Ijităn n-inĕmmušal 8

1A-wa ijăn ašăl-wen-dăɣ iket-net issan-as Sawĕl hărăt, iqqăs i-tamăttant ta ija Stifan. Ɣur-ašăl-wen-dăɣ, ad-intă ălɣizabăt sĕmmăn făll-ălkănisăt ta tĕhăt Yărussălam, ĕmmăhăšăn imumĕnăn dăɣ-tajiwen ti n-Ălyăhudĕyăt d-Sămari, inĕmmušal ɣas a dd-ăqqimănen dăɣ-Yărussălam. 2Osăn-dd meddĕn ăddinnen, ĕṣtărăn-in Stifan, ĕṭṭăfăn iba-net dăɣ-tisnant. 3Iggăd-dd Sawĕl dăɣ-a-wen-dăɣ, ad-itammăɣ i-ĕmmĕk s-hin-olăm ălkănisăt edăgg t-tĕlla-dăɣ, wăr t-illa ehăn wăr-ijješ, isatărmas ăddinăt wi omănnen s-Ɣisa jer-ămoosăn meddĕn wăla tiḍeḍen, itĕjjar-tăn-in dăɣ-tikărmuten. 4Imumĕnăn wi dd-ĕzjărnen Yărussălam, ĕmmăhăšăn ɣas, ăllilăn ăkall iket-net, xaṭṭăbăn Ălĕnžil i-ăddinăt. 5Dăɣ-a-wen-dăɣ ad-ikkă Fĕlibb aɣrĕm iyyăn ihan teje ta n-Sămari ad-dăɣ-s ixaṭṭăb i-tamĕtte isălan n-Ălmasex. 6Sajadăn-as ăddinăt ăjjootnen s-ijraẓ măjrăd wa ităjj d-ijităn n-Măssinăɣ wi itamašal data-săn, 7itakkăs alšinăn naḍḍăwnen iɣăran dăɣ-ăddinăt, izizuy daɣ inaɣyabăn d-inĕbdan ăjjootnen. 8Ja tedăwit măqqoorăt dăɣ-aɣrĕm-wen-dăɣ. 9Izzaɣ dihen ăhalĕs n-emăssăxăr s-isĕm-net Simon, ămoos a-wa ităjj awnaf i-kăl-Sămari, ăssimɣăr iman-net hullan, 10ĕltaɣăn-t wi măḍroynen hakd wi wăššarnen, jannen fălla-s: "Wa ăhalĕs, tărna ta tojărăt n-Măssinăɣ a iṭṭaf." 11Ǝltăɣăn-t ya ăddinăt ăjjootnen dăɣ-tĕssĕba n-ĕssăxăr wa ităjj, itaqqăn iɣăfawăn-năsăn. 12Inhăy Simon a-s omănăn ăddinăt s-Ălĕnžil wa hasăn-ixaṭṭăb Fĕlibb făl Tĕmmĕnĕya n-Măssinăɣ d-Ɣisa Ălmasex ɣas, ad-titwĕsĕlmiɣăn meddĕn hakd tiḍeḍen dăɣ-aman, 13omăn ĕnta-dăɣ, ătwăsălmăɣ dăɣ-aman. Iltăɣ ya Fĕlibb ḍarăt-a-wen făl tĕssĕba n-ijităn n-Măssinăɣ d-tikunen ti s-t-ihannăy itajj'-enăt, ăqqănnen eɣăf-net ĕnta-dăɣ. 14Ǝslăn inĕmmušal wi hănen Yărussălam a-s kăl-Sămari-dăɣ omănăn s-măjrăd n-Măssinăɣ ɣas, ăšmašălăn-dd săr-săn Bĕṭrus d-Exya. 15Ǝwwăḍăn-in ɣas, dălăn Măssinăɣ i-ad-dd-izĕzzubbĕt Unfas Šăddijăn făll-ăddinăt wi ătubnen dihen 16ed, dat-a-wen-dăɣ, wăr tăn-iha-i făll-dd-ăzzubbăt Unfas Šăddijăn, atwĕsĕlmaɣ ɣas a ătwăjjăn dăɣ-aman s-isĕm n-Emăli Ɣisa. 17Ăswăr-tăn Bĕṭrus d-Exya ifassăn-năsăn, ăzzubbăt-dd fălla-săn Unfas Šăddijăn. 18Inhăy Simon a-s šămad tăn-ăsiwărăn inĕmmušal ifassăn-năsăn, ad-fălla-săn dd-ăzzubbăt Unfas Šăddijăn ɣas, ittăr ad-tăn-ăkf aẓrĕf, ijann'-asăn: 19"Ăkfăt-ahi năkk-dăɣ tădabit-ta-dăɣ i-ad-umas a-s ere ăswărăɣ ifassăn-in năkk-dăɣ, ad-fălla-s dd-izzubbĕt Unfas Šăddijăn." 20Inn'-as Bĕṭrus: "Tĕkšăfăd, kăyy hakd aẓrĕf-năk ed torded a-s a-wa ikfa Măssinăɣ bănnan, tăddoobed ažĕnš-net. 21Šămad kăyy ĕnniyăt-năk da-dăɣ, ĕlmĕd a-s a-wa ijăn, ăbas t-iha folăt-năk ed ifraɣ ulh-năk dat-Măssinăɣ. 