Kăl-Gălasya 2

1Măraw iwĕtyan d-ĕkkoẓ ḍarăt-a-wen-dăɣ ad-olăsăɣ ajoẓi s-Yărussălam ăddeewăɣ ăsihe-wa d-Bărnăbbas d-Titus. 2Ajoẓi-nin daɣ s-Yărussălam, Măssinăɣ a hi-t-dd-ăsnăfalălăn, jeɣ-t. Ǝžžĕmmăɣăɣ dihen d-inušămăn n-ălkănisăt ta t-tĕllăt dihen, ăssoɣălăɣ-asăn isălan n-Ălĕnžil wa xaṭṭăbăɣ i-inĕẓẓulam, ĕffĕsărăɣ-asăn s-iyyăn-iyyăn isălan n-a-wa jeɣ d-a-wa hi-išlăn iket-net i-ad-wăr-itumas ălxidmăt wa s-išwăr jeɣ-t, a jeɣ bănnan. 3Jeɣ-dăr-săn anĕfham-wa-dăɣ făl wăr-ăšhăššălăn wăla dăɣ-Titus-i dăr-i ăddewăn asĕmmili n-iman-net ed ĕssanăn a-s ăgg-Ălyunan a ămoos. 4Wăr t-illa făw ere dd-iḍkalăn isălan n-amili wăla iba-net har jere-năɣ dd-ălmamăsăn kăl-Ălyăhud iyyăḍ jannănen s-bahu a-s ălmăssexităn a ămoosăn, ad-tattărăn asĕmmili-net măšan, nĕlmăd šik a-s a-wa inaramăn hanăɣ-dd-ĕjjašnen i-ad-zĕjjĕzzĕn ajăraw n-iman wa hanăɣ-ikfa Ɣisa Ălmasex a-s nomăn săr-s. Nĕlmăd a-s wăr tĕttărăn ɣas ar ad-năj ăššăk dăɣ-ĕllĕllu wa nĕjrăw, alĕsăn-anăɣ asĕkkĕlu i-alămăr wa n-ănnăbi Mosa. 5Ăddinăt-en-dăɣ, wăr hasăn-noyya iman-nănăɣ s-ăkall, nĕssĕkfăr-asăn iman-nănăɣ, nunjăy s-a-wa săɣren i-ad-tăqqaymĕm kăwăneḍ tĕṭṭafăm Ălĕnžil-i ămoosăn tidĕt ta s-tărḍăm. 6Dăɣ-taɣimit-nănăɣ-ten-dăɣ, ad-ĕnnăn meddĕn wi n-inušămăn n-imizărăn, kud-dăɣ, s-iman wi-nin, wăr-ăkkulăɣ d-a-wa ămoosăn ed Măssinăɣ, wăr-iḍĕkkĕl ăddinăt s-ĕḍḍĕkuḍ wa dăɣ-tăn-jăn imidiwăn-năsăn, hakd a-wen-dăɣ, wăr t-illa ăššăk jan dăɣ-a-wa săɣreɣ, 7ănn-ak, ărḍăn iket-dăɣ-năsăn a-s năkk, ikkĕllăf-ahi Măssinăɣ axăṭab n-Ălĕnžil i-inĕẓẓulam-i wăren ĕja amili hărăt s-ĕmmĕk wa s-ikkĕllăf Bĕṭrus d-a-wen i-kăl-Ălyăhud-i ɣur-ămoos amili hărăt. 8Ǝfhămăn iket-năsăn a-s tărna n-Măssinăɣ ta hi-jăt dăɣ-tĕnnĕmušĕla n-Ălĕnžil i-inĕẓẓulam, ĕnta daɣ a jăt Bĕṭrus dăɣ-tĕnnĕmušĕla-net i-kăl-Ălyăhud. 9Dăɣ-edăwănne-nin d-inušămăn, irḍa Yaqub d-Bĕṭrus d-Exya-i ămoosnen imizărăn wi ĕššămnen n-ălkănisăt a-s năkk-dăɣ, ikf'-ahi Măssinăɣ turhajăt n-ad-ăjăɣ isălan n-Ălĕnžil-net i-inĕẓẓulam. Ɣur dihen-dăɣ ad-dăr-năɣ jăn năkk d-Bărnăbbas ifassăn n-ălxer, nănmărḍa dăr-săn i-ad-năkk năkkăneḍ inĕẓẓulam, ĕkkĕn ĕntăneḍ kăl-Ălyăhud. 