Kăl-Ifăsus 3

1A-wen-dăɣ a făl, năkk Bulĕs, ašăl-i-dăɣ, ămoosăɣ u-takărmut dăɣ-tĕssĕba n-Ɣisa Ălmasex-i hi-ijăn ănămmašul hawăn kăwăneḍ-i n-inĕẓẓulam, 2ăšmašăl-ahi-dd săr-wăn Măssinăɣ dăɣ-ănnuɣmăt-net i-ad-kăwăn-in-sĕssiwĕḍăɣ isălan-net, 3ĕnta-i hi-dd-ăsnăflălăn ĕddăraj wa s-hawăn-odăšăɣ isălan-net a ĕnḍărrăn dăɣ-armuḍ, 4măšan afăl tăɣrăm tăkarḍe-ta-dăɣ, ad-tĕjrăhăm a-wa-dăɣ s-hawăn-ăssewălăɣ ed năkk, Ălmasex a hi-issĕfhămăn ălmăɣna n-ĕddăraj-wen-dăɣ. 5Isălan-wi-dăɣ, ĕzzurĕyatăn ti hin-okăynen, wăr tănăt-dd-izjer ăgg-adĕm s-dd-ăsinăfalăl Măssinăɣ ălmăɣna-năsăn-has măšan, ašăl-i-dăɣ, issĕlmăd ălmăɣna-năsăn s-tărna n-Unfas Šăddijăn i-inĕmmušal-net wi n-imĕššeddĕjăn d-ănnăbităn. 6Ǝddăraj-en-hi, ălmăɣna-net a-s inĕẓẓulam hakd kăl-Ălyăhud, iyyăn n-ajăraw a jăn ɣur-Măssinăɣ, ămoosăn tiyyăt tawset, ohărăn iket-dăɣ-năsăn d-Ɣisa Ălmasex ărkăwăl wa s-ătwăjjăn isălan-net dăɣ-Ălĕnžil. 7Năkk-i, ij'-ahi Măssinăɣ s-tărna n-ănnuɣmăt-net akli-net, wa ixaṭṭăbăn isălan n-Ălĕnžil, 8năkk-i n-adday jer-imĕššeddĕjăn, ikf'-ahi Măssinăɣ ănnuɣmăt-net i-ad-ăjăɣ i-inĕẓẓulam isălan n-tĕmɣăre n-ărrĕzăɣ wa ihăn Ălmasex, 9ăffăsărăɣ-asăn iket-dăɣ-năsăn isălan n-ĕddăraj wa s-kăla ăttunkăl iket-di dd-ixallăk Măssinăɣ ăddunya, s-ašăl-i-dăɣ, ănfalăl-dd ălmăɣna-net. 10Isălan-en, ăsnăfalăl-tăn-dd Măssinăɣ i-ad-tumas ălkănisăt ĕssĕbab wa s-lammădăn imănokalăn d-kăl-ăṣṣahăt wi ĕzzăɣnen išĕnnawăn s-tihusay d-ĕjut wa ija sărho n-Măssinăɣ. 11A-wa s-ăru t-issĕbdăd Măssinăɣ dăɣ-isălan-win-dăɣ, ămešăl-t Emăli-nănăɣ Ɣisa Ălmasex-i 12hanăɣ-ijrăwăn dăɣ-tĕssĕba n-immun wa săr-s nĕja, anmihaẓ d-Măssinăɣ s-ĕnniyăt t-iflasăn. 13A-wen-dăɣ a făl dăɣ-wăn ărheeɣ, ad-wăr hawăn-igĕddĕl aɣăna wa hannăyăɣ akuyĕd, ănn-ak, umaset-awăn a-wen ĕssĕbab n-aḍkul n-iɣăfawăn-năwăn. 14A-wen-dăɣ a făl rakkăɣăɣ dat-Abba i-ad-t-ădĕlăɣ, 15ĕnta-i s-wăr t-illa ejădăš iwarăn išĕnnawăn wăla ăkall s-wădden iɣarr isĕm-net, 16tĕddalăɣ-t ĕnta-i s-irzăɣ ănnuɣmăt-net, wăr t-illa a-s wădden ill'-e jĕnnĕj-s i-ad-kăwăn-isĕṣṣuhĕt dăɣ-iman-năwăn s-tărna n-Unfas-net, 17ikĕn immun s-Ălmasex antum dăɣ-ulhawăn-năwăn, tĕknĕm daɣ anmărh jer-iman-năwăn, 18tudabem kăwăneḍ d-imĕššeddĕjăn iket-năsăn ujreh n-tărha-net-i-dăɣ măqqărăt: tărha daɣ jat tăhhĕrut d-tĕššĕjrĕt d-aḍkul d-atrĕjji-i-dăɣ s-wăr t-illa făw a tăt-madăn-iktĕl. 19Tĕddalăɣ Măssinăɣ i-ad-tĕknĕm ujreh n-tărha n-Ălmasex-i-dăɣ măqqărăt tojărăt a-wa s-ăddoobăt eɣăf n-ăgg-adĕm ad-t-dd-isăɣlĕy, iḍney Măssinăɣ ulhawăn-năwăn s-a-wa iḍnăy wa-net. 20Măssinăɣ-i ăddoben ad-ăj a ojărăn a-wa s-ăddooben iɣăfawăn-nănăɣ utăr-net d-azĕnnĕzjĕmi dăɣ-s, ĕnta-i ăddooben ad-hanăɣ-idhĕl s-tărna-net ta simrumirăt ulhawăn-nănăɣ, 21tumaset tĕmmal ti-net dăɣ-ălkănisăt, d-dăɣ-tĕssĕba n-Ɣisa Ălmasex hărkuk. Amin!

will be added

X\