Ijităn n-inĕmmušal 9

1Ăzzăman-en-dăɣ, a dd-iggăd Sawĕl, isamădad, isamăhaḍ, wăr t-illa anĕzjum ila săl wa n-iji n-iman n-inĕṭṭulab n-Ɣisa. Dăɣ-isălan n-a-wen-dăɣ a dăɣ-ikka ămănokal n-kăl-tikutawen 2i-ad-t-ăkf tikarḍiwen issĕknă dăɣ-ihănan n-ăddin wi n-kăl-Ălyăhud hănen Dămašăq i-ad-ijrĕw s-asĕttărmĕs n-e d t-illăm ere ăllilăn tabarăt-ten-dăɣ n-Emăli, jer-ăhalĕs wăla tamăḍt, i-ad-t-dd-awĕy dăɣ-tišĕm s-Yărussălam. 3Ăssookal Sawĕl dăɣ-a-wen a-s hin-ohăẓ aɣrĕm wa n-Dămašăq. A ĕnḍărrăn, ămlăwlăw ănnur-i-dăɣ ăṣṣoohen dd-ifalăn išĕnnawăn; 4ihă-dd oḍa, isl' ălwăqq-wen-dăɣ i-emăsli has-innăn: "Sawĕl, Sawĕl, ma kăy-orămăn săr-i tiɣĕzzĕbud-ahi?" 5Inn'-as Sawĕl: "Mi tămoosăd Emăli?" Inn'-as Emăli: "A-wa năkk Ɣisa wa tiɣĕzzĕbud, ad-hak-indăr amẓĕẓẓaj dăr-i hărkuk. 6Ămăra, ĕbdĕd, ĕjjĕš aɣrĕm wa n-Dămašăq, ad hak-itwĕnn dihen a-wa s-led s-ad-t-tĕjĕd." 7Ǝqqălăn-dd ɣas meddĕn wi ăddewnen d-Sawĕl oran imawăn, ăbas ĕssanăn a he-ĕnnĕn ed ĕslan i-emăsli-wĕnnin-dăɣ măšan, wăr t-illa ere hannăyăn. 8Ibdăd Sawĕl ḍarăt-a-wen făll-iman-net, ittăr ad-arr tiṭṭawen-net măšan, wăr t-illa a ihannăy. Ǝlwăyăn-t imidiwăn-net har dăr-s ĕjjăšăn aɣrĕm wa ĕkkăn. 9Ija kăraḍ išilan ḍarăt-a-wen dărɣal, wăr-ikša, wăr-iswa. 10Aɣrĕm wa n-Dămašăq, ih'-e ănăṭṭalib n-Ɣisa s-isĕm-net Ănanyas, ănfalăl-as-dd Măssinăɣ, inn'-as: "Ănanyas!" Inn'-as Ănanyas: "Năkk da Emăli." 11Inn'-as Emăli: "Ăkk tăšarrit ta s-itawănna 'ta toɣădăt', tĕjjĕšăd ehăn wa n-Yăhudĕs, sĕstĕnăd d-ăhalĕs n-taɣrĕmt ta n-Tarša s-isĕm-net Sawĕl." A-s ităjj a-wen-dăɣ, itĕddal Sawĕl Măssinăɣ, 12ănfalăl-as-dd dăɣ-a-wen-dăɣ a-s ikk'-e-hi-dd ăhalĕs s-isĕm-net Ănanyas-i t-madăn-isĕwăr ifassăn-net i-ad-t-dd-iqqĕl ahănay-net. 13Innă Ănanyas: "Emăli, ĕsleɣ a ăjjeen făll-ăhalĕs-i-dăɣ, ĕllăɣen-ahi ăddinăt ăjjootnen erk ĕmmĕk wa issĕkna imĕššeddĕjăn wi hănen Yărussălam, 14wăla Dămašăq-i dd-ikka, ikk'-et-dd ăwway tikarḍiwen t-dd-ĕkfan imănokalăn n-kăl-tikutawen has-ĕjrawnen ad-isĕttărmĕs e d t-illăm ere iɣarrăn isĕm-năk." 15Inn'-as Emăli: "Ǝglĕw, ăhalĕs-di, năkk a t-ăsnăfrănăn i-ad-awĕy isĕm-in, isĕlmĕd tiwsaten ti n-inĕẓẓulam d-imănokalăn d-kăl-Iṣrayil a-wa ămoosăɣ, 16ad-t-săknăɣ aɣăna wa mad-inhĕy dăɣ-tĕssĕba-nin." 17Igl' Ănanyas, ikk' ehăn wa s-has-ătwănna ih'-e Sawĕl, os'-in, ăswăr-t ifassăn-net, inn'-as: "Ă/n/na-ɣ Sawĕl, Emăli Ɣisa-i hak-dd-ănfalălăn dăɣ-tabarăt ta dd-jed, ĕnta a hi-dd-ăšmašălăn săr-k i-ad-kăy-dd-iqqĕl ahănay-năk, iḍnĕy-kăy Unfas Šăddijăn." 