1 Ayĕtma! Ăsimătărăɣ-kăwăn năkk-i n-u-takărmut dăɣ-tĕssĕba n-Emăli d-ad-tĕjĕm tămudre tănihăjjăt d-teɣăre ta kăwăn-dd-ija Măssinăɣ s-iman-net. 2 Sărĕsăt iman-năwăn dăɣ-hărăt iket-net, iẓadăt, ẓăydărăt, tĕnmĕšmărăm jer-iman-năwăn dăɣ-tărha. 3 Ăjăt a-wa tăddobem iket-net i-ad-tĕṭṭĕfăm tassaɣt ta n-iyyăt dăɣ-kăwăn-ija Unfas Šăddijăn, ămlet ălxer jere-wăn. 4 Tiyyăt taɣĕssa a tămoosăm, Unfas daɣ iyyăn ɣas, iyyăn n-ăṭṭăma a kăwăn-ăsjăr Măssinăɣ a-s kăwăn-dd-iɣră s-iman-net; 5 Emăli iyyăn, immun iyyăn, atwĕsĕlmaɣ dăɣ-aman daɣ iyyăn. 6 Măssinăɣ, iyyăn ɣas, ĕnta a-s Abba n-e d t-illăm ăgg-adĕm, ill'-e jĕnnĕj-hărăt iket-net, ăssodăr hărăt iket-net, ih' ulhawăn iket-năsăn. 7 Dăɣ-ănnuɣmăt-net, hak ăwadĕm-dăɣ, ij'-as isuf wi ităjj Ălmasex i-ăddinăt i-ad-hin-sĕssiwĕḍăn ămašal-net. 8 A-wen-dăɣ a făl innă ĕlkĕttab n-Măssinăɣ dăɣ-isălan n-Ɣisa: "A-s ikk' išĕnnawăn, irna imiksănăn-net, ăšrăwrăw-tăn ḍara-s tĕzzar ija isuf wi s-irha i-dăgg-adĕm." 9 Ma ămoos ălmăɣna n-tăfert ta tĕnnăt: "Ikk' išĕnnawăn"? Ălmăɣna-net a-s Ɣisa-i ijjăšăn ider n-ăkall, ĕnta daɣ a ikkăn išĕnnawăn. 10 Ǝnta-en-dăɣ s-hawăn-heɣ ti-net, ĕnta-i ijjăšăn ider n-ăkall, ĕnta daɣ a ikkăn ašĕnna wa hin-illan dăɣ-išĕnnawăn, ămnakăl făll-hărăt iket-net. 11 Ămăra, dăɣ-isălan n-isuf wi ijă, ĕnta iman-net a ijăn iyyăḍ inĕmmušal, iyyăḍ ănnăbităn, iyyăḍ imăllănžalăn, iyyăḍ ărrabexăn wi n-imănnăhăḍăn d-imăsăɣran n-ălkănisăt. 12 Isuf-win-dăɣ, ij'-asăn-tăn i-ad-sărɣĕsăn i-imĕššeddĕjăn tadăwla, ĕkfĕn-tăn imutaj wi s-ămiɣatărăn i-ad-tĕhĕl ălkănisăt-i tămoosăt taɣĕssa n-Ălmasex s-data. 13 Dihen, ad-năj issuɣ imdan dăɣ-immun wa nohăr, nĕkĕn tĕmĕzzuyt n-Rure-s n-Măssinăɣ, numas ăddinăt ăɣradnen s-tolăh tămudre-năsăn d-ta n-Ălmasex-i wăr-iwer ălɣib wăl' iyyăn. 14 Ad-ăbas nămoos aratăn s-tăšikwălt n-teɣăre tăn-dd-tĕmmărăt-dăɣ, ad-tăn-tăzzawăt; năɣlĕs dăɣ-a-wa sălmadăn dăgg-adĕm wi wăren tĕttăr ar ere ăšnămăšrăyăn s-tikărras-năsăn. 15 Numaset ăddinăt tinmĕnninen tidĕt tăddeewăt d-tărha i-ad-nĕdwĕl, nalăh d-Ălmasex-i n-ămizăr-nănăɣ. 