Kăl-Gălasya 6

1Ayĕtma, ărheeɣ dăɣ-wăn, kăwăneḍ-i dăɣ-ănniihăḍ Unfas Šăddijăn n-Măssinăɣ a-s, e-d tărmăsăm ăwadĕm iɣšadăn hărăt, sĕssiɣĕdăt s-ĕnniyăt ăẓedăn, wăr t-tăxwelăm. Kăyy daɣ-i t-isasaɣadăn, ăj ĕnniyăt i-iman-năk i-ad-wăr toḍed dăɣ-abăkkaḍ šund wa dăɣ-oḍa. 2Iḍkĕlet hak iyyăn dăɣ-wăn ăẓuk wa ăllinjăt amidi-net, dihen, ad-tămašălăm alămăr wa n-Ălmasex. 3Ere ordăn iman-net hărăt-dăɣ, a-s ija a-wen, wăr-ămoos wăla a ĕnḍărrăn, ilmĕdet a-s iman-net ɣas a isaswad, 4iššĕket ăwadĕm imojjan-net tĕzzar iššĕk wi n-ăwadĕm iyyăn, dihen kunta ihannăy făll-iman-net a ăniihăjjăn d-tĕmmal, adiš amĕlet iman-net s-a-wen-dăɣ, măšan, wăr-ităjjet făw ĕmmĕk s-ăsnăfăqqa iman-net d-ăddinăt wi iyyăḍnen, 5făl-a-s, hak ăwadĕm ad-itwĕsĕstĕn d-ăẓuk n-a-wa ămešăl. 6Wi kăwăn-saɣranen măjrăd n-Măssinăɣ, ifraḍ fălla-wăn ad-dăr-săn tahĕrĕm a-wa s-kăwăn-irxăm Măssinăɣ iket-net. 7Wăr tăkărrasăt iman-năwăn, Măssinăɣ, wăr t-itĕjj ăwadĕm tekăškăšt, wăr-e alĕy ăwadĕm ar a-wa ăddomăt: 8wa s-taɣĕssa-net ɣas a-s ixdam derhan-net, ad-săr-s dd-arĕw a-wa itamašal ĕlhĕllak măšan, wa s-Unfas Šăddijăn a-s itamašal derhan-net, ad-săr-s dd-arĕw a-wen tămudre tăɣlalăt. 9Wăr hanăɣ-ităjjăšet sendad n-amišĕl n-a-wa olăɣăn ed, afăl dd-tosa tăqqăn ta issĕbdăd Măssinăɣ, kunta wăr sămmeḍ fălla-năɣ iji n-a-wa olăɣăn, ad-nĕjrĕw ălxer n-a-wa nĕjă. 10A-wen-dăɣ a făl ămăra, iket-di nĕjraw s-a-wen, ihĕlet milɣaw-nănăɣ ebre n-e d t-illăm ăwadĕm hullan ebre n-wi dăr-nohăr immun. 11Ǝnhĕywăt tĕššuhărt n-akătab dăɣ-edăgg-wa-dăɣ i-ad-tĕlmĕdăm a-s năkk iman-in a hawăn-in-iktăbăn tăkarḍe-ta-dăɣ. 12Ăddinăt wi tattărnen ad-hawăn-ĕjĕn amili fărĕḍ, ĕjrăhăt-ah'-in ɣas a wa tăn-išlan, wăr-ĕrhen ahănay n-aɣăna, a-wen-dăɣ a făl, wăr helăn ad-ĕnnĕn i-ăddinăt a-s ĕlɣĕllas wăr-iha ar tajĕttewt ta făll-ămmut Ălmasex. 13Tĕzzar daɣ ăddinăt-en ĕṭṭăfnen amili, ĕjrăhăt-in ɣas a-s ĕntăneḍ iman-năsăn, wăr tĕmišilăn fărĕḍăn n-alămăr iket-net, jan dăɣ-săn nefran, wăr fălla-wăn ĕfreḍăn amili ɣas ar dăɣ-tărha n-ad-ăbbărăjăn n-a-s ĕntăneḍ a ămoosnen ĕssĕbab n-amili-năwăn. 14Năkk, wăr t-illa a jeɣ abăraj kunta wădden tidĕt ta n-a-s Emăli-nănăɣ Ɣisa Ălmasex, ămmut făll-tajĕttewt. Tamăttant daɣ ten-dăɣ ija a tămoosăt ĕssĕbab wa făl săr-i olăh a-wa-dăɣ ihăn ăddunya-ta-dăɣ šund a ămmun, olăhăɣ-as daɣ năkk d-ere ămmun. 15Wădden amili wăla iba-net a-s hărăt, tumast n-ăwadĕm ăssiynăy Măssinăɣ a-s hărăt. 16Ǝttarăɣ s-Măssinăɣ, ad-ăkf ălxer-net d-tăhanint-net i-e d t-illăm ere ilkamăn i-a-wa ĕnneɣ, ijrăw daɣ a-wen i-e d t-illăm ere ihan Iṣrayil wa n-Măssinăɣ. 17Ǝttarăɣ dăɣ-wăn, kăwăneḍ ašăl-i-dăɣ, ad-wăr dăɣ-wăn itilĕs ăwadĕm asĕsnan n-iman-in, ĕgdăhăn-ahi ibuyĕsăn-wi-dăɣ ăššišwălnen taɣĕssa-nin s-ĕntăneḍ a-s tajuhe n-a-s năkk, il'-ahi Ɣisa. 18Ayĕtma-ɣ dăɣ-ăddin, ăhuulăɣ-kăwăn-in, ĕttarăɣ daɣ dăɣ-Emăli-nănăɣ Ɣisa Ălmasex, ad-ăj ănnuɣmăt-net dăɣ-ĕnniyăt-năwăn. Amin!

will be added

X\