Ijităn n-inĕmmušal 7

1Issĕstăn ămănokal n-kăl-tikutawen wa măqqărăn Stifan ḍarăt-a-wen, inn'-as: "Kăyy, a-wa ătwănnăn fălla-k, ak tidĕt meɣ bahu?" 2Inn'-asăn Stifan: "Ayĕtma, abbatăn, săjdăt-ahi: Măssinăɣ-i ilăn ălxurmăt iket-net, ĕnta a dd-ănfalălăn i-abba-nănăɣ Ibrahim hărwa izzaɣ ăkall wa n Mizĕbbuṭamya, hărwa wăr dd-iddek ăkall wa n-Haran. 3A-s has-dd-ănfalăl Măssinăɣ, inn'-as: 'Ǝfĕl ăkall-năk d-imărawăn-năk, tăhanĕd s-ăkall wa kăy-mad-săknăɣ.' 4Ăhona ya Ibrahim, ifăl ăkall wa n-Kăldăyăn, iddăk wa n-Haran. 5Ăba abba-net dihen ɣas, inn'-as Măssinăɣ, ad-ăhan s-ăkall-wa-dăɣ, tĕzzaɣăm ašăl-i-dăɣ. Ăkall-en, wăr dăɣ-s ikfa Măssinăɣ Ibrahim tăkasit n-wăla edăgg dăɣ-ăssinsa aḍăr-net măšan, ijjăš-as ărkăwăl n-ad-t-ăkf ăkall-en-dăɣ ĕnta d-ihăyawăn-net. A-s has-ijănna Măssinăɣ a-wen-dăɣ, wăr-ila Ibrahim ara. 6Inn'-as Măssinăɣ ăzzăman-en: 'Ihăyawăn-năk ad-umasăn imăjarăn dăɣ-ăkall wăr len, ad-ăkkălen, ĕnhĕyăn aɣăna har ĕkkoẓăt timaḍ n-awătay 7măšan, ad-hasăn-ĕkkĕsăɣ tekăriḍt, ĕšrăɣăɣ ăkall-en tăn-ăskălen, zĕzjărăɣ-asăn-t-dd, ăɣbĕdăn dăɣ-edăgg wa-dăɣ tăn-ĕkfeɣ.' 8Ijjăš Măssinăɣ ărkăwăl n-tassaɣt i-Ibrahim, ărkăwăl-en, amili a-s tamătart-net. A-wen-dăɣ a făl ikrăš Ibrahim Isxaqq, ăsmalăy-t ašăl wa s-ĕttam; a-wen-dăɣ daɣ a ija Isxaqq i-rure-s Yaqub, ij'-e daɣ Yaqub i-mĕddana-s wi n-măraw d-ĕssin i n-imɣarăn n-imăzzaɣăn n-tiwsaten-nănăɣ ti n-mărawăt d-sănatăt. 9Osămăn ḍarăt-a-wen mĕddana-s n-Yăqub wi n-imɣarăn n-imăzzaɣăn făll-Yusĕf-i n-ă/n/na-săn, ĕžžĕnšăn-t-in i-ad-ăkkălăt dăɣ-Miṣra măšan, issăn Măssinăɣ dăɣ-Yusĕf dăɣ-ăkall-wen-dăɣ. 10Wăr t-illa erk ĕmmĕk dăɣ-wăr t-dd-ikkes Măssinăɣ, issĕnsă fălla-s ănnuɣmăt-net d-sărho i-ad-ikrĕš idĕm dat-Firɣăwna-i n-ămănokal n-Miṣra-i has-ijăn taflĕst-ta-dăɣ făl t-ăsmănakăl dawa-s făll-ăkall d-a-wa ihăn eɣewĕn-net iket-net. 11Dăɣ-a-wen-dăɣ a dd-oḍa laẓ lăbasăn făll-Miṣra d-Xăna, ămɣatărăn ăddinăt hullan har ăbas ĕṭṭafăn imărawăn-nănăɣ a ĕkšăn. 