18Tamăzăyyat-ten-dăɣ a dăɣ-dd-ătrăkkăt a olăhăn d-tifrĕnkawen dăɣ-tiṭṭawen n-Sawĕl tĕzzar iqqăl-t-dd ahănay-net, 19ibdăd ḍarăt-a-wen, ătwăsălmaɣ dăɣ-aman, immĕnsăw, iqqăl-t-dd ăṣṣahăt-net, izzăɣ Sawĕl ɣur-inĕṭṭulab wi n-aɣrĕm-en-dăɣ har ɣur-săn ăssakăy a lăn išilan. 20Wăr-ăhoja a-s issĕntă axăṭab n-isălan n-Ɣisa dăɣ-ihănan n-ăddin wi n-kăl-Ălyăhud, isatbat dat-tamĕtte iket-net a-s, Ɣisa a-s, Rure-s n-Măssinăɣ. 21Ăkunăn ăddinăt wi has-sallănen, ĕqqălăn-dd ɣas, jannen: "A-wa, wădden Sawĕl wa izzănăn s-wi ɣarrănen isĕm wa n-Ɣisa hănen Yărussălam? Ajăn wădden ass-net i-aɣrĕm-wa-dăɣ, i n-tĕssĕba n-ad-tăn-isĕttărmĕs, ăj'-en dăɣ-ifassăn n-ămănokal n-kăl-tikutawen?" 22Sawĕl ĕnta, itiiṣuhut immun-net s-Măssinăɣ hak ašăl, isimxĕlxil kăl-Ălyăhud wi ĕzzăɣnen Dămašăq, isikus-tăn ăššăk a-s Ɣisa a-s Ălmasex. 23Okăy ăzzăman ɣas, ănmănnakăn kăl-Ălyăhud făll-ĕmmĕk wa s-t-mad-săɣdărăn, ănɣĕn-t kĕrĕf. Ǝssĕbdădăn ḍarăt-a-wen meddĕn dăɣ-imawăn n-aɣrĕm iket-net i-ad-ăqqaymĕn has-ăɣtafăn i-ad-ĕjrĕwăn ĕmmĕk s-t-ănɣăn 24măšan, ĕjjăšăn-t isălan n-taɣdărt ta s-ăbokăn ad-has-tăt-ĕjĕn. 25Ǝnkărăn inĕṭṭulab s-ehăḍ, jăn Sawĕl dăɣ-deke hĕrĕwăn, ăstărarăn-t s-ašrut n-ăɣalla wa iyyăḍăn iɣlăyăn aɣrĕm, ĕssĕjmăḍăn-t, ikkă Yărussălam. 26Iwwăḍ-in ɣas, ikkă inĕṭṭulab wi iyyăḍnen i-ad-dăr-săn irtĕy măšan, ăksuḍăn-t iket-năsăn ed wăr-ĕflesăn hărwa a-s iyyăn dăɣ-săn a ămoos. 27Irmăs-t-dd Bărnăbbas s-iman-net, ilwăy-t s-inĕmmušal, illăɣăt-asăn ĕmmĕk wa s-inhăy Sawĕl Emăli Ɣisa dăɣ-tabarăt ta n-Dămašăq d-ĕmmĕk wa s-has-immĕjrăd Măssinăɣ d-turhajăt ta t-ikfa n-ad-ămmăjrăd s-ĕnniyăt ozjan dăɣ-ihănan n-ăddin wi n-kăl-Ălyăhud i-ad-ăjjăyh a-s Ɣisa a-s Ălmasex. 