Kăl-Kulĕs 1

1A-wa năkk, Bulĕs, wa ija erhet n-Măssinăɣ ănămmašul n-Ɣisa Ălmasex. Ăhuulăɣ-in năkk d-ă/n/na-ɣ dăɣ-ăddin wa s-isĕm-net Timoti 2ayĕtma-năɣ wi n-imĕššeddĕjăn n-imaɣdalăn dăɣ-tassaɣt d-Ălmasex ĕzzăɣnen aɣrĕm wa n-Kulĕs. Ikf'-iwăn Abba-nănăɣ Măssinăɣ d-Emăli Ɣisa Ălmasex ănnuɣmăt-net d-ălxer-net. 3Wăr kăla hanăɣ-okăy ašăl d-wăr nămmoy i-Măssinăɣ-i n-Abba n-Emăli-nănăɣ Ɣisa Ălmasex dăɣ-tittar ti has-nĕtăjj dăɣ-tĕssĕba-năwăn. 4Nĕtumay-as hak ašăl făl-a-s, osăn-anăɣ-dd isălan n-immun wa jăm s-Ɣisa Ălmasex d-tărha ta n-tidĕt jăm i-imĕššeddĕjăn. 5A-wen, jăm-t ed tĕssanăm făl ăṭṭăma wa kăwăn-ăsjăr Măssinăɣ-i ihăn išĕnnawăn. Ăṭṭăma-en, măjrăd wa n-tidĕt ămoos Ălĕnžil a hawăn-t-issĕslăn, tomănăm săr-s. 6Ălĕnžil daɣ wa s-kăwăn-in-ĕwwăḍăn isălan-net, ĕmmĕk-wa-dăɣ s-has-tĕslăm a-s titwĕjjin isălan-net dăɣ-ăddunya iket-net, jarrăwăn ăddinăt tămudre ta tăɣlălăt dăɣ-tĕssĕba-net. Ǝmmĕk-wen-dăɣ daɣ s-takkăn isălan-en s-data ɣur-wăn, ɣur-ašăl wa d-hasăn-tĕslăm, tĕjrăhăm ĕddĕttu wa ija ănnuɣmăt n-Măssinăɣ, ĕmmĕk-wen-dăɣ daɣ a-s tĕhhalăn s-data dăɣ-ifăyyăn n-ăkall. 7Ălĕnžil wa s-tĕslăm, issăɣr'-awăn-t Ibbafras wa n-emărh-nănăɣ dăr-nohăr ĕššăɣĕl, ĕnta-i n-ămaɣdal ixdămăn i-Ălmasex dăɣ-idăggan-nănăɣ-hawăn. 8Ǝnta-en-dăɣ a hanăɣ-ijăn isălan n-tărha ta dd-iššĕnšăr Unfas Šăddijăn dăɣ-ulhawăn-năwăn. 9Tĕssĕba n-a-wen-dăɣ a făl năkkăneḍ-dăɣ, ɣur-ašăl-i-dăɣ d-hanăɣ-ĕjjăšăn isălan-năwăn-dăɣ, wăr kăla năssunfa dăɣ-tamădilt n-Măssinăɣ-hawăn, nĕtattăr dăɣ-s ad-kăwăn-ăkf musnăt imdan n-erhet-net, ăkf'-iwăn daɣ s-tărna n-Unfas Šăddijăn sărho d-ujreh iket-net 10i-ad-tĕlmĕdăm ĕmmĕk wa s-ăniihăjja ad-săr-s tĕlkĕmăm i-Emăli, tĕjrĕẓăm-as dăɣ-hărăt iket-net. Dihen, ad-tĕkrĕšăm ănnuɣ n-imărkedăn iket-năsăn, tĕhĕlĕm daɣ s-data dăɣ-tĕmĕzzuyt n-Măssinăɣ, 11tĕṣṣuhum s-tărna n-ălxurmăt-net, tudabem tebădde dăɣ-hărăt iket-net s-taẓidert tăddeewăt d-tedăwit. 12Dăwătăt, tumayăm i-Abba-i kăwăn-ikfăn turhajăt n-ad-tĕjjĕšăm ănnur-net, tahĕrĕm d-imĕššeddĕjăn tăkasit ta hasăn-itwăr dăɣ-Tĕmmĕnĕya-net. 13Măssinăɣ, ohăɣ-anăɣ-dd dăɣ-tărna n-tihay n-Iblis, iwwăy-anăɣ s-Tĕmmĕnĕya n-Rure-s wa ikna tărha. 14Idĕm n-Rure-s-en-dăɣ a dăɣ-dd-nĕjrăw ĕllĕllu dăɣ-tišĕm n-Iblis d-tenăšše n-ibăkkaḍăn. 15Măssinăɣ, wăr-itĕtwĕnhiy, a-wa ămoos iket-net, itawănhay dăɣ-Ɣisa Ălmasex-i n-Rure-s-i t-illăn hărwa wăr t-illa a t-illan. 16Tĕssĕba n-tărna-net ĕnta-en-dăɣ a dăɣ-dd-ixlăk Măssinăɣ hărăt iket-net, jer-a-wa ihăn išĕnnawăn wăla a-wa iwărăn ăkall, a-wa ilăn mănhoy hakd a-wa t-wărăn ila; imănokalăn, imănnăhăḍăn, imĕṣṣuha, imărnan, wăr t-illa a-s wădden ĕnta a t-dd-ixlăkăn, ĕnta daɣ a-s dd-ixlăk. 