Kăl-Gălasya 4

1Ărheeɣ daɣ dăɣ-edăgg-wa-dăɣ, ad-kăwăn-ăknăɣ asĕssĕjrah n-a-wa s-ărheɣ tĕnna-net: wădden ara s-ilkam ad-ikus ti-s, a ikka wăr-ikreš tayĕtte, wăr-iẓley d-akli n-măssi-s kud-dăɣ wăr t-ih' ăššăk a-s a-wa ila abba-net dăɣ-ehăre iket-net, i-net. 2A ikka ămoos ara ĕnḍărrăn, ad-ila imănnăhăḍăn d-ălwăkilăn has-janen ĕnniyăt ĕnta hakd a-wa ila iket-net. Ad-ija a-wen-dăɣ hundăɣ har ašăl wa d-ikkăs abba-net ăššăk a-s rure-s, ămoos ăhalĕs ilan tanhaḍt ămăra. 3Šund a-wen-dăɣ a fălla-năɣ ijan năkkăneḍ-dăɣ, nolăh d-aratăn s-kăla ăkkilen i-tărna ta făll-tĕgl' ăddunya 4măšan, tăwwăḍ-dd tăqqăn ta issĕbdăd Măssinăɣ ɣas, ăšmašăl-dd săr-năɣ Rure-s toraw tamăḍt i-ad-izzăɣ jere-năɣ, ămašăl ĕnta-dăɣ a-wa innă alămăr wa n-kăl-Ălyăhud, 5a-wen, ij'-e Măssinăɣ dăɣ-tĕssĕba n-ad-isĕddărfĕt ăddinăt wi ĕzzăɣnen daw-alămăr-wen-dăɣ, ăkf'-anăɣ daɣ năkkăneḍ turhajăt ta n-tumast n-aratăn-net. 6Tidĕt-dăɣ a-s aratăn-net a tămoosăm ed tasĕtbat n-a-wen, a tăt-ămoosăn, Unfas Šăddijăn n-Rure-s n-Măssinăɣ wa ija dăɣ-ulhawăn-nănăɣ. Unfas-net-en-dăɣ a hanăɣ-ijrăwăn s-ad-nĕɣarr Măssinăɣ s-isĕm: Abba. 7A-wen-dăɣ a făl, ăbas tămoosăm eklan, ănn-ak aratăn n-Măssinăɣ a tămoosăm. Ɣas šămad aratăn n-Măssinăɣ a tămoosăm, adiš, tămoosăm imĕkkusa wi s-irh' ălxer iket-net. 8Ibda, a-s wăr tĕzzeyăm Măssinăɣ, ăṣṣănămăn-i n-mălayăɣna ɣas a-s tăkkilem, ɣabbădăm-tăn 9măšan, ašăl-i d-tĕzzeyăm Măssinăɣ, ănn-ak, ănnăɣet, ašăl-i d-kăwăn-izzăy Măssinăɣ, ĕnd'-e-d-il' ĕmmĕk n-ad-talĕsăm ihuk n-iman-năwăn i-mălayăɣnatăn wi făll-tĕgl' ăddunya s-wăr t-illa făw a ĕnfan wăla a tăn-ihan, adiš kăwăneḍ a tărham ad-tăqqĕlăm ĕkkĕlu-wa-dăɣ dd-tĕzjărăm? 10Ǝjrahăɣ-in a-s tĕknam asĕmɣar n-uḍĕf n-išilan iyyăḍ d-orăn iyyăḍ d-ăzzămanăn iyyăḍ d-iwĕtyan iyyăḍ, 11ăssiirmăɣ-ahi hullan a-wa kăwăn-išlăn har ămmukkăn făw a-s ija ɣur-i a-s ălxidmăt wa jeɣ jere-wăn, ăbboṭṭăl-in bănnan. 12Ayĕtma! Asĕlɣad a kăwăn-tajjăɣ ămăra, tălălăt-ahi ed ăzzăman wa ĕkkăsăɣ ĕlleɣ-t jere-wăn, jeɣ iman-in iyyăn dăɣ-wăn, wăr-ĕnheyăɣ daɣ a hi-tăɣšadăm. 13Tĕssanăm făw a-s ašăl wa ăzzarăn d-kăwăn-in-oseɣ i-ad-hawăn-ăjăɣ isălan n-Ălĕnžil, a-s kăwăn-in-oseɣ, ărhiinăɣ, 14ja taɣĕssa-nin tĕlĕmḍe-ta-dăɣ făl tăsijălălhăy măšan, hakd a-wen-dăɣ, wăr hi-tĕkrehăm, wăr hi-tăjlălhăyăm, ănn-ak, tăsbărrăkăm-ahi šund ɣas ănjălos n-Măssinăɣ a kăwăn-dd-osăn, šund ɣas a-s năkk iman-in a-s Ɣisa Ălmasex. 15Ma ija ălxer wa hi-tĕssĕknăm ăzzăman-wen-dăɣ? Ma kăwăn-ijrăwăn? Ajăn tĕttĕwăm-in a-s ăzzăman-en-dăɣ d-kăwăn-in-oseɣ, ărhiinăɣ, tĕssĕknăm-ahi tărha-ta-dăɣ făl ĕnnăr ămmukkăn a-wen-dăɣ, tĕkkukkĕrem-dd tiṭṭawen-năwăn i-ad-hi-tănăt-tĕkfĕm. 16Ajăn tidĕt ta hawăn-jănneɣ, tĕj'-ahi ašănjo-năwăn? 