12Isla Yaqub a-s ih' ĕttăɣam Miṣra ɣas, ăšmašăl săr-s mĕddana-s wi hanăɣ-ăshăyăwnen. 13Osăn-dd, ĕqqălăn, šămad dd-jan asikĕl wa s-ĕssin a tăn-ăzozăy Yusĕf iman-net, ilmăd daɣ Firɣăwna s-a-wen-dăɣ, tumast n-Yusĕf. 14Ăssotăr Yusĕf ti-s d-imărawăn-net iket-năsăn, ămoos a-wen-dăɣ ĕssayăt timĕrwen n-ăwadĕm d-sĕmmos. 15Iddăk-dd ya Yaqub Miṣra, ăba-t daɣ dihen-dăɣ ĕnta d-imărawăn-nănăɣ wi hanăɣ-ăshăyăwnen. 16Ǝmmĕḍkălnăt tifĕkwen-năsăn ḍarăt tamăttant-năsăn s-aɣrĕm wa n-Sišăm i-ad-ĕnbĕlăn dihen dăɣ-tĕfărre ta ižžĕnša Ibrahim făll-mĕddana-s n-Hămmăr dăɣ-Sišăm. 17A-s dd-tăwwăḍ tăqqăn n-ărkăwăl wa ijjăš Măssinăɣ i-Ibrahim, tĕkna tamĕtte-nănăɣ ĕjut dăɣ-Miṣra. 18Inăy-dd ăzzăman-en Firɣăwna ăynayăn wărăn izzey Yusĕf. 19Ijjăš săr-năɣ erk ălxal, issĕknă tumast-nănăɣ aɣăna, ijă a wărăn ijreẓ i-imărawăn-nănăɣ, ăsmăḍrăy-tăn hullan s-ălxidmăt wa dăɣ-tăn-ijă, iglă dăɣ-tăllăbăst-net har hasăn-innă ad-hin-ĕnḍĕwăn aratăn-năsăn wi n-eyyan i-ad-ămmătăn. 20Ăzzăman-en-dăɣ ad-iwa Mosa-i ikrăšăn idĕm dat-Măssinăɣ; kăraḍ orăn ɣas a jăn imărawăn-net ĕṭṭafăn-t, tĕzzar, ăšhăššăl-tăn a-wa inna Firɣăwna tăbĕḍḍawt dăr-s. 21Jărăn-t-in ɣas, tĕkkĕmăt-t-dd elle-s n-Firɣăwna, tĕj'-e-hi-dd s-iman-net, tĕj'-as asĕdwal wa mad-tăj i-ara n-tăsa-net. 22Ămoos Mosa ere iɣran dăɣ-tĕlɣulĕma d-musnăt wa n-kăl-Miṣra, ikf'-e Măssinăɣ ăṣṣahăt dăɣ-măjrăd hakd dăɣ-timašalen. 23Ikrăš ĕkkoẓăt timĕrwen n-awătay ɣas, ijjăs-t-dd ĕnniyăt n-ad-ăkk ayĕtma-s wi n-Iṣrayil, idhĕl-tăn, ĕntăneḍ-i n-tumast-net. 24Ašăl iyyăn, inhăy iyyăn dăɣ-săn isalmaḍ u-Miṣra t-irnan ɣas, ohăɣ-as tinahăɣen, ijă iman n-wa n-u-Miṣra. 25Ăɣel afăl ija a-wen, ad-ĕjrăhăn ayĕtma-s a-s Măssinăɣ a t-dd-ăšmašălăn săr-săn i-ad-tăn-ikkĕs dăɣ-ĕkkĕlu wa hăn măšan, wăr ĕjrehăn a-wen. 26Ašăl wa ilkamăn i-wen, inhăy ĕssin meddĕn n-kăl-Ălyăhud ĕknasnen, ittăr ad-ăkk jere-săn, ibḍĕw-tăn, ĕjĕn ălxer. Inn'-asăn: 'Imidiwăn, kăwăneḍ wădden ayĕtmatăn a tămoosăm, mafăl tinmĕjjim a lăbasăn jer-iman-năwăn.' 