akš efew, wăla ti jarrăwnen tenăšše n-abăkkaḍ." Ǝnta-den-dăɣ a-wa innă Ɣisa kud-dăɣ ill'-e a-wa ifrăḍ Măssinăɣ dăɣ-isălan n-tikutawen. 9 Olăs daɣ Ɣisa innă: "Măssinăɣ, năkk da! Oseɣ-dd i-ad-ăjăɣ erhet-năk." Ikkăs-in Ɣisa s-a-wen-dăɣ ălɣibadăt wa ăzzarăn, iššĕšrăy t-dd i ăynayăn. 10 Dăɣ-erhet n-Măssinăɣ a dăɣ-hanăɣ-iššĕšdăj Ălmasex s-iyyăt, išĕšdăj-anăɣ s-iman-net wi ija takute. 11 Kăl-tikutawen iket-năsăn, iqqal-asăn ăššil hak ašăl ad-ĕbdadăn ɣarrăsăn i-tikutawen ti s-kăla tănăt-jăn olăsăn wăren šĕšdij dăɣ-ibăkkaḍăn. 12 Măšan Ɣisa ĕnta, ikfa taɣĕssa-net s-iyyăt, ămoos takute ta takkăsăt ibăkkaḍăn, ăqqima ḍarăt-a-wen hărkuk daw-aɣil n-Măssinăɣ, 13 iqqal dihen i-ad-ĕtwĕjjĕn išĕnja-net iket-năsăn daw-iḍarăn-net. 14 Ikfa tiyyăt takute, tĕgdăh harkuk i-ăddinăt wi išăšdaj. 15 A-wen-dăɣ a hanăɣ-ăsdăttăt Unfas Šăddijăn făl-a-s innă Emăli s-tizarăt: 16 "Ǝnta da arkăwăl-in n-tassaɣt wa dăr-săn mad-ahărăɣ ḍarăt išilan-win-dăɣ: 'Afăl tăn-ĕkfeɣ fărĕḍăn-in, ad-tăn-ĕktĕbăɣ făll-ulhawăn-năsăn d-ĕnniyătăn-năsăn.' " 17 Inna daɣ ḍarăt-a-wen: "Ad-ăbas dd-ḍakkălăɣ isălan n-ibăkkaḍăn-năsăn, itawăɣ-in s-iyyăt tinmĕšriyen-năsăn." 18 Tenăšše ya, e-d ja, ad-ăbas tĕlkam takute n-ašni tiyyăt dăɣ-tĕssĕba n-abăkkaḍ. 19 Ayĕtma-ɣ, ămoos-anăɣ ašni n-Ɣisa takute tĕtbatăt s-ĕnta a hanăɣ-torăt emm n-ehăn wa n-Măssinăɣ wa iknăn tĕšĕdje, 20 or'-anăɣ tabarăt tăynayăt ha tămudre t-tĕllat ḍarăt ărido, a-wen a t-ămoosăn taɣĕssa-net. 21 Ămăra, nĕla U-tikutawen ifranăn ixkămăn făll-ehăn n-Măssinăɣ. 22 Ɣas nahĕẓet-t-dd s-ulhawăn ădduuttănen d-immun imdan, dăɣ-a-s ărridăn ulhawăn-năwăn dăɣ-inĕzjam wi lăbasnen, ărridnăt tiɣĕswen-năwăn dăɣ-aman šăddijnen, wăr t-illa făw a dăɣ-nĕššak iman-nănăɣ. 23 Wăr nĕtăqqălet s-ḍarăt, wăr nĕsisumet dăɣ-isălan n-ăṭṭăma-nănăɣ ed ere wa hanăɣ-ijjăšăn ărkăwăl-wen-dăɣ, emărkăwăl, wăr-irăẓẓ dăɣ-tĕnna-net. 24 Nĕnmĕjjet ĕnniyăt jer-iman-nănăɣ, nĕnmĕsĕmmĕtăret tărha jer-iman-nănăɣ d-imărkedăn. 25 Wăr nĕzăjjăret ălžămaɣăt wa nĕha s-ălɣibadăt n-Măssinăɣ šund a-wa tăjjăn iyyăḍ, ănn-ak, nĕmsĕkkuyĕdet jer-iman-nănăɣ, hullan ămăra-dăɣ d-nĕhannăy a-s dd-ohăẓ ašăl wa n-uɣĕl n-Emăli. 