16 Ǝnta-en-dăɣ a-s ĕssĕbab wa dd-isadawăn ăddinăt i-ad-asĕɣĕn s-ĕmmĕk wa s-osăɣăn izĕmmuz taɣĕssa n-ăgg-adĕm. Taɣĕssa, afăl hak taslăḍt-net dăɣ, išl'-eet a-wa tăt-iwărăn, ad-daggăl iket-net, togdăh, tosaɣ. A-wen-dăɣ a făl, nĕnmărhet i-ad-nĕhĕl s-data. 17 Ămăra, a-wa, ĕnneɣ-t, tilĕsăɣ daɣ tĕnna-net dăɣ-tĕssĕba n-Emăli: wăr tolehăm d-inĕẓẓulam -i wăren ĕgla ar făll-mălayăɣna n-ălxal, 18 tihay a dăɣ-ărjašăn, ĕžhalăn, ăqqurăn ulhawăn-năsăn, tĕdraj-asăn tămudre ta ihăkk Măssinăɣ. 19 Ăssetăn dăɣ-tĕẓẓulĕma d-iba n-tăkrakiḍt d-asĕmmăḍĕs n-iman-năsăn d-tărha n-ajăraw okăyăn ămaku. 20 Măšan, kăwăneḍ, wădden erk ălxal-wen-dăɣ a kăwăn-issăɣra Ălmasex 21 kunta ĕnta a făl tĕlmădăm, tĕlkămăm i-tidĕt ta kăwăn-issăɣra Ɣisa. 22 Ăyyăt fălla-wăn erk ălxal wa s-kăla t-tăttilălăm, tĕbḍĕwăm d-derhanăn n-tiɣĕswen-năwăn ed a-wen wăr dd-itiirĕw ar ĕlhĕllak s-ăgg-adĕm. 23 Ăyyăt Măssinăɣ ad-isĕynĕy inĕzjam-năwăn, ăj'-iwăn ăddinăt ărjašnen s-tayĕtte tăynayăt, 24 ĕkrĕšăt ălxal wa ikarrăš ăwadĕm ăssiynăy Măssinăɣ, ăɣĕdăt, išdajăt, tĕnnĕm tidĕt dăɣ-hărăt iket-net. 25 A-wen-dăɣ a făl, ĕbḍĕwăt d-bahu, ănnet hak iyyăn dăɣ-wăn tidĕt i-amidi-net ed ămăra-dăɣ, hak iyyăn dăɣ-năɣ, ămoos ašrut n-iyyăn. 26 Afăl kăy-ijjăš aḍkăr, wăr tĕyy aḍkăr-năk ăssoḍ'-ik dăɣ-a išlayăn, wăr toyyed tăfukt toḍa ha tĕsĕmme n-a-wen ulh-năk, 27 wăr jem i-Iblis tašlĕlt s-kăwăn-orăm. 28 Wa itikrĕn, wăr-itilĕset tikra, ănn-ak, ixdĕmet s-ifassăn-net i-ad-ijrĕw s-ălxaqq n-tide-net, idhĕl ĕnta-dăɣ wa tărmăs tămăɣatert. 29 Wăr dd-izăjjăret măjrăd sĕmmăn, a ămoos-dăɣ, imawăn-năwăn, ănn-ak, i dăɣ-wăn orăn emm-net i-măjrăd-dăɣ, izjăret-t-dd a infan hărăt, iknan, wărăn inxes iman n-ăddinăt wi has-ăsijădnen. 30 Wăr zăẓẓăkănẓărăt Unfas Šăddijăn n-Măssinăɣ-i s-kăwăn-iššĕšwăl i-ašăl wa dd-e-isĕmdĕw săr-wăn tădarfit ta s-innă. 31 Wăr toyyem tĕsĕmme wăla ăšo wăla aḍkăr wăla terk tettert wăla tigĕggar, wăr toyyem wăla dăɣ-hărătăn-win-dăɣ ikraš ekew dăɣ-ulhawăn-năwăn. Ǝbḍĕwăt d-tăllăbăst a tămoos-dăɣ. 32 Iẓadăt jer-iman-năwăn, nĕmiḍĕnăt tăhanint, ɣaymăt tinmĕnšim jer-iman-năwăn s-ĕmmĕk wa s-hawăn-in-inša Măssinăɣ dăɣ-idĕm n-Ălmasex.