22A-wen-dăɣ a făl utab dăɣ-amsud-năk iket-di, tĕdĕlăd Emăli kunta ămmukkăn a-wen, ad-hak-ănš erk ĕnniyăt wa innăhăḍăn dăɣ-ulh-năk 23ed, hannăyăɣ a-s ulh-năk, wăr-iḍney a săl tăllăbăst d-iba n-iqqud." 24Ăwwežăb Simon, inn'-asăn: "Ǝttărăt-ahi-in kăwăneḍ-di-dăɣ dăɣ-Emăli i-ad-wăr hi-irĕmmĕs a-wa s-tĕnnăm." 25Ăjjĕyhăn inĕmmušal, ăxṭăbăn măjrăd n-Emăli i-ăddinăt ăjjootnen tĕzzar, ĕqqălăn Yărussălam. Dăɣ-asikĕl-năsăn, tajjăn isălan n-Ălĕnžil dăɣ-tidbi ăjjootnen n-Sămari. 26Immĕjrăd ḍarăt-a-wen ănjălos n-Emăli i-Fĕlibb, inn'-as: "Fĕlibb, tărur, tĕjĕd tabarăt ta fălăt Yărussălam tĕkka Gaza ed wăr dăɣ-s ĕjjĕtăn imĕssukal ămăra-dăɣ." 27Iglă, wăr-ăhoja a-s ăhalĕs iyyăn n-ămudăš n-minĕstăr-da-dăɣ, ĕnta a ănnihăḍăn dăɣ-a-wa la Kăndas ta n-tămănokalt n-ăkall wa n-Ityobya. Ăhhujjăjj-dd ĕnta-dăɣ s-Yărussălam i-ad-dăɣ-s iɣbĕd Măssinăɣ. 28Issĕmda ăhujjĕj ɣas, iqqăl ăkall-net dăɣ-turăft-net ĕlwayăn ibĕjwan. Ăssookal minĕstăr-di iɣarr ĕlkĕttab wa n-ănnăbi Saya a-s dăr-s ămmuqqăs Fĕlibb. 29Innă Unfas Šăddijăn i-Fĕlibb ad-hin-ahĕẓ turăft-net. 30Ošăl Fĕlibb har dăr-s ămsadăɣ, isl'-as iɣarr ĕlkĕttab wa n-ănnăbi Saya ɣas, inn'-as: "Ăhalĕs, ak a-wa ɣarrăd, tĕjrahăd ălmăɣna-net meɣ?" 31Inn'-as ăhalĕs: "Ǝndek a-wa he-ăjăɣ ĕjrăhăɣ-t a-s wăr t-illa ere hi-t-iffĕssărăn." 32Ăsnăy-t-dd ăhalĕs edes-has ad-has-iɣarr edăgg wa dăɣ-iktăb a-s: "Olăh ɣas d-tiɣse tăttilwăyăt s-asăɣrĕs, olăh d-takĕndĕmt s-tĕllasăn ăddinăt, wăr t-illa emăsli dd-izjarăn emm-net, 33immĕḍrăy bănnan, wăr has-ătwăjja ăššăreɣa wa dăr-ăniihăjja. Mi s-ilkam ad-dd-iḍkal isălan-net i-ihăyawăn-net ed tărẓa taɣrĕst-net dăɣ-ăddunya?" 34Issĕstăn ăhalĕs wa n-ămudăš n-Ityobya Fĕlibb, inn'-as: "Lăɣăt-ahi, mi s-iha ănnăbi ti-net dăɣ-edăgg-wa-dăɣ? Ak iman-net a dăɣ-ămmijrăd meɣ isălan n-ere s-ilkam ad-dd-ass a-s iha ti-net?" 35Irmăs-as-dd Fĕlibb tifer-ti-dăɣ, ad-has-itafăssar a-wa inna Ălĕnžil n-Ɣisa. 36Ǝglan har dd-ĕkkăn edes i-edăgg han aman ɣas, inn'-as ăhalĕs wa n-ămudăš: "Aman da, ma igdalăn ad-ĕtwĕsĕlmăɣăɣ?" (( 37Inn'-as Fĕlibb: "Amĕn ɣas s-ulh imdan.")) Inn'-as ăhalĕs wa n-ămudăš: "Omanăɣ a-s Ɣisa Ălmasex a-s Rure-s n-Măssinăɣ." 38Omăr ălwăqq-wen-dăɣ i-ad-tĕbdĕd turăft, ijjăš dăr-s Fĕlibb aman, issĕlmăɣ-t. 39Diha-dăɣ dd-ĕzjărăn aman ad-iḍkăl Unfas n-Emăli Fĕlibb, wăr t-oles ămudăš-ĕnnin-dăɣ ahănay, iglă ĕnta dăɣ-zăbo-net, ikna tedăwit. 40A-s hin-ijrăh Fĕlibb iman-net ḍarăt-a-wen, iha ăkall wa n-Ašdud, ifăl dihen, ikk' aɣrĕm wa n-Qăyṣăra. Tadăbayt immăr-dăɣ, ad-dăɣ-s ăj isălan n-Ălĕnžil.

will be added

X\