Kăl-Ifăsus 5

1Ayĕtma! Šămad aratăn n-Măssinăɣ ikna tărha a tămoosăm, adiš, tălălăt-t. 2Tănnăhăḍet tărha dăɣ-a-wa tăjjăm iket-net s-ĕmmĕk wa s-hawăn-tăt-issĕkna Ălmasex-i ikfăn iman-net, ămmut i-ad-umas takute lat ălqim, s-ijraẓ aḍu-net i-Măssinăɣ. 3A-wen-dăɣ a făl wăr jere-wăn dd-tătwăḍkalnet isălan n-ăwadĕm ikfan iman-net iba n-tăkrakiḍt wăla asĕmmăḍĕs n-iman-net wăla utăr n-terše tokăyăt ămaku. A-wa hărătăn s-wăr-ănhăjja făw ad-dd-titwăɣrin jer-imĕššeddĕjăn. 4Wăr safălɣaɣăt, wăr tăjjăt măjrăd wărăn ila ălmăɣna, wăla tekăškăšt wărăt la ăddălil, ănn-ak, a tăjjăm-dăɣ, ɣaymăt tumayăm i-Măssinăɣ ijităn-net. 5Ǝlmĕdăt a-s ăddinăt wi ĕkfănen iman-năsăn iba n-tăkrakiḍt d-wi samăḍasnen iman-năsăn d-wi ha tărha n-hărăt-i wărăt tĕẓley d-ălɣibadăt n-ăṣṣănămăn; ăddinăt-en, xăram-asăn ahănay n-Tĕmmĕnĕya ta n-Ălmasex d-Măssinăɣ. 6Wăr kăwăn-isăswadet ăwadĕm s-tăẓude n-ilĕs wărăn infa hărăt ed anmĕšri šund-wen-dăɣ ad-dd-itirĕwăn aḍkăr n-Măssinăɣ făll-ăddinăt wi unjăynen s-ămišĕl n-tĕnna-net. 7Ăddinăt wi tamašalnen hărătăn-win-dăɣ, wăr tăn-tăsmadăwăm. 8Kăla hăm kăwăneḍ-dăɣ tihay măšan, ašăl-i-dăɣ, tosăɣăm d-Emăli, adiš, ĕṭṭĕfăt ălxal wa n-dăgg-ănnur; 9ănnur daɣ, wăr t-dd-izĕjjăr ar milɣaw, iqqud d-tidĕt. 10Šămad dăgg-ănnur a tămoosăm, ĕlmĕdăt a-wa ijrăẓăn i-Emăli, tămašălăm-t. 11Wăr tihrăt hărăt d-mălayăɣnatăn wi tamašalăn kăl-tihay, ănn-ak, sĕffukkărăt a-wa tamašalăn 12ed a-wa tăn-išillun dăɣ-ufăr, ăsikărakăḍ wăla edăwănne dăɣ-s. 13Wăr tăkărrasnet iman-năsăn, ilkam ad-dd-isĕffukkăr ănnur a-wa tăn-išlăn iket-net, 14ed ănnur, wăr t-dd-izĕjjăr ar ănnur. A-wen-dăɣ a făl ătwănnă: "Jăy! Kăyy-i iṭṭăsăn, ĕnkăr-dd dăɣ-eḍĕs Ǝnkăr-dd jer-inĕmmuttan wi jer-tĕnsed i-ad-fălla-k isĕmmĕlĕwlĕw Ălmasex ănnur-net." 15Ăjăt ĕnniyăt i-tămudre-năwăn, udaɣ ad-tumasăm ăddinăt wăren la tayĕtte, umasăt imĕssorha. 16Ăjăt ărramăt dăɣ-taɣrĕst-năwăn, ăyyăt fălla-wăn a-wa wăr-iha ălfăyda ed, išilan lăbasnen a fălla-năɣ janen. 17Wăr tămoosăm ăddinăt irmas iba n-tayĕtte, ĕjrăhăt erhet n-Emăli. 