28Ăsbărrăkăn-t ălwăqq-wen-dăɣ, irtăy dăr-săn; edăgg ĕkkăn dăɣ-Yărussălam-dăɣ, ăddeew dăr-săn, itajăyha s-ĕnniyăt ozjan ĕnta-dăɣ făll-isĕm n-Emăli, 29itidwĕnnit, itamăzaɣ d-kăl-Ălyăhud wi sawalnen Tălyunanit măšan, ĕggădăn-dd săr-s, ad-tammăɣăn ĕntăneḍ-dăɣ i-tašlĕlt s-ĕjăn iman-net. 30Ǝslăn ayĕtma-s dăɣ-ăddin i-a-wen ɣas, ĕssĕjmăḍăn-t s-aɣrĕm wa n-Qăyṣăra tĕzzar, ikkă ḍarăt-a-wen wa n-Tarša. 31Ăzzăman-en, tĕjraw ălkănisăt ălɣafyăt dăɣ-tajiwen ti n-Ălyăhudĕyăt d-Galila d-Sămari, tiṣuhun inĕṭṭulab dăɣ-immun-năsăn, tinmĕkfin tayĕtte, tamašalăn hărăt iket-net dăɣ-tuksĕḍa n-Emăli, idhal-tăn Unfas Šăddijăn, isawaḍ-dd fălla-săn hak ašăl ăddinăt wi iɣlăs Măssinăɣ. 32Ălliil Bĕṭrus ĕnta ăkall iket-net har dd-osa imĕššeddĕjăn wi ĕzzăɣnen tadăbayt ta n-Ludd. 33Ill'-e dihen ăhalĕs s-isĕm-net Inyas s-a ilan ĕttam iwĕtyan ibdan, wăr kăla ifăl asĕftăɣ-net. 34Os'-e-hi-dd Bĕṭrus, inn'-as: "Inyas, ăzozăy-kăy Ɣisa Ălmasex, ĕbdĕd, aḍh asĕftăɣ-năk." Ibdăd Inyas ăssaɣăt-wen-dăɣ. 35Ǝnhăyăn kăl-Ludd ĕntăneḍ d-ăddinăt wi ĕzzăɣnen telămse ta n-Sarun a-wen ɣas, omănăn s-Emăli iket-dăɣ-năsăn. 36A-s ităjj a-wen-dăɣ, tĕzzaɣ tănăṭṭalibt s-isĕm-net Tăbita aɣrĕm wa n-Žafa, tawăɣra daɣ s-isĕm wa n-Dorkas, a-wen ălmăɣna-net: "Tašĕnkăḍt." Tămoos tamăḍt n-wălăt-ălxer, tajj imărkedăn ăjjootnen, tĕkkat. 37Išilan-en-dăɣ ad-tărhin, ăba-tăt, ĕknăn ăddinăt tafĕkka-net, ĕssĕnsăn-tăt dăɣ-ehăn n-soro. 38Ǝslăn inĕṭṭulab wi hănen taɣrĕmt-en wărăt tănmăjjaj d-Ludd a-s dd-ijjaš Bĕṭrus ăkall ɣas, ăšmašălăn săr-s ĕssin meddĕn i-ad-dăr-săn dd-idaw šik. 39Ăddew dăr-săn Bĕṭrus, ĕwwăḍăn-dd ɣas, ĕlwăyăn-t s-soro wa dăɣ-tĕnsa tafĕkka n-tamăḍt, ĕlkăḍnăt-as-dd tinuḍăfen ĕṭṭafnăt iba-net, hallănăt, saknenăt isĕlsa wi hasnăt-tĕẓẓĕẓmăy Dorkas dăɣ-a-wa tĕkkăs tĕll'-e jere-snăt. 40Izzĕzjăr-tănăt ĕntănăteḍ d-tamĕtte iket-net, irkăɣ ḍarăt-a-wen jĕnnĕj-s, idăl Măssinăɣ. Issĕmdă tittar ɣas, innăḍ-dd săr-s, inn'-as: "Tăbita, ĕnkăr-dd!" Toră-dd tiṭṭawen-net ălwăqq-wen-dăɣ, tĕnhăy Bĕṭrus, tăqqimă-dd. 41Ăshătăl-as-dd s-ăfuss-net, issĕbdăd-tăt, iɣră-dd imĕššeddĕjăn d-tinuḍăfen ḍarăt-a-wen, issĕkn'-asăn-tăt, tĕddar. 42Šik-dăɣ a-s dd-ĕssăɣlăyăn isălan n-a-wen-dăɣ aɣrĕm wa n-Žafa iket-net, omănăn ăddinăt ăjjootnen s-Emăli. 43Ija Bĕṭrus ăzzăman dăɣ-Žafa izzaɣ dăɣ-ehăn n-Simyon wa isafalăn ilămawăn.

will be added

X\