Kăl-Gălasya 5

1Ălmasex a hanăɣ-ijrăwăn iman-nănăɣ, nĕjrăw-tăn daɣ s-ălxal imdan. A-wen-dăɣ a făl, ĕhĕlăt iman-năwăn, wăr jem iman-năwăn tolăs daw-ăẓuk wa n-Iblis i-ad-has-tăkkălem. 2Năkk Bulĕs, ĕnneɣ-awăn: afăl tăsmalăyăm iman-năwăn s-ĕmmĕk wa s-t-ifrăḍ alămăr, adiš, wăr kăwăn-e-infĕw Ălmasex s-wăla a ĕnḍărrăn. 3Ărheɣ daɣ ad-ĕkkĕsăɣ ăwadĕm iket-net irhan ad-isĕmmilĕy iman-net dăɣ-taɣdărt, afăl ăsmalăy iman-net, ămoos-as fărĕḍ ad-ămašăl daɣ fărĕḍăn wi iyyăḍnen ĕktăbnen dăɣ-alămăr. 4Kăwăneḍ-i tattărnen ad-kăwăn-ăj amišĕl n-fărĕḍăn n-alămăr wa n-ănnăbi Mosa ăddinăt lanen idĕm dat-Măssinăɣ, ăssiilmădăɣ-kăwăn a-s ibḍ'-iwăn a-wen d-Ɣisa Ălmasex, ăsiinămăjjăj-kăwăn d-ănnuɣmăt n-Măssinăɣ. 5Năkkăneḍ-i omănnen s-Ɣisa Ălmasex, Măssinăɣ a ih' ăṭṭăma-nănăɣ i-ad-hanăɣ-ăj imaɣdalăn. Ăṭṭăma-en, năqqal-as s-taẓidert ta ihakk Unfas Šăddijăn-i s-ĕnta a ăssixdămăn immun-nănăɣ. 6Ăwadĕm, afăl išwăr irtăy d-Ɣisa Ălmasex, wădden amili wăla iba-net a infan hărăt, a-wa infăn hărăt, immun d-asĕtbat-net s-tărha-nănăɣ i-ăddinăt. 7Ănna săbxas yaden, uhĕn kăwăneḍ-i s-a ija a-wa-dăɣ tosasăm dăɣ-azzal wa n-immun s-ĕmmĕk-wa-dăɣ, ma kăwăn-dd-iwwăɣăn, igdăl-awăn amišĕl n-tidĕt? 8Erk ĕnniyăt-wen-dăɣ, wădden Măssinăɣ-i kăwăn-dd-iɣrăn s-iman-net a dd-ifal, 9ajăn tĕttĕwăm-in a-s tăẓẓa ĕnḍărrăt a sakafăt ejel n-ălkăma ăjjeen. 10Năkk, ikf'-ahi Emăli dăɣ-isălan-năwăn taflĕst n-a-s wăr-e tĕjĕm ɣas ar inĕzjam šund wi jeɣ măšan, ărheeɣ ad-tĕssanăm a-s ăwadĕm wa itattărăn uɣĕn n-iɣăfawăn-năwăn, ilmĕdet a-s ad-t-irmĕs Măssinăɣ ed anmĕšri šund-wen-dăɣ, wăr săr-s iẓley Măssinăɣ ăddinăt. 11Ayĕtma, dăɣ-a-wa hi-dd-iqqălăn năkk, ĕnnăr isălan wi tăjjăɣ, ĕfraḍăɣ făll-ăddinăt amili, adiš mafăl hi-tiɣĕzzuben kăl-Ălyăhud bănnan? Ǝnnăr a-wen-dăɣ a xaṭṭăbăɣ, iket-di, wăr tumas tajĕttewt ta făll-ămmut Ălmasex ălmuxal i-ăwadĕm wăl' iyyăn. 12Ărheeɣ dăɣ-ăddinăt wi kăwăn-šaškanen ad-kăwăn-ĕkfĕn ălɣafyăt kud-ărhan ḍarăt-a-wen, sĕmmĕkĕḍmĕkĕḍăn iman-năsăn. 