Kăl-Kulĕs 2

1Ayĕtma-ɣ, ărheeɣ ad-tĕssanăm făll-eẓăwe wa ija amjăr wa heɣ fălla-wăn, kăwăneḍ d-kăl-Lăwdisa, d-ăddinăt wi iyyăḍnen s-wăr kăla ĕnhăyăn idĕm-in. 2A-wa heɣ, heɣ-t fălla-săn ĕntăneḍ-dăɣ i-ad-ismaḍăn ulhawăn-năsăn, tasăɣăm dăɣ-tărha s-iyyăn n-ĕnniyăt, ĕnnuflĕyăn dăɣ-ărrĕzăɣ n-ănnuɣmăt n-Măssinăɣ, ăkf'-en musnăt imdan i-ad-udaben ujreh n-ĕddăraj n-Măssinăɣ wa s-kăla ăttunkăl s-ašăl-i-dăɣ ănfalăl-dd ălmăɣna-net; a-wen a t-ămoosăn Ălmasex. 3Ǝnta-en-dăɣ a ɣur-dd-imdă ărrĕzăɣ wa n-sărho hakd-dăɣ tayĕtte. 4A-wa, janneɣ-awăn-t i-ad-wăr kăwăn-isĕswid ăwadĕm wăl' iyyăn s-tăẓude n-ilĕs 5făl-a-s, kud-kăwăn-ujĕjăɣ dăɣ-taɣĕssa-nin-dăɣ, ărtayăɣ dăr-wăn s-ĕnniyăt-in ed tartit ta tăhuusket jăm jer-iman-năwăn d-antum wa ija immun-năwăn dăɣ-tassaɣt d-Ălmasex, ij'-ahi asĕddĕwi wa făl săr-i, šund ɣas, ĕlleɣ-t ɣur-wăn, hannăyăɣ-kăwăn. 6Ămăra, ayĕtma-ɣ, šămad tidĕt-dăɣ a-s tărḍam s-Emăli Ɣisa Ălmasex, adiš, ăjăt-as alkum itbatăn. 7Ăjet alkum-năwăn-has antum wa tăjjăn ikewăn n-ahĕšk dăɣ-ăkall, umaset asĕɣăr wa tĕjrăwăm a ăsiṣahen immun-năwăn dăɣ-a-s tăsidăwăm a-wen hărkuk d-tămayit. 8Agĕẓăt iman-năwăn, wăr kăwăn-isăswadet ăwadĕm wăl' iyyăn s-tiddas n-fălṣăfa dd-ikkas dăɣ-eɣăf-net wăla s-bahutăn ăsihătălnen făll-agna dd-ĕknan dăgg-adĕm i-iman-năsăn, wăla s-a-wa făll-tĕgl' ăddunya, a-s ija a-wen, wăr t-illa a osaɣ a-wen d-Ălmasex. 9Wăr hasăn-tăsjădăm. Măssinăɣ, a-wa ămoos, ăsbayăn-anăɣ-t-dd iket-net dăɣ-Ɣisa Ălmasex. 10A-wen-dăɣ a făl, a hin-toḍănăm-dăɣ, ill'-awăn-t ɣur-Ălmasex-i ăminakălăn făll-imĕṣṣuha d-imărnan iket-dăɣ-năsăn. 11Ǝnta-en-dăɣ a ɣur-tĕjrăwăm amili ăynayăn wărăn oleh d-wa tăjjăn ifassăn n-dăgg-adĕm, ed amili wa s-Ălmasex iman-net a t-itajjăn i-inĕṭṭulab-net, ălmăɣna-net a-s, ad-tĕjrĕwăm tărna făll-abăkkaḍ, tĕkrĕšăm ašăl făll-erk imojjan-năwăn. 12Kăwăneḍ daɣ i omănnen s-tărna n-Măssinăɣ ta dd-tĕssĕnkărăt Ɣisa jer-inĕmmuttan, ĕlmĕdăt a-s atwĕsĕlmaɣ wa tătwăjjăm dăɣ-aman, ălmăɣna-net a-s tohărăm dăr-s tamăttant. Aẓĕnjăẓ daɣ wa dd-jăm ḍarăt alămaɣ-năwăn dăɣ-aman, ălmăɣna-net a-s tohărăm d-Ălmasex tanăkra ta dd-ija jer-inĕmmuttan i-ad-dăr-s tărtĕyăm. 13Kăwăned-i s-ibda jan-kăwăn erk ijităn-năwăn šund inĕmmuttan dat-Măssinăɣ, ăsisalăhăn-kăwăn d-inĕẓẓulam wăren ămelăy; ašăl-i-dăɣ, dăɣ-idĕm n-Ălmasex, issĕnkăr-kăwăn-dd Măssinăɣ dăɣ-tamăttant, ikf'-iwăn tămudre tăynayăt; inš'-anăɣ năkkăneḍ hakd kăwăneḍ ibăkkaḍăn-nănăɣ. 