26 Afăl nofa abăkkaḍ dăɣ-erhet n-iman-nănăɣ ḍarăt a-s nĕlmad tidĕt iket-net, ăbas t-tĕlla takute tăddoobet ad-hin-tamĕs abăkkaḍ-nănăɣ, 27 ad-ăbas-hanăɣ-in-ăqqim ɣas ar asĕmmoqqĕl i-ăššăreɣa wa dd-imalăn d-efew wa ăhjăljălăn he-ikšĕn inămăšrayăn. 28 Tĕssanăm a-s e-d ănmăšrăy ăwadĕm i-Ăṭṭawrăt ta n-Mosa, wăr has-t-tĕlla tăhanint, igdăh ɣas ad-dd ĕzjărnăt sănatăt tijuhawen meɣ kăraḍăt i-ad-ămmăt ălwaqq-wen-dăɣ. 29 Ǝmmĕk-wen-dăɣ daɣ a-s, ăwadĕm wa ăfkălfăkălăn Rure-s n-Măssinăɣ, ăsmăḍrăy-t meɣ ăsbănnăn ašni-net wa hanăɣ-iššĕšdăjăn, săr-năɣ dd-orăwăn ărkăwăl n-tassaɣt d-Măssinăɣ, meɣ daɣ, wăr-issĕfrăr Unfas wa n-ănnuɣmăt, ajăn wădden ăwadĕm-wen-dăɣ, ănihăjja d-tisnant tojărăt, ta dăr-ănihăjja wa ănmăšrăyăn i-a-wa innă alămăr wa n-ănnăbi Mosa. 30 Năkkăneḍ, nĕzzay wa innăn: "Eɣa, i-nin, ukĕs n-ălxăr, ɣur-i." Inna daɣ: "Emăli a-s ilkam ad-išrăɣ tamĕtte-net." 31 Asuksăḍ ija ejăḍăl dăɣ-ifassăn n-Măssinăɣ-i iddărăn. 32 Ǝktĕwăt-dd a-s ibda, kăla tĕzzăɣăm tihay, tĕbbĕlănăm dăɣ-a-wa ămoosăn immun-năwăn, tĕnhăyăm aɣăna, 33 ĕkwărăn-kăwăn ăddinăt, ăqquzzăben-kăwăn, jăn-kăwăn isĕḍsa dat-tamĕtte; ăddinăt wi tĕnhăyăm hannăyăn aɣăna-wen-dăɣ, tăwwăɣăm-asăn timudda. 34 Wi hănen tikărmuten dăɣ-tĕssĕba n-Ɣisa, tănɣ'-iwăn tăhanint-năsăn, ohăɣăn dăɣ-wăn išĕnja a-wa tĕṭṭăfăm, măšan, wăr-ifneẓ a-wen tisrawt-năwăn s-Măssinăɣ ed tĕkkasăm ăššăk a-s a-wa ihăn ifassăn-năwăn, ufa a-wen-dăɣ iket-net ed iɣlal. 35 A-wa făl tăsifăllăm, ăknăt-t uḍĕf ed ĕjjĕtăn imraš-net. 36 Hărwa-dăɣ, ĕšmărăt dăɣ-amišĕl n-erhet n-Măssinăɣ, afăl jăm a-wen, ad-săr-wăn dd-isăɣsĕl Măssinăɣ ărkăwăl wa hawăn-ijjăš. 37 Innă ĕlkĕttab n-Măssinăɣ a-s: "A ĕnḍărrăn, a ĕnḍărrăn ɣas a hin-ăqqimăn ass-dd wa s-ătwănnă ilkam ad-dd-ass, os'-iwăn făw! 38 Ăddinăt wi oɣădnen dăɣ-zăbo-nin, ad-hasăn-ijrĕw immun-năsăn tămudre ta n-tidĕt măšan wi ĕšlăynen i-zăbo-en, wăr-ilkem ad-hi-ijraẓ ălxal-năsăn." 39 Năkkăneḍ, wăr nĕha ăddinăt wi šallăynen, hakkănen iman-năsăn i-ĕlhĕllak, ănn-ak, nĕha wi taṭṭăfnen immun i-ad-tăn-iɣlĕs Măssinăɣ.
