Kăl-Ifăsus 2

1Kăwăneḍ ibda, tămmum dat-Măssinăɣ, a-wa-dăɣ hawăn-jăn ălɣibăn-năwăn d-ibăkkaḍăn-năwăn. 2Tăttilălăm ăzzăman-en a-wa făll-tĕgl' ăddunya, tamašalăm a-wa fălla-wăn irha Iblis-i ăminakălăn făll-alšinăn-i ĕllăynen, ămiinakăl daɣ făll-inămašrayăn wi n-imĕffellĕgăn. 3Ăddinăt-win-dăɣ, kăla dăɣ-săn năḍḍin năkkăneḍ-dăɣ, nĕlkam ɣas i-derhanăn wi lăbasnen n-tiɣĕswen-nănăɣ d-erk inĕzjam-nănăɣ; ăssiitbăt a-wen tumast-nănăɣ n-kăl-ăddunya wăren ĕẓley d-imidiwăn-năsăn. Wăr hin-ăqqima ɣas ar ad-fălla-năɣ dd-izĕzzubbĕt Măssinăɣ aḍkăr-net s-ĕmmĕk wa s-t-dd-mad-izĕzzubĕt făll-ăddinăt wi iyyăḍnen t-wăren ăksuḍ. 4Măšan Măssinăɣ, măqqăr tăhanint-net, ij'-anăɣ tărha-i-dăɣ măqqărăt, 5s-hărwa nămmut dat-Măssinăɣ, a-wa-dăɣ hanăɣ-jăn uḍlemăn-nănăɣ, ăssodăr-anăɣ năkkăneḍ hakd Ălmasex ed ănnuɣmăt-net a kăwăn-iɣallăsăn. 6Dăɣ-tĕssĕba n-Ɣisa Ălmasex-en-dăɣ a făl hanăɣ-dd-issĕnkăr Măssinăɣ năkkăneḍ hakd ĕnta jer-inĕmmuttan, ăsnăɣăym'-anăɣ dăr-s dăɣ-išĕnnawăn. 7A-wen, ij'-e dăɣ-milɣaw-net i-ad-ĕlmĕdăn ăddinăt făll-tĕmɣăre, d-ĕjut n-ănnuɣmăt wa ihăn Ɣisa Ălmasex s-wăr-ilkem ad-istak. 8Ănnuɣmăt n-Măssinăɣ ăddewăn d-immun săr-s a iɣallăsăn; a-wen, wădden ăgg-adĕm a dd-ifal, ihuk n-Măssinăɣ a ămoos. 9Wăr t-jărrĕwăn imărkedăn ămešăl ăwadĕm i-ad-wăr-itĕbărij wăl' iyyăn. 10Măssinăɣ a dd-ifăl a-wen, ĕnta a hanăɣ-dd-ixlăkăn s-tihusay s-tărna n-Ɣisa Ălmasex i-ad-nudabăt amišĕl n-imărkedăn wi s-ăru d-tăn-dd-ăsmăjnăt Măssinăɣ i-ad-tăn-nămašăl. 11A-wen-dăɣ a făl ămăra, wăr hin-tĕttĕwăm a-s kăla tămoosăm inĕẓẓulam, jannen-awăn kăl-Ălyăhud-i ɣur-ămoos amili hărăt: "Ǝd-kărămelăy", kud-dăɣ, amili-en, wăr-ămoos ar hărăt n-tamĕnkiḍt dd-inakkăḍ ăwadĕm s-ăfuss-net dăɣ-taɣĕssa. 12Ăzzăman-en-hi, wăr t-illa a toharăm d-Ălmasex, wăr t-illa a tăssirtăyăm d-tamĕtte ta n-kăl-Iṣrayil, wăr toherăm dăr-săn ărkăwăl wăla ărkăwălăn n-tassaɣt wi hasăn-ătwăjjăn, wăla ăṭṭăma n-Măssinăɣ dăɣ-ăddunya wăla dăɣ-ălaxărăt. 13Ǝnta-den-dăɣ a-wa dăɣ-wăn ijan măšan, ašăl-i-dăɣ, kăwăneḍ-i s-kăla tujĕjăm, ăẓẓehăẓ-kăwăn-dd Măssinăɣ iman-net s-ašni wa n-Ălmasex inɣălăn, tosăɣăm d-Ɣisa Ălmasex. 14Ǝnta-en-dăɣ a-s ălxer-nănăɣ, ĕnta-i issărtăyăn kăl-Ălyăhud d-inĕẓẓulam, ămoosnen ihĕnnin, sănatăt tiwsaten, ij'-en iyyăn n-ăwadĕm, ikkăs-in jere-săn ajăzzar wa ikkăn jere-săn ed ikfa taɣĕssa-net ašăl wa d-ămmut i-ad-hin-ănd ăɣalla wa tăn-ibḍăn. 15Tamăttant-ten-dăɣ ija a-s hin-issĕmdă a-wa hin-ăba dăɣ-a-wa innă alămăr wa n-ănnăbi Mosa dăɣ-isălan n-a-wa xălalăn d-a-wa xăramăn. Issărtăy ămăra kăl-Ălyăhud d-inĕẓẓulam, imăl-t ălxer jere-săn i-ad-umasăn făll-ĕssin-essăn tiyyăt tawset dăr-s tosaɣăt, 16ăẓmăẓăl ăddinăt d-Măssinăɣ d-jer-iman-năsăn s-tamăttant ta ija făll-tajĕttewt, ij'-en tiyyăt taɣĕssa i-ad-ăbas t-illa anmĕkšar jere-săn. 17Ɣisa Ălmasex, ašăl wa dd-osa, osă-dd i-ad-ixṭĕb isălan n-Ălĕnžil-i hawăn-ih' ălxer kăwăneḍ-i n-inĕẓẓulam-i ănimăjjăjnen d-Măssinăɣ hakd-dăɣ kăl-Ălyăhud-i săr-s dd-ĕllanen; 18ĕnta-en-dăɣ a ikfăn Unfas iyyăn Šăddijăn i-kăl-Ălyăhud hakd inĕẓẓulam i-ad-ĕjrĕwăn tabarăt s-Abba. 19Ămăra, ăbas tămoosăm imăjarăn wăla ăddinăt ĕzzaɣnen ăkall wăr len, tohărăm ăkall d-imĕššeddĕjăn, tămoosăm d-ăgg-ehăn wa n-Măssinăɣ, 20tolăhăm d-ibĕlɣan n-tihun wi s-ikrăs ehăn dăɣ-a-s ăssas n-ehăn-en, a-wa ăxṭăbăn inĕmmušal d-ănnăbităn a t-ămoosăn; Ɣisa Ălmasex iman-net a-s tăhunt n-ehăn ta n-aɣmăr făll-idăy ehăn iket-net. 21Ɣisa-en-dăɣ a făl ănimăṭṭăfnăt tihun ti s-ikrăs ehăn i-ad-wăr t-isiḍĕw hărăt, ogdăh iket-net, itimɣar i-ad-umas ehăn-en, ehăn šăddijăn dăɣ-izzaɣ Emăli. 22Kăwăneḍ daɣ-i n-imumĕnăn, tănimăṭṭăfăm dăr-s, i-ad-tumasăm ehăn dăɣ-izzaɣ Măssinăɣ s-Unfas-net.

will be added

X\