Kăl-Ifăsus 1

1A-wa năkk, Bulĕs, wa ija erhet n-Măssinăɣ ănămmašul n-Ɣisa Ălmasex hin-iktabăn i-imĕššeddĕjăn wi ăɣdălnen s-Ɣisa Ălmasex ĕzzăɣnen aɣrĕm wa n-Ifăsus. 2Ăhuulăɣ-kăwăn-in, ikf'-iwăn Măssinăɣ-i n-Abba-nănăɣ d-Emăli Ɣisa Ălmasex ănnuɣmăt d-ălxer. 3Tĕmmal i-Măssinăɣ-i n-Abba n-Emăli-nănăɣ Ɣisa Ălmasex-i fălla-năɣ dd-ăzzăbben s-tărna n-Unfas-net e d t-illăm ărrăxmăt ihan išĕnnawăn itatăjrawăn ɣur-Măssinăɣ dăɣ-idĕm n-Ălmasex. 4Măssinăɣ a hanăɣ-ăsnăfrănăn hărwa wăr dd-tăxlek ăddunya i-ad-numas data-s dăɣ-tĕssĕba n-Ălmasex imĕššeddĕjăn, wăr-iwer uḍlem wăl' iyyăn. 5Dăɣ-tĕssĕba n-tărha ta hanăɣ-ija a făl iɣtăs dăɣ-tihusay n-erhet-net s-ad-numas aratăn-net dd-ija s-iman-net dăɣ-idĕm n-Ɣisa Ălmasex. 6Ămăra, namĕlet-t dăɣ-tĕssĕba n-tĕmɣăre n-ănnuɣmăt-net-wa hanăɣ-ikfa bănnan dăɣ-ăddimmăt n-Wa ikna tărha. 7Tădarfit ta hăt ašni n-Rure-s, wa inɣălăn a hanăɣ-ijrăwăn tenăšše n-ibăkkaḍăn, ăzzăbbăt-dd fălla-năɣ ărrĕzăɣ n-ănnuɣmăt-net ed, 8ăsnăflăy-anăɣ dăɣ-a-wen s-sărho d-tayĕtte ta hanăɣ-ikfă i-ad-nĕjrăh erhet-net. 9Iffĕssăr-anăɣ-dd ĕddăraj n-erhet wa s-dd-ăsnăfalăl ălmăɣna-net ašăl-i-dăɣ: a-wen, a t-ămoosăn ăddăbara ăhuusken s-ăru d-t-issĕbdăd Măssinăɣ, 10innă afăl dd-ăddewăn ăzzămanăn har dd-osa wa n-Ălmasex, ad-dd-isĕdĕw a-wa ihăn išĕnnawăn d-ăkall, imnukĕl fălla-s. 11Dăɣ-tĕssĕba-net ĕnta-en-dăɣ d-a-wa hanăɣ-ikittĕw a făl ăru, hărwa wăr t-illa făw a dd-ixlakăn, ad-iɣtăs Măssinăɣ s-ad-hanăɣ-isĕnnĕfrĕn dăɣ-erhet-net wa issĕbdăd. 12Adiš, namĕlet ălxurmăt n-a-wa hanăɣ-ija Măssinăɣ, năkkăneḍ-i jărnen ăṭṭăma-nănăɣ s-tizarăt dăɣ-Ălmasex. 13Ǝnta-den-dăɣ a-wa jăm kăwăneḍ-dăɣ, ed tĕslăm i-tidĕt ta ămoos Ălĕnžil-i iɣallăsăn, tomănăm săr-s, jăm a-wen ɣas, iššĕšwăl-kăwăn s-Unfas Šăddijăn-i s-hawăn-ijjăš ărkăwăl-net. 14Unfas Šăddijăn a-s ăḍḍimmana n-tăkasit ta hanăɣ-itwăr Măssinăɣ. Ijjăš-anăɣ ărkăwăl n-a-s ašăl wa dd-e-isĕmdĕw săr-năɣ tădarfit-net, ad-ăj jer-ifassăn-nănăɣ imraš wi ăhuuskătnen hanăɣ-itwăr, a-wen-dăɣ a făl, namĕlet ălxurmăt n-Măssinăɣ. 15Dăɣ-isălan n-a-wen-dăɣ, a făl năkk-dăɣ, ĕjjăšăn-ahi isălan n-immun-năwăn s-Emăli Ɣisa d-tărha ta săknem imĕššeddĕjăn, 16ad-t-tĕddalăɣ hak ašăl, tumayăɣ-as dăɣ-tĕssĕba-năwăn. 17Tĕddalăɣ Abba n-Emăli-nănăɣ Ɣisa Ălmasex, ĕnta-i t-illăn jĕnnĕj-hărăt iket-net i-ad-kăwăn-ăkf sărho, isĕnnĕfilĕl-dd-hawăn iman-net i-ad-t-tĕknĕm muzĕyăt, 18isĕmmĕlĕwlĕw ulhawăn-năwăn s-ănnur-net i-ad-tĕkkĕsăm ăššăk dăɣ-ăṭṭăma wa kăwăn-ăsjăr a-s kăwăn-dd-iɣră s-iman-net, tĕlmĕdăm daɣ făll-tĕmɣăre n-tăkasit ta s-irha ad-hawăn-tăt-uẓan kăwăneḍ d-imĕššeddĕjăn, 19d-tĕmɣăre n-tărna ta s-wăr t-illa a dăr-togdăh ihăkk imumĕnăn s-a-wa dăr-ogdăh ăṣṣahăt-net, tădabit-net d-tărna-net. 20Tărna-ten-dăɣ, ăšmašăl-tăt-dd s-ăṣṣahăt ašăl wa dd-issĕnkăr Ălmasex jer-inĕmmuttan tĕzzar, ăsɣăym'-e daw-aɣil-net dăɣ-išĕnnawăn, 21jĕnnĕj-e d t-illăm ănjălos, d-e d t-illăm ămănokal, d-e d t-illăm hărăt ilan tărna dăɣ-išĕnnawăn, d-e d t-illăm amănay; ăssajăr isĕm-net e d t-illăm isĕm itawăɣren dăɣ-ăddunya hakd-dăɣ e d t-illăm isĕm s-ilkam ad-dăɣ-s ătiwăɣra. 22Ija hărăt iket-net daw-iḍarăn-net, ij'-e eɣăf n-ălkănisăt iket-net-i 23tămoosăt taɣĕssa ta dăɣ-izzăɣ ĕnta-i dd-ăsnăfalălăn Măssinăɣ-i ilsăn ăkall s-ălmăɣna imdan.

will be added

X\