27Iggăd-dd săr-s wa irnăn, imhăl-t-in, inn'-as: 'Kăyy, mi kăy-ijăn ămizăr d-ălqa/l/li-hanăɣ, 28ĕyya, a tărhed ad-hi-tănɣĕd šund a wa jed i-u-Miṣra wa s-jed iman-net ĕnḍĕšel.' 29Islă Mosa i-măjrăd-wen-dăɣ ɣas, irmăɣ, ăjewăḍ ălwăqq-wen-dăɣ s-ăkall wa n-Mădyan, izzăɣ, ădobăn ya dihen-dăɣ, ikrăš ĕssin ilyaḍăn. 30Šămad okaynăt ĕkkoẓăt timĕrwen n-awătay ad-has-dd-ănfalăl ănjălos n-Măssinăɣ dăɣ-tenere făll-aḍaɣ wa n-Săynay dăɣ-tabsăɣt ta tăhijăljălăt wăr răqq. 31Tăqqăn tănăfalilt-ta-dăɣ ihannăy eɣăf-net, iknă-dd ihĕẓ n-tabsăɣt i-ad-ikĕn asĕnnĕfli dăɣ-a-wa ihannăy măšan, izjăr-tăt-dd emăsli n-Emăli has-innăn: 32'Năkk a-s Măssinăɣ n-imɣarăn wi kăy-ăshăyăwnen, năkk a-s Măssinăɣ wa n-Ibrahim d-Isxaqq d-Yaqub.' Ihă-dd ɣas Mosa ăšikăḍkăḍ a-wa-dăɣ has-ja tarĕmmeɣt har ăbas ihăl wăla-dăɣ ad-iḍkĕl idĕm-net, ikyĕd. 33Inn'-as Emăli daɣ: 'Ǝkkĕs tifădelen-năk făl-a-s edăgg wa dăɣ-tĕbdadăd, edăgg šăddiijăn, 34ĕnhăyăɣ tisnant ta tărmăsăt tamĕtte-nin dăɣ-Miṣra, ĕsleɣ i-tihnĕffa-năsăn, a-wen-dăɣ a făl dd-ăzzubbeɣ i-ad-tăn-sĕddărfeɣ. Ămăra, ĕglĕw, kăyy a he-šĕmmĕsĕlăɣ s-ăkall wa n-Miṣra.' 35Wădden hannăyăm a-s Mosa-wa-dăɣ ăkkuddălăn a-s has-ĕnnăn: 'Mi kăy-ijăn ămizăr d-ălqa/l/li-hanăɣ?' Ǝnta-en-dăɣ a dd-ăšmašăl Măssinăɣ i-ad-izar i-kăl-Iṣrayil, isĕddărf'-en-dd s-tărna n-ănjălos wa has-dd-ănfalălăn dăɣ-tabsăɣt ta tăhijăljălăt wăr răqq. 36Ǝnta-en-dăɣ a tăn-dd-izzĕzjărăn Miṣra itajj s-tărna n-Măssinăɣ hărătăn ăqqannen eɣăf d-ijităn n-Măssinăɣ har ĕjlăyăn ejărew wa sĕmmăn šăggăɣăn, ĕjăn ḍarăt-a-wen ĕkkoẓăt timĕrwen n-awătay ăhonăn dăɣ-tenere. 37Mosa, ĕnta a-s kăla innă i-kăl-Iṣrayil: 'Ilkam ad-săr-wăn dd-išĕmmišĕl Măssinăɣ ănnăbi dăr-i olăhăn, ănnăbi dăr-wăn oharăn temiḍt.' 