18Wăr săssăt asmĕd har dăɣ-wăn itakkăs ĕnniyăt ed iba n-ălxal a-wen, ănn-ak, ăyyăt Unfas Šăddijăn a dăɣ-wăn ănnăhăḍ. 19Nĕmăṭṭĕfăt jer-iman-năwăn s-tĕmmalen dd-ĕzjarnen Ăẓẓăbur, d-tĕmmalen kăwăn-samătarnen d-isuhaɣ săr-wăn dd-oraw Unfas Šăddijăn. Amĕlăt Emăli s-ulh imdan. 20Umayăt hărkuk i-Măssinăɣ-i n-Abba a-wa hawăn-ija iket-net dăɣ-isĕm n-Emăli-nănăɣ Ɣisa Ălmasex. 21Isărĕset hak iyyăn dăɣ-wăn iman-net i-amidi-net dăɣ-tĕssĕba n-tuksĕḍa ta jăm i-Ălmasex. 22Tiḍeḍen! Sărĕsmăt iman-năkmăt dat-meddĕn-năkmăt šund a-s Emăli a dat-tăsrăsmăt iman-năkmăt, 23ăniihăjja a-wen făl-a-s, ăhalĕs a-s ămizăr n-hănne-s s-ĕmmĕk wa s-ămoos Ălmasex eɣăf n-ălkănisăt-i tămoosăt taɣĕssa-net ta dd-iɣlăs. 24Ǝmmĕk-wa-dăɣ s-tăsirăs ălkănisăt iman-net dat-Ălmasex, ĕmmĕk-wen-dăɣ daɣ a-s lanăt tiḍeḍen ad-sărĕsnăt iman-năsnăt dat-meddĕn-năsnăt dăɣ-hărăt iket-net. 25Meddĕn! Ărhet hak iyyăn hănne-s s-ĕmmĕk wa s-irha Ălmasex ălkănisăt-net-i s-ija tărha ta făll tăt-ikfă iman-net, 26i-ad-tăt-dd-isĕbdĕd dat-Măssinăɣ, wăr tăt-iwer ălɣib wăl' iyyăn ed, ĕnta iman-net a tăt-iššĕšdăjăn, ăssirăd-tăt s-măjrăd-net-i išašdajăn, 27i-ad-dd-tĕbdĕd data-s tĕkna tihusay, tăsisahăɣ ašăl, wăla ălɣib wăla ešer wăla ankĕmmi wăl' iyyăn. 28Ǝmmĕk-wen-dăɣ daɣ a-s lan meddĕn s-ad-ĕṭṭafăn tiḍeḍen-năsăn, ĕjĕn-asnăt tărha d-ĕnniyăt wa jăn i-tiɣĕswen-năsăn. Tărha ta jed i-iman-năk, ăjet i-hănne-k 29ed wăr t-illa ere iksanăn iman-net, ănn-ak, hak ăwadĕm ija ĕnniyăt i-taɣĕssa-net, išakš'-et, isals'-et. Ǝmmĕk-wen-dăɣ daɣ a ija Ălmasex i-ălkănisăt 30ed năkkăneḍ-i săr-s omănnen, nămoos tislaḍ n-taɣĕssa-net. 31A-wen-dăɣ a făl innă măjrăd n-Măssinăɣ: "Ad-ifĕl ăhalĕs ti-s d-ma-s, asăɣ d-hănne-s, umasăn făll-ĕssin-essăn tiyyăt taɣĕssa d-iyyăn n-ăwadĕm." 32Măjrăd-wa-dăɣ hawăn-jeɣ dăɣ-isălan n-ĕddăraj wa tămoos tassaɣt ta ija Ălmasex d-ălkănisăt-net, ĕssanăɣ a-s wăr răqqis ujreh-net 33măšan, ifraḍ făll-hak ăhalĕs-dăɣ, ad-ărh hănne-s s-ĕmmĕk-wa-dăɣ s-irha iman-net; sĕmɣăret daɣ hak tamăḍt, ăhalĕs-net.

will be added

X\