Ijităn n-inĕmmušal 6

1Ăzzăman-en, hak ašăl tiwwaḍăn-dd imaksaḍăn n-Măssinăɣ dăɣ-wi ĕlkamnen i-ăttăbeɣa wa n-kăl-Ălyunan făll-ălžămaɣăt wa n-imumĕnăn. Dăɣ-a-wen-dăɣ, ad-ikka măjrăd jer-kăl-Ălyăhud wi ĕzzăɣnen jer-kăl-Ălyunan d-kăl-Ălyăhud wi sawalnen Ɣăbranĕyya. Ǝnnăn wi n-kăl-Ălyunan, timĕddun wi n-Ɣăbranităn tinuḍăfen-năsăn dăɣ-isălan n-tiẓunawen n-tadhĕlt ta tajjăn hak ašăl. 2Ǝssăɣrăn-dd inĕmmušal wi n-măraw d-ĕssin tamĕtte ta n-inĕṭṭulab, ĕnnăn-asăn: "Wăr-ănhăjja ad-năyy ălxuṭbăt n-isălan n-Măssinăɣ, năqqĕl-dd nănnuṭṭăf d-tiẓunawen n-imĕnsiwăn. 3A-wen-dăɣ a făl, sĕnnĕfrĕnăt jere-wăn ĕssa meddĕn ătiwăsămɣărnen, iḍnay Unfas Šăddijăn n-imĕssorha, ănnuṭṭăfnen d-ĕššăɣĕl-wen-dăɣ, 4dihen, năkkăneḍ, ad-năkf iman-nănăɣ tamădilt n-Măssinăɣ d-ălxuṭbăt hak ašăl n-măjrăd-net." 5Ijrăẓ ăddăbara-wen-dăɣ i-ălžămaɣăt iket-net, innĕfrăn-dd Stifan, a-wen ăhalĕs n-immun imdan, iḍnay Unfas Šăddijăn d-Fĕlibb d-Brukurus d-Nikanur d-Timun d-Bărmenas d-Nikola wa n-teje ta n-Intyuš s-kăla ilkam i-ăddin wa n-kăl-Ălyăhud. 6Meddĕn-win-dăɣ a dd-issĕbdăd ălžămaɣăt dat-inĕmmušal, ĕttărăn-asăn s-Măssinăɣ tĕzzar, ăswărăn-tăn ifassăn-năsăn, jăn dăɣ-săn ălbăraka. 7Ad-xaṭṭăbăn ĕntăneḍ măjrăd n-Măssinăɣ, tijatăn-dd fălla-săn hak ašăl imumĕnăn ăynaynen dăɣ-Yărussălam. Omănăn făw kăl-tikutawen ăjjootnen, ad-tamašalăn ĕntăneḍ-dăɣ, a-wa innă măjrăd n-Măssinăɣ. 8Stifan, ămoos ăhalĕs s-tidĕt-dăɣ, făll-ăssinsa Măssinăɣ ănnuɣmăt-net d-tărna-net, itamašal hărătăn ăqqannen eɣăf d-ijităn n-Măssinăɣ dat-tamĕtte iket-net. 9Ǝggădăn-dd meddĕn ila ehăn n-ăddin wa n-kăl-Ălyăhud s-itawănna "Idărfan", ĕntăneḍ d-iyyăḍ dd-falnen Qĕrwan d-Iskăndĕrya d-tajiwen ti n-Silisi d-ti n-Azya, ad-tamăzaɣăn d-Stifan, 10măšan indăr-asăn ad-t-siḍĕwĕn dăɣ-măjrăd făl tihusay n-sărho wa t-ikfa Unfas Šăddijăn. 11Ǝglăn, ĕžžĕnšăn imawăn n-ăddinăt iyyăḍ i-ad-t-sĕḍlĕmăn, ĕnnăn, ĕslan-asăn har ăskafar, innă daɣ a lăbasăn făll-ănnăbi Mosa d-Măssinăɣ. 12Ǝntăjăn-dd s-a-wen-dăɣ tamĕtte d-imizărăn-net d-ălɣulam n-Ăṭṭăwrăt. Wăla a hin-ijrăh Stifan a-s fălla-s oḍăn ăddinăt, ĕwwăyăn-t s-kăl-Sinhidrin wi n-imizărăn n-kăl-Ălyăhud ɣattăsnen ăššăreɣa. 13Ăwwăyăn-dd daɣ tijuhawen n-bahu ĕnnănen: "Ăhalĕs-i-dăɣ, wăr kăla okăy ašăl d-wăr-innă a lăbasăn făl ehăn n-Măssinăɣ wa šăddijăn d-alămăr wa n-Mosa." 14Tĕhhaḍăn, jannen: "Ijmaḍ-t ăššăk a-s nĕsl'-as har innă a-s ilkam, ad-ărẓ Ɣisa wa n-Năṣirăt ehăn n-ămudd wa măqqărăn, isĕmmĕskĕl ălɣadatăn wi hanăɣ-dd-oyya ănnăbi Mosa." 15Iqqăl-dd ălžămaɣăt iket-net ăsibălalăɣ dăɣ-Stifan, iqqăl-dd săr-săn a-s ănjălos a dăɣ-ĕkyadăn făl tihusay-i-dăɣ dd-ija idĕm-net.

will be added

X\