13Ayĕtma, ajăraw n-iman-năwăn a-s kăwăn-dd-iɣra Ălmasex s-iman-net, wăr tăjjăt a-wen ăsaru făll-hakkăm iman-năwăn abăkkaḍ, ănn-ak, kunta ill'-e a dăɣ-wăn itanăhaḍăn, umaset tanmĕdhalt jer-iman-năwăn dăɣ-tărha 14făl-a-s alămăr wa n-ănnăbi Mosa iket-net, ăkilăwkălăw-t-dd măjrăd wa innăn: "Ăj i-ănhăraj-năk tărha-ta-dăɣ jed i-iman-năk." 15Măšan, afăl dd-tăqqălăm tănifăqqăm d-iwăɣsan, tinmĕdidăm, tinmĕkšim jer-iman-năwăn, dihen, ăjăt ĕnniyăt i-ad-wăr tĕnmĕlhisăm jer-iman-năwăn. 16Ăyyăt Unfas Šăddijăn ad-ănnăhăḍ dăɣ-wăn, dihen, ad-ăbas tĕlkamăm i-erk derhanăn n-tiɣĕswen-năwăn. 17A-wa lăbasăn isadărhan ăgg-adĕm, iknas Unfas Šăddijăn; Unfas Šăddijăn daɣ iknas a-wa lăbasăn isadărhan ăgg-adĕm. Wăr kăla imda akĕnnas wa n-jere-săn, a-wen-dăɣ a dd-orăwăn a-s, wădden a dd-ijjăšăn eɣăf n-ăwadĕm-dăɣ, ad-t-ăj. 18Afăl Unfas Šăddijăn a dăɣ-wăn ănniihăḍăn, wăr dăɣ-wăn-e-ănnăhăḍ alămăr wa n-ănnăbi Mosa. 19Erk imojjan wi lăbasnen itamašal ăgg-adĕm, wăr-ĕfferăn, ătiwăssanăn, ĕntăneḍ da: ĕlkăxbu, iba n-tĕšĕdje, asĕmmăḍĕs n-iman, 20ălɣibadăt n-ăṣṣănămăn, ĕkkĕriku, amšĕnji, akĕnnas, tismiten, asjĕt n-aḍkăr, tărha n-mijraw, băḍḍo-băḍḍo, ejhăn-ejhăn, 21munkăẓi, tesăse n-asmĕd, tăruft d-a ăjjeen wărăn iẓley d-a-wen-dăɣ. Ǝkkasăɣ-kăwăn dăɣ-taɣdărt s-ĕmmĕk wa s-kăla hawăn-t jeɣ, ĕnneɣ-awăn: ăddinăt wi tamašalnen hărătăn-win-dăɣ, xăram-asăn ujĕš n-Tĕmmĕnĕya n-Măssinăɣ. 22A-wa olăɣăn dd-itirĕw Unfas Šăddijăn s-ulh n-ăgg-adĕm ĕnta da: tărha, tedăwit, ălxer, taẓidert, tăhanint, milɣaw, immun, 23tăẓude, tanhaḍt dăɣ iman. Hărătăn-win-dăɣ, wăr tăn-iha-i iknas alămăr. 24Ăddinăt wi ĕkfănen iman-năsăn Ɣisa Ălmasex, ĕṣlăbăn făll-tajĕttewt ta făll-ătwăṣlăb Ɣisa derhanăn-năsăn wi lăbasnen tăn-ĕlwaynen. 25Šămad Unfas Šăddijăn a dăɣ-năɣ ănnihăḍăn, adiš, năyyet-t daɣ ad-ănnăhăḍ dăɣ-tămudre-nănăɣ s-a-wa olăɣăn. 26Wăr nĕtumaset ăddinăt tabărajnen wăla tinmĕkĕnẓernen jer-iman-nănăɣ, wăr-itisĕmet wăl' iyyăn făll-a ila amidi-net wăr ila.

will be added

X\