Kăl-Gălasya 3

1Ya kăl-Gălasya! Ajăn kăwăneḍ iba n-tayĕtte a kăwăn-irmăsăn? Mi kăwăn-ăkrakăwăn i-ad-tăqqĕlăm ḍarăt Ɣisa-i s-hawăn-nĕffĕssăr ăddălil wa făl ătwăṣlăb făll-tajĕttewt? 2Sastanăɣ-kăwăn ămăra: amišĕl n-a-wa innă alămăr meɣ immun s-Ălĕnžil-i s-tăsjădăm a kăwăn-ikfăn Unfas Šăddijăn? 3Ajăn kăwăneḍ irmas-kăwăn iba n-tayĕtte ogdăhăn d-a-wen-dăɣ! Ǝnd'-e-d-il' ĕmmĕk a-s a-wa tĕssĕntăm s-tărna n-Unfas Šăddijăn, tăsbăṭṭălăm-t-in har dd-tăqqălăm ămăra, tăsifăllăm făll-iman-năwăn? 4Ɣas kăwăneḍ a-wa-dăɣ dd-tokăyăm iket-net dăɣ-immun-năwăn, wăr t-illa a kăwăn-ikfa dăɣ-tayĕtte? Wăr il' ĕmmĕk a-wen! 5Ak Unfas Šăddijăn wa kăwăn-ikfa Măssinăɣ d-tikunen ti ija jere-wăn, ma tordam, mafăl ija a-wen-dăɣ iket-net jere-wăn? Ak ajăn tordam a-s amišĕl-năwăn i-alămăr n-ănnăbi Mosa a făl hawăn-ija a-wen meɣ a-wa s-innin tomănăm s-Ălĕnžil-i s-tăsjădăm? 6Ǝktĕwăt-dd măjrăd wa innă Măssinăɣ făll-ănnăbi Ibrahim a-s innă: "Omăn Ibrahim s-Măssinăɣ, ikrăš data-s idĕm." 7Ălmăɣna n-a-wen a-s ăddinăt wi omănnen s-Măssinăɣ a-s aratăn n-Ibrahim wi n-tidĕt. 8Ăru d-ătwăktăb dăɣ-ĕlkĕttab n-Măssinăɣ n-a-s ilkam ad-amĕnăn inĕẓẓulam s-Măssinăɣ, ăkf'-en immun-năsăn-en-dăɣ idĕm dat-Măssinăɣ. Ăru d-ija Măssinăɣ i-Ibrahim isălan n-ălxer-wi-dăɣ a-s has-innă: "Ad-ăjăɣ ălbăraka dăɣ-tiwsaten iket-dăɣ-năsnăt dăɣ-ăddimmăt-năk." 9A-wen-dăɣ a făl ere omănăn s-Ɣisa-dăɣ, ad-dăɣ-s ăj Măssinăɣ ălbăraka wa ija dăɣ-Ibrahim. 10Dăɣ-isălan n-ăddinăt wi jărnen ăṭṭăma n-a-s amišĕl-năsăn i-alămăr wa n-ănnăbi Mosa a tăn-madăn-iɣlĕs, ĕlmĕdnet a-s iwar-tăn uḍlem dat-Măssinăɣ, ed iktab dăɣ-ĕlkĕttab n-Măssinăɣ a-s: "Ilɣăn Măssinăɣ ăwadĕm wărăn itĕmišil hak ăssaɣăt a-wa ĕnnăn fărĕḍăn wi hănen alămăr wa n-ănnăbi Mosa." 11Wăr t-illa ăwadĕm mad-ăj alămăr ămaɣdal dat-Măssinăɣ ed iktab a-s: "Immun a ihakkăn ăgg-adĕm idĕm dat-Măssinăɣ i-ad-ăj tămudre ta fălla-s irha Măssinăɣ." 12Nĕssan a-s immun, wăr-oseɣ hărăt d-alămăr ed iktab daɣ dăɣ-ĕlkĕttabăn a-s ere ămešălăn s-iqqud fărĕḍăn n-alămăr wa n-Mosa iket-net, ad-iddăr săr-săn. 13Iwar-anăɣ uḍlem dat-Măssinăɣ ed indăr-anăɣ ad-nămašăl a-wa innă alămăr măšan, osă-dd Ălmasex ɣas, ăsdărfăt-anăɣ dăɣ-tilɣant ta hanăɣ-ăswăr, iḍkăl-tăt făll-iman-net, ămmut i-ad-năɣlĕs ed iktab a-s: "Ilɣăn Măssinăɣ ăwadĕm ătiwăṣlăbăn făll-tajĕttewt." 14Tamăttant ta ija Ɣisa făll-tajĕttewt, ij'-et i-ad-ĕnmiwĕḍăn inĕẓẓulam dăɣ-idĕm-net d-ălbăraka wa s-ijjăš Măssinăɣ ărkăwăl-net i-Ibrahim, nĕjrĕw daɣ năkkăneḍ-i săr-s omănnen Unfas Šăddijăn dăɣ-tĕssĕba n-Ɣisa Ălmasex. 15Ărheeɣ ayĕtma ămăra, ad-hawăn-ăffăssărăɣ isălan-wi-dăɣ s-ălmital iglan făll-agnatăn wi dăɣ-nănăɣ: tĕssanăm a-s ed iktăb ăhalĕs tăkarḍe dăɣ-ija isălan n-ĕmmĕk wa s-mad-tuẓan tăkasit ta dd-mad-ăyy, afăl issĕmda akătab-net, iɣfăl-tăt, ad-ăbas t-illa ere ăddooben asiwĕḍ wăla afănaẓ n-a-wa s-išwăr iktăb-t. 16Ǝmmĕk-wen-dăɣ daɣ a-s ijjăš Măssinăɣ ărkăwălăn-net i-Ibrahim d-ahăya-net. Ǝjrăhăt-in a-s wăr-innă ĕlkĕttab: "Ad-dăr-k ĕjjĕšăɣ ărkăwăl kăyy d-ihăyawăn-năk." A innă: "Kăyy d-ahăya-năk", i-ad-ĕlmĕdăn ăddinăt a-s ăwadĕm iyyăn ɣas a-s iha Măssinăɣ ti-net, a t-ămoosăn Ălmasex. 