1 Măssinăɣ ibda, wăr t-illa ăzzăman d-ălmăɣna s-wădden immĕjrăd dăɣ-s i-imărawăn-nănăɣ s-imawăn n-ănnăbităn 2 măšan, dăɣ-ăzzămanăn-wi-dăɣ n-ajilal n-ăddunya, Rure-s a-s immĕjrăd. Rure-s en-dăɣ a ija amăkkasu n-hărăt iket-net, s-tărna-net ĕnta-en-dăɣ a-s dd-ixlăk ăddunya. 3 Ǝnta a-s ănnur n-ălxurmăt n-Măssinăɣ, ănifăqqa d-Măssinăɣ dăɣ-hărăt iket-net. Tărna n-măjrăd-net a-s iṭṭaf, ihal a-wa ihăn ăddunya iket-net. Ǝnta a ijrăwăn i-dăgg-adĕm ĕmmĕk s-šăddijăn dăɣ-tilušawen n-abăkkaḍ, tĕzzar ikk' išĕnnawăn, ăqqima dihen daw-aɣil n-Măssinăɣ-i n-ămănokal ilăn tărna iket-net. 4 Rure-s n-Măssinăɣ, ojăr ănjălosăn; tĕmɣăre n-tifut-i tăn-ija a făl ijrăw isĕm ojărăn wa-năsăn. 5 Ǝndek ɣas dăɣ-ănjălosăn-i s-kăla has-ătwănnă? "Kăyy a-s Rure-ɣ, ɣur-ašăl-i-dăɣ, năkk a-s Abba-năk." Wăr t-illa! Ǝndek daɣ-i s-kăla has-ătwănnă? "Ad-hak-umasăɣ Abba, tumasăd Rure-ɣ." Wăr t-illa! 6 Măšan, Rure-s n-Măssinăɣ-i n-teɣăfădde, ašăl wa t-dd-ăšmašăl s-ăddunya, innă: "Ărkăɣnet data-s ănjălosăn n-Măssinăɣ iket-dăɣ-năsăn." 7 Ămăra, dăɣ a-wa dd-iqqălăn ănjălosăn, ĕnta da a-wa fălla-săn innă Măssinăɣ: "Ănjălosăn, inĕmmušal-in, eklan-nin; jan armuḍ wa ja tăšikwălt, olăhăn d-efew ăhijăljălăn." 8 Măšan, Rure-s n-Măssinăɣ ĕnta, inn'-as: "Kăyy a-s Măssinăɣ, tĕmmĕnukĕla-năk, tăɣlal; wi hănen Tĕmmĕnĕya-năk, tăxkamăd fălla-săn s-iqqud; 9 ijraẓ-ak a-wa oɣădăn, wăr sĕggĕḍăd dăɣ-a-wa lăbasăn. A-wen-dăɣ a făl kăy-ăsnăfrăn Măssinăɣ-i n-Măssi-k, ikn'-ik asĕddĕwi, ăssof kăyy imidiwăn-năk." 10 Olăs daɣ innă Măssinăɣ dăɣ-isălan n-Rure-s: "Emăli, s-alăṣăl dat-hărăt iket-net, kăyy ad-dd-ibnăn ăkall, ifassăn-năk a-s dd-tăxlăkăd išĕnnawăn. 11 Išĕnnawăn d-ăkall, ilkam ad-tăn-iba, iyyĕn-kăy-dd hed edăgg-năk; ilkam ad-ĕjĕn amĕnd wa n-ebărḍăy 12 taḍhĕd-tăn-in šund abărnuš, sĕmmĕskĕlăd-tăn-dd šund temăslit isamăskal ăwadĕm, măšan, kăyy, wăr tĕmiskilăd, hed edăgg-năk, tăɣlal taɣrĕst-năk." 13 Ǝndek ɣas dăɣ-ănjălos-i s-kăla has-innă Măssinăɣ a olăhăn d-a-wa innă i-Rure-s a-s has-innă: "Ǝyyăw, ɣayĕm daw-aɣil-in hundăɣ har kăy-ăkfăɣ tărna făll-išĕnja-năk, ăjăɣ-tăn isĕkkukal dawa-k." 14 Ak, ănjălosăn-i-dăɣ făw ma ăqqalăn? Ajăn wădden unfasăn ija Măssinăɣ inĕmmušal has-ăxdamnen išamašal i-ad-ahăɣăn tinahăɣen i-ăddinăt wi s-irha Măssinăɣ ad-tăn-iɣlĕs dăɣ-ibăkkaḍăn-năsăn?
