Kăl-Ifăsus 6

1Aratăn! Sajadăt i-imărawăn-năwăn, ĕnta-den-dăɣ a-wa oɣădăn fălla-wăn irha Emăli. 2Innă iyyăn dăɣ-alămărăn n-Măssinăɣ: "Sĕmɣăr ti-k d-ma-k"; alămăr-wa-dăɣ, ĕnta a-s wa ăzzarăn ăsdăw Măssinăɣ d-ărkăwăl, innă: 3"Afăl tĕssĕmɣărăd ti-k d-ma-k, ad-tĕjrĕwăd ălxer, tĕkrĕšăd taɣrĕst." 4Kăwăneḍ-i daɣ n-imărawăn, wăr tăẓẓăkănẓărăm aratăn-năwăn ănn-ak, ăjăt-asăn asĕdwal dăɣ-tăn saɣrem, tadăbbarăm-asăn s-a-wa innă Emăli dăɣ-măjrăd-net. 5Eklan! Săjdăt i-imălan-năwăn, uksaḍăt-tăn, sĕmɣărăm-tăn s-ulhawăn šăddijnen šund ɣas a-s Ălmasex iman-net a-s jăm a-wen. 6Udaɣ ad-tajjăm a-wa fălla-wăn ărhăn dihad kăwăn-hannăyăn ɣas šund a-s tărham ad-kăwăn-in-ĕjrăhăn ăddinăt, ănn-ak, ăjăt a-wa fălla-wăn ărhăn s-ulh irḍan, ed a-wen-dăɣ a fălla-wăn irha Măssinăɣ. 7Ăjăt a-wa kăwăn-iwărăn s-ulh imdan šund a-s Emăli a-s t-tajjăm wădden dăgg-adĕm. 8Tĕssanăm a-s hak ăwadĕm, jer-akli wăla elăll, hak ăwadĕm-dăɣ, ad-t-ăkf Emăli a-wa has-jăn imojjan-net. 9Kăwăneḍ daɣ-i n-mĕssaw-s n-eklan, tajjăt a olaɣăn i-eklan-năwăn, udaɣ ɣas ad-fălla-săn samahaḍăm ed tĕssanăm a-s kăwăneḍ hakd eklan-năwăn, Emăli-năwăn wa n-tidĕt ih' išĕnnawăn, wăr tĕẓleyăm data-s. 10Ḍarăt-a-wen daɣ, ĕṭṭĕfăt tărna n-Emăli i-ad-kăwăn-isĕṣṣuhĕt. 11Ǝjbĕsăt, tĕḍkĕlăm ĕẓẓĕnĕfăn n-imutaj n-amjăr wi kăwăn-ikfa Măssinăɣ i-ad-tudabem ehel n-iman-năwăn dat-Iblis d-tidămaten-net. 12Ămăra, anmănɣ wa nĕha, tĕssanăm a-s wădden dăgg-adĕm a dăr-t nĕja, ănn-ak, nĕj'-e d-kăl-tărna d-kăl-ĕlxĕkum d-kăl-tădabit wi n-ăddunya ărjăšnen dăɣ-tihay, nĕj'-e d-a-wa-dăɣ iglăn făll-tăllăbăst d-alšinăn wi ĕllăynen dăɣ-ălhăwa. 13Šămad isălan-den-dăɣ, adiš, ĕjbĕsăt s-ĕẓẓĕnĕfăn n-imutaj n-akĕnnas wi kăwăn-ikfă Măssinăɣ i-ad-tudabem ehel n-iman-năwăn, afăl fălla-wăn dd-oḍa erk ašăl, tudabem akĕnnas s-a-wa tĕṭṭăfăm, wăr tăjewăḍăm. 14Ǝhĕlăt iman-năwăn: tumaset-awăn tidĕt, tamĕntĕka; umaset-awăn iqqud, ĕltăɣ-idmar wa wăr nĕbbĕjnĕt tidij, 15ĕmmĕk-wa-dăɣ s-tăssirmăḍăm esel n-tifădelen-năwăn, ĕmmĕk-wen-dăɣ daɣ a-s hărkuk, ɣaymăt tăsidăwăm i-iji n-isălan n-Ălĕnžil-i săr-wăn-dd-ăwwăyăn ălxer. 16A tăjjăm-dăɣ, umaset immun s-Măssinăɣ aɣărh wa hin-itiwăɣăn fălla-wăn ăssămăn wi ăhijăljălnen s-kăwăn-itĕjjar Iblis. 17Umaset-awăn ĕlɣĕllas wa kăwăn-ikfa Măssinăɣ takĕnbut ta hin-tiwăɣăt fălla-wăn tisăwaten, ĕšlĕjăt tăkoba ta ămoos măjrăd n-Măssinăɣ-i kăwăn-ikfă Unfas Šăddijăn. 18Tĕddalăt Măssinăɣ hărkuk s-tărna n-Unfas Šăddijăn, ĕjlĕyăt hullan dăɣ-a-wen-dăɣ, wăr toyyem sendad n-a-wen irmas-kăwăn, tĕddalăt Măssinăɣ i-imĕššeddĕjăn iket-dăɣ-năsăn. 19Ădĕlăt-ah'-in Măssinăɣ năkk-dăɣ a hi-issărɣăsăn măjrăd, udabeɣ asuɣĕl n-isălan n-ĕddăraj wa ămoos Ălĕnžil s-ĕnniyăt ozjan. 20Ălĕnžil-en-dăɣ a-s ămoosăɣ ălwakil, kud-dăɣ ašăl-i-dăɣ, dăɣ-tĕssĕba n-iji n-isălan-net a făl heɣ takărmut. Ǝttărăt-ah'-in ad-ĕjrĕwăɣ iman-in i-ad-udabeɣ iji n-isălan-en s-a-wa ilăn ĕmmĕk d-esăwe. 21Dăɣ-a-wa dd-iqqălăn taɣărha-nin hakd-dăɣ a-wa hi-išlăn, ad-dăɣ-wăn ăj, Tušik-i emărh-in n-ă/n/na-ɣ n-ămaɣdal dăɣ-ămašal-wa-dăɣ hanăɣ-ija Emăli, isălan-in; 22ăšimašălăɣ-t-in săr-wăn i-ad-hawăn-ăj isălan-nănăɣ, isĕsmăḍ ulhawăn-năwăn. 23Ăhuulăɣ-kăwăn-in, ĕttarăɣ daɣ s-Măssinăɣ-i n-Abba d-Emăli Ɣisa Ălmasex a kăwăn-ikfăn ălxer kăwăneḍ hakd imumĕnăn iket-dăɣ-năsăn, tĕnmărhĕm jer-iman-năwăn, iwwaḍ immun-năwăn. 24Ikfă Măssinăɣ ănnuɣmăt-net i-ăddinăt wi jănen tărha tĕmdat i-Emăli-nănăɣ Ɣisa Ălmasex. Amin!

will be added

X\