14Ălkaḍ wa itwărăn s-ĕnta a făl ĕktabăn uḍlemăn-nănăɣ dăɣ-isălan n-anmĕšri-nănăɣ i-fărĕḍăn d-alămăr n-Măssinăɣ, omăs-t-in Ɣisa, ikkăs-t-in s-iyyăt s-tărna n-atwĕṣlĕb wa ătwăjja făll-tajĕttewt. 15Ăzzăman wa d-ămmut Ɣisa făll-tajĕttewt, ikrăš tărna făll-imĕṣṣuha d-imărnan, ikšăf-tăn dat-tiṭṭawen n-ăddunya iket-net, ija iɣunan dăɣ-errawăn-năsăn, iwăt-tăn data-s. 16A-wen-dăɣ a făl wăr kăwăn-isăwaret ăwadĕm wăl' iyyăn uḍlem dăɣ-isălan n-a-wa tăttăm wăla a-wa săssăm; dăɣ-isălan n-ašăl n-ămudd s-wăr tĕlkemăm, wăla dăɣ-iba n-uḍĕf n-tebădde n-orăn; wăla dăɣ-isălan n-ašăl n-ĕssĕbĕt-i n-tăsonfat s-wăr tĕlkemăm. 17Hărătan-win-dăɣ iket-dăɣ-năsăn, taliwen n-a dd-imalăn a ămoosăn. Ămăra tidĕt ĕnta tosă-dd, a tăt-ămoosăn, Ălmasex. 18Wăr toyyem ăwadĕm wăl' iyyăn isilĕbbuḍăn taɣĕssa-net, ălmăt ĕmmĕk-wen-dăɣ a-s isaras iman-net dat-Măssinăɣ, wăla i iɣabbădăn ănjălosăn, ija dăɣ-wăn tasăja făl-a-s innin itajj a wăr tĕjjĕm. Ăddinăt wi išillĕw a-wen, sakafăn iman-năsăn, jannen s-bahu a-s a-wa tăn-išlăn, Măssinăɣ a hasăn-t-dd-ăsnăfalălăn dăɣ-tăharjit, wăr hasăn-tăsjădăm făl-a-s inĕzjam-năsăn, wăr-ĕglen ar făll-a-wa făll-tĕgl' ăddunya. 19Ăddinăt-en, wăr-ănmăṭṭafăn d-Ălmasex-i ămoosăn eɣăf-wa ihakkăn taɣĕssa a-wa s-tămiɣatăr, ĕnta-en-dăɣ a-s ĕssĕbab n-tassaɣt ta t-tĕllăt jer-izĕmmuz d-aẓarăn, isadwal-tăt Măssinăɣ s-ĕmmĕk wa s-irha. 20Šămad ămăra, toharăm d-Ălmasex tamăttant dăɣ-isălan n-a-wa făll-tĕgl' ăddunya, mafăl tĕyyĕm dăgg-adĕm sawarăn-kăwăn fărĕḍăn wi tĕggarnen ăddinăt ĕglanen făll-a-wa făll-tĕgl' ăddunya? 21Jannen-awăn: "He kăwăneḍ, wăr tĕḍkelăm hărăt wa, i lăbasăn; wăr tăkrăbbem hărăt-wĕdi, ixăramăn; wăr ḍesăm hărăt-wen, wăr-oleɣ", 22jannen a-wen-dăɣ a-s ija a-wen hărătăn-win-dăɣ iket-dăɣ-năsăn, wădden wăla a ĕnḍărrăn ed wăr t-illa a ĕnfan afăl išwăr ikš'-en ăwadĕm. Ḍarăt-a-wen daɣ, fărĕḍăn-win-dăɣ, wăr-ămoosăn ɣas ar a saɣren dăgg-adĕm, wădden Măssinăɣ a dd-falăn. 23Ădduuttăt a-s fărĕḍăn-ĕnnin-dăɣ, ănifăqqăn d-a isawaḍăn sărho făll-ăgg-adĕm, ăssiiktăn-dd ălɣibadăt dd-ifalăn ulh d-asiinĕn n-taɣĕssa d-tanhaḍt dăɣ-s măšan, wăr t-illa a-s ĕnfan ăgg-adĕm irhan ad-ikrĕš tărna făll-erk derhanăn wi ănnihăḍnen dăɣ-taɣĕssa-net.

will be added

X\