38Ǝnta-en-dăɣ daɣ a ibdădăn dăɣ-tenere ta n-Săynay jer-ănjălos wa has-ămmiijrădăn făll-afălla n-aḍaɣ wa n-Săynay d-tamĕtte, ikf'-e Măssinăɣ măjrăd wa ihakkăn tămudre i-ad-hanăɣ-t-dd isĕssiwăḍ 39măšan, unjăyăn abbatăn-nănăɣ s-asjĕd-has, ăsɣărăn-as ulhawăn-năsăn, ĕnnăḍăn fălla-s, ad-sadărhanăn uɣĕl n-Miṣra-i dd-ĕzjărăn. 40Dăɣ-a-wen-dăɣ, a dd-tĕggăd tamĕtte s-Harun, tĕnn'-as: 'Ăj'-anăɣ imălan ăynaynen ărjăšnen data-năɣ făl-a-s Mosa wa hi-hanăɣ-dd-izzĕzjărăn Miṣra, ăbas nĕssan a ija.' 41Ǝṣṣĕwwărăn-dd ḍarăt-a-wen i-iman-năsăn ehădăl n-orăɣ, ad-tajjăn tikutawen i-ăṣṣănăm wa jăn s-ifassăn-năsăn, ad-t-ɣabbădăn, tiimĕlĕn-t, sănkarăn iẓĕjraẓ d-isudal dat-a-wa dd-ĕknăn ifassăn-năsăn. 42Ǝssĕksănăn iman-năsăn Măssinăɣ s-a-wen-dăɣ tăn-išlăn, oyy'-en ĕnta-dăɣ s-ăṣṣănăm-năsăn d-ălɣibadăt wa tăjjăn i-ajhanăn wi n-išĕnnawăn: tăfukt, ewăr d-etran; ămoos a-wen a ăssiitbătăn a-wa innă ănnăbi Ɣămmosa a-s inna dăɣ-ĕlkĕttab-net, innă Măssinăɣ: 'Ya kăl-Iṣrayil! Ǝkkoẓăt timĕrwen n-awătay a jăm dăɣ-tenere, ɣarrăsăm i-taɣsiwen, tĕkkatăm-tănăt, ak ăssistănăɣ-kăwăn, ajăn năkk a-s tănăt-kătăm? 43Wădden ehăket n-ăṣṣănăm wa s-isĕm-net Molax d-atăr wa s-isĕm-net Rufan-i jăm emăli-năwăn, tahanem dăr-s siha d-siha, a-s tănăt-kătăm, tăqqălăm-dd ɣabbădăm-tăn. Dăɣ-tĕssĕba n-a-wen-dăɣ tămešălăm a făl mad-ărẓĕn kăl-Băbilun ăkall-năwăn, tăkkălem dăɣ-ikallăn wi hasăn-in-ĕllanen.' 44A-s hăn imɣarăn-nănăɣ tenere, ĕṭṭafăn ehăket wa n-tămuqqest n-Măssinăɣ ămoosăn tajuhe i-ărkăwăl n-tassaɣt wa ijjăš Măssinăɣ i-Mosa a-s, has-innă, ad-ikrĕs ehăket-en s-ĕmmĕk wa s-has-omăr s-a-wen. 45Ehăket-en, togăẓ-t-dd ĕzzurĕyăt ta hasăn-tĕlkămăt har ăzzăman wa d-hasăn-ăzzar Yešwa, ĕjjăšăn d-ehăket ăkall wa tăn-ikfa Măssinăɣ, ohăɣăn dăɣ-ĕddĕwĕlăn wi iyyăḍnen; ĕṭṭafăn ehăket-en dăɣ-ăkall-en-dăɣ har ăzzăman wa n-Dawĕd-i 46ijrăwăn idĕm d-ănnuɣmăt dat-Măssinăɣ. Ǝnta-en-dăɣ a ittărăn dăɣ-Măssinăɣ turhajăt n-ad-isĕkrĕs ehăn i-Măssi-s n-Yaqub 47măšan, turhajăt-ten-dăɣ, Sulăyman-i n-rure-s n-Dawĕd a tăt-ijrăwăn. 