10Hărăt iyyăn a dăr-hanăɣ-ăsmătărăn, ĕnnăn-anăɣ: "Wăr hin-tĕttĕwăm tilăqqiwen n-ălkănisăt ta hăt Yărussălam". Ămoos a-wen-dăɣ dăɣ-năɣ ĕttărăn a dăɣ-ĕkneɣ ĕjjĕluyăt ḍarăt-a-wen. 11Tĕglă tanfust hundăɣ har ašăl wa dd-osa Bĕṭrus aɣrĕm wa n-Intyuš. Indăr-ahi dihen anĕfham dăr-s ed iwar-t uḍlem dăɣ-a-wa ija 12făl-a-s iket-di dd-tisĕn meddĕn dd-ăšimašăl Yaqub, itihăr imĕnsiwăn d-ălmăssexităn wi wăren ămoos dăgg-Ălyăhud măšan, osăn-dd inămmašalăn n-Yaqub ɣas, imăl ĕnta s-edes šund kăla wăr-inhey ălmăssexităn-win-dăɣ, ăbas dăr-săn itihăr wăla imĕnsiwăn a-wa-dăɣ has-tĕja tuksĕḍa n-a-wa he-ĕnnĕn kăl-Ălyăhud wi jănnănen ifraḍ amili făll-ăddinăt iket-năsăn. 13Ǝnhăyăn kăl-Ălyăhud wi iyyăḍnen n-ălmăssexităn a-wa ija Bĕṭrus ɣas, ĕlkămăn-as ĕntăneḍ-dăɣ har dd-iha ilkam-asăn Bărnăbbas iman-net dăɣ-tĕlmĕnufăɣa ta ijjăš Bĕṭrus. 14Ǝnhăyăɣ a-s ifraɣ Bĕṭrus i-tidĕt n-a-wa inna Ălĕnžil ɣas, ăɣtălăɣ-t dat-ăddinăt iket-năsăn, ĕnneɣ-as: kunta kăyy-i n-ăgg-Ălyăhud tĕlkamăd i-agna wa s-ĕlkamăn inĕẓẓulam, ĕnd'-e-d-il' ĕmmĕk ămăra-dăɣ, ad-tĕttărăd dăɣ-inĕẓẓulam ad-ilalăn agna wa n-kăl-Ălyăhud? 15Tidĕt, s-alăṣăl-dăɣ, dăgg-Ălyăhud a nămoos, wăr hanăɣ-iha ašni n-tiwsaten ti n-inĕẓẓulam wăren ĕssen s-alămăr n-Măssinăɣ 16măšan, hakd a-wen-dăɣ, nĕssan a-s ăwadĕm, immun s-Ɣisa Ălmasex ɣas a t-ihakkăn idĕm dat-Măssinăɣ wădden amišĕl n-a-wa innă alămăr wa n-ănnăbi Mosa kud-irha iṭṭaf-t iket-dăɣ-net. A-wen-dăɣ, a făl năkkăneḍ-dăɣ, nomăn s-Ɣisa Ălmasex i-ad-hanăɣ-ăkf immun-nănăɣ săr-s idĕm dat-Măssinăɣ wădden imărkedăn-nănăɣ ed wăr t-illa ăwadĕm madăn-ijrĕw idĕm ɣur-Măssinăɣ făl-a-s innin ămešăl a-wa innă alămăr wa n-ănnăbi Mosa. 17Năkkăneḍ, Ălmasex a-s nĕtattăr ad-hanăɣ-ijrĕw idĕm ɣur-Măssinăɣ măšan, kunta hakd a-wen-dăɣ iket-net, ăffukkăr-dd a-s nămoos inăsbăkkaḍăn, ajăn a-wen ălmăɣna-net a-s Ălmasex a hanăɣ-ăssoḍăn dăɣ-ibăkkaḍăn-win-dăɣ? Xăša! 18Ădduuttăt a-s afăl dd-ăqqălăɣ alămăr wa n-ănnăbi Mosa wa ăbboṭălăɣ, ad-janneɣ i-iman-in, ăddoobeɣ amišĕl-net, a-di, uḍlem ɣas a sawarăɣ iman-in ed a-wen wăr-ămmukkăn. 19Alămăr, iman-net a hi-madăn-ănɣ i-ad-ăbas ĕddarăɣ i-alămăr, ănn-ak, Măssinăɣ a-s ĕddarăɣ. 20Năkk, ohărăɣ d-Ălmasex atwĕṣlĕb wa ătwăjja făll-tajĕttewt, kunta ămăra ĕddarăɣ, ăbas năkk a iddarăn, Ălmasex a iddarăn dăɣ-taɣĕssa-nin. Tămudre-nin dăɣ-ăddunya-ta-dăɣ, jeɣ-tăt dăɣ-tĕssĕba n-immun wa jeɣ s-Rure-s n-Măssinăɣ-i hi-ijăn tărha-ta-dăɣ făl ămmut dăɣ-tĕssĕba-nin i-ad-ăɣlĕsăɣ. 21A-wen-dăɣ a făl wăr-ărḍeɣ sibĕṭṭulăɣ ănnuɣmăt wa hi-ikfa Măssinăɣ ed ădduuttăt a-s ĕnnăr ihakk amišĕl n-alămăr wa n-Mosa idĕm ɣur-Măssinăɣ, adiš Ălmasex-i-dăɣ, ămmut bănnan.

will be added

X\