Kăl-Kulĕs 3

1Šămad tidĕt-dăɣ a-s toharăm d-Ălmasex tanăkra ta dd-ija jer-inĕmmuttan, adiš, ĕmmăɣăt i-a-wa hawăn-itwăr Măssinăɣ dăɣ-išĕnnawăn-i dăɣ-ăqqiima Ălmasex, ămiinakăl daw-aɣil n-Măssinăɣ, 2ăɣlĕbnet-kăwăn hărătăn-win-dăɣ hănen išĕnnawăn, tĕyyĕm fălla-wăn azĕnnuzjĕm dăɣ-wi n-ăddunya. 3Kăwăneḍ, ɣur-ašăl wa d-tomănăm s-Ɣisa Ălmasex, tămoosăm šund ăddinăt ămmuutnen dăɣ-isălan n-a-wa făll-tĕgl' ăddunya, tămudre ta tăynayăt tĕjrăwăm, toohar d-ta n-Ălmasex atunkĕl ɣur-Măssinăɣ. 4A-wen-dăɣ a făl ašăl wa dd-mad-infilĕl Ălmasex-i ămoosăn tămudre-năwăn, ad-dăr-s dd-tĕmzĕyyim anfilĕl dăɣ-ălxurmăt-net. 5Tĕssĕba n-a-wen-dăɣ a făl dăɣ-wăn ărheɣ ad-tĕbḍĕwăm d-erk imojjan-năwăn iket-dăɣ-năsăn, ĕbḍĕwăt d-a-wa isamăḍasăn tiɣĕswen-năwăn d-iba n-tĕšĕdje d-derhan dărɣalăn d-derhan ăsisakăyăn, tărha n-hărăt-i wărăt tĕẓley d-ălɣibadăt n-ăṣṣănămăn. 6Tĕssĕba n-hărătăn-win-dăɣ a făl dd-izizĕbbut Măssinăɣ ăššar-net ((făll-ăddinăt wi has-ănimăšrăynen)). 7Hărătăn-win-dăɣ a-s kăla tăn-tamašalăm kăwăneḍ-dăɣ a-s tĕṭṭafăm tămudre-ten-dăɣ 8măšan, ămăra, ĕbḍĕwăt dăr-săn iket-dăɣ-năsăn, wăr tăn-tolesăm amišĕl. Ăyyăt fălla-wăn aḍkăr d-tukĕse n-ulh d-tăllăbăst d-tiẓmiten, wăr săfălɣaɣăt, 9wăr tinmĕnnit bahu jer-iman-năwăn kăwăneḍ-i ĕbḍănen d-tasna-năwăn ta-dăɣ ănniihăḍ abăkkaḍ d-timašalen-net, 10ed ămăra, tĕlsăm tasna ta tăynayăt-i s-Măssinăɣ-i n-Ămaxlak-nănăɣ a hawăn-tăt-ikfăn, isaynay-tăt daɣ hărkuk dăɣ-tĕssĕba n-ad-t-tĕknĕm muzĕyăt, talĕhĕm dăr-s. 11Dăɣ-tasna ta-hi tăynayăt, wăr-iẓley wa n-Ălyunan d-wa n-ăgg-Ălyăhud; wăr-iẓley wa ămelăyăn d-wa wărăn ămelăy; wăr-iẓley wa n-ănăẓẓalim d-wa n-ălžahil; wăr-iẓley elăll d-akli, ăbas t-illa ar Ălmasex, ĕnta a-s hărăt dăɣ-hărăt iket-net. 12Šămad ăddinăt ăsinăfrăn Măssinăɣ a tămoosăm, ij'-iwăn imĕššeddĕjăn s-tĕtbat tărha ta hawăn-ija, adiš, nĕmĕḍḍĕnăt tăhanint kăwăneḍ-dăɣ jer-iman-năwăn, tĕnmĕdhĕlăm jer-iman-năwăn, isărĕset hak iyyăn iman-net dat-amidi-net, iẓadăt jer-iman-năwăn, tĕnmĕẓĕẓẓĕydărăm, 13tĕnmĕšmărăm, tĕnmĕnšĕm jer-iman-năwăn; ere s-iɣšăd ă/n/na-s hărăt-dăɣ, ănšet-as-in s-ĕmmĕk wa s-hawăn-inša Emăli. 14Ăjăt jĕnnĕj-a-wen-dăɣ iket-net anmărh imdan jere-wăn ed ĕnta a dd-itiirĕwĕn tartit tĕmdat. 15Ăyyăt ălɣafyăt wa ihăkk Ălmasex ad-ănnăhăḍ dăɣ-ulhawăn-năwăn ed ĕnta a kăwăn-dd-iɣrăn s-ălɣafyăt-wen-dăɣ, issărtăy-kăwăn i-ad-tumasăm tiyyăt taɣĕssa, tumayăt i-Măssinăɣ. 16Ijatet măjrăd wa n-Ălmasex jere-wăn s-sărho, tĕnmĕkfĕm tayĕtte, tĕnmĕkkĕsăm dăɣ-taɣdărt s-sărho imdan, tamĕlăm Măssinăɣ s-ulhawăn ĕmdanen, tumayăm-as s-tĕmmalen dd-ĕzjarnen ĕlkĕttab wa n-Ăẓẓăbur d-tĕmmalen janen făll-tuksĕḍa n-Măssinăɣ d-isuhaɣ dd-oraw săr-wăn Unfas Šăddijăn i-ad-săr-săn tamĕlăm Măssinăɣ. 17A jănnem d-a tajjăm-dăɣ, ăjăt-t dăɣ-derhan n-ad-sĕmɣărăm isĕm n-Emăli Ɣisa dăɣ-a-s tumayăm i-Abba Măssinăɣ dăɣ-tĕssĕba n-isĕm wa n-Ɣisa. 18Tiḍeḍen! Sărĕsmăt iman-năkmăt dat-meddĕn-năkmăt s-a-wa ănihăjjăn ed a-wen-dăɣ a ijraẓăn i-Emăli. 19Meddĕn! Ărhet hak iyyăn dăɣ-wăn hănne-s, wăr tĕssĕsmămăm fălla-snăt. 20Aratăn! Săjdăt i-imărawăn-năwăn dăɣ-hărăt iket-net ed a-wen-dăɣ a ijraẓăn i-Emăli. 21Abbatăn! Wăr tăẓẓăkănẓărăm aratăn-năwăn i-ad-wăr fălla-wăn wăr-ănxesăn iman-năsăn. 22Eklan! Săjdăt i-wi kăwăn-lănen dăɣ-ăddunya-ta-dăɣ dăɣ-hărăt iket-net, wădden dihad kăwăn-hannăyăn ɣas dăɣ-ittus n-ad-kăwăn-amĕlăn, ănn-ak, jer-hannăyăn-kăwăn wăla, ăknăt ĕššăɣĕl-năwăn s-ulh ijlayăn dăɣ-tuksĕḍa n-Emăli. 23Ǝššăɣĕl hăm-dăɣ, ăjăt-t s-ĕnniyăt imdan šund Emăli a-s tăxdamăm wădden dăgg-adĕm, 24ălhăk wa s-ilkam ad-t-tĕjrĕwăm, itwar-awăn-t Emăli dăɣ-išĕnnawăn. Ălmasex a-s Emăli, umasăt eklan-net 25făl-a-s, ere iɣdărăn dăɣ-a-wa iha, ilkam dăɣ-s ad-ijrĕw ălxaqq n-taɣdărt-net ed Măssinăɣ ya, wăr-iẓley ăddinăt.

will be added

X\