48Ikrăs ehăn-en măšan, issĕlmăd-t Măssinăɣ s-hărăt iyyăn, 49inn'-as Emăli: 'Išĕnnawăn a-s tasăqqaymut-in, ăkall a-s isĕkkukal n-iḍarăn-in. Ma ămoos ehăn wa s-tăddobem a hi-t-tĕdĕyĕm i-ad-hi-awĕy, sunfăɣ dăɣ-s? 50Ajăn wădden ăfuss-in a dd-ixlăkăn hărăt iket-net.' " 51Olăs daɣ inn'-asăn Stifan: "Ya meddĕn-i-dăɣ n-iɣăfawăn ăqqurnen n-ulhawăn wăren ătub s-ăṭṭubbătnăt timĕẓẓujen-năsăn, tunjayăm s-Unfas Šăddijăn šund a-wa jăn abbatăn-năwăn, 52ijmaḍ-t ăššăk a-s a-wa ĕjăn abbatăn-năwăn ɣas a kăwăn-išlăn kăwăneḍ-dăɣ, wăr t-illa ănnăbi s-wădden ăqquzzăben-t, jăn iman n-wi hasăn-ălolăynen n-a-s ilkam a dd-ass wa n-iyyăn n-Ămaɣdal ăsnăfrăn Măssinăɣ, tĕttĕlălăm-tăn kăwăneḍ-dăɣ ed tĕssăɣdărăm-t ĕnta-dăɣ tĕzzar, tănɣăm-t kĕrĕf, 53ăzzăbbăt-dd Măssinăɣ fălla-wăn alămărăn-net, ĕmmĕjrădăn-awăn săr-săn ănjălosăn măšan, tunjăyăm s-asjĕd-hasăn." 54Islă ămănokal n-ălžămaɣăt wa iɣattăsăn ăššăreɣa i-a-wen-dăɣ ɣas, ad-isamădad ĕnta d-ăddinăt-net, ẓimkărkĕweẓăn isenăn, făll-ălhăm-i-dăɣ măqqărăn tăn-ijjăšăn făll-Stifan. 55Ǝnta ălwăqq-wen-dăɣ, iḍnăy-t Unfas Šăddijăn, iḍkăl asăwaḍ-net s-išĕnnawăn, inhăy ălxurmăt n-Măssinăɣ d-Ɣisa ibdad daw-aɣil n-Măssinăɣ. 56Iḍkăl emăsli-net ălwăqq-wen, innă i-ălžămaɣăt: "Săjdăt, ĕnhĕywăt išĕnnawăn, ămerăn, ibdad Ăgg-ăgg-adĕm daw-aɣil n-Măssinăɣ." 57Ǝslăn i-a-wen ɣas, ăsɣăyyăn dăɣ-išĕnnawăn, hărăn timĕẓẓujen-năsăn, ošălăn-dd šund iyyăn n-ăwadĕm săr-s iket-dăɣ-năsăn, oḍăn fălla-s, 58ăšrăwrăwăn-t har dăr-s ĕzjărăn aɣrĕm, ad-t-hakkăn sămmăjori n-tihun har t-ănɣăn kĕrĕf. Ăddinăt wi jănen a-wen-dăɣ, ămawaḍ s-isĕm-net Sawĕl a ĕssăɣlăfăn isĕlsa-năsăn tĕzzar ăšewăjăn s-Stifan. 59Hakkăn-t sămmăjori n-tihun wăr dd-išrey, itĕddal ĕnta Măssinăɣ, ijanna: "Emăli Ɣisa, ăssiɣlăfăɣ-kăy iman-in." 60Irkăɣ ḍarăt-a-wen, iḍkăl emăsli-net s-afălla, innă: "Emăli, wăr tăn-tăswărăd abăkkaḍ-wa-dăɣ." Innă a-wen-dăɣ ɣas, ĕjmăḍăn-t iman.

will be added

X\