17Ămăra, ălmăɣna n-a-wen, ĕnta da: Măssinăɣ, ijjăš d-Ibrahim ărkăwăl n-tassaɣt, šămad okaynăt ĕkkoẓăt timaḍ d-kăraḍăt timĕrwen n-awătay ad-dd-ăzzăbbăt Măssinăɣ alămăr wa n-ănnăbi Mosa făll-kăl-Ălyăhud, ămăra, alămăr-wen, wăr-ăddobăt ad-hin-ikkĕs ărkăwăl wa s-išwăr ijjăš-t Măssinăɣ s-tizarăt. 18Ǝnnăr ija a-wen, adiš, ma ija ărkăwăl wa s-išwăr ijjăš-t Măssinăɣ i-Ibrahim? Nĕssan a-s Ibrahim, issĕtbăt Măssinăɣ ărkăwăl wa has-ijjăš, wădden s-alămăr măšan s-tĕnna-net ed Măssinăɣ iman-net a has-innăn: "Ad-kăy-ăkfăɣ ănnuɣmăt-in." 19Alămăr, adiš, ma infa? Alămăr, temăhiḍt hanăɣ-salmadăt a-s năkkăneḍ-i-dăɣ, inăsbăkkaḍăn a nămoos ămiiɣatărnen s-tenăšše hundăɣ har ašăl wa dd-mad-ass ahăya n-Ibrahim wa s-ătwănna ed ĕnta-en-dăɣ a-s ijjăš Măssinăɣ ărkăwăl-wen-dăɣ. Alămăr-en, tĕssanăm a-s ănjălosăn a t-dd-ăwwăynen s-ănnăbi Mosa-i t-dd-ăwwăyăn s-tamĕtte ta jer-imăl d-Măssinăɣ. 20Dăɣ-ărkăwăl wa ijjăš Măssinăɣ d-Ibrahim, wăr t-illa ere imalăn jere-s d-Ibrahim ed Măssinăɣ, ĕnta ɣas a ijjăšăn ărkăwăl-wen-dăɣ i-Ibrahim wăla ĕssĕbab wăl' iyyăn. 21A-wen ak ălmăɣna-net a-s alămăr wa n-ănnăbi Mosa, ill'-e a-s ănimăšrăy i-ărkăwăl wa ijjăš Măssinăɣ? Ăbo, wăr-ămmukkăn a-wen ed ĕnnăr t-illa alămăr ăddooben ihuk n-ălžănnăt, ĕjrĕwăn-t ăddinăt, ăj'-en alămăr-en-dăɣ ăddinăt ĕjrawnen idĕm dat-Măssinăɣ 22măšan, illăɣăt-anăɣ ĕlkĕttab n-Măssinăɣ a-s ăddunya iket-net a t-tĕllat daw-tărna n-abăkkaḍ, ămoos a-wen a itbatăn dăɣ-tĕssĕba n-ad-ĕjrĕwăn ăddinăt wi omănnen s-Ɣisa Ălmasex a-wa s-hasăn-ijjăš Măssinăɣ ărkăwăl-net. 23Ămăra, dat-ăzzăman wa dd-issărɣăs Măssinăɣ immun s-Ɣisa Ălmasex, alămăr wa n-ănnăbi Mosa a dăɣ-năɣ ănniihăḍăn, nămoos-as šund kăl-takărmut ikna uḍĕf dăɣ-tišĕm-net, ănniihăḍ dăɣ-năɣ hundăɣ har ašăl wa dd-ăsnăfalăl Măssinăɣ immun s-Ălmasex. 24A-wen, isalmad-anăɣ a-s alămăr wa n-ănnăbi Mosa, taɣălift a hanăɣ-ija; iɣlaf-anăɣ i-ăzzăman wa dd-mad-ass Ălmasex i-ad-hanăɣ-ăkf immun-nănăɣ idĕm ɣur-Măssinăɣ. 25Ămăra-dăɣ d-nĕjjăš ăzzăman wa n-immun, ăbas fălla-năɣ ila ănaɣlaf-en tărna 26ed ɣur-ašăl-wa-dăɣ d-tomănăm, tămoosăm aratăn n-Măssinăɣ dăɣ-tĕssĕba n-Ɣisa Ălmasex, 27ĕnta-i s-isĕm-net a dăɣ-tătwăsălmăɣăm dăɣ-aman, ămoos a-wen a ăssiitbătăn tassaɣt-năwăn dăr-s, tărmăsăm daɣ ălxal wa irmas Ălmasex. 28Ămăra-hi, ăbas iẓlay wa n-ăgg-Ălyăhud d-wa n-Ălyunan, ăbas iẓlay wa n-elăll d-wa n-akli, ăbas iẓlay ăhalĕs d-tamăḍt ed tămoosăm iket-dăɣ-năwăn iyyăn n-ăwadĕm dăɣ-tĕssĕba n-tassaɣt-năwăn d-Ɣisa Ălmasex. 29Ɣas, šămad Ɣisa Ălmasex a kăwăn-ilan, adiš tămoosăm ihăyawăn n-Ibrahim, ad-tĕjrĕwăm tăkasit ta s-hawăn-ijjăš Măssinăɣ ărkăwăl-net.

will be added

X\