17Ăddinăt wi ĕdgăẓnen dăɣ-asĕmmĕskĕl n-isălan wi hawăn-nĕja, wăr teɣalăt ăkkulăn dăɣ-wăn, ănn-ak tărha ɣas n-ad-kăwăn-sĕnnĕmĕjjĕjăn dăr-i i-ad-hasăn-tĕlkĕmăm a dăɣ-ošalăn. 18Tidĕt, idgĕẓet ăwadĕm măšan, idgĕẓet dăɣ-amišĕl n-a-wa olăɣăn. Năkk, ăssofăɣ ad-tamašalăm a-wa olăɣăn s-ălwăqq iket-net jer-ĕlleɣ ɣur-wăn wăla wăr ɣur-wăn t-ĕlleɣ. 19Ilyaḍăn-in, ăssiilmădăɣ-kăwăn a-s oẓarăɣ dăɣ-tĕssĕba-năwăn, ijmaḍ-t ăššăk daɣ a-s jeɣ tiẓẓurt ta tăjj tamăḍt jarrăwăt eɣăf-net, tiẓẓurt daɣ ta jeɣ, ad-tăt-ĕṭṭafăɣ hundăɣ har ašăl wa d-mad-ikĕn Ălmasex ăntum dăɣ-ulhawăn-năwăn. 20Ăsiidărhănăɣ ad-t-ĕlleɣ ɣur-wăn ăssaɣăt-wa-dăɣ i-ad-hawăn-ăjăɣ măjrăd săl wa-dăɣ făl-a-s iqqan eɣăf-in făll-tĕmɣăre n-asĕmmăxĕlxĕl-i-dăɣ hi-ija a-wa kăwăn-išlăn. 21Ăyyăt-ahi ad-kăwăn-sĕstĕnăɣ kăwăneḍ-i ĕdgăẓnen s-ĕmmĕk-wa-dăɣ dăɣ-utăr n-amišĕl n-a-wa innă alămăr wa n-ănnăbi Mosa. Ak ajăn tĕknam făw teɣăre n-a-wa innă? 22Wădden, iktab dăɣ-s a-s ikrăš Ibrahim ĕssin ilyaḍăn, iyyăn, ohar-t d-Xăžrăta ta n-taklit, wa iyyăḍăn, ohar-t d-Sarăta ta n-telăllit-i issăxlăl. 23Ara wa ohăr d-taklit, ohăr-t dăr-s s-ĕmmĕk-wa-dăɣ s-itihăr ăhalĕs d-tamăḍt ara măšan, ara wa ohăr d-telăllit, ămoos ara n-ărkăwăl wa ijjăš Măssinăɣ i-Ibrahim. 24Tanfust-ta-dăɣ jăt făll-tiḍeḍen-ti-dăɣ n-sănatăt, la ălmăɣna šĕjreen, ălmăɣna-net da: tiḍeḍen-ti-dăɣ n-sănatăt, ănifăqqănăt d-ărkăwălăn wi n-ĕssin: Ărkăwălăn-en, wa ăzzarăn, tamătart-net, Xăžrăta; a-wen ărkăwăl wa ijjăš Măssinăɣ d-ănnăbi Mosa făll-aḍaɣ wa n-Săynay, wen ărkăwăl, a-wa t-dd-ijmăḍăn dăɣ-aratăn iket-net eklan ed Xăžrăta-i n-ma-săn, taklit. 25Xăžrăta-en-dăɣ a-s šund aḍaɣ wa n-Săynay ihăn ăkall wa n-arabăn, toolăh daɣ d-aɣrĕm wa n-Yărussălam-i s-ašăl-i-dăɣ, mĕssaw-s iket-dăɣ-năsăn, ăkkiilen hărwa i-alămăr-en-dăɣ. 26Măšan, Yărussălam ta n-tidĕt t-tĕllăt ɣur-Măssinăɣ dăɣ-išĕnnawăn, ĕnta a-s tamăḍt ta n-telăllit n-anna-nănăɣ. 27A-wen-dăɣ făw a făl iktab dăɣ-isălan n-tamăḍt ta n-telăllit a-s: "Tamăḍt, kămm-i n-temĕjjejrut, dăwăt, săqqĕlĕlĕt daɣ kămm-i s-kăla wăr kăm-tărmes tiẓẓurt ta n-ajăraw n-eɣăf ed ădduuttăt a-s tamăḍt ta tătwăksănăt, făl-a-s innin wăr tĕtĕy, ad-tajăr ta dăr-ohăr ăhalĕs-net aratăn." 28Ayĕtma, ĕlmĕdăt a-s kăwăneḍ aratăn dd-oraw ărkăwăl n-Măssinăɣ a tămoosăm šund ĕmmĕk wa s-ijjăš Măssinăɣ ărkăwăl i-Ibrahim ɣas, ikrăš Isxaqq. 29S-ĕmmĕk-wa-dăɣ s-ibda iwă-dd alyaḍ wa tĕkrăš Xăžrăta, idwăl ɣas, ad-isakna wa n-Sarăta aɣăna; ĕmmĕk-wen-dăɣ daɣ a ijan jer-ăddinăt har ašăl-i-dăɣ. 30Ămăra, ilyaḍăn-win-dăɣ n-ĕssin, ma hanăɣ-innă ĕlkĕttab n-Măssinăɣ dăɣ-isălan-năsăn? Wădden iktab a-s innă Măssinăɣ i-Ibrahim: "Sĕfĕl iman-năk taklit d-rure-s ed wăr t-illa ĕmmĕk s-ohăr alyaḍ wa n-taklit tăkasit d-alyaḍ wa n-telăllit." 31Ayĕtma, năkkăneḍ, anna-nănăɣ telăllit wădden taklit.

will be added

X\