17Ǝnta a dd-ăzzarăn i-hărăt iket-net, ĕnta daɣ a iṭṭafăn tămudre n-hărăt iket-net. 18Ǝnta a-s eɣăf n-taɣĕssa ta tămoos ălkănisăt, ĕnta a issĕnsăn itabbăn n-ăddunya, ĕnta a dd-ăzzarăn tanăkra jer-inĕmmuttan i-ad-wăr-itilĕs tamăttant, umas ămizăr dăɣ-hărăt iket-net. 19Făl-a-s, ijrăẓ i-Măssinăɣ, ad-izzăɣ s-a-wa ămoos iket-net dăɣ-Rure-s Ɣisa. 20Ǝnta a dd-ija Măssinăɣ ĕssĕbab i-ad-iẓĕmmĕẓĕl d-iman-net a-wa t-illăn iket-net, jer-a-wa izzăɣăn išĕnnawăn wăla a-wa izzăɣăn ăkall; ašni n-Ɣisa wa inɣălăn a-s ătwăṣlăb făll-tajĕttewt a-s ĕssĕbab n-ălxer jer-Măssinăɣ d-dăgg-adĕm-i dd-ixlăk. 21Kăwăneḍ daɣ i s-ibda, jan-kăwăn erk inĕzjam-năwăn d-erk imojjan-năwăn, imăjarăn d-išĕnja n-Măssinăɣ, 22ăẓmăẓăl-kăwăn Măssinăɣ ămăra-dăɣ d-iman-net s-tamăttant ta ija Rure-s a-s dd-ămoos ăgg-adĕm făll-ărori n-ăkall. A-wen, ij'-e dăɣ-tĕssĕba n-ad-tudabem tebădde data-s šăddijăm, wăr kăwăn-iwer ălɣib wăl' iyyăn, wăr t-illa daɣ uḍlem kăwăn-iwarăn. 23A-wen, ad-itbĕt afăl wăr dd-tărẓem dăɣ-immun-năwăn, tĕknĕm antum dăɣ-s i-ad-wăr kăwăn-ăsnămăjjăj hărăt wăl' iyyăn d-ăṭṭăma wa kăwăn-ăsjărăn isălan n-Ălĕnžil wi s-tĕslăm; isălan-en-hi, wăr t-illa ere s-wădden, isl'-asăn. Năkk daɣ, Bulĕs, ij'-ahi Măssinăɣ ămaway n-isălan n-Ălĕnžil. 24Ayĕtma-ɣ, ămăra-dăɣ, ăsidăwăt-ahi a-wa hannăyăɣ dăɣ-tersĕmmawen fălla-wăn ed olăh săr-i d-a-s năkk -i-dăɣ a hin-isimdun ălɣizabăt wa hin-oḍăn Ălmasex; ărḍeɣ s-ahănay n-ăɣana-wen-dăɣ dăɣ-tĕssĕba n-ălkănisăt-i tămoosăt taɣĕssa n-Ălmasex. 25Ălkănisăt-en-dăɣ a-s ămoosăɣ ănaxdim ed, ikkĕllăf-ahi Măssinăɣ dăɣ-turhajăt-net d-ad-kăwăn-săɣrăɣ s-ujreh măjrăd-net iket-net, 26sĕlmĕdăɣ-kăwăn s-ĕddăraj wa s-kăla ăttunkăl iwĕtyan făll-iwĕtyan i-ăddunya iket-dăɣ-net măšan, ašăl-i-dăɣ, ăsnăfalăl-t-dd Măssinăɣ i-imĕššeddĕjăn-net 27wi ăsnăfrăn i-ad-tăn-isĕlmĕd s-tĕmɣăre n-ărrĕzăɣ, d-ălxurmăt n-a-wa s-kăla t-iffăr i-tiwsaten iket-dăɣ-năsnăt. Ǝddăraj-en-hi s-ašăl-i-dăɣ ănfalăl-dd, ălmăɣna-net da: Ălmasex dăɣ-ulhawăn-năwăn, a-di, tĕjjăšăm tĕmɣăre n-ănnur n-Măssinăɣ. 28Ălmasex-en-dăɣ a-s nĕxaṭṭăb isălan-net, nĕtakkăs hak ăgg-adĕm dăɣ-taɣdărt, nĕsaɣra hak ăgg-adĕm s-sărho ilan ujreh i-ad-dd-nĕsĕbdĕd hak ăgg-adĕm iɣrad, imda dăɣ-tassaɣt-net d-Ălmasex. 29Tĕssĕba n-a-wen-dăɣ a făl ĕdgaẓăɣ dăɣ-ălxidmăt wa heɣ, ăbbiillănăɣ s-tărna ta hi-ikfa Ălmasex ed tărna-net a făl ăsifăllăɣ dăɣ-a-wa heɣ iket-net.

will be added

X\